El nuevu panorama n'Asturies depués del 25-M.

Munches llínies de tinta fueron escrites estes selmanes n'Asturies ente la convocatoria d'eleiciones a la Xunta Xeneral y la fuelga xeneral del pasáu xueves. La prensa sucursalista y burguesa obviamente fexo'l so papel, desplicando la so visión a la ciudadanía, la visión burguesa y colonialista.

Los resultáos de les eleiciones nacionales nun pudieron ser más desgraciaos p'Asturies y la so supervivencia como nación. La mafia pseudo-socialista y españolista de la FSA trunfó una vegada más, amosando la rede que tien implantada nel nuesu país y el so furrulamientu clientelar. FORO y PP obtuvieron unos bonos resultáos pa la so situación de decretazos y crisis de gobiernos, mentanto Izquierda Xunida algamó bonos resultáos relativos a fuercia de fagocitar y aprovechase de la llucha de la braera izquierda asturiana, en tolos ámbitos y xacios. Les coses a la fin nun camudaron tanto respeutu a enantes del 25 de mayu de 2011.

Pero, ciertamente, dende una perspectiva patriota y soberanista, lo que más esmolez o asina s'entiende dende esti blogue, ye la entrada d'UPyD, partíu ultra-nacionalista español y de lo más reaccionariu con Ignacio Prendes a la cabeza, con un diputáu. Los acontecimientos y los votos d'emigrantes fueron claves pa da-yos el papel amás de llave de gobiernu, polo que meyor nun-yos podía salir la xugada. Independientemente de la importancia que-y queramos dar a les eleiciones, pues siempre tenemos que tener en cuenta que formen parte del xuegu del capital, el fechu de qu'UPyD entre na Xunta Xeneral ensín gran nivel de militancia y ensín representación nos conceyos d'Asturies ye una llaceria. Esti resultáu ye un síntoma más de la desesperación coleutiva y de la gran estructura del Estáu pa qu'Asturies siga inorando la so condición de colonia y entamar a llantar resistencia daveres.

Nun podemos obviar que los medios de comunicación "asturianos" dieron-y una importancia terrible a esa formación ultraespañolista. La Nueva España, RTPA, El Comercio, La Voz, etc, ficieron campaña por UPyD al empar que poles sos opciones inmovilistes tradicionales. Paez ser qu'ente'l poder mediáticu hebo un gran interés en meter a UPyD na Xunta Xeneral d'Asturies. Esos intereses respuenden a les presiones ya intereses del uniformismu españolista y los intereses de les grandes empreses españoles pa somorguiar más Asturies, obtener más plusvalía al travíes d'una ferramienta perbona: el colonialismu.

Ye mui negativu qu'entre na Xunta Xeneral un partíu que nun reconoz l'asturianu como llingua, y cuando lo fai nun lo ta faciendo de verdá. Un partíu que ta contra la oficialidá "ensín rodeos", ensín llínies d'actuación de normalización. Un partíu que diz que non direutamente tamién al carbón asturianu, que conderga a tolos seutores económicos asturianos en pro de "la concentración. Un partíu, UPyD, que ta na so bas ideolóxica contra les propies Comunidaes Autónomes, anque mazcariten esi discursu, esi mensaxe. Que quier finar cola estructura territorial tradicional de los conceyos. ¿Cómo un partíu tan direutu y reaccionariu algamó representación na Xunta Xeneral?

Hai dellos fautores, prensa, desencantu, intereses económicos y lliquidacionistes, nel sen cultural y nacional, etc. Pero lo ciertu ye qu'esi resultáu pue suponer la derrota definitiva d'Asturies como nación y como Pueblu Trabayador. Les formes de neocolonialismu adautaes al nuesu país tan lloñe del modelu Africa, eso ye evidente, pero les fuercies polítiques sustentaben esi apartheid y esa estructura colonial teníen dalgo de precuru por tapecer esi conflictu, espeyar normalidá democrática y asumir dalgún rol de la propia identidá ya idiosincracia asturiana.

Agora, con UPyD, y cola previsible españolización del restu de partíos con representación paez que vamos entamar a pasar de nuevu a un marcu de colonialismu puru, con un Estáu Español que va violar los intereses y necesidaes d'Asturies y va inorar ciertu equilibriu ente'l país y l'Estáu al que tamos amarraos. Lleguen tiempos difíciles, onde los elementos identitarios d'Asturies van ser persiguíos y los intereses y necesidáes del Pueblu Asturianu tamién. L'equilibriu políticu, económicu, social y cultural va decantase del llau del centralismu y la posición d'Asturies va ser definitivamente marxinada. Asperemos que'l "fautor UPyD" nun torne a apaecer pela Xunta y nes prósimes eleiciones nun tornemos a topanos con esta xente, anque'l restu son más de lo mesmu. La falta de capacidá organizativa y la nula representación nos conceyos pue facer que'l pasu d'UPyD pela Xunta Xeneral seya dalgo anecdóticu.

El nacionalismu/soberanismu asturianu

Fuercies nacionalistes yeren dos les que se presentaben a les eleiciones, Andecha Astur y Bloque por Asturies-Unidá Nacionalista Asturiana, xunta a la marca ecoloxista (residual) Los Verdes - Grupo Verde estos últimos. Ente les dos fuercies, nun s'algamaron 3.000 votos. La crisis presente nel soberanismu asturianu ye yá fonda y vien d'atrás, con una dinámica d'escisiones d'escisiones y de perda progresiva de bas social y militante.

Los murnios resultáos son espeyu de una gran perda de bas social. Nun hai alpenes militantes y n'Asturies la figura del simpatizante activu ye cuasi inesistente. Per otru llau, mesmamente a nivel propagandísticu el nacionalismu asturianu tien series deficiencies, y si bien el nivel de trabayu de cai d'Andecha Astur nestes eleiciones nun foi malu, lo ciertu ye que'l nivel queda mui lloñe de meyores époques. La conclusión básica nel nacionalismu asturianu, a la espera d'analis más ellaborás y posáos, ye que falta muncha xente nel proyeutu nacional y social.

Esto lleva a que nos conceyos nun tengamos conceyales, nin sedes de les organizaciones, nin influencia nos movimientos sociales cuasi, nin tampocu nel ámbetu vecinal y cultural. La xuntanza ente BA-UNA y AA a nivel nacional baxo unos mínimos asumibles y respetando la soberanía organizativa ye inútil si nun miramos con llupa esi fenómenu de falta de bas social. El nacionalismu asturianu, pola so propia ñatura ideolóxica nunca va ser beneficiáu pol Estáu o los sos medios, polo que'l camín nun ye facer un movimientu políticu con cuatro persones con traxe y corbata ya inorar crear llocales, bas social, infraestructura a la fin, lo que ye imposible ensín militantes, munchos militantes son necesarios, cientos o miles, y non decenes ( poques) como anguañu.

Hai que posar un pocu y mirar los conceyos, la xente, les posibilidaes de crear bas social y entamar dende ceru. Enantes de nada, hai que fuxir de que mos vean como "los del bable" y tener en cuenta la llucha social. Hai que saber analizar la crisis capitalista actual y ser referentes de rempuesta n'Asturies, ye un mínimu que mos tendríemos que poner d'equí a 5-6 años.

Dos consideraciones pa finar esti artículu, que ye una opinión tovía en caliente y pocu construyía. La taútica reformista y posibilista de BA-UNA, con un discursu autonomista y con un discursu d'izquierda cuasi calcáu al d'IU, d'asimilación parcial del capitalismu y mui averáu a posiciones socialdemócrates frañó. La teúnicu de tratar d'imitar a los partíos del sistema, ñegar cuestiones como la nacionalidá d'Asturies (recordemos a Palacios nuna entrevista con Neira, tratando de nun dicilo, con complexos nesi sen) y nun analizar la realidá baxo criterios de clas y poder nun foi la meyor manera d'algamar representación pa ellos. Poro, quiciabes habia qu'afitar unes bases mínimes, non posibilistes anque tampocu seutaries pero ensín complexos. Cuestiones como l'autodetermín y la necesidá de superación del capitalismu son cuestiones irrenunciables y que siempres tienen de tar ehí.

Otra consideración pa zarrar ye la poca fuercia y maduré política que tien eso que se suel nomar "asturianismu cultural". Ta nidio que nel ámbetu cultural l'asturianismu tien una incidencia importante n'Asturies pel momentu, mui perriba de la influyencia del "asturianismu políticu". Analizando los númberos, podemos ver como eses persones que conformen y dinamicen la cultura tradicional del país dieron-y la espalda al nacionalismu y ye previsible qu'esos votos vayan siempres pa IU, PSOE y a vegaes FORO. Ye dicir, l'asturianismu cultural nun representa'l nacionalismu, anque se sirva d'ellí pa según que coses. Nun quier dicir esto que'l nacionalismu políticu tea de dexar de sofitar esi ámbetu cultural pero ye pernecesaria la crítica y una mayor presión política sobro esi coleutivu, faciendo d'ellí una parte fundamental del movimientu patriota del futuru movimientu de lliberación nacional asturianu.

Ensín persones nin movimientu nun habrá votos enxamás. Col parlamentarismu nun se va a dengún
sitiu de cara a tresformar la sociedá y emancipar al Pueblu Asturianu pero ta nidio que necesitamos un mínimu, unos espacios nos conceyos y na Xunta pa normalizar lo que tien de venir a ser un movimientu políticu masivu dalgún día. Hasta qu'eso llegue, siguiremos resistiendo les agresiones d'España ya inda más agora, que se fai más que necesariu.

Asturies, un pueblu obligáu a resistir.

Xixón 29 de marzu de 2012. 15.000 asturianxs coherente na cai.

