lunes, 30 de abril de 2012

Sobre la Biblioteca Dixital

Magar d'agora, los documentos que taben y tarán asitiaos na nuesa Biblioteca Dixital camuden de sirvidor y pasen de RapidShare a GoogleDocs. Les razones son delles, RapidShare esborria documentos si nun pases a la cuenta de pagu y nun permite ver los documentos de forma direuta.

Agora, el llector podrá esfrutar de los documentos de la Biblioteca ensín tener necesidá de baxalos, anque de toles formes encamiéntase facelo pa una mayor visibilidá de los mesmos. Pa descargar los documentos nesti nuevu formatu hai que calcar enriba los enllaces de la biblioteca p'abrilos, una vegada visibles la opción de descarga pues atopala arriba a la manzorga de la ventana.

Comentar de nuevu que siguimos abiertxs a aida, polo que si quies tornar y/o dixitalizar daqué a la nuesa llingua o encamentanos dalguna obra pa la nuesa biblioteca pues facelo unviando un corréu lleutrónicu al nuesu e-mail  frayandocadenes@gmail.com

Manifiestu de Darréu ente'l Primeru de Mayu

Otru primeru de mayu más, y otru añu más nel que les agresiones del capitalismu siguen golpiando al Pueblu Trabayador Asturianu. La situación de la mocedá d'esti país ye pergrave, con una emigración forciada, un paru xuvenil y una precariedá que medren de forma acelerada y que faen que'l futuru nesti estáu de les coses seya ca vuelta más escuru. La Educación Pública Asturiana ta entamando a ser desmantelada poles imposiciones del Gobiernu d'España de Rajoy, al igual que la sanidá. La llexislación tórnase entá más represiva y los drechos de la ciudadanía van desapaeciendo pasu ente pasu, amosando esti fechu la situación pre-democrática na que tábemos enantes y na que siguimos, pa pior. L'Estáu Español quita la mazcara y col tiempu va quedando n'evidencia, amosando que la supuesta “transición democrática” foi continuismu franquista reformáu.
La situación empiora, la crisis del capital golpía fuerte y la represión medra, pero nun debemos escaecer que la crisis ye un gran negociu y una escusa pa la burguesía española, yá tea asitiada en Madrí o n'Asturies, pa finar col anterior réxime de drechos y llibertáes, yá de por sí mui restrinxíu. Mentantu la mocedá nun ve futuru, los ricos siguen atropando multimillonarios beneficios, eso si, altravíes de la esplotación y la precariedá que sofre'l trabayador o la trabayadora.
La solución nun ye confiar nos analistes de salón y sofá que falen en términos neolliberales d'una posible solución, llamando al sacrificiu y a la paz social. El sistema capitalista tien estes crisis económiques de forma periódica y Asturies, que carez una crisis permanente dende los tiempos de la supuesta “reconversión”, sigue en manes de sucursalistes y llacayos del españolismu capitalista. Dende Darréu atalantamos que la solución a esta situación ye construyir una alternativa d'unidá popular, asturiana y revolucionaria, que puxe pola soberanía económica y política d'Asturies.
Asturies solo tien un camín pa salvase: caminar haza la conciencia nacional y la conciencia de clase. Les relaciones ente l'Estáu Español y el nuesu país son propies del colonialismu y la sumisión d'Asturies a esa ferramienta del capital que ye España ye total. Pa construyir una alternativa al capitalismu tenemos que lluchar pola soberanía nacional d'Asturies, solo asina podremos salir de les estructures del poder como la XE o la OTAN y construyir un sistema políticu y económicu basáu na xusticia social, na independencia, na democracia popular y na estabilidá económica y política.
¡Non a los retayos sociales! ¡Non a la privatización de la Educación! ¡Abaxu la Reforma Llaboral!
¡Puxa'l 1u de Mayu! ¡Puxa la clase trabayadora! ¡Puxa Asturies socialista y dixebrá!
Por otru llau dende Darréu queremos convidar a la sociedá asturiana a la espicha entamada xunto con Andecha Astur nel Llar l'Ayalga de Xixón sitiau na Cai Prendes Pando,asina como a la manifestación entamada pol sindicatu de clas asturianu CSI que saldrá de la Plaza L'humedal de Xixón a les 12:00 hores.

CSI, CXT y Suatea convoquen en Xixón pa «resistir, lluchar, avanzar»

La Corriente Sindical d’Izquierda (CSI), CXT y Suatea celebren el Primeru de Mayu en Xixón. Ta convocada una manifestación a les 12 hores, na plaza L’Humedal, col eslogan de Resistir, lluchar, avanzar. Nella llamen a tolos trabayadores a denunciar la política del Gobiernu de Rajoy, que ta afondando «na cris-estafa na que llevamos metíos dende hai dellos años».

Los convocantes ponen como exemplu d’esa realidá qu’obliga a la movilización «los rescates millonarios a la banca, el fraude fiscal, la economía sumida, l’acosu y derribu de la sanidá, la educación y los servicios sociales públicos, l’aumentu de la probitú severa, el paru esbocáu o l’ataque fulminante a los derechos de los y les trabayadores que supón la reforma llaboral».

Les cifres de paraos y les implicaciones sociales qu’eso supón lleven a que l’actuación nes empreses y centros de trabayu de los sindicatos, a xuiciu de los convocantes, «tien que ser d’una firmeza estraordinaria; tenemos que defender, a toa costa, cada puestu trabayu. Y a ello tenemos que xuntar la llucha de los que yá nun tienen trabayu y de los que, anque trabayen, reciben un sueldu de miseria». A esa situación esplosiva, denuncien, el Gobiernu estatal ta respondiendo «con una escalada escomanada de la represión, na que la brutalidá policial, les detenciones arbitraries y la proliferación de fuertes sanciones económiques ensin sentíu nengún, faen desapaecer na práctica tolos drechos y llibertaes ciudadanes. Nesi sen, la nueva normativa d’orden públicu anunciada pol Ministru l’Interior, va volvenos a tiempos pasaos, qu’enxamás pensábemos que podíen volver».

Fonte: Les Noticies

Andecha Astur apautase al manifestamientu convocáu pola CSI, CXT y SUATEA pal Primeru Mayu

Andecha Astur apautase al manifestamientu convocáu pola CSI, CXT y SUATEA pal prósimu martes 1 de mayu a les 12 hores na plaza L’Humedal de Xixón, y fai un llamamientu "al conxuntu del Pueblu Trabayaor Asturianu a que participe activamente". Arriendes d’ello, Andecha Astur amiesta "a les evidentes reclamaciones de xusticia social, la de SOBERANÍA, entantu qu’atalanta qu’ensin ella nun va ser posible superar la situación que carecemos anguañu", na que más de 35.000 families asturianes tienen a tolos miembros en paru, onde la media pensiones nun algama los 600 euros, más del 60% de la mocedá ta nel paru, y decenes de miles d’ellos vense obligaos a emigrar añu ente añu pa poder vivir.

Ello asina, Andecha Astur considera que "recuperar la capacidá del Pueblu Asturianu pa decidir llibremente’l so futuru costitúi el pegollu principal p’avanzar haza una sociedá llibre y socialista onde los recursos económicos, los medios de produición y el sistema xurídicu-políticu tea en función de los más de la sociedá asturiana". De magar el manifestamientu, Andecha Astur cellebrará una espicha nel Llar d’Andecha (Prendes Pando 11 baxu. Xixón)

Conferencia sobre los archivos del Conseyu Soberanu

Güei en Xixón.


El Clú La Nueva España de Xixón entama una charra entitulada "¿Dónde están los documentos del Consejo Soberano de Asturias y León?" na que Rafael Fernández Tomás, nietu del hestóricu dirixente obreru asturianu Belarmino Tomás, falará d'estos aprosimadamente 60.000 documentos qu'anguaño s'atopen en Ferrol, y que según defiende Fernández Tomás deberíen asitiase en territoriu asturianu, llugar al que pertenecen de mena llexítima.

La conferencia cuntará cola presentación de Mariu Arbesú, miembru de coleutivos políticos como Andecha Astur y Conceyu Abiertu, y tendrá entamu a les 20 hores de la tarde nel Clú La Nueva España de Xixón.

Fonte: Infoasturies.net

Sofitu denuncia un nuevu casu de represión

Piden 4 años de prisión por supuestamente "agredir" a Tini Areces.

Dende Sofitu acaben d'informar y denunciar les posibles consecuencies d'un nuevu casu de represión qu'entamaría'l 9 de xunetu del 2010. Según despliquen, "Esi día nel actu de refuga entamáu nel recibimientu al Tren Negru na estación de Xixón, la policía española detién, por órdenes direutes de Tini Areces (Presidente del Principáu d'aquella), a una moza independentista por "supuestamente " habelu agredío".

Según amesten, "Con violencia, la policía azótala al suelu rompiéndo-y les ropes que llavaba pa esposala y treslladala a comisaría. Ante les pretestes de la xente ellí aconceyao, la policía carga y otra muyer ye denunciada por supuéstamente da-y un taragañu nun deu a un policía, ensin que nel informe mélicu apaeza mancaura tala.
Al día siguiente la prensa oficial asoleya datos y semeya de la moza detenía ensin respetar dengún de los sos drechos, amuesando una vegada más la impunidá cola que, tanto prensa como policía trabaya nestos casos"
.

