viernes, 7 de septiembre de 2012

Nesti 8 de setiembre: ESBORRIEMOS MITOS, CONQUISTEMOS REALIDAES.

L’8 setiembre ye’l Día d’Asturies, un día nel que les persones comprometíes col país salimos a la cai a reclamar un futuru que tan robando demientres el gobiernín va de romería a ver a la santina. Esti 8 de setiembre, dende la mocedá Darréu camentamos que n’Asturies nun hai anguañu nada que cellebrar y nun podemos atalantar que’l gobiernu de Javier Fdez marche pa Cuadonga a folclorizar esti día.
 
La situación global ta perclara yá: cola escusa de la crisis capitalista los que la crearon tan enriqueciéndose como nunca mentantu los trabayadores cada día tamos más na miseria y la probitú. La crisis ye en realidá una estafa, cada día más xente abre los güeyos énte esta realidá. Dende Darréu tenemos claro que lo que ta pasando ye normal, yá qu’esti sistema neolliberal nel que vivimos atiende namás a los intereses d’una minoría enriquecía y privilexada.
Al empar, la situación n’Asturies agravase ainda más, yá que dende hai décades el nuesu país vive una crisis estructural y permanente que data yá de los primeros años de la reconversión: emigración forciada, altu paru xuvenil, desmantelamientu económicu, espoliu enerxéticu… resultáu de vivir baxo un sistema socioeconómicu que s’afita nel espoliu y la esplotación pero también de les imposiciones del Reinu d’España, alloñaes de les necesidaes de los y les asturianos/es, imposiciones qu’inora y llexitimiza’l gobiernu del Principáu de turnu. Poro, dende Darréu atalantamos que la situación d’Asturies ye incaltenible dafechu y que los enemigos a baltiar principalmente son dos si queremos vivir nuna Asturies digna y xusta: l’Estáu Español y el sistema capitalista.
Énte esta doble problemática y esta doble opresión nós tamién vemos como superación d’esta crisis d’Asturies una doble solución. La soberanía política y económica d’Asturies como nación que ye. Entendemos que nun mundu tan globalizáu y onde l’imperialismu capitalista tien una rede estructural tan grande con instrumentos como la OTAN, la Unión Europea o’l Fondo Monetariu Internacional ye necesariu que’l nuesu pueblu conquiste la so soberanía política nacional pero tamién la soberanía económica. Solo puxando pola soberanía d’Asturies y de los pueblos podremos dir faciendo contra-poder al capitalismu y dir creando nos nuesos pueblos una alternativa xusta, llibre y soberana al capitalismu español y global.
Asina pues, pidimos esborriar los mitos qu’amarren Asturies dende hai tantos años empobinaos pol españolismu y conquistar realidaes, como que somos una nación estremada con drechu a decidir y vivimos una crisis socioeconómica y política con munches peculiaridaes de la que tenemos que salir pola izquierda. Nesti sen, la implicación de los xóvenes d’Asturies ye fundamental pa construyir la unidá popular que nos permita avanzar nesi sen. Asina, nesti 8 de setiembre dende Darréu pidimos una vegada más pa garantizar el futuru’l nuesu pueblu’l drechu a decidir, desixiendo l’autodetermín y puxando pol socialismu como alternativa a un sistema capitalista que nun atiende yá a razones humanitaries nin étiques pa siguir calteniéndose en pie.
¡PUXA ASTURIES LLIBRE Y SOCIALISTA!
 
Fonte: www.darreu.org