Pesie a los munchos golpes del españolismu, el caciquismu, el capital, la represión y les traiciones al nuesu país de patriotes d'ordenador y sindicalistes de cachopu, puru y Mercedes ASTURIES NUN SE RINDE.

BA-UNA-LV-GV asoleyó la so primer valoración sobre les elleiciones del 25M

Dende la coalición "Bloque por Asturies - Unidá Nacionalista Asturiana - Los Verdes-Grupo Verde: Compromisu por Asturies" vienen de facer pública la so primer valoración tres les elleiciones asturianes del 25 de Marzu, nel que la formación algamó 1.639 votos y un 0,32% de los votos, resultáu que dende la coalición afirmen que "solo puede calificase de malu". Darréu'l comunicáu íntegru:
Primer valoración de la coordinadora de la coalición Bloque por Asturies-UNA-Los Verdes del so resultáu nes elecciones del 25-M

Esta coordinadora valora que'l resultáu de la coalición nes elecciones del 25 de marzu solo puede calificase de malu. Énte un númberu tan amenorgáu de votos y de porcentaxe como los algamaos, y una diferencia coles elecciones de mayu tan alta, nun ye posible facer una valoración del resultáu que nun sía negativa y que nun abra un periodu de reflexón.

Les causes que nos llevaron a esti númberu de votos, tan per debaxo de les mires, entendemos que son tanto esternes como internes, y especialmente nel segundu casu, han de llevanos a una autocrítica fonda que modifique formes d'actuación, d'organización, de comunicación y d'estratexa.

Nun escenariu difícil, impuestu en parte poles circunstancies, nun supimos atopar un buecu, un discursu y una práctica qu'ilusionara a les más de 6.000 persones que nos votaren en mayu -en parte pola lentitú nel procesu d'afitamientu y visibililización d'una alternativa común nos últimos meses- nin consiguimos llegar a nuevos sectores a los que dirixíamos el nuesu discursu, y a pesar del esfuerzu realizáu na nuesa campaña, el nuesu mensaxe nun llegó a más que 1.600 persones, yá que nun fuimos a tresmitir que la nuesa coalición podía ser una alternativa válida a los dos grandes bloques que se formaren.

Amás, la mayoría de la población interpretó qu'estes elecciones tratábense d'una segunda vuelta de les elecciones de mayu de 2011, na que les opciones amenorgábense principalmente a dos; desallugar a Foro al traviés d'un gobiernu de PSOE ya IX o torgar que volviera'l PSOE al gobiernu asegurando un gobiernu de FAC. Nesi escenariu, l'espaciu d'actuación y de tresmisión del nuesu mensaxe y propuestes convertióse en mínimu y el llamáu votu útil xugó na nuesa contra d'una manera evidente.

Agora ye'l momentu de mirar p'alantre, faer autocrítica, reflexón, deprender de los erros, valorar positivamente y afitar los aciertos, y trabayar con rixu y responsabilidá pensando nel futuru. Sicasí, nun podemos escaecenos de dar les gracies a una militancia bien activa qu'a pesar de les dificultaes y la escasez de medios, trabayó con ilusión y ensin descandsu na campaña, nin podemos dexar de señalar que'l trabayu conxuntu ente organizaciones con xénesis y práctiques polítiques distintes cadaldía ye más fácil.

Recordamos nesti momentu qu'una de les constantes de la nuesa campaña foi la reiteración de que, independientemente del resultáu, un proyectu políticu asturianu autónomu, pensáu y articuláu dende la esquierda, l'asturianismu, l'ecoloxismu y enraigonáu nos movimientos sociales, ye necesariu nel nuesu país, y que'l 26 de marzu habría que siguir trabayando pa la so construcción. Agora ye'l momentu de que les organizaciones que formen esta coalición analicen el contestu políticu, faigan les sos reflexones y les pongan en comuña pa redefinir el proyectu y siguir, tres esta esperiencia de la que tenemos enforma qu'aprender, col procesu d'unión, ampliación, y afitamientu d'un proyectu conxuntu y ampliu que se quedó atayáu pola convocatoria electoral.

Pela nuesa parte afitamos la necesidá d'esti proyectu, tamos convencíos y convencíes de qu'hai munchos miles de persones a los que nun lleguemos nesta ocasión, pero que pueden volver enfotase en nós, o facelo per primer vegada. Por ello, faemos una llamada a correxir con humildá y realismu los nuesos erros, y convidamos a quien crea n’una alternativa d'esti tipu, quien nos votó y quien nun lo fixo, a la xuntura pa llevantar con fuerza y ente toos y toes l'alternativa política y la Asturies que queremos.

CONCEYU ABIERTU POR UVIÉU ENCAMIENTA LA CESIÓN DE LES INSTALACIONES DE LA TURRIA DE LA IRÍA AL MOVIMIENTU ASOCIATIVU LLOCAL

La Turria o “Talud” de La Iría cunta dende va tiempu con unes instalaciones construyíes baxo les inversiones del “Plan E” con un costu de 4,55 millones d’euros pa la creación d’un “Centru Cultural” col que dar conteníu d’ésti calter al barriu y, de la mesma mena, completar la probetaya nunos casos, y elitista n’otros, programación cultural que dende la Casa Conceyu desendolquen cada añu pal nuesu conceyu.

Anguaño mos atopamos con una situación bien murnia y esmolecedora, debío a que’l cacarexáu “Centru Cultural” s’atopa zarráu, en primer llugar, poles males condiciones nes que s’atopa frutu d’erros de diseñu y na so construcción. Asina, les instalaciones presenten humedaes nes parés por mor de la condensación, y un espaciu destináu a un muséu que, según reconocen dende’l gobiernu uvieín, cunta con unos “dos o tres metros d’agua” nel suelu poles filtraciones vinientes d’una muria de tierra de la turria.

En segundu llugar, la llamentable situación del equipamientu tien el so orixe na falta d’idegues del gobiernu llocal pa dá-y conteníu a les instalaciones, y ye que la “corporación llocal”, sacantes la Zarzuela y les instalaciones faraóniques como’l “Palaciu de Congresos” del Calatrava, nun sabe lo que facer cola programación cultural d’ésti conceyu de nueso.

A too ello, dende Conceyu Abiertu por Uviéu sacamos les siguientes conclusiones:

1) Col llamentable estáu de les instalaciones, por mor de los fallos de diseñu y construcción, nun facemos más que comprobar una vegada más l’actitú cómpliz del Ayuntamientu pa col seutor empresarial, y ye que, pesie a que nesti casu los fondos provienen del estáu, paez ser que la impunidá del seutor priváu nes sos actividades pa l’alministración local ye la tónica xeneral. La concesión de fondos públicos pal desendolcu d’un bien d’interés xeneral pa tola ciudadanía del conceyu debería atender a un criteriu de mayor control del Ayuntamientu nes obres que se realicen, dexando a un lláu l’amiguismu carauterísticu nes sos actuaciones.

2) Debío a la planificación d’una programación cultural que nun atiende a lo que la sociedá demanda, dende la Casa Conceyu nun cunten con idegues sobre qué actividades desencolcar nes instalaciones, que, d’otra manera, sedríen d’utilidá ya interés popular en casu de que se-y dea un emplegu afayaízu. Sicasí, poco podemos asperar d’un equipu de gobiernu que desprecia la cultura de base, y apuesta nel so llugar polos equipamientos de calter masivu y comercial como’l Palaciu de Congresos del Calatrava.

3) Como ye vezu, l’Ayuntamientu nun cuntó en nengún casu cola opinión de los vecinos y vecines del barriu onde s’asitia la instalación, escaeciendo qu’ellos podrían ser una bona fonte non sólo d’idegues coles que nutrir les instalaciones, sinón que también como suxetos xeneradores de conteníu cultural y d’otru calter.

Poro, dende ésti movimientu ciudadanu queremos proponer los siguientes aspeutos como rempuesta a l’actual situación, que como ye lóxico debe cuntar con una igua inmediata dende’l gobiernu uvieín:

1) Proceder a la rehabilitación y remocique del equipamientu pa facelu utilizable y operativu, reclamando -si procede y ye posible- a los responsables de los defeutos poles deficiencies manifiestes de la construcción. D’otra manera, l’equipu de gobiernu ta na obligación d’atopar los recursos económicos colos qu’iguar la so propia incompetencia, que caltién ensin usu un espaciu válidu. La privatización nun ye una opción a contemplar, y camentamos que la custión respondería más a la voluntá municipal qu’a la falta de presupuestu.

2) Dende Conceyu Abiertu por Uviéu consideramos qu’ésti “Centru Cultural” nunca nun tendrá meyor xenerador de conteníos que’l propiu pueblu, al traviés del so texíu asociativu a nivel vecinal, social, cultural, lúdicu, etc. Como bon exemplu d’ello, hai que facer referencia al Centru Social Ocupáu Autoxestionáu La Madreña, que con un costu mínimu y la organización y xestión popular ye capaz d’ufiertar a toos y toes una programación variada, completa y de baldre.

Poro, encamentamos a la cesión de les instalaciones pa la so autoxestión por distintes asociaciones y coleutivos del conceyu, prioritariamente del propiu barriu y los sos alredores, como aniciativa que sirva tamién pa dá-y puxu a l’actividá asociativa y vecinal de la zona, al mesmu tiempu que dea utilidá al espaciu con un costu mui reducíu pal Ayuntamientu.

3) En tou casu, nun ye tolerable que’l gobiernu del nuesu conceyu escaeza la cultura de base y, sobre too, escaeza quién la fae, y a quién va dirixía: al pueblu. Polo tanto, dende CA por Uviéu proponemos la formación d’una comisión cultural popular, na que tengan representación persones y coleutivos representativos de l’actividá cultural del conceyu y que participen na conformación del programa cultural y d’actividaes municipales, atendiendo polo tanto a les necesidades y demandes reales de la xente.