El casu nun fina ehí, y ye que tal como informen dende l'organismu antirrepresivu, "Cuasi dos años dempués la fiscalía pide 4 y 1 añu de prisión pa cada una acusándoles d'unos presuntos delitos de atentáu a l'autoridá. por estos fechos sedrán xulgaes el prósimu 3 de mayu nos xulgaos de poniente de xixón a les 10:30 hores".

Sofitu quier denunciar "que denguna d'estes dos agresiones asocedieron, que nun hubo más agresión que la de la policía escontra los qu'ellí se manifestaben pa protestar pola violencia política, económica y cultural que'l gobiernu de turnu del PSOE taba exerciendo escontra'l nuesu pueblu".

Poro, faen "un llamamientu pa solidarizase coles represaliaes y denunciar esti nuevu casu de persecución política".

Fonte: Infoasturies.net

sábado, 28 de abril de 2012

Primeru de mayu n'Asturies

El prósimu martes 1 de mayu cellébrase n'Asturies, y en tol mundiu, el Día Internacional de los Trabayadores, día del proletariáu internacional. Esi día habrá nel mundiu una montonera de movilizaciones y convocatories pol socialismu, pola dignidá de los y les trabayadores, la soberanía nacional y la democracia popular. En definitiva, en tol mundiu'l prósimu martes habrá en tolos países miles de voces glayando escontra l'actual dictadura del capitalismu, que ellí per onde pasa arrasa con miseria, desigualdá, represión ya individualismu xenocida.

N'Asturies la situación ye bien conocía, el capitalismu manifiéstase con grandes proyeutos económicos de calter colonial manexaos dende la metrópoli Madrí. A nivel industrial, enerxéticu, residual... Asturies ye un país que tien una situación económica permurnia pero al empar sacrifica la so ñatura, fuercia de trabayu y productividá al serviciu del capitalismu españolista, ensín que dientru d'esi xuegu capitalista tea dengún beneficiu a cambeu d'esi sacrificiu.

Les muertes nel tayu siguen medrando, la patronal sigue cuntando les sos mentires y falacies de siempres y algamando cuotes de poder políticu mentantu nun paguen la crisis social y económica qu'ellos mesmos xeneraron y se faen más ricos y riques al travíes del yá tan sonáu "sacrificiu de toes y toos" del que nos fala'l sistema capitalista pa superar la so crisis. Lo más murnio ye que'l propiu Pueblu Trabayador entrá nel xuegu y acaba creyendo esos llamamientos lliberales al sacrificiu, qu'a la fin nun son más que recortes económicos y de drechos algamaos pola clas obrera y pa la clas obrera. Los pocos drechos sociales colos que podía movese'l pueblu tan siendo desmantelaos, amosando esti fechu lo feble de la supuesta democracia monárquica española.

Les burguesíes nacionales qu'hai nel Estáu en momentos d'auxe económicu ( pa elles) viendense meyor que nunca al españolismu, amosando que la burguesía nun tien patria y la burguesía española manexa al so antoxu tola parafernaria nacionalista española, somorguiando un puquiñin más a los pueblos/naciones del Estáu. El sistema capitalista sigui diendo de la man de la idea d'España, yá qu'esa idea ye una idea propia d'esi sistema lliberal qu'impunxieron valíendose d'esi nacionalismu, ente otres coses. La inoracia y el nivel cultural y educativu del Estáu Español (n'amenorgamientu por ciertu) faen que tol mundiu piénsese como español, un nuevu modelu d'interclasismu estúpidu, onde afiten una coleutividá que gana mundialinos de fúbol y na que toos piensen que son iguales.

Como vemos, España, ferramienta'l capital y el propiu sistema, gocien de bona salú pesie a la supuesta indignación xeneralizada qu'hai. Al mesmu tiempu, les clases populares conscientes de la braera situación n'Asturies siguen ensín una alternativa soberanista y de clas, el soberanismu asturianu sigui en crisis y el nacionalismu ca vegada va a fórmules más reformistes que polo visto en marzu nun-y valen de nada.

¿Qué facer?

Esti nun ye un analís posáu, ye un analis que probatiblemente seya consideráu como feble y pocu rigurosu pero camentamos qu'hai una riestra d'emerxencies que camentamos como necesariu mirar haza elles. El lleutor avezáu sabrá que siempres tamos diciendo lo mesmu, pero ye la realidá. Cualesquier país coles condiciones suxetives y oxetives que tien Asturies nesti momentu lliberose permediu d'un procesu d'emancipación social y nacional. La condición de colonia y d'esplotación y espoliu masivu capitalista faen qu'Asturies tea d'afondar na so construcción nacional, enfrentase col Estáu y trabayar sobre'l socialismu y pol socialismu.

Hai qu'amestar a la concenciación nacional el componente de clas y facer ver a la xente d'esti país qu'otra Asturies ye posible. Una Asturies fuera de les grandes estructures de poder de la oligarquía mundial y española con soberanía, independencia y xusticia social. Una Asturies non dependiente y que dea exemplu al mundiu de lo que ye una economía y un sistema políticu al serviciu de les persones y non de les plusvalies.

Namái hai que buscar la fórmula pa facer qu'Asturies seya de nuevu un referente pa la clas obrera mundial, pero da-y una vuelta de tuerca y amestar el componente nacional. Pa ello, ye pernecesariu desechar les ferramientes polítiques y sindicales qu'anguañu son mayoritaries n'Asturies y que furrulen col pasu los años como una mafia clientelar al serviciu del capitalismu español.

La independencia nacional d'Asturies va costar muncho, hai que crear la conciencia nacional pa lo que quiciabes haya qu'entamar a quitar dalgunos tabús, pero eso si, nunca dir a posiciones de nacionalismu reaccionariu, sinon de construcción nacional y social. Asturies tien de ser una barricada que nun pueda pasar el sistema d'esplotación del home pol home, y pa ello tien de llibrase del llastre imperialista español. Hai que construyir país, patria y nación, dende la izquierda y al empar semar socialismu, un socialismu revolucionariu qu'anguañu tien poca cabía dientru'l mesmu soberanismu, pues si bien fálase d'esa "independencia y socialismu", bien poca xente patriota propón una idea y una fueya de ruta p'algamar esi socialismu y diseñar esi socialismu. Pa qu'esto camude, la formación y la organización van ser claves pa superar l'actual estáu de les coses. Pel momentu, pasa a l'aición y movilizate col sindicalismu asturianu de clas esti prósimu 1u de mayu. Depués vendrá'l tiempu de los alderiques internos y la normalización d'un movimientu políticu asturianu y popular.

¡Puxa'l Primeru de Mayu!

¡Puxa'l Pueblu Trabayador!

¡Puxa Asturies!

La CSI solidarízase col Sindicatu Andaluz de Trabayadores

El gobiernu andaluz desaloxó la Finca Somonte, ocupada por trabayadores del SAT.

La Corriente Sindical d'Izquierda vien d'asoleyar un comunicáu en solidaridá pa col Sindicatu Andaluz de Trabayadores pol desaloxu de la Finca Somonte, propiedá de la Xunta d'Andalucía y que foi ocupada por mediu millar de trabayadores del sindicatu. Según desplica CSI, "Con esta ocupación, el SAT pretendía l’autoxestión de la tierra polos propios y propies trabayadores, pa crear el másimu emplegu y favorecer el desendolque la economía llocal y comarcal".

Tal como informa la Corriente, "El xueves 26 d’abril, el Gobiernu andaluz (PSOE-IU) unvió delles dotaciones de la Guardia Civil que, por orden de la Xunta d’Andalucía, desaloxaben a los y les trabayadores de la finca que yá taben cultivando".

Poro, "Delantre estos fechos, la Corriente Sindical d’Izquierda quier asoleyar la so solidaridá dafechu pa col Sindicatu Andaluz de Trabayadores, al empar que desixe al PSOE y a Izquierda Unida la vuelta atrás nesti allorie y que torne la finca de Somonte a los y les trabayadores del campu andaluz, que son los únicos y llexítimos dueños de la so tierra".

D'otra miente, ye de reseñar la llegada d'informaciones qu'afirmen qu'alrodiu d'ún cientu d'obreros y obreres tornaron a ocupar la finca na madrugada.

Fonte: Infoasturies.net

viernes, 27 de abril de 2012

Nuevos documentos na biblioteca.

La nuesa Biblioteca Dixital yá cunta con dos documentos más na so llista que podeis descargar en formatu pdf calcando nel títulu los mesmos. Per un llau presentamos un nuevu documentu d'Ho Chi Minh y el Partíu Comunista de Vietnam, entitulada Aiciones que "tienen de faese" y que "nun tienen de faese", onde s'afiten una riestra d'aiciones a considerar pa bien y mal, y onde se toma como básicu'l respetu a les cultures tradicionales de la cultura nacional vietnamita. Tamién nesi documentu surden cuestiones alredor de la posición nesi momentu respeutu a lo "místicu" y les creencies.

