Conceyu Abiertu por Samartín, Mieres y Llangréu sofitarán la fuelga xeneral del 18 de Xunu

Los conceyos de la organización nes cuenques mineres faen un llamamientu conxuntu a la llucha.

Les organizaciones de Conceyu Abiertu nos conceyos de Samartín, Mieres y Llangréu vienen d'asoleyar un comunicáu nel qu'anuncien el so sofitu a la fuelga xeneral que se desendolcará nel cuenques mineres el prósimu llunes 18 de xunu, asina como denuncien la xabaz represión policial durante les protestes de les caberes selmanes. Darréu apurrimos el comunicáu completu:

"La militancia de Conceyu Abiertu nos municipios de Samartín del Rei Aurelio, Mieres y Llangréu quier amosar de mena conxunta el so sofitu decidíu y absolutu a la convocatoria de fuelga xeneral nes cuenques mineres que tendrá llugar esti llunes 18 de Xunu, en defensa del seutor del carbón, amenazáu de pieslle polos recortes de fondos que’l gobiernu estatal quier aplicar pa esta estaya económica y llaboral clave e indispensable nel presente y futuru cercanu de les zones mineres, asina como d’Asturies nel so conxuntu, y ye que camentamos qu’esti conflictu ye de tolos y toles asturianes, debío a que les consecuencies direutes ya indireutes del posible zarru de la minería sedríen bien penoses pa tol país.

Poro, animamos a los asturianos y asturianes asitiaes fuera de les cuenques, a que sofiten la xornada de llucha convocada pal restu’l país, como manera d’amosar apoyu al coleutivu mineru, amás d’amosar a les élites polítiques, económiques y sociales del estáu que la clas obrera asturiana nun va a tolerar una agresión de tales proporciones a los sos drechos y condiciones de vida.

Tamién queremos denunciar la descomanada presencia policial desplegada en toa Asturies, tantu d’efeutivos de la “Policía Nacional” como de la “Guardia Civil”, que tan desplegando nel nuesu país a les sos fuercies d’élite, tresportaes dende otros llugares del estáu pa ocupar Asturies, reprimir duramente les lluches sociales y llaborales, y amedrentar a la población que les sofita, dexando nidio una vegada más el so calter de mercenarios al serviciu de les oligarquíes que dirixen el nuesu destín. Ye por ello que facemos un llamamientu p’aparar la represión exercida polos policíes, de la mesma mena que camentamos que, de nun ser asina, el pueblu asturianu ta nel so llexítimu drechu de defendese mediante los medios que considere afayaízos.

En definitiva, Conceyu Abiertu por Samartín, Mieres y Llangréu asoleyamos la nuesa solidaridá y sofitu incondicional pa colos mineros na so llucha pol futuru de los nuesos conceyos, asina como llamamos a la ciudadanía a participar na convocatoria de fuelga xeneral pa esti llunes 18 de Xunu, amás de na xornada de llucha pal restu d’Asturies."

Estrayíu d'infoasturies

DARRÉU llama a la movilización permanente en les cuenques y n'Asturies

Dende la organización de mocedá soberanista y revolucionaria Darréu queremos tresmitir la nuesa postura al rodiu de les convocatories que tamos teniendo en les cuenques y n'Asturies demientres estes selmanes y la creciente situación de conflictividá:

• Sofitamos la fuelga xeneral en les cuenques convocada pa esti llunes 18 y atalantamos que ye necesaria yá una fuelga xeneral nel conxuntu'l país asturianu col calter indefiníu y combativu, yá que ye un erru parcializar la situación o sectorializala, tando en xuegu'l conxuntu del texíu industrial asturianu y les nueses espectatives de futuru como país.

• Darréu ye una organización de mocedá y dende la nuesa perspectiva creemos que ye la hora de que les moces y los mozos de les cuenques y d'Asturies dean un pasu alantre y emprendan una dinámica de movilización activa, combativa y dende espacios y frentes de llucha ayenos a los intereses del Estáu Español y el capital. La mocedá va ser la más perxudicada nesti desmantelamientu industrial y de drechos. El nuesu futuru pinta escuru y ye polo tanto importante nesti sen la llucha de la mocedá pa tornar la situación.

• Magar d'esti prósimu llunes, camentamos que nun se tien d'aparar nada, sinón siguir n'aumentu la escalada de movilización y llucha nes cais y nos espacios propios, yá que nel ámbetu institucional nun podemos esperar nada, tando'l mesmu remanáu y controláu pol neolliberalismu español. La posición chulesca y prepotente del PP o la hipocresía del PSOE nesti conflictu amuesen esti control total de la supuesta “democracia”. Son dambos partíos les cares d'una mesma moneda, la del capitalismu español y l'inmovilismu políticu y social.

• Asina, dende Darréu sofitamos toles movilizaciones de tolos trabayadores en griesca pol so puestu de trabayu y llamamos a la mocedá asturiano a espresar la so solidaridá activa. Otra vuelta, Darréu reclama la soberanía política y económica d'Asturies como nación pa poder construyir una braera democracia popular nesti país, garante d'un sistema socioeconómicu y políticu xustu y al serviciu del Pueblu Trabayador, non de les grandes élites del capital. Solo saliendo de les estructures del capital podremos construyir la alternativa al capitalismu que conderga'l futuru de los pueblos y los trabayadores.

¡PUXA LA LLUCHA DEL PUEBLU TRABAYADOR ASTURIANU!

¡MOCEDÁ LLUCHA POL TO FUTURU!

¡PUXA ASTURIES LLIBRE Y SOCIALISTA!