En definitiva, Conceyu Abiertu por Uviéu puxa por una cultura de base fecha por toos y toes, y que seya l’enfotu principal del Ayuntamientu, lloñe de los faraónicos despliegues n’espectáculos de mases que, anque respetables, nun cunten con gran demanda nin repercusión, pero consumen la práutica totalidá del presupuestu cultural nel conceyu d’Uviéu.

POR UNA CULTURA FECHA POR TOOS Y PA TOOS: REAPERTURA DE LA TURRIA DE LA IRÍA BAXO XESTIÓN ASOCIATIVA.

29-M n'Avilés: aparecen incendiaes les oficines de MAPFRE y el polideportivu d'El Quirinal

Mientres la xornada de fuelga xeneral del 29 de marzu, produxéronse n'Avilés numberoses aiciones.

La inmediata reforma de la llexislación que regula l'actividá de les mutualidaes (mutues), ye la razón pola que les oficines centrales de la mutua MAPFRE, aparecieron amburaes na madrugada'l día la fuelga.

Asina mesmo, y debíu al conflictu de les piscines municipales d'Avilés, tamién aparaeció amburáu'l polideportivo municipal d'El Quirinal.

Dambos episodios fueron calificaos de mui graves, polos importantes daños causados.

Periodista ultradrechista realiza públicamente un comentariu despeutivu haza l'asturianu

El periodista d'ultradrecha Alfonso Merlos, columnista nel periódicu La Razón, y direutor y presentador d'un espaciu "informativu" na cadena estatal 13TV, propiedá de la Conferencia Episcopal Española, vien de facer un comentariu despeutivu haza la llingua asturiana nuna conocía rede social, onde, énte una mención d'un ciudadanu asturianu que se-y dirixó en llingua asturiana, respondió de la siguiente mena: "qué clase de dialecto es este!? con lo hermosa que es la comunicación en español...gracias por seguirme!!!!".

D'esta mena, atopamos un nuevu despreciu mediáticu del ultradrechismu nacionalista español pa cola llingua, cultura ya identidá del nuesu país, qu'amesta un nuevu ataque viniente del frente mediáticu multimedia del ultraespañolismu d'estrema drecha.

Fonte: Infoasturies.net

Ésitu masivu de la fuelga xeneral n'Asturies

El seguimientu de la mesma queda cifráu nel 89%.

La xornada de movilización obrera n'Asturies derivada de la convocatoria de fuelga xeneral cuntó con un seguimientu masivu énte'l pueblu trabayador asturianu, que participó masivamente nes diverses aiciones que dende la madrugada desencolcaron les organizaciones sindicales xunto a otros coleutivos obreros y persones independientes. Asina, dende bien ceo l'aición obrera punxo barricaes nes carreteres, impidió la salida a la cai de los servicios de llimpieza y aparó'l tresporte, con un seguimientu del 100% en dichu seutor. Amás, la participación en seutores públicos como la enseñanza foi del 70%,demientres que nes grandes industries como Arcelor sólo furrularon los servicios mínimos pautaos.

La mañana tuvo protagonizada polo piquetes informativos que, nes principales ciudaes del país, puxaron pol pieslle de les grandes empreses del seutor servicios y d'alimentación que, como ye vezu, presionen a la so plantilla p'acudir al puestu de trabayu y abrir les sos puertes. Sicasí, ye de reseñar qu'aquellos comercios que foron a abrir les sos puertes malapenes rexistraron ventes. En zones d'Asturies como les cuenques mineres y l'occidente -Cangas, Degaña, etc.- el seguimientu de la fuelga en toles estayes foi total.

De magar les 12 de la mañana CSI, CXT y SUATEA, xunto a la participación de CNT, desendolcaron la so manifestación peles cais de Xixón, con una importante participación cifrada nunes 15.000 persones que percorrieron les cais de la ciudá nun ambiente combativu, vindicativu, y tamién de refugu pa col sindicalismu mayoritariu.

Pel so lláu, l'actu central de los sindicatos mayoritarios foi una manifestación masiva peles cais d'Uviéu, con una participación d'alrodiu de 100.000 persones nún de los manifestamientos más masivos de los caberos años n'Asturies. UGT, CC.OO y USO participaron na marcha, xunto a un bloque críticu averáu al "15M" que s'amestó a la marcha de mena independiente.

La xornada saldose con cuatro persones que conformaben piquetes informativos deteníes, ensin munches más incidencies a destacar -salvo les avezaes actuaciones policiales de calter represivu- dientru d'una xornada de combatividá y participación masiva nel nuesu país, que xunto a Euskal Herría rexistró les mayores cifres de seguimientu.

Fonte: Infoasturies

Blogue peslláu por fuelga xeneral.

Esti blogue tará ensín actualizaciones demientres dure'l día 29 de marzu en solidaridá con toles víctimes de l'agresión capitalista qu'España impón n'Asturies y nel restu de pueblos del Estáu Español.

¡Que razón tien el guah.in!

Rosa Díez entama a manexar los asuntos d'Asturies cola so autocracia y el so españolismu pro-falangista.

Rosa Díez quier un gobiernu estable p’Asturies que piense en clave estatal

La líder d’UPyD, Rosa Díez, formación que con un solu escañu pue ser llave de gobiernu n’Asturies, pide pal país un gobiernu estable que piense en clave estatal. Nun quixo adelantar con quién pautaría.

Díez insistió que faen falta "pautos d’estáu con perspeutiva ‘nacional’". "Hai que frayar esa política de bloques contra bloques, de sigles contra sigles, porque lo que necesita’l nuesu ‘país’ ye altor de mires y grandes políticas d’estáu", señaló pa depués añadir que "nun creemos en facer una o otra mayoría, sinón facer un gobierno estable n’Asturies que piense en clave ‘nacional’ y qu’enfrente los problemes graves de los asturianos. Que contribuya a la gobernabilidá d’España; que nos alloñe d’esta situación de comunidaes frente a comunidaes. Eso ye horrible pal nuesu ‘país’ y el nuesu discursu ye ési, síamos o non determinantes".

La ex socialista, que fixo estes declaraciones a EsRadio, tamién dixo entender “que’l PSOE y IX mantengan esi discursu del bloque de la izquierda contra la derecha y la derecha se crea que namái pue gobernar con mayoría absoluta", esplicó. Otra manera, sobre les eleiciones andaluces, comentó que-y paez "menos razonable" que los conservadores asuman esi discursu "de bloque frente a bloque hasta l’estremo de facer lo que fixo Arenas na nueche eleutoral". “Creo que quien ganó les eleiciones n’Andalucía ye’l PP, que tiene qu’aniciar un procesu de dialogu col restu de fuercies polítiques para crear un gobiernu de concentración", manifestó.

Fonte: Asturies.com

¡Fuelga, fuelga fuelga! ¡Fuelga xeneral!

Dende Asturies, p'Asturies, pa los pueblos y contra'l capital. Poro, contra los poltroneros, la banca, la patronal y los sindicatos traidores y corruptos. ¡FUELGA CONTRA ELLOS!

L’Ateneo de Lengua y Cultura Guaraní sofita dende Paraguái la reivindicación llingüística n’Asturies

La entidá de carauter científico-cultural Ateneo de Cultura y Lengua Guaraní amosó nuna comunicación oficial la so solidaridá col movimientu asturianu de reivindicación llingüística. El 90 por cientu de los paraguayos fala esti idioma.

David Galeano Olivera, direutor xeneral del Ateneo, robla una carta unviada a Iniciativa pol Asturianu nel qu’amuesa la so solidaridá col movimientu de reivindicación llingüística tres conocer l’actividá que desarrolla tanto esti coleutivu como la Xunta pola Defensa de la Llingua Asturiana. El paraguayu considera’l nuesu idioma como una “valiosa, xenuina y histórica manifestación de la cultura” d’Asturies y defende que los sos falantes, responsables del so caltenimientu y tresmisión, “tienen tol derechu del mundu –como derechu humanu y llingüísticu– d’espresase na so llingua llariega”, yá que resume la “historia y manera de ser de la xente asturiano”.

L’Ateneo defínese como una entidá xurídica, autónoma, civil y progresista, con caráuter científico-cultural, que se fundó’l 23 de setiembre de 1985. Foi declaráu d’interés cultural-educativu pol Viceministeriu de Cultura y desendolca cursos de guaraní y actividaes de promoción cultural en Paraguái. El so oxetivu ye trabayar na investigación, recuperación, promoción, difusión, valoración, proteición y xerarquzación “constante, efeutiva y sistemática” de la llingua y cultura guaraní. Esti idioma d’orixe precolonial, oficial xunto col castellanu en Paraguái dende’l 1992, tamién se fala en zones d’Arxentina, Bolivia y Brasil y tien anguaño un total de 8 millones de falantes.

Dende Iniciativa pol Asturiana agradecen les pallabres de sofitu d’esta institución y quier facer pública “la nuesa más fonda simpatía faza esta llingua y cultura, símbolu d’un país tan prósimu al de nueso por razones históriques y sociales, yá que, d’igual mena qu’asocede col asturianu, nun dexa de ser patrimoniu de toos y toes, y nuesa ye la responsabilidá de nun la dexar desapaecer”.

FONTE: Asturies.com

Posicionamientu de Darréu énte la fuelga xeneral.

Dende la mocedá independentista y revolucionario queremos pronuncianos alrodiu de la fuelga xeneral convocada a nivel estatal y que, polo tanto, tendrá’l so desendolcu na nuesa nación.Otra vegada más, les centrales sindicales de CC.OO y UGT realicen una convocatoria de fuelga xeneral con retrasu, de la mesma manera qu’ocurrió n’anterior reforma llaboral desendolcada pol PSOE y que tuvo la so correspondiente xornada de fuelga, al igual qu’ésta vegada, dacuando la mesma yá ta siendo aplicada nos centros de trabayu en perxuiciu de los y les trabayadores afeutaes.