Per otru llau, podeis baxalos l'artículu de James Connolly entituláu ¿Antipatrióticu?, nel cual el llider marxista ya independentista irlandés reflexona sobre la llucha social y de clases y la so rellación con conflictu nacional n'Irlanda y fai un analis hestóricu de ciertes reivindicaciones sociales que fueron de la man de les nacionales propies del conflictu ente Irlanda y l'Imperiu Británicu.

Si quereis facer dalguna aportación a la biblioteca nun teneis más qu'unviar lo que vos pete al correu frayandocadenes@gmail.com

Mayu entama con convocatories perimportantes pal Pueblu Asturianu.

Esti mes de mayu, como tolos años, vien bien cargáu de convocatories y movilizaciones, dos de les cuales son siempres perimportantes. Per un llau, el prósimu martes ye 1 de mayu, Día de la Clas Trabayadora y pol otru'l vienres 4 de mayu ye'l Día de les Lletres Asturianes.

Asina, esti prósimu martes, 1u de mayu, los sindicatos asturianos de clas, CSI, SUATEA y CXT entamen la yá tradicional manifestación en Xixón. La convocatoria partirá de la céntrica Plaza L'Humedal xixoniega, a les 12:00 hores. Dende dichos sindicatos indiquen que sedrá una convocatoria col envís de baltiar la reforma llaboral, la represión y los recortes sociales. Esi mesmu día amás,cellebrando'l 1u de mayu, al finar la manifestación les organizaciones soberanistes y socialistes Andecha Astur y Darréu entamen una espicha popular nel Llar L'Ayalga de Xixón a les 14:30 hores.

Non menos importante ye la manifestación del prósimu vienres 4 de mayu. Na Estación del Norte d'Uviéu a les 19:30 hores escomencipiará la manifestación pola OFICIALIDÁ, entamada pola Xunta Pola Defensa de la Llingua Asturiana, manifestación que por desgracia repítese añu tres añu ensín que l'estatus xurídicu del idioma'l país camuda y siga la humildación pal nuesu pueblu asturianu, lo que conlleva la desapaición del bable o asturianu pali que pali.


Nun planu más institucional, esi mesmu vienres cellebrase'l XXXIII Día de les Lletres Asturianes, qu'entama como tolos años l'Academia de la Llingua Asturiana y qu'entama depués de la manifestación. Los actos del Día de les Lletres entamen a les 20:30 hores nel Teatru Filarmónica d'Uviéu y van consistir nuna riestra d'actuaciones musicales y lliteraries y nuna Xuntra Estraordinaria d'académicos.

¡Esti mayu movilízate! ¡Por Asturies, la nuesa cultura, los nuesos drechos, la soberanía y la xusticia social! ¡Puxa Asturies llibre y socialista!

jueves, 26 de abril de 2012

Comunicáu de la CSI alredor de la represión y el so ascensu.

Nun hai dubia de la desesperada situación económica pola que tan pasando millones de presones nel Estáu español. Despidos, pieslles d’empreses, paru, perda de viviendes, families arruinaes, probitú..., tan xenerando una riestra protestes sociales ca vegada más tenses.

La indignación ciudadana va xorreciendo cuandu se compreba la escesiva riqueza na que vive una minoría privilexada y la patente impunidá qu’arrodia a una corruición política y económica cada vuelta más xeneralizada.

 La esplosiva situación social que ta creándose, retrúcase dende’l Gobiernu con una escalada descomanada de la represión, na que la brutalidá policial, les detenciones arbitraries y la proliferación de fuertes sanciones económiques ensin sentíu nengún, faen desapaecer na práutica tolos drechos y llibertaes ciudadanes.

 Escenes de policíes apaleando a manifestantes pacíficos, inclusu menores d’edá, detenciones o encarcelamientos preventivos son yá tan normales, que nin siquier costituin una noticia.
Llegamos al puntu nel que la muerte d’un ciudadanu por impautu d’una pelota goma, corre’l riesgu d’acabar por considerase comu un acidente fortuítu.

 Nesi sen, la nueva normativa d’orde públicu anunciada pol Ministru l’Interior, na que, fasta les manifestaciones pacífiques pueden tener el mesmu tratamientu que los actos terroristes, trespórtanos a tiempos pasaos, qu’enxamás pensábemos que podríen tornar.

 Y comu yera d’esperar, la CSI nun s’escapa d’esa represión. Identificaciones arbitraries, seguimientu y acosu policial a afiliaos y afiliaes o sanciones de fasta 30.000 euros, por coses tan “peligroses” comu facer pintaes, pegar cartelos, prender bengales o tener por una escalera, son los primeros pasos nuna política represiva que, ensin dubia, va dir endureciéndose col tiempu.

 Nesi sen, el pasáu 9 febreru, CSI, CXT y SUATEA convocaren una manifestación baxu’l lema “Nun ye una cris, ye una estafa”. Darréu d’ello, la delegación de Gobiernu vien de sancionar al Secretariu Xeneral de la CSI y al Secretariu d’Organización de la CXT, con multes de fasta 30.000 euros por “el despliegue d’una pancarta dende unos andamios, encendiendo dos bengales”, porque “dellos individuos encolingáronse nel edificiu de l’Ayalguería de la Seguranza Social”, por “la realización, pela parte de dellos individuos, de pintaes n’entidaes bancaries”, por llevar banderes “que pudieren utilizase comu obxetos contundentes” y “por nun tratar de torgar estos comportamientos”.
Asina mesmo, n’Avilés, la CSI lleva acumulaes delles multes por valir de 500 euros, pol cenciellu fechu de pegar cartelos.

 Y too eso ta asocediendo tamién con otres organizaciones y coleutivos sociales per tola xeografía asturiana. La represión yá ye xeneralizada y pue cayer enriba cualisquier presona que tea la ocurrencia de facer cualisquier tipu de protesta.

 Por embargu, el Gobiernu tien otra vara midir estremada cuandu, por exemplu, non sólo nun persigue los delitos de fraude fiscal o evasión d’impuestos, sinon qu’amnistíalos, prémialos y garantiza la impunidá de quienes cometen talos delitos.

 Los mesmos que nos quiten les melecines, nos piesllen hospitales, dexeneren la educación o desanicien los servicios sociales, nun dubien n’aumentar desaxeradamente’l presupuestu pa material antidisturbios y allánciense a una política represiva na que los y les trabayadores, que son les braeres víctimes de la cris, son trataos comu delincuentes cuandu salen a la cai col únicu oxetivu de pidir un trabayu y una forma de llevar el pan pa casa.

 Pero nada de too esto va torgar que la CSI siga dando una rempuesta decidida, cola firmeza y la contundencia que seyan necesaries pa echar la galga a tolos ataques que ta sufriendo la clas obrera.
Lo que ta entamando a pasar nel estáu español, nun ye de recibu. Nun tamos dimpuestos nin dimpuestes a permitir que cientos de miles de presones, orixinaries o inmigrantes, muerran a les puertes de los centros sanitarios nos que namás s’atienda a quienes tienen perres pa pagalo. Nun vamos permitir que, otra vuelta, namás que los ricos tean acesu a los estudios. Nun vamos permitir que les presones con necesidá d’atención social, acaben tiraes peles cais. Nun vamos permitir que too eso pase demientres banqueros, empresarios, especuladores y políticos corruptos amasen fortunes y nos traten comu si fuéremos mercancía d’usar y tirar.

 La represión nun va paranos y, sero o céu, quienes utilicen la violencia istitucional p’afogar les xustes reivindicaciones de los y les trabayadores, van tener que rendir cuentes por ello. 

La retirada del asturianu nos XIII Premios de la Crítica provoca la reaición d’escritores y coleutivos

L’Asociación d’Escritores d’Asturies retiró la categoría d’asturianu nos XIII Premios de la Crítica. Ello provocó la reaición d’escritores como Carlos Suari, que decidió devolver el gallardón que ganara nel 2009, y de dellos coleutivos.

La entrada del asturianu nestos premios fíxose nel añu 2002, cuando Roberto González-Quevedo llevó’l premiu a la meyor novela n’asturianu con ‘Pol sendeiro noite’. A partir d’esi momentu, tolos años hubo gallardones pa llibros escritos na llingua del país, hasta esta edición, na que la organización, al paecer por motivos económicos les poques candidatures que se presentaben, dexó fuera al asturianu. Esta situación provocó la reaición d’escritores y coleutivos de defensa del idioma, como la Xunta pola Defensa de la Llingua Asturiana (XDLA) y Iniciativa pol Asturianu. Asina, Carlos Suari, ganador del 2009 del premiu a la meyor poesía n’asturianu por ‘Orbayu d’alfileres’, decidió devolver el so premiu.

Nel so comunicáu, la XDLA aseguró que, con esta decisión, l’Asociación d’Escritores d’Asturies marxina a los lliteratos qu’utilicen el nuestru idioma como vehículu de creación” y pide la intervención de la Direición Xeneral de Política Llingüística –entidá que collabora colos Premios de la Critica– pa que “intermedie y solucione esti agraviu comparativu hacia los lliteratos qu’usen como ferramienta l’idioma del país”. D’igual forma, recuerda que nel 2011 espublizáronse n’Asturies más de cien obres n’asturianu y eloxa’l llabor de los escritores en llingua asturiana, a los que califica como “los meyores embaxadores de la nuesa cultura y lliteratura”.

