viernes, 30 de septiembre de 2011

Álvarez-Cascos diz tar nes “antípodes” del nacionalismu


El presidente d’Asturies, Francisco Álvarez-Cascos, aseguró esti miércoles nel Forum Europa, en Madrid, que ta nes “antípodes” del nacionalismu. Nesta mesma xornada, el líder de FAC inauguró la sede del so partíu na capital castellana.

Nel desayunu informativu de Forum Europa, Álvarez-Cascos presentó’l proyeutu de Foro Asturias Ciudadano (FAC) pa les eleiciones del 20-P col oxetivu de dar calce a "les aspiraciones reformistes de cambiu políticu, de progresu social y d'igualdá ente toles comunidaes autónomes españoles, ensin privilexos nin esclusiones”. Una iniciativa cola que va tratar de ganar la confianza de los votantes dende “les antípodes” del nacionalismu y coles mires de garantizar la igualdá y cohesión territorial. Amás, negó que'l so partíu divida'l votu de la derecha, dao que son los ciudadanos los que “reparten la confianza”.

Al so xuiciu, ye necesario que surdan fuercies territoriales “perifériques” que “neutralicen a les fuercies centrífugues nacionalistes actuando de contrapesos nes sos reivindicaciones”. Según recordó, hasta nos periodos de mayoría absoluta les formaciones nacionalistes forzaron na ellaboración de los Presupuestos Xenerales del Estáu (PXE). Na so intervención, Álvarez-Cascos refugó dar detalles de la so rellación col PP y tampoco quixo emitir la so opinión sobre les aspiraciones de los populares nes eleiciones. “Caún tien los sos propios problemes, dar solución a los retos que tien; y yo nun tengo que referime a otres fuerces polítiques”, defendió.

Otra manera, el presidente del páis acusó esti miércoles al xefe del Executivu estatal, José Luis Rodríguez Zapatero, de cometer un actu de “insumisión constitucional ensin precedentes” al nun aprobar un decretu de prórroga de los PXE, como marca la Constitución. “Tamos ante un actu d’insumisión constitucional ensin precedentes na nuesa democracia, realizáu por puru interés eleutoral partidista; que nun acarreta consecuencies polítiques pa los infractores pero que, amás, añade incertidumes nueves al escenariu económicu ‘nacional’ y al de les comunidaes autónomes; que nun podemos conocer nin siquier les estimaciones de los ingresos que vamos recibir del Estáu pa ellaborar los presupuestos rexonales pa 2012”, censuró

Inauguración de la sede en Madrid

Baxo’l lema ‘Más Foro, mejor España’, l’ex ministro de Fomentu inauguró la sede en Madrid del Foro de los Ciudadanos col oxetivu de reunir les 5.000 firmes necesaries pa presentase a les xenerales. En declaraciones a los medios, Álvarez-Cascos indicó que les sensaciones primeres son “mui positives”, yá que tolos voluntarios que salieron a la cai “volvieron colos pliegues de firmes enllenos”Mentes, el líder de la formación asturiana refugó falar del númberu de votos que pue alcanzar el partíu nes eleiciones xenerales porque “tovía nun hai percepción suficiente de la presencia de Foro”.

“Creo qu’hai un espaciu políticu pal nuesu partiu, que defendemos un mensaxe de cohesión social positivo pa que tolos territorios d’España y los sos repartos sían iguales”, resaltó’l presidente d’Asturies al tiempu que celebró que, cola inauguración de la sede del so partíu en Madrid, la so formación “echa raíces” na Comunidá de Madrid. El llar de FAC na capital castellana ta na cai Hilarión Eslava, númberu 49 baxu, na zona de Moncloa.

Fonte: Asturies.com

Conceyu Abiertu por Llangréu colos vecinos y por unes zones d'ociu públicu dignes


La organización llangreana sofita les vindicaciones vecinales.

Conceyu Abiertu por Llangréu denunció al traviés del so caberu comunicáu asoleyáu -y espardíu pela zona afeutada- que "dende fai una llarga temporada los vecinos del barriu felguerín conociu popularmente como Pinín, lleven quexandose de la falta d'equipamientu y descuidu de la Plaza Prau de Marzu y les pequeñes plazoletes públiques de la redolada., asitiaes toes ente la cai Horacio Fernández Inguanzo y la cai Emilio Alarcos Llorach". Asina, "Según los vecinos, llegó a producise un aconceyamientu ente l'alcaldesa y vecinos d'esta zona de la villa felguerina, pero la edil nun atendió adecuadamente les peticiones d'estos ciudadanos, causando gran descontentu ente estos/es vecinos/es".