D’otru lláu, consideramos que la convocatoria de fuelga xeneral ta más que xustificada, y non sólo pola regresiva reforma llaboral aprobada pol gobiernu estatal formáu pol PP, sinón que también pola situación xeneral de crisis económica, llaboral, social, identitaria, cultural, etc. que dende va décades vien careciendo’l nuesu país. Sicasí, también ye evidente que dende’l sindicalismu mayoritariu enxamás se da una rempuesta específica que correspuenda al ámbitu asturianu, sinón que ye necesario que les centrales sindicales a nivel estatal dean la orde pa entamar a movilizase.

Poro, el sofitu de Darréu a la xornada de fuelga hai qu’atalantalu dientru del contestu xeneral de la nuesa nación, na que ye pernecesariu tou actu de protesta y contestación social escontra les élites polítiques y económiques que somorguien al nuesu país y los sos intereses a los de so, asina como a los intereses del estáu. Al mesmu tiempu, denunciamos la inoperancia a nivel autónomu de CC.OO y UGT d’Asturies , nun respondiendo polo tanto a los intereses concretos de la clas obrera asturiana, que vien requiriendo movilización dende va años ensin atopar rempuesta dala dende’l sindicalismu mayoritariu.

Amás, Darréu vindica una vegada más que la igua pa la situación xeneral del país, y nesti casu concretu pa la igua de les dificultaes que’l pueblu trabayador asturianu atopa nel tarrén llaboral, asina como la perda de drechos que vien sufriendo, ta na soberanía del pueblu asturianu, ye dicir, que’l pueblu asturianu seya quién a decidir el marcu de rellaciones llaborales nel que desenvolvese, atendiendo namái qu’a les necesidades concretes y especifiques de la nuesa clas obrera. Pa ello, como ye evidente, ye necesariu un nivel munchísimo mayor de soberanía nel tarrén políticu, dalgo poco factible cola actual estructura política ocupada por partíos que son dirixíos dende la capital del Reinu d’España.

Del mesmu móu que puxamos pola soberanía, dende la mocedá independentista camentamos una vegada más que’l pueblu asturianu nun tien otru camín qu’avanzar haza’l socialismu, considerando que baxo ési sistema nun se produciríen los atropellos a los drechos del pueblu trabayador que sí se desendolquen baxo la cadarma capitalista, n’actualidá na modalidá neoliberal. Amás d’ello, nun concebimos un pueblu soberanu dafechu que nun furrule baxo criterios socialistes, polo que la demanda de soberanía y socialismu van de la mano pa la nuesa organización.

En definitiva, Darréu vindica la soberanía y el socialismu como camín pa qu’Asturies algame los sos drechos como pueblu, y pa que’l propiu pueblu trabayador nun se vea agredíu mediante la regresión nes sos condiciones.

Tamién animamos a tola población, n’especial a la xente mozo, a secundar la xornada de fuelga’l prósimu xueves 29 de Marzu y a movilizase en defensa de los sos drechos llaborales dende criterios de clas, y de sofitu a les organizaciones sociales, polítiques y sindicales que dende l’espaciu alternativu tan trabayando pola movilización obrera dende un prima combativu’l prósimu xueves.

www.darreu.org

¿Castigu a la clase política o crisis ideolóxica?

De los resultaos del 25M munchos destacaremos como lo más llamativo l’altu índiz d’abstención. Pero, ¿cómo interpretar l’abstención? El sistema elleutoral, incluso con una participación de tan sólo’l 30%, da por llexítimos los resultaos elleutorales. Poro, hai quien valora l’abstención como un actu d’inconsciencia, d’apatía, de conformidá col estáu de les coses y de conformidá colos que ganen les elleiciones. Sicasí, pa otros l’abstención ye l’alternativa de los descontentos, de los que refuguen el sistema o nun s’identifiquen con denguna de les opciones polítiques. A la fin l’abstención, mui de xuru nel casu d’Asturies, representa un poco de los dos estremos.

Párome a analizar l’abstención porque camiento no que vien darréu: Los que tampoco nun creemos nel sistema pero sí presentamos candidatures con fuerte conteníu ideoloxicu alternativu terminamos por ser de siempres los que más sofrimos el castigu de l’abstención.

Los resultaos de les opciones polítiques que nos presentamos a les elecciones plantegando alternatives más ideoloxizaes p’Asturies tuvimos en xeneral un sofitu insignificante mientres que los grandes partios institucionales -PSOE, IU, FORO y PP- anque perdieran cuantitativamente en númberu de votos repártense igualmente’l mesmu númberu d’escaños del que se compón la Xunta Xeneral. Poro, camiento que nun se pué falar de castigu a la clase política cuando ellos, independientemente de l’abstención, tienen garantizada la so poltrona. Aporto asina a la primera conclusión: sí ye cierto que l’abstención revélanos qu’esiste una creciente disconformidá col sistema pero nun ye cierto que l’abstención supunxera un castigu a la clas política.

Pero nun sólo eso, el tipu d’electores de la drecha o de la falsa izquierda que representa’l PSOE ye un eleutoráu mui fiel y que participa siempres cásique a preba de fuéu (el casu del PSOE ye mui paradigmaticu d’esto ganando les elleiciones n’Asturies pesie a los casos de corrupción y la so responsabilidá direuta na crisis asturiana). Pela contra, el coleutivu de xente que nun participa, aunque ye difícil de dixebrar en qué gráu lo fai por apatía o d’una forma activa y consciente (equí ye de destacar tamién l’ésitu ente los minoritarios de la formación Escaños en Blanco), tien un componente en xeneral muncho más críticu col sistema y cola clas política, que fae d’esi coleutivu que s’abstien precisamente’l públicu potencial d’aquelles formaciones crítiques tamién col sistema pero que proponen otres alternatives polítiques xeneralmente n’Asturies dende la izquierda, el soberanismu y l’ecoloxismu (Andecha, Bloque-UNA, PCPE, EQUO…).

Dalguien dixo una vez: “Yo nun sé lo que quiero, pero sé lo que nun quiero”. Qu’haya un abanicu d’opciones polítiques con idegues, con propuestes alternatives, con militantes implicaos trabayando por defendeles, con cierta estructura por conceyos y que la gran mayoría de los disconformes prefieran abstenese o votar Escaños en Blanco (EB) posiblemente seya porque n’Asturies la gran crisis yá nun ye sólo la económica, social o política, sinon la crisis ideolóxica. Falten idegues y falten referencies creyibles.

Queda munchu qu’analizar sobre los resultaos del 25M, ésto ye solo un apunte pero selemente y con más tiempu dirán apaeciendo más opiniones y va xenerase más alderique. Dicir que faigo esta aportación con animu constructivu y pa contribuyir a un diálogu seriu y posáu sobre la tema de construyir una alternativa política n’Asturies qu’ilusione y nos puea sacar del pozu.

Ánimu a la xente que tien idegues, que trabayó, que defendió na campaña la so opción política y que votó pensando n’Asturies y nel pueblu asturianu o que s’abstuvo activamente pensando lo mesmo. ¡Contra’l facismu, l’imperialismu y el capitalismu la llucha ideolóxica continúa!

*Mariu Arbesú ye militante d'Andecha Astur y candidatu a la presidencia d'Asturies por Conceyu Abiertu nes elleiciones de Mayu de 2011 .

Convocatoria fuelga xeneral de los sindicatos de clas asturianos

Por una fuelga xeneral asturiana, de clas y con una dinámica continuada nel tiempu. Rueda de prensa de los sindicatos de clas del país: http://www.youtube.com/watch?v=HYYlpt-7PJM&feature=player_embedded

Pela so parte, la izquierda nacionaliega tamién sofita la convocatoria:

La emigración va decidir unes eleiciones marcaes pola participación más baxa de la historia

El votu emigrante va decidir les eleiciones al tener la posibilidá de quitar un escañu a Foro pol occidente pa da-ylu a la FSA. Ello permitiría a UPyD ser llave de gobiernu y podría impidir un pautu posible de la derecha.

El miércoles conoceráse’l resultáu definitivu de les eleiciones tres el recuentu de los votos procedentes de la emigración. El PSOE tien opciones de sumar un escañu más pol occidente a costa de Foro de Ciudadanos, lo que permitiría a Javier Fernández buscar l’apoyu d’Izquierda Xunida y UPyD pa tener una mayoría suficiente pa gobernar el país. En total, el PSOE debería tener 177 votos más que la formación de Francisco Álvarez-Cascos na circunscripción occidental y sumar trés votos por cada uno que tenga Foro, una cantidá que superaría de repetise los resultaos de mayu: naquella ocasión, Fernández tuvo 500 apoyos por 42 de Foro. Sicasí, hai que tener en cuenta que los pidimientos d’emigrantes pa exercer el so derechu al votu baxó de 8.477 a 4.100 y que toles persones que lu soliciten nun acaben votando, como demuestra qu’hai 10 meses terminaren unviando la so papeleta 3.290 persones. Por ello, el PSOE prefier ser prudente y esperar al recuentu.

De dase esti cambiu con respeuto a los resultaos d’ayer, el partíu favoratible en fortalecer l’Estáu y única formación que se muestra abiertamente contraria al asturianu –“el bable/asturiano, en sus diferentes variantes, será objeto de protección. Unión, Progreso y Democracia se opone a la cooficialidad del asturiano” espón la formación de Rosa Díez nel so programa eleutoral– decidiría col so votu si la izquierda o la derecha va gobernar el país nos años próximos: PSOE y IX sumaríen 22 escaños ente los dos, los mesmos que Foro y PP.