Pela so parte, Iniciativa pol Asturianu califica la decisión de dexar fuera al asturianu d’estos gallardones de “una falta seria al idioma d’Asturies”. “Consideramos inalmisible tala decisión por ser un xestu dañible pa la llingua nuna situación tan drástica como na qu’anguaño s’atopa. Poro, pedimos a l’Asociación d’Escritores d’Asturies que rectifiquen esta decisión, calteniendo toles categoríes contemplaes nel pasáu, en pie d’igualdá colos escritores en castellanu”, apunten dende esti coleutivu, que tresmitió la so quexa a Mariano Arias Páramo, presidente de l’Asociación d’Escritores d’Asturies, y a la Conseyería de Cultura y Deporte.

Asturies.com

L'Alcalde "del 15M" mandó a parar

La Corriente Sindical d'Izquierda quier amosar la so más atayante refugu a los retayos económicu y llaboral que'l gobiernu d'IX va aplicar a la plantiya municipal.

Paeznos brutal quitar 1.300.000 € de la masa salarial, ente 400 trabayadores/as, p'amenorgar la delda que'l Conceyu contraxo. Paeznos inxustu que les trabayadores carguemos cola culpa de la nefasta xestión y l'espilfarru que llevaron a cabu los políticos mierenses, teniendo que ver amenorgaos una vegada más los nuesos salarios.

Paeznos inaceptable qu'IX nun pensara n'otres alternatives p'amenorgar el gastu y que se sumara ensin nenguna crítica a los mandatos de Rajoy realizando una campaña de descreitu de el trabayadores municipales, pero ensin dar nenguna esplicación política a les causes de la crisis, de la qu'ellos son tamién partes.

Y d'últimes paeznos INDECENTE qu'un gobiernu que se declara d'izquierdes, que públicamente se manifiesta en contra de la reforma llaboral, la vaya a aplicar d'una manera contundente na so plantiya. Por tou esto, negámonos a axustar col restu de sindicatos municipales, nenguna repartida de la miseria, nin nengún retayu de los salarios y condiciones de trabayu de los emplegaos municipales.

Preguntamos ¿ye en realidá una entelequia aspirar a qu'un partíu d'izquierdes faiga una política d'esquierdes? ¿para qué votamos?, ¿son les instituciones tal como les conocemos capaces de llevar a cabu les nueses aspiraciones como persones d'esquierdes? Por desgracia ta claro que non y l'exemplu más patente ye'l del gobiernu d'IX en Mieres.

Fonte: csi-asturies.org

miércoles, 25 de abril de 2012

Miles d'estudiantes asturianos/es pola Educación Pública.

Miles d'estudiantes salieron a la cai esti 25 d'abril acudiendo al llamáu de les Asamblees d'Estudiantes de la Universidá d'Uviéu escontra los recortes sociales y la privatización de la enseñanza. A les 12:00 h. taba convocada la manifestación que partía de la Plaza España d'Uviéu y finaría nel Edificiu Hestóricu de la Universidá d'Uviéu, onde anguañu ta'l Rectoráu.

Baxo'l llema "Pública nos la dexaron y pública vamos devolvela" los y les estudiantes percorrieron les cais qu'arrodien el Campu San Franciscu nun ambiente de reivindicación y al empar peranimáu, coles apaiciones del yá pernomáu SuperPública.

Les persones que participaron na convocatoria criticaron muncho la xuba xabaz de tases, el nuevu réxime de permanencia o l'amergamientu de les beques ente otres munches coses. L'añu pasáu ya hebo una convocatoria d'estes carauterístiques, pero paez ser que'l nivel de combatividá per parte l'estudiantáu va medrando, paralelamente tamién la violencia que ta exerciendo'l sistema capitalista en tolos ámbetos mediante l'aición represora y de desmantelamientu de drechos sociales qu'exerce l'Estáu Español.

Iniciativa pol Asturianu denuncia la difícil situación de los Servicios de Normalización Llingüística nes mancomunidaes

Iniciativa pol Asturianu amuesa'l so "fondu maltar" pola situación política na que s'alcuentren les mancomunidaes del país, como la Mancomunidá d'Avilés y, principalmente, la Mancomunidá del Cabu Peñes, onde la engarradiella ente'l PP y el PSOE pue afeutar a la continuidá del so Serviciu de Normalización Llingüística (SNL). De fechu, despliquen, el francimientu de dicha mancomunidá supondría que, polo menos, los gozoniegos quedaren privaos d'un serviciu que lleva furrulando dende 2004.


La inestabilidá que vienen encarando los SNL dende'l so entamu débense principalmente a dos factores, segun Iniciativa pol Asturianu:

1. La falta d'un conveniu ente'l Gobiernu del Principáu d'Asturies y los Conceyos, que faiga de los SNL un serviciu fixu del so organigrama. <!--[endif]-->

2. La falta de compromisu políticu y económicu, por parte del Principáu y de los Conceyos. Cola xida de la crisis, tán zarrándose servicios que yá teníen una partida presupuestaria alcordada, como ye'l casu de la Casa de la llingua de Corvera, el SNL de la Mancomunidá del Sueve y, agora, el SNL de la mancomunidá en Gozón.

Sicasí, "mientres zarren servicios y nun se fai nada por evitalo, anúnciase la creación d'otros nuevos n'Illas y Castrillón, lo que nun correspuende a un plan coherente de política llingüística. Estos conceyos pertenecen a la Mancomunidá d'Avilés, xunto col conceyu del mesmu nome y el de Corvera. Nes sos propuestes de coordinación de programes, falen d'oficines d'información a la mocedá, de consumu y de los telecentros, pero non de la normalización llingüística", denuncien.

Poro, dende Iniciativa pol Asturianu, esixen a diches mancomunidaes qu'igüen un plan pa que tolos conceyos que les formen puedan ser atendíos por un SNL.

Fonte: Infoasturies.net

martes, 24 de abril de 2012

Importante: mañana n'Uviéu


Anque nun seyas estudiante, sofita a los estudiantes de la Universidá d'Uviéu en llucha pola Educación Pública. La Universidá Pública ye una forma de lluchar por un futuru más xustu pa les nueses fies y fios, han de tener la oportunidá d'acceder a los estudios que-yos pete y la progresiva privatización de la universidá asturiana nun ye'l camín pa ello. ACUDE

La burguesía asturñola asoleya datos que meten mieu, como sedrán los de verdá...

1938 accidentes llaborales con baxa hasta Febreru según la FADE

Datos de la patronal asturiana.

La Federación Asturiana d'Empresarios asoleyó con motivu d'unes xornaes de prevención de riesgos llaborales y seguridá nel tayu los datos que manexen respeuto al númberu d'accidentes llaborales con baxa esistentes nel nuesu país durante los dos primeros meses del presente añu.

Asina, un total de 1938 trabayadores esperimentaron accidentes que derivaron en baxa llaboral, de los que'l 22,74% tuvieron llugar na industria manufacturera, el 13,3% na construcción y el 12,84% nes industries estractives.

Infoasturies.net

lunes, 23 de abril de 2012

¡Norabona al C.S.A. La Semiente!


¡ A siguir semando en L'Entregu y en Samartín! ¡ Que l'añu segundu sía inda meyor que'l primeru!

sábado, 21 de abril de 2012

¡ Non a la violación de los conceyos asturianos !


Mapa colos municipios del Estáu Español
El mapa qu'equí presentamos ye un mapa qu'inclúi los conceyos de tol Estáu dientru de cada autonomía. Como podemos agüeyar ensín muncha dificultá, los conceyos d'Asturies tienen una densidá poblacional y territorial muncho mayor que la media de los del restu l'Estáu. Esto, ente otres coses, respuende a una realidá hestórica, una realidá que nos diz la importancia de los conceyos como entidáes polítiques y decisoríes n'Asturies, la importancia de los conceyos na vertebración de la estructura territorial que conforma una nación estremada: Asturies.

Como podemos ver nel mapa, los conceyos nel nuesu país, dientru'l Principáu y fuera d'ellí, son territories muncho más grandes que la media de municipios del conxuntu estatal. Ye dicir, Asturies, en comparanza col restu l'Estáu tien unos conceyos o municipios con una estensión grande, frutu de la tradición territorial del país como dicimos. Esti mapa ye abondo ilustrativu a la hora de pensar lo que ta pasando n'Asturies.

UPyD, que dicía que nun diba dedicase al chantaxe en política nin a poner condiciones l'añu pasáu anguañu pon n'Asturies la condición d'entemecer conceyos nesti país pa dar el votu favoratible a una investidura u otra. UPyD quier desaniciar la estructura de conceyos tradicional d'Asturies, como quien se desprende d'un muérganu burocráticu inservible o d'un serviciu municipal que nun paga la pena caltener. Pa UPyD los nuesos conceyos nun sinifiquen un res, nun tienen valir, pa UPyD la estructura de separtación territorial qu'hai hebo y asperemos haya n'Asturies ye puxarra, igual que la llingua y otres tantes partes de la nuesa identidá popular y nacional.