Conceyu Abiertu desplica que diches places sufren numberoses carencies: "Les fontes nun suelen tener agua y los bancos lleven dellos años ensín ser pintaos, con munches partes rotes. Amás les piedres de dalgún xardín tan sueltes peles places, causando más d'una vegada dalgún incidente lleve a dalgún vecín. Ye normal ver basoria tirada por estes zones". Pa la organización "Tanto'l descuidu de la poca vexetación presente como'l de los bancos causa un sensación de total abandonu, lo que fai que'l comerciu d'esti barriu na redolada de les plazoletes nun espoxigue. Esto ye fácil de ver, la gran mayoría de los llocales alredor d'estos equipamientos municipales tan vacios y lleven asina más d'una década na mayor parte los casos, causando esto un efeutu negativu na economía llocal".

Despliquen tamién que les consecuencies nun son sólo económiques, sinon de toa triba, "La mala imaxe y el deficiente equipamientu fai que los habitantes llangreanos nun frecuenten la zona, causando esto un déficit de socialibilidá y faciendo qu'un espaciu que debiera ser d'animación sociocultural quede en nada. Los vecinos amás quexense muncho del mini-golf cercanu y del despilfarru económicu y la inutilidá que supón. Piden igualdá ente toles zones de la villa felguerina y del Conceyu de Llangréu, pues caltienen que l'alcaldesa mira más pol curiau y l'embellecimientu urbanu d'unes zones que d'otres de forma interesada".

Poro, CA por Llangréu pide "a la corporación llocal y a l'alcaldesa del Conceyu de Llangréu, Esther Diaz, qu'atiendan les peticiones de los vecinos de la redolada del Parque El Sutu. Tamién queremos tresmitir el nuesu sofitu a estos vecinos que solo quieren tener unes zones dignes, onde se pueda xugar, falar, aldericar, al fin y al cabu, facer vida social, y qu'esto atraiga a los comerciantes". Pa finar, afiten la idega de que " en Llangréu y en La Felguera hai zones más abandonaes qu'otres y qu'esti fenómenu paez que se da a costafecha según les preferencies y gustos de l'alcaldesa y los y les sos collacies".

lunes, 26 de septiembre de 2011

Llamada a conceyu abiertu en Noreña.



CSI CONVOCA UNA CONCENTRACIÓN POLA SITUACIÓN DE LES PISCINES D'AVILES



La Corriente Sindical d’Izquierda va convocar una concentración pública pa denunciar el pelligru pa la salú pública qu’apareya la utilización de les piscines d’Avilés. Esta concentración va tener llugar el prósimu xueves, 29 setiembre, a les 19:30 h., na Plaza l’Ayuntamientu d’Avilés.




Dende la Corriente Sindical d’Izquierda quieren denunciar públicamente "l’ataque continuáu ya impune escontra la seguranza y la salú de los trabayadores y usuarios de les piscines d’Avilés." El sindicatu asturianu denuncia que'l vienres 23 de setiembre de 2011 hebo "un suministru de cloru detectáu a les cincu la tarde" y entruguen "¿qué pasó colos mecanismos d’alarma?, ¡cómu ye posible que la situación se descontrole fasta’l finxu de que dellos neños tuvieren de ser atendíos nel centru salú, darréu les inhalaciones de cloru?".

N’anteriores ocasiones, desplica CSI, los protocolos de seguranza "namás furrularon cuandu los monitores de les piscines denunciaron la situación". CSI camienta que ye "escandaloso y una vergoña" que torne a producise otru incidente más col cloru nes piscines ensin que se "tomare midía denguna colos responsables de les intosicaciones por cloro, porque ésti nun ye un fechu aislláu, sinon el frutu d’actuaciones neglixentes y repetíes".

Anteriores escapes de cloru prevocaren la xubilación de dos trabayadores por lesiones inreversibles, al empar que numberosos usuarios tuvieron de ser atendíos nos servicios d’urxencia de los centros sanitarios y nun ye la primer vegada que les piscines d’Avilés tienen de ser pesllaes al públicu pol pelligru qu’apareyaben pa la salú pública, desplica la Corriente nun comunicáu onde denuncia que "a riestra d’inregularidaes y de despreciu a les mínimes normes afitaes pola sanidá o la prevención de riesgos "ye enorme" y esta situación "consiéntese pola impunidá de la que disfruta la Fundación Deportiva Municipal que, al paecer, puede actuar al so antoxu y ensin responsabilidaes de denguna triba".