Una astención del 44,08 por cientu

Les eleiciones del 25 de marzu del 2012 a la Xunta Xeneral, les primeres anticipaes que vive’l país, rexistraron la participación más baxa de la historia. Nunca los asturianos dieron tanto’l llombu a una convocatoria eleutoral pa decidir el presidente del país, rexistrándose 106.000 votos menos qu’hai diez meses; esto ye, se pasó d’una participación del 66,89 por cientu al 55,92, once puntos menos. Hasta la fecha, la cifra más baxa databa del 1991, cuando votó’l 58,69 por cientu del eleutoráu. La poca confianza de la ciudadanía nos políticos y la situación que llevó a la convocatoria d’esta eleiciones anticipaes espliquen el desánimu de la xente.

A falta namái del recuentu del votu emigrante pa decidir el repartu definitivu d’escaños, el PSOE ye’l ganador de les eleiciones al algamar el 32,01 por cientu del total de votos (159.811) tres medrar poco más de dos puntos (29,02 por cientu nel 2011). Estes cifres permiten-y a Javier Fernández sumar un escañu más, al pasar de 15 a 16. Pela so parte, Foro baxa d’un 29,66 por cientu al 24,83 por cientu (123.979) y pierde trés parllamentarios pa sumar un total de 13. Mentes, el PP nun consiguió medrar en representación pese al cambiu de candidata y Mercedes Fernández algama los mesmos escaños, 10, qu’Isabel Pérez-Espinosa. Los populares pasaron d’un 19,95 por cientu de los votos al 21,53 (107.476).

La xuba mayor ente tolos partíos presentaos nesta cita coles urnes foi’l d’Izquierda Xunida que, pese a la participación menor, consiguió aumentar el so númberu d’apoyos: pasó de 61.703 (10,28 por cientu) xunto con Los Verdes d’Asturies a 68.827 (13,78 por cientu) en solitariu. Asina, la coalición d’izquierdes pasa a tener cinco escaños, unu más qu’en mayu. Tamién medró UPyD, que consigue entrar na Xunta Xeneral na so segunda intentona: de 14.640 votos (2,44 por cientu) a 18.739 (3,75 por cientu). Asina, Ignacio Prendes va ser el representante de la formación nel Parllamentu.

No que respeuta a los resultaos de los partíos nacionalistes asturianos, éstos rexistren ún de los peores resultaos de la so historia: la coalición Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) sumó 1.639 votos, un 0,32 por cientu, mentes qu’Andecha Astur algamó 668 (0,13 por cientu). En total, 2.307 apoyos, un 0,45 por cientu, resultaos mui asemeyaos a los que tuvo na primer convocatoria d’eleiciones pal país nel 1983 l’Ensame Nacionalista Astur (2.505 votos, un 0,44 por cientu). Les cifres algamaes pola formación rexonalista URAS tampoco foron bones al disponer de 444 apoyos (0,08 por cientu), lloñe del 0,49 por cientu de mayu que sumó en coalición col PAS.

La sesta fuercia del país, la primera de la llista d’organizaciones que se queden fuera de la Xunta Xeneral, foi Escaños en Blanco, iniciativa que busca recoyer tol votu en blancu col oxetivu de dexar vacíu los escaños nel casu d’algamar representación, con un 0,82 por cientu de los votos (4.095). Los resultaos del restu de partíos foron los siguientes: Equo-Los Verdes d’Asturies, 2.518 votos (0,50 por cientu); Bloque-UNA-LV-GV, 1.639 (0,32 por cientu); PACMA, 1.395 (0,27 por cientu); PCPE, 772 (0,15 por cientu); Idas-Hartos.org, 737 (0,14 por cientu); Andecha Astur, 668 (0,13 por cientu); URAS, 444 (0,08 por cientu); PDYC, 230 (0,04 por cientu); MSR, 178 (0,03 por cientu); SaiN, 176 (0,03 por cientu); UCE, 167 (0,03 por cientu); Agrupación de Electores Auseva Red, 55 (0,01 por cientu); Partido Humanista, 26; Partido da Terra Eo-Navia, 13; y Partido Familia y Vida, 5.

El númbero de votos en blanco y nulos tamién baxaron nesta ocasión. Nel casu de los primeros, pasaron d’un 2,60 por cientu a un 1,43 por cientu, mentes que los votos nun válidos menguaron d’un 1,44 a un 0,85 por cientu.

Fonte: Asturies.com

Más miseria pal Pueblu Trabayador Asturianu.

El comité d’empresa de Saint-Gobain llama a consulta sobre la "reorganización" del personal

Supresión de 25 puestos de trabayu na Maruca.

El comité d'empresa de Saint-Gobain organiza güei y mañana una consulta destinada a determinar la rempuesta de la plantilla énte'l plan de "reorganizaciós" del personal presentáu pola direición de la compañía, consistente na supresión de 25 puestos de trabayu de la llinia de producción de Sekurit, que sedríen destinaos a otres estayes de trabayu, y "en nengún casu al despidu", según despliquen dende la multinacional.

Sicasí, dende'l comité d'empresa consideren que los 25 puestos de trabayu que sedríen suprimíos na planta de La Maruca deben cuntar cola aprobación o refugu de la plantilla de la compañía, afitando en tou casu que'l so enfotu ye garantizar la viabilidá de la factoría perteneciente a una compañía que medró los sos beneficios un 5% el pasáu añu.

Arcelor menguará la so plantilla de Veriña en 177 trabayadores

Cifres definitives del recorte na plantilla de la multinacional.


La direición d'ArcelorMittal y el comité d'empresa punxeron fin a les negociaciones alrodiu de la mengua na plantilla de les instalaciones que la multinacional caltién en Veriña (Xixón), con un balance final de 177 puestos de trabayu afeutaos frente a los 200 qu'en principiu quería suprimir la multinacional, nuna operación de llaváu d'imaxe pa una compañía siderúrxica qu'amenaza cola desllocalización en casu de que nun se cumpla la so voluntá.

Finalmente, el repartu de la supresion de puestos de trabayu queda repartíu d'esta mena: 77 puestos n'Acería, 25 en Carril, 48 n'Allambrón y 27 en Talleres Auxiliares, a cambiu d'una inversión de 3,4 millones en meyores teunolóxiques na estaya productiva necesaria pa facer competitiva la factoría, y que la multinacional somorguiaba a la elliminación de les casi dos centenes de puestos de trabayu que perderá'l seutor siderúrxicu asturianu.

El sindicalismu de clas tornó a movilizase de forma masiva.

El sindicalismu de clas asturianu tornó a salir a la cai en Xixón pa movilizase escontra la Reforma Llaboral del Gobiernu ( y escontra la del anterior tamién) y col envís de facer ver a la sociedá asturiano un caltenimientu na organización y práutica tresformadora nel nuestru país en pro de los nuesos drechos como trabayadores y puxando pola superación del xenocida sistema capitalista. La marcha axuntó a miles de persones, munches d'elles moces, pero tamién otres más avieyaes, síntome del quemazu coleutivu que ta creando'l capital. Asina, dende CSI, CXT y SUATEA llamaron a la fuelga xeneral, pero non a la fuelga de les grandes empreses-sindicatu CCOO y UGT, sinon a una fuelga xeneral del Pueblu Asturianu col únicu suxetu coleutivu que'l mesmu. En tou momentu hebo un gran dispositivu policial, con axentes con chalecos antibales inclusive, dalgo patéticu daveres. La Policia Nacional Española trató d'amedrantar a los ciudadanos que salieron a reivincar futuru p'Asturies pero nun lo consiguió de dengún mou.

Ye perimportante puxar pol enfoque que dan de la movilización del xueves los sindicatos asturianos, llamando a la movilización activa, consciente, crítica y ensín cayer nel xuegu de los sindicatos amariellos y vendeobrerxs del capital CCOO y UGT. Asina pues, dende equí llamamos a aprovechar la fuelga xeneral del prósimu xueves como l'entamu d'una dinámica de contestación social y popular fuerte en defensa de los drechos coleutivos del Pueblu Trabayador Asturianu, de la nuesa nación y de tolos pueblos. Amestar soberanía nacional y socialismu sigui siendo obligatoriu, pues ye obviu qu'ensín poder ser dueños del nuesu futuru los asturianos y asturianes vamos siguir viviendo baxo estes condiciones precaries y esclavistes que mos imponen dende Madrí y la gran Europa del capital.

¡PUXA'L PUEBLU TRABAYADOR ASTURIANU!

¡PUXA ASTURIES SOCIALISTA Y SOBERANA!

Que nun se-y escaeza a naide:

Actu fin de campaña d'Andecha Astur

Esti vienres 23 Andecha Astur cellebra un actu fin de campaña n'Uviéu (Cai Paraisu, 2) de magar les 20:00 hores. L'actu consiste nun mitín con delles intervenciones polítiques y la participación del candidatu a la Presidencia del "Principado". Dempués una espicha rematará dos selmanes d'intensu trabayu por esparder el mensaxe de la izquierda nacionaliega, L'ASTURIES QUE NUN SE RINDE.

El capitalismu europeo quier destruyir la estructura territorial tradicional asturiana de conceyos.

Conseyu d'Europa propón nuevos criterios pal establecimientu de conceyos

N'Asturies sólo sedríen viables 21 conceyos.

El Conseyu d'Europa fizo públicu un estudiu nel que, como principal conclusión, recomienda que'l tamañu mínimu de los conceyos atope como criteriu principal el númberu d'habitantes, qu'afita n'al menos 10.400 persones pa facer viable un conceyu económicamente, anque atendiendo a otros criterios como la caltenibilidá urbanístico la cifra medra hasta les 11.600 persones. D'otra miente, consideren que pa xestionar eficazmente los organismos de control son necesaries 9.800 habitantes, demientres que pa garantizar servicios sociales de calidá son requeríes 8.200 persones.