Poro, encamentamos a los señores d'UPyD ( o a la señora d'UPyD, pues debe ser la única que decide) a revisar la so posición respeutu a los conceyos asturianos, enviendo que'l tamañu mediu de los mesmos ye muncho mayor n'Asturies en comparanza col Estáu y que ye una tradición que tien de ser respetada. Nun ye l'alderique esti, pero si queremos metenos dientru'l so xuegu deberíen tener precuru, pues fechos como'l qu'espeya la imaxe d'enriba pueden da-yos nel focicu. Señoritxs d'UPyD, el problema económicu d'Asturies nun son los conceyos, nin la solución ye entemecelos. La solución ye que xente como vustedes, que tarrecen Asturies, xunto con tolos poltroneros de la Xunta Xeneral colen d'esti país y dean pasu a les instituciones a la xente trabayadora y asturiana. El Pueblu Asturianu si que sabe valorar la so identidá y sabrá salir de la situación que carez Asturies, afondando na so soberanía política y económica. Lo demás, cuentos. Especialmente lxs señores d'UPyD deberíen de revisar el so papel n'Asturies, onde tienen un diputáu ensín tener dengún conceyal. ¿Quién son ellos, ensín conceyales, pa falar de lo qu'hai de facer nos conceyos?

¡Respetu pa los nuesos conceyos nacionales!

viernes, 20 de abril de 2012

Repsol ye España, y lo demás, petróleu conquistao

Nos caberos díes conocimos la noticia de que’l gobiernu arxentín va a recuperar el control de la petrolera YPF mediante la espropiación del 51% de les acciones de la compañía, anguaño nes manes de la multinacional Repsol que, curiosamente, y siguiendo un camín ximielgu al d’YPF, foi vendida pol estáu a preciu saldu con motivu del procesu de privatización d’empreses públiques desendolcáu n’infinidá d’estaos a lo llargo de los años d’ofensiva neolliberal que güei inda sufrimos con fuercia.

Llama muncho l’atención ver la reaición de munchos collacios y collacies, vecinos y vecines, compañeros y compañeres… d’indignación énte’l “robu arxentín d’YPF”, identificando asina la petrolera privada Repsol pa con España, y a min namái sentir estes reaiciones siempres se me vien a la tiesta “la roja”, la seleición española de fútbol como exemplu bien nidiu del forofismu descomanáu de delles persones pa con determinaos símbolos.

Toos y toes conocemos a persones que, con motivu del tornéu futbolísticu de turnu, saquen al balcón la bandera del estáu, fechu qu’enxamás repiten n’otra fecha cualquiera, y como lo de la bandera, otres munches aiciones y fechos esceicionales que respuenden más a dinámiques de manipulación mediática ya imposición qu’a l’aniciativa propio. Y nesti “conflictu petroleru”, paezme que tamos énte un casu similar, onde en llugar de sacar al balcón la bandera roxigualda, saquen a pasear una riestra d’argumentos que, a poco que se profundice, vese nidiamente que son frutu del bombardéu mediáticu y la enquivocada identificación d’intereses privaos pa colos del pueblu.

L’identificar una compañía multinacional, especuladora, qu’agrede ensin esmolición dala los drechos llaborales o mediuambientales, col estáu español, ye una amuesa clara de cuál ye la utilidá d’ésti ente: caltener una serie de símbolos, costumes, etc, garraos a distintos pueblos, pa crear con ellos una concencia de patriotismu haza l’estáu hexemónicu que sirva pa defender los intereses de la burguesía, de les élites polítiques, económiques y sociales, qu’a la fin nun son más que l’interés priváu d’unos pocos.

A too ello, cuando daquién fala del tema Repsol-YPF echando pestes pa los arxentinos y falando de que “mos robaron”, yo pongo un exemplu nidiu: “imaxinái que nós cuntamos con bayuroses reserves petrolíferes, pero éstes son esplotaes por, vamos a poner, una compañía privada de Bélxica…¿veríeis mal que l’alministración pública algamara’l control d’eses riqueces naturales, evitando que’l beneficiu vaya a manes ayenes y equí sólo quede l’esfarrape mediuambiental?”. Pienso que si se fae la preba camudando los papeles d’arxentina y l’estáu español, un bon númberu sofitaría la midida del estáu arxentín en casu de que les reserves de combustible tuvieren equí.

Ta claro que cualquier soberanista aplaudiría la midida d’Arxentina, porque a la fin nun ye más que recuperar la soberanía sobre los recursos regalaos a entidaes privaes, como tamién lo ta qu’hai una parte perimportante de la sociedá que sigui’l discursu mediáticu d’ “ataque a españa” ensin decatase del tresfondu del asuntu, y de qu’en realidá los intereses de la clase trabayadora nun pierden ren por ello, y en tou casu fadríenlo aquelles persones que cunten con una participación en Repsol a les que’hai que dicí-yos que la soberanía del pueblu arxentín ye muncho más importante que les sos plusvalíes.

Tou esti rollu d’enrriba, anque a primer vista pueda paecer que non, tamién tien la so aplicación n’Asturies, y ye que, ¿hai meyor exemplu de país cuyos recursos naturales foron, son, y posiblemente sedrán espoliaos poles oligarquíes del estáu español, nunos casos, y poles élites económiques dueñes d’empreses de diversos países, n’otros?.

Entruguemos a los asturianos y asturianes: ¿paéz-vos bien que seya una empresa privada la que controle los yacimientos d’oru, quedando col beneficiu, y dexando esfarrape mediuambiental? ¿Tais a favor de que, pesie a que somos un país sobreproductor d’enerxía llétrico, valga lo mesmu o más el recibu qu’en territorios que nun producen enerxía? ¿Creyéis conveniente permitir a Repsol facer prospeiciones na costa asturiana a la gueta de petróleu, sabiendo que sedríen ellos los que quedaríen cola inmensa mayoría del beneficiu de la so esplotación, y cuntando col desaniciu mediuambiental qu’amestaría?

Son entrugues que, d’otra manera, tamién pueden dar una visión al soberanismu asturianu, asina como una estaya de trabayu importante pal nuesu movimientu, debío qu’al mio paecer tamos nuna época na que la xente paez tar más receptivo a temes de calter económicu, enerxéticu, etc. y qu’a la fin supón un nichu onde trabayar fórmules soberanistes pa la nuesa nación, por supuestu ensin escaecer temes identitarios, culturales, sociales, etc, tamién perimportantes.

Poro, equí dexo la mio reflexón, sobre trabayar nesta estaya pa desmontar les mentires ya intereses del estáu español y les élites a les que representa, amás de ser una ferramienta p’afondar na concencia soberana del pueblu asturianu, anguaño bien amenorgada, too ello afondando en que non sólo val con estatalizar la mayoría d’acciones d’una compañía, sinon qu’hai que consiguir un repartu del so beneficiu que repercuta dafechu nes clases populares.

Adrián Calvillo

Reflexones sobre’l 25-M de Compromisu por Avilés

Compromisu por Avilés, nome dáu a la coalición Bloque por Asturies- UNA- LV-GV nesi conceyu, asoleyó un comunicáu valorando los resultaos de les eleiciones asturianes del pasáu 25 de marzu. Darréu apurrímosvoslo íntegru

