viernes, 21 de enero de 2011

¡Trabayu refuga l'ERE de Barros y acaba l'enzarru!


La dirección xeneral de Trabayu refugó l’ERE pal taller de Barros (Llangréu) de Duro Felguera. Los trabayadores, que taben zarraos en midida de protesta nes instalaciones, conocieron ellí la noticia y punxeron fin al enzarru.

Según los trabayadores consultaos, la resolución da-yos la razón y establez dos meses de plazu pa la empresa si quier interponer un recursu contencioso-alministrativu, asina como un mes pa que'l conseyeru d'Industria y Empléu del Principáu d'Asturies, Graciano Torre, actúe como intermediariu.

La noticia conocíase precisamente'l día nel que se rexistraron duros enfrentamientos ente trabayadores y antidisturbios, qu'acabaron col incendiu del techu de la nave onde taben zarraos. Los bomberos estinguieron l'incendiu a les 14.30 hores.

Según informó'l 112-Asturies, el fueu, que sólo afectó al teyáu, quemó unos 20 metros cuadraos de la cubierta de chapa d'uralita de les instalaciones. Nel incidente nun se rexistraron daños personales.

El Centru de Coordinación d'Emerxencies del 112-Asturies recibió l'avisu a les 11.33 hores. Na llamada indicaben que taba quemando'l techu de les naves centrales de la citada empresa. Indicaben que nun había persones afectaes yá que la nave taba vacía anque dientro del recintu de la empresa había unes 100 persones.

Darréu movilizóse a efectivos de Bomberos d'Asturies con base nos parques de de Samartín del Rei Aurelio, La Morgal y Mieres xunto al Xefe de la Zona Central de Bomberos d'Asturies, que tamién se personó nel llugar del incidente.

Los primeros en llegar al llugar fueron los efectivos desplazaos dende'l parque de Mieres y el Xefe de la zona Central. Los manifestantes que s'alcontraben nel llugar facilitáron-yos el pasu al traviés d'una de les barricaes. Cuando estos efectivos llegaron a la nave afectada, los trabayadores yá teníen prácticamente controláu'l fueu con estintores.

Los bomberos dieron por controláu l'incendiu a les 12.40 hores, polo que los efectivos desplazaos dende'l parque de Samartín del Rei Aurelio tornaron a la so base.

Fonte: Asturies.com

Darréu nel Nalón se solidariza colos cinco mozos de JCA


Comunicau solidariu de Darréu con 5 mozos de JCA:

Los conceyos de Darréu nos conceyos del Nalón quieren amosar la so solidaridá con 5 mozos que puen dir a la carcele por participar na fuelga xeneral.



Esti pasáu 29 de setiembre de 2010, demientres la fuelga xeneral que se cellebró a nivel estatal cinco mozos militantes de les Juventudes Comunistes de Asturies( JCA) fueron indentificaos ya interrogaos demientres participaben nun piquete informativu. Na intervención de la policia española, los axentes amosaron una actitú de prepotencia y abusaron de la so autoridá según informen dende les JCA. Anguaño, paez ser qu'estos mozos s'esponen incluso a penes de carcele, gracies a les mentires de los policies, anque los mozos solo exercíen el so llibre drechu a la fuelga.

Dende Darréu fuimos críticos nel so día cola convocatoria de fuelga xeneral de les grandes centrales sindicales, anque sofitamos la fuelga como preséu d'espresión del Pueblu Trabayador Asturianu. Amás, si bien ente Darréu y JCA nun se dan grandes puntos d'alcuentru, yá seya a nivel informativu, prácticu o políticu, dende los conceyos de Darréu na Cuenca del Nalón queremos amosar delles coses:

•Amosamos la nuesa solidaridá colos cinco militantes de JCA que van dir a xuiciu y pedimos la retirada de los cargos de los que se-yos acusa. El llibre drechu a participar nuna fuelga xeneral nun tien de ser dengún delitu.

•Qu'esta intervención policial contra la mocedá, nun fai más qu'espeyar, una vegada más la situación pre-democrática que vivimos n'Asturies, nun "status quo" onde los drechos individuales y coleutivos del Pueblu Asturianu nun se respeten.

•Sorrayamos el papel que cumple la policia española n'Asturies, que nun ye otru que reprimir y perseguir cualesquier espresión crítica col Estáu español y el so modelu políticu y económicu.

•Que dende va un tiempu na Cuenca del Nalón se vienen asocediendo murnios capítulos de represión, dende siguimientos, multes millonaries, detenciones, identificaciones, xuicios farsa... contra cualesquier persona crítica. Esti panorama amás afeuta sobremanera a la mocedá que s'encuadra dientru d'un pensamientu críticu y combativu.

•L'enfotu d'esta represión sistemática nes cuenques ye amedrentar a la mocedá y emplegar el mieu p'asina refugar que los mozos y moces puedan tener dalguna iniciativa crítica y garrar dalgún compromisu social o políticu.

•Qu'inda más, nel contestu llaceriosu qu'atopamos nes cuenques, onde tan ñegandonos el futuru y desmantelando tolos medios de trabayu ye inamisible esta persecución de les idees por parte del Reinu d'España, executando la mesma represión les fuercies policiales españoles.

Asina, dende les agrupaciones de Darréu nos conceyos de Samartín del Rei Aurelio, Llaviana y Llangréu queremos tresmitir la nuesa solidaridá colos 5 mozos que van dir a xuiciu y desixir que s'apare con esta llocura persecutoria a la mocedá que protesta contra'l sistema vixente.

¡Non a la represión a la mocedá!