Baxo'l primer criteriu -ye dicir, el mínimu de 10.400 persones en cada conceyu pa facelu viable económicamente-, la cadarma municipal asturianu menguaría hasta los 21 conceyos, frente a los 78 qu'anguaño dividen el nuesu territoriu. Según paez, la intención del gobiernu estatal ye la de "revisar" la estructura municipal de tol estáu español, con previsibles fusiones de conceyos que, práuticamente con toa seguridá, atenderán el criteriu de la viabilidá económica.

Fonte: Infoasturies

Toes y toos a la manifestación de mañana en Xixón.

MANIFESTACIÓN DE CSI, CXT Y SUATEA EN XIXÓN, EL 22 DE MARZU

El prósimu xueves 22 de marzu, a les 19:30 h., na plaza L’Humedal, de Xixón, va entamar una manifestación convocada pola Corriente Sindical d’Izquierda, CXT y SUATEA “Contra la Reforma Llaboral, los recortes sociales y los ataques del capital”.

La realidá fa...la por sí mesma. Yá algamamos la cifra de 100.000 paraos y paraes n’Asturies y de 6 millones nel conxuntu l’Estáu español. Un millón y mediu de families, 35.000 d’élles asturianes, tienen a tolos sos miembros en paru; más de la metada los y les pensionistes cobren menos de 600 euros; el 50% de la mocedá ta nel paru; medio millón de families perdieren yá les sos viviendes y una de cada cuatru presones (el 25% la población) anda a la raya la probitú.

Pero, el Gobiernu del Estáu español yá anunció nueos recortes por valor d’unos 50.000 millones d’euros. Al empar, les sucesives reformes llaborales, los recortes sociales y les privatizaciones van facer xorrecer el paru y tornar el drechu a la Salú, la Educación y los Servicios Sociales nun privilexu al que namás van poder aceder aquéllos que puedan pagalu.

Pa la CSI, la cabera Reforma Llaboral ta fecha al dictáu de la Patronal, porque pon fin a tolos drechos de los y les trabayadores, déxanos na indefensión dafechu y tórnanos en simples mercancíes en manes d’empresarios y especuladores.

En CSI, nun vamos aceutar denguna negociación sobro esta Reforma Llaboral y desiximos la so retirada darréu, asina comu del Acuerdu pol Emplegu y la Negociación Coleutiva, apautáu anteriormente por CCOO, UXT y la Patronal.

Refugamos, asinamesmo, del entreguismu de las burocracias sindicales de CCOO y UXT, que nun quisieron apurrir igües nel pasáu nin van apurriles nel futuru.

Pa les y los trabayadores, les coses namás van camudar cuandu entamemos un camín de movilización y defensa de los nuesos drechos na cai y nos centros de trabayu, con tolos medios que tengamos al nuesu alcance. A los y les trabayadores namás nos queda una igua: ganar na cai lo que nos quiten nos despachos.

Xornaes antifacistes n'Uviéu

Partido da terra: Pangalleguismu agresivu y anti-asturianu.

Equí podemos ver a componentes del Partido da Terra, que se presenta a les eleiciones del 25 de marzu a la Xunta Xeneral d'Asturies pola circunscripción occidental cola so bandera nacional detrás. Contrasta esta semeya coles sos declaraciones y comunicaciones en medios de prensa asturianos demientres tola campaña eleutoral. Ye bien murnio'l xuegu que ta faciendo esta marca blanca de los seutores más reaccionarios y anexonistes del frayáu BNG nel nuesu país.

Ca persona ye llibre de pensar lo que-y pete, pero sinceramente'l nacionalismu asturianu ( en tol so conxuntu y con tola so heteroxeneidá) yá ta tardando en dar una rempuesta xunitaria a esta agresión a la nuesa soberanía nacional y a la solidaridá ente pueblos en llucha. El nuesu territoriu asturianu merez respetu y esta xente nun ta respetando la nuesa nación. Y nun se trata d'entrar n'alderiques chovinistes y territorialistes, pero ye que yá que quieren imponer les llendes gallegues más allá del Eo que lo digan de frenti, que nun seyan falsos y falses.

¡Nin colonialismu español nin anexionismu gallegu!

¿Por qué votar a la formación política Andecha Astur el prósimu 25 de marzu?

• Porque ye la única candidatura de les presentaes nel país que nun tien dengún problema a la hora de referise a Asturies como una nación estremada, y polo tanto, desixe como formación patriota unos drechos nacionales qu'entiende que-y cuerresponden al Pueblu Asturianu. Poro, podemos falar d'Andecha Astur como única organización del país qu'asume'l problema nacional qu'hai y quier da-y solución d'una forma democrática, popular y ensín medies tintes.
• Porque ye firma defensora de la llingua asturiana en tol territoriu nacional, reconociendo la heteroxeneidá de la mesma pero oponiéndose de forma firme a les estratexes pangalleguistes que ciertos seutores del nacionalismu gallegu lleven alantre cola escusa de la fala o l'eo-naviegu. Amás, entiende que l'únicu pasu que pue da-y vida nel futuru a la llingua'l país ye la completa oficialidá de la mesma, fuxendo de reformes llingüístiques que nun lleven a dengún puertu y midies minimalistes y folclóriques que nun van salvar l'idioma.
• Porque entiende que la crisis económica qu'anguañu vivimos ye una crisis capitalista y que la salida a esa situación ye la soberanía nacional d'Asturies y una alternativa de bas socialista revolucionaria al capitalismu. Amás, nun ñega como organización que n'Asturies llevamos más de 30 años de crisis estructural, cosa que nun reconocen munches de les organizaciones que presenten candidatura.
• Votar Andecha Astur ye un votu anticapitalista, socialista y revolucionario. Ye un votu al serviciu del Pueblu Trabayador Asturianu y non al serviciu de la oligarquía española o pseudo-asturiana. Andecha Astur defendi la realidá de división social ente clases sociales, al contrariu qu'otres formaciones que se dicen d'izquierda alternativa pero que tan amarraes por un mensaxe reformistam que nun ye daveres revolucionario nin busca tresformar la realidá.
• Andecha Astur fexo demientres estos años un llabor pervaloratible nel campu de la defensa ecolóxica del país, denunciando situaciones d'especulación y maltratu de la fauna y flora del país. Votar Andecha ye votar a favor de la preservación de la ñatura y contra les polítiques del formigón. Ye votar a favor del turismu caltenible, y non del modelu que la FSA y depués FAC impulsaron, murniamente asemeyáu al modelu mafiosu marbellí y de Costa Brava.
• Porque la organización AA si qu'asume de verdá otra forma de facer política, puxando poles sestaferies, los conceyos abiertos y la democracia participativa. La inclusión d'AA nes istituciones ye col envís de facer contra-poder, nunca asumir el mundu de los grandes gurus de la política de corbata y chofer. Poro, votando a Andecha Astur nun tas dando un votu personalista, sinon que tas faciendo qu'amplios seutores ya esmolecimientos del pueblu entren nes istituciones d'una vegada por toes, ensín cuestiones triviales, sinon cuestionando tola realidá d'una forma sincera, crítica y superadora.
• Depositar el votu p'Andecha Astur val más que nun votar, votar en blanco o votar nulu. L'abstención, por mui organizada que la quiera pintar muncha xente siempres beneficia a los poderosos, polo que una opción como Andecha Astur fai dañu, una organización armada de ganes de defender el país con munchu trabayu militante y coherente y tresformador mensaxe.
• Porqu'Asturies lleva en manes de traidores, corruptos, personaxes ensín escrúpulos y facistes más de 30 años y yá ye hora de dar una vuelta de tuerca, poro, da-yos onde más-yos duel: VOTA ANDECHA ASTUR.

Seis de los diez partíos más votaos n’Asturies lleven la oficialidá nel so programa eleutoral

Iniciativa pol Asturianu señala, tres repasar tolos programes eleutorales de los partíos que se presenten al 25-M, que seis de los diez más votaos lleven la oficialidá nel so programa. UPyD ye l’únicu que se manifiesta contrariu dafechu.

Les formaciones qu’apuesten pola oficialidá nos sos programes son Izquierda Xunida, Bloque por Asturies-UNA-LV-GV, Ideas-Hartos.org, Equo-LV, Andecha Astur, PCPE, URAS y Partido da Terra Eo-Navia. Mentes, FSA-PSOE, PP y Foro de Ciudadanos, trés de les cuatro organizaciones con representación na Xunta Xeneral, siguen ensin apoyala, “anque inclúin cada vegada más acciones empobinaes a la normalización del idioma”, destaquen dende Iniciativa pol Asturianu. Inclusive, hasta’l MSR, únicu partíu d’estrema derecha que se presenta a les eleiciones por Asturies, sorprende cola inclusión de la llingua asturiana na so propaganda eleutoral repartida per Xixón.

“Dende Iniciativa pol Asturianu recordamos que les encuestes sociollingüístiques demuestren que más del 60 por cientu de los asturianos apoyen que l’asturianu se convierta en llingua oficial n’Asturies, polo qu’entendemos que tolos partíos habríen responder a esta demanda social que ye la ferramienta de la oficialidá, imprescindible pa que podamos conservar l’importante patrimoniu cultural y económicu que ye l’asturianu”, aseguren

Fonte: Asturies.com

Apara'l facismu.

Asturies, caltién la dignidá y nun te rindas contra l'enemigu de siempres.  

A la fuelga xeneral, ¡pero a la del Pueblu Asturianu!

El prósimu 29 de marzu, xueves, ta convocada una fuelga xeneral en tol Estáu Español poles grandes centrales sindicales CCOO-UGT. El principal motivu ye l'agresivu ataque del capital a la sociedá materializáu na cabera Reforma Llaboral. Esti prósimu 29-M hai que dir a la fuelga, siempres y cuando nun caigamos na trampa de la burocracia sindical-capitalista y españolista.