Anque la convocatoria del 25-M pudiera garrar a contrapié a les formaciones de carácter nacional que concurrieron, al tar nel mediu de procesos internos, nun hai que facer munches reflexones sobre los resultaos d’estes últimes elecciones y cualquier reflexón que se faiga va ser aplicable a cualquier convocatoria previa. Lo que caracteriza a la izquierda nacional asturiana ye que nun s’alcuerda de trabayar na cai hasta los quince díes primeros de cada convocatoria y si nun tienes protagonismu nos medios y nun trabayes la cai, poca base social va poder movilizase porque simplemente, ésta nun existe. Asina, dende’l paecer de Compromisu por Avilés, nun caben sides nin llectures que nun pasen por asumir el fracasu total que supunxo’l 25-M pa la izquierda nacional asturiana y d’ehí que debiere suponer un puntu d’inflexión que tien que rematar nun procesu de reconstrucción de la mesma.
Dende Compromisu por Avilés, entiéndese que nel momentu hestóricu nel que nos alcontramos, necesítense midíes hestóriques y éstes pasen por asumir responsabilidaes pol bien del País. Asina, queremos abrir un debate ente militantes y simpatizantes del movimientu asturianu d’izquierdes, que permita la rexeneración nos plantegamientos y estratexes a siguir nel futuru. Darréu, queremos exponer el camín que se tendría que siguir según la nuestra visión.
Compromisu por Avilés entiende que too partíu políticu tien que ser una ferramienta válida p’algamar un fin y que dende’l puntu de vista del nacionalismu d’izquierda, non solo nunca se llegó a esi fin, sinón qu’en munches ocasiones foron y son les propies siegles, el fin de munches batalles internes, quedando los intereses nacionales al marxen. Poro, toles ferramientes que lleva usaes el nacionalismu asturianu hasta’l día de güei, yá tán caduques, siendo necesariu pa la izquierda asturiana abrir un nuevu y únicu camín. Asinamesmu y empatando colo anterior, muncho s’oyó falar de rexeneración política nes últimes convocatories asturianes y si bien yera necesariu nesi intre, va siendo hora qu’esi cuentu vaya aplicándose dientro de la izquierda nacional asturiana. Ye necesariu ser responsables y dexar pasu a xente nuevo, xente que nun tea contaminao nin envenenao poles continues batalles personales qu’endolquen al nacionalismu asturianu dende l’añu 1991 y qu’aporte idees nueves. La construcción d’esta nueva alternativa tien que ser lo más abierta, plural y flexible posible dende’l so xermen, buscando dende’l primer momentu la suma del mayor númberu de fuercies.
D’otramanera, la izquierda nacional siempre pecó de “paracaidismu” dientro del nuesu país, tanto a nivel electoral como na participación nos movimientos sociales. Ye difícil pensar nun conflictu social nel que la izquierda nacional fora la vanguardia y non un movimientu “parasitariu” que llega a la manifestación de turnu cola pancarta recién fecha. Asina, entendemos que toles estratexes basaes en crear estructures a nivel nacional, tamién tán agotaes, teniendo en cuenta tanto la incapacidá de ser operativos en tolos conceyos, como nos nulos resultaos.
Dende Compromisu por Avilés, propónse trabayar na construcción nacional asturiana dende la base, que pal nuesu paecer, han de ser los conceyos, ensin refugar a presentar candidatures nes sucesives convocatories nacionales. Hai que centrase n’organizase autónomamente nos conceyos nos qu’anguañu hai xente anque seya de forma residual y participar activamente na vida socio-política de los mesmos, creando espacios de confluencia y articulándose como un brazu políticu útil pa tolos movimientos cívicos asturianos.
Per otra banda y como se dicía más p’arriba, l’apostar pol trabayu nos conceyos, nun tien que tar reñíu, nin muncho menos, cola coordinación de trabayu ente los conceyos y la organización d’un referente d’izquierda asturiana nes cites electorales d’ámbitu nacional. Esta coordinación d’acción, taría venceyada a una Asamblea Xeneral de Conceyos de carácter como pocu semestral y que taría formada por un representante de cada conceyu.
Teniendo claro, qu’hai qu’afondar muncho más nos temes trataos, éstes son les llinies xenerales que pa Compromisu por Avilés tien que seguir la izquierda nacional asturiana nel camín de la so necesaria refundación y coles que queremos abrir un procesu de debate ente tolos axentes, que nos lleve a bon puertu pa entamar a trabayar cuanto primeru.

N’Avilés, 13 d’abril de 2012.

Estrayíu d'Aruelu.com

Manifestación en defensa de la Educación Pública esti miércoles

Les Asamblees d’Estudiantes de la Universidá d’Uviéu, actives en tolos sos centros, con representación en tolos sos órganos de gobiernu y na presidencia del Conseyu d’Estudiantes, CONVOQUEN el miércoles 25 D’ABRIL a les 12:00H. na plaza d’España y coincidiendo con movilizaciones coordinaes en diferetes puntos del Estáu:

¡¡MANIFESTACIÓN en defensa de la educación pública!!

Retayos n’educación... (21,9 %), xuba progresiva de tases, redución de beques (166 millones menos) – obviando los criterios de renta – y la so sustitución polos préstamos-renta, desapaición y fusión de carreres y universidaes, xuba del númberu d’alumnos per aula y reducción de recursos humanos, sumisión del sistema educativu a los intereses de les empreses, precarización de la enseñanza pública en xeneral en favor de la educación privada y concertada, Estratexa Universidá 2015…

¡Consigui’l to panfletu y busca información pela to cuenta!

¡¡Sóbrennos los motivos!!

Nun podemos permitir que se nos arrebate la oportunidá d’acceder a una educación pública de calidá, independientemente de les nuestres condiciones sociales y económiques.



PÚBLICA NOS LA DEXARON, PÚBLICA VAMOS DEVOLVELA

Acompaña a @Super_Publica na nuestra llucha en defensa de la educación pública.

Vémonos el miércoles 25 d’abril a les 12 na plaza d’España.

Cellebrose la concentración en Caxastur escontra los desahucios

Activismu escontra los desahucios executaos poles entidaes bancaries.


Esti xueves cellebrose frente a la sede central de Caxastur na Plaza Luis Ruiz de la Peña -conocía como "Les Palomes"- una concentración p'aparar los desahucios que dende la entidá bancaria se quieren desendolcar prósimamente. Asina, un grupo d'alrodiu mediu centenar de persones repartieron información y visibilizaron la problemática denunciada, col sofitu de munches persones que tocaben el claxon al pasu pel llugar.

Una delegación de los y les solidaries entraron a falar cola direición de la caxa, negociaciones que s'espardieron a lo llargo d'una hora onde s'aseguró que la cabera orde de desahuciu nun podía ser aparada por elli debío a que esa decisión correspondía a los sos superiores. Sicasí, l'aición solidaria sirvió pa más ciudadanos y ciudadanes conozan el casu, y les aiciones de la entidá bancaria anteriormente caxa d'aforros.

Fonte: Infoasturies.net

jueves, 19 de abril de 2012

La XDLLA convoca pal 4 de mayu la manifestación pola oficialidá

La Xunta pola Defensa de la Llingua Asturiana (XDLLA) tien convocada pal vienres 4 de mayu la manifestación que, con motivu del Día de les Lletres Asturianes, se fai pa reclamar la igualdá llegal plena del asturianu col restu de llingües oficiales del Estáu. La marcha va arrancar a les 19.30 hores de la Estación del Norte d'Uviéu y desfilar peles cais d'Uría y San Francisco hasta llegar a la Plaza Porlier, onde, alredor de les 20.30 hores, va lleese un comunicáu.

La manifestación coincide esti añu una selmana depués del Conciertu pola Oficialidá, qu'entama dende hai 24 años la XDLLA y que, nesta ocasión, va celebrase'l sábadu 28 d'abril, a partir de les les 19.30 hores, nel Parque Inglés de Xixón. A los dos escenarios del conciertu van xubir dellos de los meyores grupos asturianos d'anguaño: Dixebra, Alfredo González, La Bandina, Macadamia, Tuenda, Fala non Caduca y De Miguel, Wolfe & Quintana, que van enllenar ocho hores de música de calidá y cien por cientu n'asturianu.

La XDLLA define'l Conciertu pola Oficialidá como «un eventu folixeru-reivindicativu» y nél vienen collaborando desinteresadamente los meyores grupos de la escena musical asturiana de cada momentu. Con esti actu, la organización en defensa de los derechos llingüísticos quier denunciar, d'una manera lúdica, «la situación de marxinación y desigualdá na que s'atopen les persones falantes d'asturianu».

Fonte: Les Noticies

Karl Marx y James Connolly n'asturianu.

Novedaes na Biblioteca Dixital de Frayando Cadenes.

El co-fundaor del socialismu científicu y principal teóricu del socialismu revolucionario y la so filosofía, Karl Marx, yá ta na nuesa biblioteca dixital. Nesti casu presentamos l'artículu "La nacionalización de la tierra", onde Marx afita unos presupuestos teóricos y estratéxicos pa llevar el socialismu científicu al campu y espeya les incoherencies de dalgunes posiciones febles nesti sen dientru la I Internacional.

Amás, tamién incorporamos a la bilioteca a James Connolly, cabezaleru nacionalista y socialista irlandés, que aportó muncho al nacionalismu irlandés, al facer frenti al so esencialismu y da-y una ñatura más rialista, amestando les idees marxistes a la llucha contra'l poder colonial británicu na so nación. Nel artículu qu'ufrimos, "Socialismu y Nacionalismu", l'autor entama a dexar clares les sos posiciones polítiques ya ideolóxiques, que vienen a ser grandes aportaciones al nacionalismu irlandés y que convendría muncho revisar nel país irlandés.

Amás, otra novedá apaez na biblioteca. Un nuevu documentu d'Ho Chi Minh, nesti casu ye una carta al presidente de los Estáos Xuníos Lyndon B. Johnson, onde'l vietnamita unvía una riestra de declaración d'intenciones al imperiu y asoleya la xenocida política siguía por Washington nel so país, demientres la pernomada guerra que foi una gran victoria pal Vietnam Socialista y Soberanu.

Tertulia sobro republicanismos y autodetermín.

