Conceyu Abiertu por Mieres ante la retirada de los cubos de basoria per parte l’Ayuntamientu

El prósimu 8 d’ochobre, gracies a una decisión unilateral del Gobiernu d’IU-LV nel Conceyu de Mieres, entrará en vigor la supresión del serviciu de recoyía de basoria en cubos. Poro, de magar l’8 d’ochobre van retirase estos cubos y les bolses de basoria depositaranse en mediu la cai. Según l’Ayuntamientu esta midía permitirá aforrar 500.000 euros y los cubos permanecerán siempres y cuando les comunidaes de vecinos asuman de forma individual y privada’l desembolsu de siguir col serviciu, cosa que nun pasará, salvo d’una forma marxinal.

Dende Conceyu Abiertu por Mieres queremos manifestar tres idees básiques al rodiu d’esti nuevu recorte del gobiernu local nun serviciu públicu:

-Esta decisión del gobiernu d’Anibal Vázquez torna afeutar a tolos vecinos del conceyu. Llevamos un supuestu aforru de 4,5 millones d’euros públicos cola fin de dir finando cola delda municipal, pero ciertamente entá nun vimos qu’estos recortes afeutaran a servicios mui específicos, prescindibles daveres o que toquen los intereses de quienes xeneraron la delda. Queremos recordar que la delda municipal nun foi creada polos trabayadores, sinon por políticos, corruptos, especuladores y otros personaxes con nomes y apellíos que nun cargaron cola responsabilidá. Hai de señalar que’l dinero qu’ingresen conceyales y/o grupos políticos municipales siguen siendo’l mesmu, ehí nun recortaron.

- Nel so día, cuando s’afitó el serviciu de cubos na recoyía basoria, les tases nos impuestos municipales pa esti serviciu aumentaron, y los vecinos del conceyu tuvieron que pagar más. Dende Conceyu Abiertu por Mieres atalantamos que nel momento que retiren el serviciu tendrán de baxar a tolos vecinos tamién el dinero que han de dar a esti serviciu mediante los impuestos municipales. De lo contrariu los y les mierenses taríen pagando por un serviciu inesistente, yá retiráu.

- Dende’l gobiernu local manifiesten que la midía ayudará aforrar 500.000 euros añales. Desconfiamos d’estes declaraciones, paeznos una cifra desaxerada y que solo podría averase al aforru d’esa cifra nel casu que señalamos anteriormente: que l’Ayuntamientu retire’l serviciu pero que los vecinos sigan pagando por él. De toles formes a eso nun podemos llamalo aforru, sinon estafar a la xente.

Pa finar, simplemente, dicir que dende Conceyu Abiertu por Mieres amás nun podemos tolerar esta midía por otra razón bien cenciella pero de vital importancia tamién. Constitui un retroceso ensín precedentes nel serviciu municipal de recoyía de basoríes, con un deterioru manifiestu na calidá’l serviciu. Tamién queremos llamar a los vecinos y vecines del conceyu a rebelase escontra esti tipu de midíes antipopulares y que resten calidá a los servicios públicos.

 

FONTE: www.conceyuabiertu.org

Conceyu Abiertu por Llangréu desixe la reapertura de les piscines de Riañu y Pénjamo

Una vegada más, dende Conceyu Abiertu por Llangréu queremos pidir responsabilidá y sentíu común al gobiernu llocal y al Principáu, dambes instituciones gobernaes pol PSOE, pa que lleguen a un alcuerdu xustu, eficaz y rápida de cara a reabrir les piscines de Pénjamo y Riañu. Tamos nun escenariu de supuesta negociación alredor d'esti tema pero nun vemos frutos nin novedaes mentantu los únicos danificaos son los vecinos y vecines del Conceyu de Llangréu.

Pero otru llau, l'escandalosu casu de les piscines municipales de Llangréu fai espeyar como les institiciones non siempres son opaques y zarraes a la presión ciudadana, y munches vegaes, gracies a la presión masiva de los vecinos y vecines, ceden y lleguen a plantegar soluciones y negociaciones cola fin de contentar a la vecindá, pesie al cálter autoritariu y pocu democráticu del sistema y del partíu PSOE. Asina, saludamos la iniciativa ciudadana y la so presión y felicitamos a los llangreanos por facer que la reapertura de les piscines municipales tea agora mesmu muncho más cerca.

Pa finar, queremos felicitar más espresamente a la "Plataforma pro piscinas Langreo", pola iniciativa de facer d'esta reivindicación dalgo organizáu y con trescendencia. Esta plataforma, con presencia nes redes sociales, ta moviendo fueyes de firmes pa la reapertura de les piscines polos nuesos pueblos y amás tamién ufre la posibilidá a los vecinos de firmar on-line. Dende Conceyu Abiertu por Llangréu animamos a la xente a firmar por esta causa. Queremos dar la norabona a toles iniciatives vecinales que puxen por un Llangréu y una Asturies meyores.

¡Reapertura de les piscines de Pénjamo y Riañu yá!

 

FONTE: www.conceyuabiertu.org