CCOO-UGT asumen el llideralgu d'esa xornada pero nun se pue permitir tala cosa. Ellos nun representen la defensa de la clas trabayadora, sinón que representen lo pior del cáncanu capitalista: caciquismu, venta masiva de trabayadores, corrupción, imposición, collaboracionismu, burocratización, etc. Asina pues, compañeru/a, fai fuelga xeneral contra la reforma llaboral, la crisis capitalista, les imposiciones d'España y la defensa de los pocos drechos coleutivos que mos queden. Fai fuelga pola soberanía económica, política y social d'Asturies, por una alternativa revolucionaria a la sociedá de mercáu capitalista, pol socialismu.
Pero nunca vos dexéis llevar poles proclames neolliberales d'esos grandes sindicatos-empresa, que lo únicu que busquen ye ganar dineru, repartir puestinos ente los sos cabezaleros y pautar cola patronal y el gran capital español y europeo. El prósimu xueves 29 de marzu tien de ser una perimportante xornada de llucha, crítica y organización de la clas obrera baxo criterios de clas y de país.

¡ASTURIES POLA FUELGA XENERAL!

¡ASTURIES CONTRA LES IMPOSICIONES DEL CAPITAL ESPAÑOL!

¡CCOO-UGT TRAIDORES Y VENDIOS!

141 aniversariu de la Comuña de París.

El 18 de marzu de 1871 entamó una insurreción ensín precedentes nel París post-revolucionario burgués. El Pueblu Trabayaor ocupó'l poder demientres 60 díes y punxo en práutica un programa revolucionariu, de calter marxista y rupturista col orde burgués. Foi'l primer gran llevantamientu del movimientu obreru y popular n'Europa depués de la espublización de llibros tan sinificativos como'l Manifiestu Comunista de Carlos Marx y Federicu Engels.

Depués de 141 años d'aquella fazaña, que foi aparada cola más sangrina represión de la benevolente y democrática burguesía, siguimos en llucha. La esplotación sigui siendo una realidá, la calidá de vida va cayendo en picáu pal conxuntu'l Pueblu Trabayaor y el gran capital sigui faciendo pagar los sos escesos a los de siempres. 141 años depués ye necesariu otru llevantamientu, de calter popular, pa derrocar esti orde que ta finando cola poca dignidá de les persones.

El capitalismu va pasar a la hestoria, les lleis del movimientu marxista internacional, del socialismu científicu de Marx, Engels, Lenin ya otros grandes teóricos son irretrucables y van tornar a inspirar a tola xente trabayadora nesti siglu XXI como lo fixieron nel anterior sieglu. Por eso, a 141 años de los socesos de París dende Asturies tenemos de reclamar una nueva ofensiva contra tolo maquinaria esplotadora y represiva del orde burgués. Y eso faise por etapes, y anque tamos entamando, hai de puxar poles meyores formes d'organización, contestación y aición.

¡Puxa la Comuña Revolucionaria de París!

¡Socialismu o Barbarie!

Andecha Astur propón un Marcu Asturianu de Rellaciones Llaborales

Nel trescursu de la campaña ellectoral, el candidatu d'Andecha Astur a la presidencia del "Principado" Arturu Xosé Bermeyu espunxo la propuesta de Marcu Asturianu de Rellaciones Llaborales. "La non aplicación de la Reforma Llaboral española poles alministraciones asturianes y la promoción dende’l propiu gobiernu d’Asturies xunta los axentes sociales d’un ámbitu propiu pa les rellaciones llaborales col firme propósitu de parar les sucesives reformes de calter neoliberal que mos imponen dende’l ambitu estatal condiciones llaborales indignes ye un oxetivu prioritariu", sorrayó.

Asina mesmo, Andecha Astur ve la necesidá d’un Conveniu Públicu de Collaboración con Entidaes de Creitu pa facilitar l’acesu a la financiación de les PYMES y autónomos asturianos. "L’alministración asturiana pondría a dimposición de los interesaos llinies de financiación preferentes al travies de los Convenios de Collaboración soscritos con entidaes qu’operen n’Asturies comu Caxa Rural d’Asturies o Caxastur intentando progresivamente mediante convenios asemeyaos recuperar el calter públicu y nacional d’estes entidaes asturianes", desplicó Bermeyu.

Más de mediu millar d'ayeranos y ayeranes protestaron cortando la carretera

En refugu al recorte de fondos mineros.

Güei sábadu más de quinientos vecinos y vecines del conceyu d'Ayer desendolcaron una aición de protesta en refugu del recorte de fondos mineros y pa vindicar una ameyora de les comunicaciones nel conceyu. Ye por ello que la protesta, convocada por delles asociaciones del conceyu, cortaron la carretera AS-112 durante aprosimadamente una hora.

Dende los convocantes anuncien que ye l'entamu de más aiciones de protesta, y cunten col enfotu d'esparder l'aniciativa pente los demás conceyos de les cuenques mineres porque "si quedamos ensin fondos mineros, quedamos ensin infraestructures", considerando los vecinos y vecines que les actuales son deficitaries.

Fonte: Infoasturies.net

Andecha Astur denuncia énte la Xunta Elleutoral Provincial la retirada de propaganda elleutoral en Xixón

El Serviciu Municipal de Llimpieza de Xixón retiró toles pancartes y bona parte de la cartelería elleutoral d’Andecha Astur

Andecha Astur denunció énte la Xunta Elleutoral Provincial la retirada de la so propaganda elleutoral por parte del Serviciu Municipal de Llimpieza de Xixón.

Esti fechu, comprobáu por miembros d’Andecha Astur, supón una amuesa más de la falta de respetu democráticu esistente nel Conceyu Xixón, asina comu les práuticamente nules garantíes democrátiques coles que cunten les formaciones polítiques que caltienen una llinia de rempuesta y resistencia a les polítiques de los partíos qu’agora mesmo son mayoritaries.

La desigualdá del repartu de los espacios elleutorales, el bloquéu sistemáticu polos medios de comunicación y la falta de garantíes pa poder llevar alantre una campaña na cai, fain qu’una vuelta más, Andecha Astur vease obligada a participar nunes condiciones d’inferioridá que nun debieren dase nuna situación democrática.

 

www.andecha.org

Marzu 2012: Xornaes antiracistes.

Asturies llibre, Poder Popular

¿Qué ye eso d'una Asturies Llibre con Poder Popular? 

Anguañu, el gran capital, la banca, los burócrates, el seutor financieru, les multinacionales y la "mediana" y "gran" patronal desixen al Pueblu Trabayador sacrificios pa finar cola crisis, imponiendo retayos y mensaxes coleutivos d'asimilación por mediu de los sos títeres pseudo-políticos. Asturies, qu'anque la so crisis yá vien de cuantayá, carez una situación inda más crítica qu'enantes, con más de 100.000 paraes/os. Siguimos siendo una colonia, entregada dafechu a Madrí y l'españolismu políticu-económicu. Somos una nación que nun tien dengún tipu de privilexiu respeutu al conxuntu l'Estáu Español, en denguna materia podemos superar esi agraviu comparativu, que va camín de convertise nun elementu estructural más del perfil social asturianu. El modelu llaboral , enerxéticu, llingüísticu, estatutariu o políticu avalen esa teoría de forma irretrucable.

La situación de la nuesa nación ye polo tanto desesperante. El Pueblu Trabayador Asturianu ye agora muncho más probe qu'hai años, pesie a que la situación d'aquelles nun yera bona. El momentu que tamos viviendo, con una crisis capitalista de la que se tan beneficiando los ricos, ta faciendo que'l colapso social agreda a la clas trabayadora, ye dicir, a la cuasi totalidá del Pueblu Asturianu. Los drechos algamos van cayendo y la banca y los grandes contratistes van embargando. El nivel de suicidios y enfermedaes psicolóxiques medra y la conflictividá social y contestataria sigui abondo parada. En resume, tenemos una sociedá construyía que entama a amosar síntomes de desgaste pero qu'entá va tener cuerda, pues el Pueblu Asturianu tien dellos problemes y torgues d'estremáu calter pa escomencipiar una estratexa y una taútica organizativa que faiga al país superar el modelu actual, abrazar la democracia popular y lliberase como suxetu políticu nacional.

L'Asturies llibre de la que tantu faló'l nacionalismu/soberanismu asturianu nestos trenta años d'esistencia carez ca día más xaciu. Pesie a la poca efectividá d'esi movimientu políticu y la poca influencia na sociedá'l discursu de máximos sigui valiendo como proyeutu futuru. Una Asturies llibre sinifica una Asturies independiente daveres. ¿Tien xaciu qu'Asturies algame un status d'independencia? La rempuesta ye que sí. La conceptualización del imperialismu, la interpretación d'estructuración de la sociedá en clases sociales y la propia inercia lleven dando pie a movimientos políticos internacionalistes en tol mundu que se reclamen al empar nacionaliegos, soberanistes, patriotes o independentistes. La soberanía nacional d'un país ye clave pa construyir una braera alternativa al capitalismu nun mundu globalizáu de forma perversa, con un imperiu reinante y con dellos imperios de segundu orde siguiendo la direición del primer. Poro, los y les marxistes revolucionarios d'Asturies, independientemente de la so orientación tienen de decatase de la necesidá de facer medrar la concencia nacional y asumila ellos/es pa facilitar un modelu socialista n'Asturies. Cada nación tien de formar la so barricada al capitalismu y l'imperialismu, superando conflictos etnocentristes y avanzando con trabayu cooperativu y solidariu na construcción d'un mundu meyor, una necesidá pa les mases y por supuestu p'Asturies.