El vienres 13 cellebróse una nueva edición de la Tertulia Enrique García-Rendueles na cual foi encetada la esistencia d’estremaes estratexes republicanes, qu’en función de la referencia nacional categoricen de manera bien estremada la reivindicación del autodetermín de la colleutividá asturiana, nuna difícil coxuntura que desgraciadamente vien marcada pol tracamundiu ideolóxicu y la desorientación estratéxica llegándose a les vinientes conclusiones:
1. La demanda esistente d'una III República Española, xenerada principalmente dende organizaciones asitiaes na esquierda nacionalista española, nun supón dengun avance na emancipación nacional del pueblu asturianu en cuantes que nun alteria les rellaciones de subordinación política y dependencia estructural del País en rellación col Estáu español.     
2. Asina énte la permanencia d'una Monarquía heredera de la dictadura franquista la única posición coherente a desendolcar dende'l Movimientu de Lliberación Nacional Asturianu (MLNA) ye la mesma que con tantos otros déficits democráticos del Estáu español, que ye la de la denuncia y la confrontación batallosa pero ensin embarcase n'estratexes esternes que nun solucionen el problema global d’Asturies comu sociedá colonizada. Nesi sen nun pue escaecese que non solamente la istitución monárquica ye continuista al respective del franquismu sinón que lo son tamién les mesmes estructures de poder del Estáu
3. Si bien dalgunos seutores definen la so propuesta de III República Española comu “federal y plurinacional” reconociendo inclusive l'autodetermín comu un drechu democráticu dientro del so programa políticu anque ruempan en munchos aspeutos cola ideoloxía esencialista del nacionalismu españolista por embargu nun lleguen a poner en cuestión equí y agora la opresión colonial yá que l'autodetermín ye conceptualizáu comu una demanda sectorial a resolver namás dempués d'un procesu de reforma institucional dientro del marcu del Estáu español. Y cualisquier marcu español por mui federal que se carauterice pa poder disponer de llexitimidá democrática tendría de ser decidíu enantes polos ciudadanos y ciudadanes d’Asturies
4. El MLNA tien que tener l'autodetermín comu la exa central dende'l cual dir articulando al conxuntu de lluches sociales del País dientru d'una mesma dinámica estratéxica de contra-poder popular n'oposición global al Estáu colonial en tola so dimensión estructural (cuestión que nun foi plantegada enxamás pol asturianismu aglutináu en redol a la reivindicación seutorial de la oficialidá de la llingua). Nesa dirección l'autodetermín amás d'un drechu ye una ferramienta p'abrir una "rotura democrática” col estáu de les coses apautáu na llamada Transición nos años 1970 comu fase previa al algame del oxetivu específicu del MLNA: la instauración d’una República Asturiana. Y acullá del exerciciu de la soberanía nacional l'únicu marcu supraasturianu que si bien nun forma parte del horizonte estratéxicu del MLNA si ye compatible con elli nun ye denguna República Española de calter federal sinón una Confederación de Repúbliques Ibériques.
5. Pero dexando al marxe les diferencies estratéxiques ente'l republicanismu asturianu que representa'l MLNA y les organizaciones adheries al republicanismu español nel actual contestu de retrocesos populares pue esistir una coincidencia a nivel táuticu na defensa y/o demanda de cuestiones básiques siempres y cuandu se garanticen primeramente dos presupuestos imprescindibles: la non disolución del MLNA comu proyeutu específicu y la reconocencia omnipresente de la ciudadanía asturiana comu suxetu de la soberanía política.

miércoles, 18 de abril de 2012

CSI organiza una charra sobre la reforma llaboral

Vienres 27 d'abril a les 10 de la mañana.


La Corriente Sindical d'Izquierda vien d'anunciar la organización d'una charra alrodiu de la reforma llaboral que tendrá llugar el vienres 27 d'abril de magar les 10 hores de la mañana nos llocales del sindicatu n'Uviéu. Ellí cuntarán cola presencia de Juan Prieto, abogáu de CSI, que se centrará nes reformes, les sos consecuencies n'Alministración y nel Estatutu de los trabayadores.

La duración de la charra sedrá d'unes dos hores, pa depués pasar a un alderique coleutivu onde se valorarán los recortes n'Alministración Pública, polo que camienten importante la presencia de tolos y toles interesaes p'aportar les sos visiones y esperiencies.

Conceyu Abiertu por Llangréu pide mayor compromisu municipal pa colos paraos y paraes

Sofita les midíes plantegaes polos coleutivos de desemplegaos/es.

Conceyu Abiertu por Llangréu vien d'asoleyar un comunicáu nel que, según despliquen, "Los paraos y paraes de la cuenca’l Nalón organizaos baxo la “Plataforma de paraos” vienen de facer una riestra de propuestes a desendolcar pol Ayuntamientu de Llangréu, énte les qu’atopamos el tresporte público de baldre o’l pagu del mínimu en dalgunes tases municipales pa quienes lleven más de dos años en paru, como midíes que, dende la Casa Conceyu, ayuden a ameyorar la situación na que s’atopen les miles de persones en situación de desemplegu, nel nuesu conceyu y nos averaos".

Dende Conceyu Abiertu por Llangréu, amás, quieren "amosar el nuesu sofitu a los paraos y paraes nes sos vindicaciones que, independientemente de propuestes concretes, son llexítimes y asoleyen la demanda qu’esiste énte la ciudadanía pa que l’Ayuntamientu seya un organismu muncho más enfotáu na situación social de lo que ta anguaño, onde sólo importen los intereses específicos del PSOE y la so rede clientelar texía a lo llargo los años".

Prosiguen desplicando que "Dacuando la Casa Conceyu debería de tar siendo una institución dinamizadora, que xenerare bientar social y movimientu económicu, atopámonos con que la so situación real ye de regresión dafechu nes prestaciones qu’ufierta, amenorgándoles nunos casos, y privatizándoles n’otros, siempres atendiendo a intereses ayenos a les clases populares."

Pa finar, la organización llangreana "desixe a los representantes políticos del conceyu’l desendolcu de midíes decidíes que seyan quién a poner en marcha aniciatives d’ayuda socioeconómica y d’actividá llaboral nuna zona tan deprimía como la de nueso. Sicasí, tamién consideramos que pa ello ye imprescindible finar cola cadarma clientelar y empresarial del PSOE y el so entornu nel nuesu conceyu, aición que nun tien más camín qu’ún mayor protagonismu de les clases populares nes instituciones municipales, bien al traviés d’una tresformación del modelu políticu del conceyu, o mediante l’entamu d’organismos o comisiones de calter popular que participen na toma de decisiones" .



Comparte: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Esbilla

lunes, 16 de abril de 2012

8 apuntes alrodiu l'apaición del "PCPA"

Nos caberos díes, vien apaeciendo información sobro l'entamu d'un nuevu proyeutu políticu, el "Partido Comunista del Pueblo Asturiano", faise llamar, nun sabemos si'l nome rexistráu va n'asturianu o en castellán, pero asina preséntense a la sociedá asturiano, ye dicir, en castellán. Al empar, pela rede apaecen mensaxes convocando un aconceyamientu o asamblea fundacional nel Atenéu Obreru de Xixón esti prósimu sábadu 21 d'abril de cara a un Ier Congresu. Amás asoleyen la so intención de lluchar pola independencia y el socialismu y reclamen a Asturies suxetu políticu propiu, rompiendo col modelu comunista clásicu n'Asturies de federalismu o confederalismu. Falen d'independencia en cuenta d'autodetermín. Pue que nun seya mui relevante esta noticia y que sía una simplaya preba o quiciabes vemos un nuevu proyeutu sólidu, pero dende esti blogue queremos atalantar una postura alrodiu d'esta noticia.

1. En primer llugar, una noticia asina, entamar un PCPA confirma cierta deriva nel PCPE haza plantegamientos más centralistes y españolistes, entendiendo l'españolismu non d'una forma estremista pero si asimilatoria del Estáu Español como principal campu de xuegu y d'eso que llamen "pueblu español", inesistente dende la nuesa postura, como suxetu políticu cimeru. Munchos años dalgunos seutores reclamaron estes siegles pal agrupamientu del PCPE Asturies, lo qu'a la fin nun va dase nunca si apaez esta nueva formación. Amás, pue vese ciertu descontentu per parte dalgunos seutores comunistes d'Asturies col viraxe centraliegu'l PCPE, que vien d'un importante Congresu d'hai dos años. Paez ser qu'agora dalgunos ex-militantes, enviendo esa deriva intenten apostar pol soberanismu, dalgo que dende posiciones d'izquierda soberanista llevase munchos años reclamando al comunismu en dellos países del Estáu, incluyíu'l de nueso.

2. Esta noticia causa ente la xente que se mueve na cai, nos tayos y nes organizaciones revolucionaries, con independencia de postura política, abonda sorpresa, pues paez que ye una noticia non esperada y un movimientu mui arriesgáu y quiciabes precipitáu. Non pol fechu de que surda una corriente soberanista y comunista, sinon por qu'esa corriente manifiéstese en forma de partíu, colo qu'ello conlleva.

3. Con tol respetu del mundiu, toes y toos sabemos qu'Asturies ye un país perpiquiñu y equí conozse tol mundu. Causa sorpresa, induldablemente, que dalgunos seutores qu'enxamás apostaron pol soberanismu socialista agora quieran entamar un proyeutu d'esti cálter, y más amosando cierta llínia nesi sen ensín tan siquier cellebrar un  Ier Congresu. Ye dicir, depués de munchos años de que dientru les organizaciones marxistes revolucionaries d'estructura estatal nun se cediera un res, nin un migayín, na cuestión nacional asturiana, agora atopámonos un proyeutu de clas y nidiamente asturianu, qu'abraza la cuestión nacional de sopitu. Amestar tamién que ye bien sabíu, que por suerte, na izquierda nacional asturiana hai militantes y simpatizantes comunistes, y polo que ye sabíu los que militen nun fixeron denguna fuga y camudaron d'organización y los que nun militen siguen asperando por un proyeutu meyor y mas razonatible y taúticu.

