viernes, 14 de septiembre de 2012

Conceyu Abiertu por Mieres solidarizase colos trabayadores de Starglass y Construcciones Urueña

Dende l'agrupación vecinal Conceyu Abiertu por Mieres queremos tresmitir de forma pública la nuesa solidaridá colos trabayadores de les empreses Starglass y Construcciones Urueña, la primera asitiada nel Polígonu de Sovilla y la segunda nel Valle de Turón. Nestes empreses tan viviéndose importantes conflictos llaborales.

La direición de la empresa Starglass, arreyada a Rioglass, decidió fai unes selmanes recortar los salarios a los y les trabayadores de la planta pesie obtener grandes beneficios dicha empresa. Esti recorte afeuta al total de la plantiya, sacantes la direición. Los trabayadores lleven cuatru xornaes de fuelga yá, con un respaldu total, pero la direición entá nun quixo escuchar al coleutivu trabayador. Si l'actitú de los empresarios de Starglass nun cambia los trabayadores apararán la produición 54 xornaes hasta finales d'añu. Pel momentu la direición nun abandona'l so determín nin quier escuchar a los trabayadores.

Pel so llau, la situación na empresa Construcciones Metáliques Urueña ye diferente pero non menos grave. La direición de Urueña ta imcumpliendo dende hai meses col Espediente de Regulación d'Empléu que vien aplicando la empresa dende entamos d'añu. El paru d'estos trabayadores, que ronden la trenteta, fina n'ochobre y l'ERE va continuar hasta'l 31 d'aviente pero la empresa debe yá nómina d'abril y bona parte de les pagues extres. Los trabayadores ya aniciaron distintes movilizaciones pa visibilizar el so conflictu y presionar a la empresa. Señalar tamién qu'esta ye una empresa más de les que fueron empobinaes con Fondos Mineros al traviés d'HUNOSA y les instituciones que fracasa. Cada día ye más evidente los chanchullos y la corrupción que se dió y que ta dando con estos fondos públicos y cola "reconversión y reindustrialización".

Pa finar, dende Conceyu Abiertu por Mieres simplemente queremos amosar la nuesa más sincera y fonda solidaridá con estos trabayadores en llucha y llamar a los vecinos y vecines del Conceyu de Mieres a demosar tamién de forma activa esa solidaridá. Tamién prestarianos que l'Ayuntamientu de Mieres, col gobiernu llocal al frenti, tuviera una posición más fuerte coles direiciones d'estes empreses y apoyara a los trabayadores. Animamos a los y les trabayadores de Mieres a movilizase pol futuru y la dignidá del Pueblu Trabayador y llamamos a la cordura a les direiciones de les empreses pa qu'escuchen les reclamaciones xustes de los trabayadores.

Fonte: www.conceyuabiertu.org

Entrevista a Marín de CSI Mineria pol so viaxe a Brasil


A invitación del sindicatu Brasileiru CSP-Conlutas (Central Sindical e Popular), José González Marín, militante de la CSI, foi a Brasil pa participar nuna serie d’actos, congresos y movilizaciones, asina como pa desplicar el conflictu mineru n’Asturies, les sos carauteristiques y la visión de la CSI de dichu conflictu.

Una vez ellí, Marín foi un de los impulsores de la Declaración Internacional de Repudíu a la Masacre de Sudáfrica y participó na entrega del manifiestu na embaxada sudafricana en Brasil.