Viendo'l cursu de la hestoria, sobre manera del sieglu XX: ¿Daquién imaxina que'l Vietnan Socialista hubiere apostáu por una República Francesa Socialista n'onde ellos tuvieren cabida?  ¿Por qué entós otru imperiu, nesti casu l'español, tien de remanar anque seya en Réxime Socialista los intereses d'Asturies?. Anque dexe de tener relaciones d'imperiu y comportamientos nesi mesmu sen, ¿pue falase de socialismu y revolución nun contestu que reproduce y continua con una estructural nacional y xeográfica de tipu capitalista ya imperialista?. ¿Por qué n'Asturies, que ye una colonia con toles de la llei, hai persones que son o dicen ser revolucionaries, y al empar defender un marcu español d'actuación y referencia? La comparanza Asturies - Vietnan ye una desaxeración, sí, fueron y son realidaes estremaes, pero hemos de ser conscientes de que nun esiste un solu tipu de modelu imperialista. L'Español ye un imperialismu hestóricu que ñaz yá na xénesis del Reinu de Castiella.

Son cuestiones que nun tan mui analizaes, en concretu l'anterior referencia clara a esi ciertu xacobinismu de parte de la izquierda marxista n'Asturies. Hai que superar esi desafortunáu analis y problema del movimientu popular asturianu. La hestoria da munches lleiciones y sacamos en claro que puxar por una Asturies llibre, o ye lo mesmu, puxar polos pueblos, va de la man de la lliberación social. Los imperios son contrarrevolucionarios, l'Estáu Español ye un Estáu marcadamente contrarrevolucionariu y la idea d'España ye fondamente facista, y tien el son fundamentu principal nesti tipu d'idees reacionaries. Por contra, Asturies ye un pueblu esplotáu, espoliáu y colonizáu y tien que tener na so soberanía como pueblu el so balón d'osixenu pa construyir nel so ámbetu una sociedá más xusta, llibre y humana: nós decidimos, y nós decidimos refugar la esplotación del home pol home.

El poder popular garantiza qu'Asturies tea nes manes de les/os propies/os asturianes/os. La economía nacionalizada, ensín inxerencies imperialistes foriates (recordemos que ye evidente que les grandes empreses internacionales son una estructura del imperiu más) fai qu'una nación puea desenrrollase con paz y estabilidá suficiente como pa superar l'actual mentalidá d'individualismu y competitividá. Nun hai de descuidar nesti sen el papel d'una educación popular completa, íntegra, crítica y autocrítica, que faigan de la reflexión y l'auto-reflexión pegoyos cimeros de la so praxis. La participación del conxuntu del Pueblu Trabayador Asturianu na actividá política y la toma de decisiones qu'afeuten al so país fadría qu'aumentara l'auto-estima d'esi pueblu, la sensibilidá nacional y la presión escontra les desviaciones egoistes y los comportamientos poco éticos. Pero nun podemos dexalo solo ehí. Tamién medraría'l bientar en tolos niveles de toles persones qu'integren esi pueblu.

A colación colo comentáu sobre'l Poder Popular, hai de dicir que lo anteriormente espuesto ye fondamente utópicu nesti momentu, pero ye una construción costosa pero posible, ensín dulda. Ta nidio que nuna situación d'independencia nacional sedría too perguapu, pero nesi procesu de construción nacional y de camín al autodetermín tamién caltenemos que ye básicu aplicar Poder Popular. Como llabor formativu y como práutica eficaz, en beneficiu del país. Las esperiencies de conceyos abiertos, asamblees populares y democracia participativa son un exemplu más tanxible dende la nuesa posición nel mundu pa entender l'Asturies de Poder Popular que queremos.

Como se diz dende'l soberanismu revolucionariu en tolos requexos del mundu, la emancipación nacional y social son les dos cares d'una mesma moneda.Ye dicir, la independencia y el socialismu tienen de caminar xuntos. En contra posición, España y el capitalismu tamién van de man, pero nesti casu pa imponer, imponer, imponer, reprimir y tornar a imponer. Nun podemos escaecer ésto enxamás, la radicalidá ye pernecesaria dende les nueses postures, lo que nun tien que confundise enxamás col estremismu radicaloide.

En resume, l'Asturies llibre, esi país que romperá con España tien qu'optar pol Poder Popular. Per otru llau, el Poder Popular tien de decantase por una Asturies llibre y fuxir del centralismu españolista fasta finar cola so propia esistencia, pues dalgún día los pueblos que tamos baxo esti mesmu yugu sedremos llibres y soberanos. Nun habrá otru día nin otru camín de cara a la llibertá y la soberanía. Con España nun hai llibertá de verdá y col capitalismu nun hai soberanía, nin xusticia, nin democracia.

Semar sestaferies pa recoyer la collecha.

Recuperar na cai lo que nos roben nos despachos

Fuelga Xeneral: Llamamientu de la CSI a la fuelga xeneral

La Corriente Sindical d’Izquierda quier facer un llamamientu a les y los trabayadores y al conxuntu’l Pueblu Asturianu, a la fuelga xeneral y a tornar esti 29 de marzu nel primer día d’una movilización continua, permanente y ensin contemplaciones.

En la CSI nun vamos aceutar denguna negociación sobro esta Reforma Llaboral y desiximos la so retirada darréu, asina comu del Acuerdu pol Emplegu y la Negociación Coleutiva, apautáu anteriormente por CCOO, UXT y la Patronal. Esti sindicatu nun va, nin siquier, a entrar a valorar denguna triba de negociación y alvierte a les cúpules sindicales de CCOO y UXT, del grave enfrentamientu, col conxuntu la clas obrera, al que van vese embocaos, en casu de querer llevar alantre tala negociación. La CSI va facer cuanto pueda por qu’esta fuelga nun seya esclusivamente un paru llaboral de 24 hores.

Los cientos de miles de paraes y paraos d’Asturies, los cientos de miles de trabayadores na precariedá, los cientos de miles de trabayadores de la economía sumerxía y los cientos de miles de presones estafaes por este sistema capitalista, tienen de ser los y les protagonistes d’esti día de llucha.

Pa la CSI, seis millones de paraos y paraes son doce millones de brazos cruzaos, qu’esti 29 de marzu tienen d’arremangase, xunta’l restu trabayadores, pa entamar a ganar na cai tolo que nos roben nos despachos. ¡ENSIN CONTEMPLACIONES!.

Gotor gana les eleiciones y repite como rector de la Universidá

Vicente Gotor consiguió, con un 66,52 por cientu de los votos, ganar les eleiciones a rector de la Universidá d’Uviéu. Derrotó a Paz Andrés, al igual que nel 2008, anque con un porcentaxe de votos trés puntos mayor.

El caderalgu de Química Orgánica y Inorgánica de la Universidá d'Uviéu sumó un total de 3.720 votos (66,52 por cientu) por 2.332 (33,62 por cientu) de la so rival. Hai cuatro años, na segunda vuelta de la votación, Gotor sumaba un 63,25 por cientu del total, mentes qu’Andrés algamaba un 36,75 por cientu.

Tres conocer los resultaos, el rector pa los cuatro años próximos agradeció los apoyos eleutorales colos que meyora en más de tres puntos los conseguíos nel 2008 y púnxose como oxetivu alcanzar la "escelencia" na institución académica asturiana. "Tán mal nun lo fiximos", dixo conteníu en declaraciones a los medios en referencia a los resultaos de les urnes, pa depués apuntar que yá tenía la so vida "preparada p’ayudar a la universidad" na so etapa académica última.

Gotor agradeció’l llabor del so equipu rectoral y eloxó una campaña "llimpia" cola otra candidata. Tamién, tres facer referencia a les dificultaes añadíes que va sufrir pola crisis económica, reiteró la so intención de contar con tol personal, priorizando la docencia y la investigación. Pa ello, comprometióse a dar oportunidaes a quienes tean acreditaos pa poder remocicar la plantiya. "Necesitamos savia nueva de calidá", calcó.

Pela so parte, Andrés señaló “que debo terminar equí, güei, esta faceta de la mio vida universitaria". La caderalga de Derechu Internacional Públicu y Rellaciones Internacionales de la Universidá d’Uviéu reseñó que la comunidá universitaria "tomó la so decisión" y que lo que-y correspuende a ella ye "asumila". "Felicito al rector eleutu y deseo-y aciertos pol bien de la Universidá", dixo. La candidata tamién aprovechó p’agradecer el sofitu col que contó, tanto ente los eleutores como ente los compañeros y destacó qu’espera qu’alguien garre’l relevu dientro cuatro años “porque sigo pensando qu’Asturies merez una Universidá meyor”.

Fonte: Asturies.com

N’Ast protesta pola retirada del sofitu del Ayuntamientu de Xixón a la promoción editorial

Piden que se caltenga'l sofitu pa la edición n'asturianu.
Dende l'asociación cultural N'Ast vienen d'asoleyar un comunicáu nel que manifiesten la so "protesta énte la esapaición de la política de promoción editorial del Ayuntamientu de Xixón. El sofitu económicu del Gobiernu municipal a la edición cultural pasó d’implicar más dos millones d’euros ente los años 2010 y 2011 a nun acutar nin un euru nel presupuestu municipal d’anguañu, precisamente nunos intres especialmente difíciles pal seutor editorial asturianu".

Dende l'asociación consideren que "la desapaición d’esta llínea d’actuación supon non solamente un dañu al espardimientu de la cultura sinón tamién a la mesma economía asturiana yá que nun escaezamos que les industries culturales son una fonte de riqueza que enxamás se potenció correchamente".

Poro, N'ast solicita como mínimu "que se caltenga’l sofitu pa la edición en llingua asturiana, dao la conocía situación de amenorgamientu que carez la nuesa llingua nacional por mor de la falta de respetu a los drechos democráticos de los asturianos en materia llingüística ".