4. Un movimientu comunista de tipu asturianu y polo tanto, nacionalista, independentista o soberanista, como'l que dende esti espaciu na rede defendemos, abrazando les teoríes del socialismu científicu y revolucionariu qu'afitaron Marx, Engels, Lenin ya otros grandes del marxismu tien de tener en cuenta la realidá sociopolítica d'esta nación. Poro, ye menester entamar a ser conscientes de qu'Asturies parte d'una relación colonial de dominación social que yá vien de dellos sieglos y que n'Asturies hai organizaciones que yá asumen esi analis dende posiciones socialistes. Nun quier dicir esto que nun deba apaecer un coleutivu como esti que se quier construyir nomáu "PCPA", pero si que ye ciertu que la condición y rol de partíu políticu solo contribúi a una mayor atomización na izquierda asturiana y una mayor confusión y perda de xunidá.

5. Igual que tresmitimos esa cuarta idea, tamién camentamos que ye pernecesariu un coleutivu de tipu marxista-leninista nel soberanismu asturianu, patriota y revolucionariu, ensín atayos nin concesiones ideolóxiques. Ye necesariu esi coleutivu p'asoleyar les contradicciones de la izquierda española y atrayer a militantes comunistes a la causa nacional asturiana. Por eso, camentamos que la función anicial de la xente qu'integra'l PCPA o que quier facelo, sedría más bien entamar una dinámica de corriente interna dientru'l soberanismu y/o nacionalismu asturianu militando nes organizaciones patriotes, dende'l conceyu a la totalidá del país. Esi coleutivu, con militantes socialistes y soberanistes d'organizaciones como por exemplu Conceyu Abiertu, tendría un pesu clave dientru'l movimientu nacionaliegu a la hora d'analizar la realidá, implicar al nacionalismu nel movimientu obreru y favorecer la formación de tola militancia. Un exemplu de coleutivu qu'exerce de corriente interna marxista-leninista nel Estáu ye'l de Kimetz, n'Euskal Herria.

6. El movimientu nacionalista y/o soberanista asturianu necesita unidá, trabayu nos conceyos y creación de bas social. Ye pernecesariu entamar dende yá ( y más depués del fostión del 25-M) una alternativa basada nel modelu d'Unidá Popular, onde a nivel nacional s'axunten tolos seutores progresistes del movimientu de vindicación nacional, dende'l Bloque-UNA a AA o CA y otros seutores, teniendo una llínia revolucionaria pero que puxe priméramente pola dinámica de vindicar condiciones democrátiques, yá que n'Asturies nun hai condiciones democrátiques nin hai conciencia nacional. Poro, necesitamos un proyeutu ñaciu dende'l Pueblu Trabayador Asturianu y con unos mínimos democráticos y sociales, ensín maximalismos direutos pero siempres dimpuestu a enfrentase al Estáu Español. Pa qu'esto sía asina, ye pernecesaria la implicación de comunistes asturianos, que tean dimpuestos a trabayar col restu compatriotes en favor de la xusticia social pal pueblu y l'espoxigue de la conciencia nacional. La so presencia ye fundamental pa esclariar a la militancia cuestiones claves, facer un analis de clas posáu de lo qu'asocede n'Asturies y curtiar les posibles derives reformistes y/o burgueses o pequeño-burgueses que puean apaecer nel futuru si'l nuesu movimientu va espoxigando.

7. Respetamos la voluntá los/es compañeros/es del PCPA y deseamos-yos muncha suerte nel futuru independientemente'l resultáu del so primer congresu, pero camentamos que dende esti blogue y col enfotu d'aportar constructivamente dende'l respetu y la crítica fundamentada ye necesariu facer valoraciones énte acontecimientos d'esti tipu y espresar la nuesa postura, que ye la d'una parte del soberanismu revolucionario asturianu. Ñaturalmente nun asperamos que les persones q ue van integrar el PCPA mos faigan casu, pero ciertamente si qu'asperamos qu'esti artículu sirva-yos pa facer un analis más posáu de la realidá, tamién de la de so, p'asina saber lo que faen y si ye necesariu o non el so proyeutu.

8. La postura d'esti blogue ye nidia no ideolóxicu. Dende equí si creemos que'l día de mañana sedrá un partíu comunista, de tipu leninista, el qu'abandere y llidere la lliberación d'Asturies como nación y como clas trabayadora. Ye dicir, asumimos, que sedrá un gran partíu revolucionario'l que traiga pa esti país, xunto con otros seutores, la tan ansiada independencia y el tan necesariu socialismu, pero esto ye una batalla mui llarga y tien munches etapes, y por desgracia tenemos entá munches que llibrar pa qu'eso ocurra y teamos en condiciones d'entamar esi proyeutu de vanguardia. Pel momentu, ta asperando la tan necesaria Unidá Popular. ¡Trabayemos toes y toos por ella! ¡Pol socialismu y por una Asturies dixebrá!

Proyeiciones n'Avilés de la Axenda Alternativa Asturiana.

Conceyu Abiertu por Llangréu solicita un mayor compromisu del conceyu colos paraos y paraes.

Los paraos y paraes de la cuenca’l Nalón organizaos baxo la “Plataforma de paraos” vienen de facer una riestra de propuestes a desendolcar pol Ayuntamientu de Llangréu, énte les qu’atopamos el tresporte público de baldre o’l pagu del mínimu en dalgunes tases municipales pa quienes lleven más de dos... años en paru, como midíes que, dende la Casa Conceyu, ayuden a ameyorar la situación na que s’atopen les miles de persones en situación de desemplegu, nel nuesu conceyu y nos averaos.

Dende CA por Llangréu queremos amosar el nuesu sofitu a los paraos y paraes nes sos vindicaciones que, independientemente de propuestes concretes, son llexítimes y asoleyen la demanda qu’esiste énte la ciudadanía pa que l’Ayuntamientu seya un organismu muncho más enfotáu na situación social de lo que ta anguaño, onde sólo importen los intereses específicos del PSOE y la so rede clientelar texía a lo llargo los años.

Dacuando la Casa Conceyu debería de tar siendo una institución dinamizadora, que xenerare bientar social y movimientu económicu, atopámonos con que la so situación real ye de regresión dafechu nes prestaciones qu’ufierta, amenorgándoles nunos casos, y privatizándoles n’otros, siempres atendiendo a intereses ayenos a les clases populares.
Poro, Conceyu Abiertu por Llangréu desixe a los representantes políticos del conceyu’l desendolcu de midíes decidíes que seyan quién a poner en marcha aniciatives d’ayuda socioeconómica y d’actividá llaboral nuna zona tan deprimía como la de nueso.

Sicasí, tamién consideramos que pa ello ye imprescindible finar cola cadarma clientelar y empresarial del PSOE y el so entornu nel nuesu conceyu, aición que nun tien más camín qu’ún mayor protagonismu de les clases populares nes instituciones municipales, bien al traviés d’una tresformación del modelu políticu del conceyu, o mediante l’entamu d’organismos o comisiones de calter popular que participen na toma de decisiones.

Conceyu Abiertu por Noreña denuncia l’oscurantismu na ellaboración de los presupuestos 2012

 
Apuesta por unos presupuestos participativos y sociales

El gobiernu municipal decidió nun permitir a los conceyales de la oposición facer una copia del borrador de los presupuestos, pudiendo acceder a el namás los miembros del plenu municipal de 8 a 15 hores, lo que pa Conceyu Abiertu ye un "déficit democráticu inxistificable" y defende "unos presupuestos participativos, onde'l pueblu de Noreña puea ser parte activa na so ellaboración". Nesti sen, CA Noreña recuerda que nel conceyu vecín de Sieru un gobiernu tamién del PSOE ellaboró los presupuestos de forma más participativa mentantu en Noreña, un alcalde del mismu color políticu "nun solo nun permite la participación ciudadana sinon que impide facer copia del documentu a los propios conceyales de la oposición".

Conceyu Abiertu entiende qu’esti ye un episodiu más de la "actitú antidemocrática y oscurantista que vien siendo vezu nel ayuntamiento de Noreña col gobiernu del PSOE y l’alcaldía de Cesar Movilla". Independientemente de les "carencies democrátiques" que denuncien alrodiu de la ellaboración de los presupuestos, Conceyu Abiertu por Noreña va defender al travies de la so conceyalía unos presupuestos pa Noreña "onde prime sobre tou lo social" dao que "los recortes sociales y económicos de corte neoliberal que se vienen promoviendo dende los gobiernos d’España o Asturies nun solo nun tan valiendo pa salir de la crisis económica sinon que tan xenerando más crisis social. Noreña tien qu’intentar nun siguir esa fola y desmarcase dientru les nueses posibilidaes ellaborando unos presupuestos fondamente sociales". Per otru llau, Conceyu Abiertu propón tamién qu’el ayuntamientu de Noreña nun aplique la nuea reforma llaboral aprebada pol gobiernu d’España.

Infoasturies.net