La intolerable actitú de despreciu de Duro Felguera con Llangréu.

Nes últimes selmanes y meses, Duro Felguera ta poniendo en práutica una política agresiva que lleva al desmantelamientu de la empresa felguerina del nuesu conceyu, anque paez ser que munchos axentes coleutivos del conceyu y d'Asturies inoren la situación por completu. L'anuncia de Duro Felguera d'abandonar Llangréu d'una forma progresiva yá ye un fechu, destinando plantiya que trabaya nel conceyu a otres poblaciones o despidiendo a trabayadores críticos cola política de la empresa y l'actitú pasiva y collaboracionista de ciertos seutores sindicales, claudicantes énte l'abandonu, más que posible, de la empresa llangreana del nuesu conceyu.


Dende Conceyu Abiertu por Llangréu creemos que debemos manifestanos una vegada más nesti sen y amosar públicamente la nuesa indignación. Creemos que ye intolerable que Duro Felguera quiera abandonar Llangréu depués de tantísimes décades d'esplotar los recursos humanos y naturales del Conceyu de Llangréu. Munches xeneraciones de llangreanos entregaron a esta empresa, que ñació en La Felguera, años de dedicación, los meyores años de la so vida. La clas trabayadora llangreana fizo que güei Duro Felguera seya una multinacional de gran poder económicu, el mugor de los nuesos paisanos foi quien encumbró a la empresa a un llugar cimeru. Agora, DF toma'l determín d'abandonar Lllangréu cuando-y debe tanto a esti conceyu.


Les persones que participamos na iniciativa Conceyu Abiertu por Llangréu pidimos la readmisión del trabayador despedíu nel Taller de Barros de DF darréu. Caltenemos qu'esti despidu respuende a una dinámica de lliquidación de los seutores críticos qu'hai dientru la empresa trabayando. Lo que quieren los xefes de Duro Felguera ye eliminar les voces crítiques y facer más cenciellu'l camín del desmantelamientu de los sos talleres en Llangréu y n'Asturies. Esta política miserable y déspota tien un fiel cómpliz nel Ayuntamientu de Llangréu, que nun diz nada sobre la situación y el desafíu empobináu por DF a la vecindá de Llangréu. Dende Conceyu Abiertu por Llangréu llamamos a los habitantes de Llangréu a planta-y cara a Duro Felguera na so intención de desmantelar la industria en Llangréu y llamamos a toles asociaciones del conceyu a pidir responsabilidá a la empresa col conceyu que la vio ñacer.


¡Non al desmantelamientu de Duro Felguera en Llangréu!


¡Despedíu de DF Barros readmisión!