El paru convocáu esti martes en toles etapes de la enseñanza pública, dende
Infantil a la universidá, tuvo un siguimientu superior al 80 por cientu
n’Asturies, según los sindicatos. El Gobiernu estatal sitúa’l paru nun 40 por
cientu.
"Esisten centros nos que se contabilizó un 100 por cien de
siguimientu, como l'Atalía o la Escuela Infantil de José Zorrilla, en Xixón, el
Colexu Públicu de Panes, los centros de Carriona o Villalegre (Avilés), el Jesús
Neira (La Pola Ḷḷena), Centru d'Educación Básica (Cabanaquinta), el Poeta Antón
o'l San Félix (Candás), o'l Jesús Álvarez Valdés n'El Franco”, señaló Luis
Fernández, responsable de la Federación d'Enseñanza de Comisiones Obreres, ún de
los sindicatos convocantes, que tamién afirmo que la fuelga ta contando con un
fuerte apoyu social por parte de los alumnos y alumnes, que nun acudieron nun 90
por cientu a les clases. Estos datos convierten a Asturies, xunto con Aragón y
Navarra, nel país onde más siguimientu tuvo la xornada de fuelga de
güei.
Los datos que manexa’l Gobiernu estatal son, por contra, mui
diferentes. Según l’Executivu de Mariano Rajoy, el paru tuvo un sofitu del 40
por cientu, perriba de la media, situada nun 19,41 por
cientu.
Marcha multitudinaria per Uviéu La
manifestación convocada pa esta tarde n’Uviéu polos sindicatos educativos ANPE,
CC OO, UXT, CSI-F y SUATEA tuvo un participación mui alta. Según los datos
manexaos poles centrales, participaron na marcha en protesta polos recortes na
educación pública alredor de 15.000 persones. Mentes, la Policía cifra
l’asistencia en dalgo más de 7.000 ciudadanos.
Na semeya, un momentu
de la protesta celebrada a primer hora de la mañana frente a la Xunta Xeneral
coincidiendo cola primer sesión del Plenu d'Investidura.
FONTE: ASTURIES.COM