El cenciellu fechu de que nun esiste una mínima actuación pela parte los responsables políticos y la impunidá dafechu de la direición de la FDM, lleva a camentar al sindicatu que la riestra de “incidentes” va siguir xorreciendo fasta que se produza dalgún acidente mortal. De la mesma mena, la CSI quier denunciar cola concentración del xueves "la pasividá dafechu" del Ispeutor de Trabayu que, dempués de numberoses denuncies, "sigue ñegándose a intervenir, dexando indefensos a los y les trabayadores de les piscines, inclusu dempués de que dos d’esos trabayadores tuvieren de xubilase con amalaúres inreversibles".

La CSI desixe a l’alcaldesa Pilar Varela la destitución darréu de los conceyales y directivos de la FDM que tienen responsabilidaes na xestión de les piscines d’Avilés, asina comu la sustitución del Ispeutor de Trabayu d’Avilés y la investigación de les sos actuaciones

domingo, 25 de septiembre de 2011

Rajoy anexona'l Navia-Eo a Galicia nun videu promocional


Nel videu de presentación de Mariano Rajoy como candidatu a la presidencia del Gobiernu español pue vese'l Navia-Eo como si fora territoriu gallegu. Asina, nel segundu 41 d'esti videu sobre la vida del candidatu popular, y falando de los sos empiezos como conceyal en Pontevedra, aparez el mapa fechu nel 2005 pol partíu independentista gallegu Nós-Unidade Popular (NÓS-UP), onde pue vese la comarca «Terra Navia-Eu», amás d'El Bierzu y dellos territorios zamoranos dientro'l territoriu gallegu.

Esti videu, que s'emitió'l miércoles 21 de setiembre na sé del PP y col mesmu Rajoy d'espectador, retiróse a última hora del xueves de la so cuenta del YouTube. Nél, amás de los territorios anexonaos a Galicia, pue vese la bandera nacionalista, la forma Galiza y la toponimia escrita cola normativa reintegracionista, basada nes normes ortográfiques del portugués.

Los creadores d'esti mapa tan polémicu, Nós-UP, emitieron un comunicáu onde afirmen que'l videu supón l'asunción «directa o indirecta» de que Galicia inclúi les comarques «arbitrariamente escluíes nel so día pol Estatutu d'Autonomía güei en vigor». Amás, los independentistes indiquen que cuando publicaron el mapa acusáronlos d'«anexonistes» por incluír los territorios de «la Galicia Irredenta».

Otra manera, afirmen que'l «xestu» de la campaña del PP supón el reconocimientu gráficu del carácter nacional de Galicia, «que más ceo que tarde tien que se convertir nun reconocimientu xurídico-políticu del Estáu Soberanu Gallegu, si bien somos sabedores de que nun vamos contar pa esti llabor col concursu del PP».


Les Noticies

Una encuesta del CIS señala que’l 75,3 por cientu de la población siéntese asturiana y española


L’estudiu post-eleutoral del Centru d’Investigaciones Sociolóxiques (CIS) reflexa que’l 75,3 por cientu de la población del país siéntese tan asturiano como español. El 11,3 por cientu considérase más asturiano y el 1,5 sólo asturiano.

El porcentaxe de persones que se consideren más españoles qu’asturianes ye del 5,5 por cientu, mentes que’l 5 por cientu diz sentise namái españoles. Mentes, un 47,4 por cientu diz tar d’alcuerdu col sistema actual de comunidaes autónomes y un 17,5 por cientu asegura querer un Estáu nel que les comunidaes tengan menos autonomía. Un 7,6 por cientu apuesta por una mayor autonomía, un 1,1 quier un Estáu que reconoza la posibilidá de qu’éstes algamen la independencia y un 9,5 un Estáu centralista ensin autonomíes.

No que respeuta a la valoración de los llíderes políticos, el que suma una mayor puntuación media ye Francisco Álvarez-Cascos pese a nun llegar al aprobáu, yá que recibe un 4,85 sobre 10. Javier Fernández, pela so parte, suma un 4,09; Isabel Pérez-Espinosa, un 3,57; y Jesús Iglesias, un 3,01. A nivel estatal, José Luis Rodríguez Zapatero tien una nota media de 2,73 y Mariano Rajoy, de 3,53. Esti estudiu fixóse ente’l 27 de mayu y el 1 de xunetu con 799 entrevistas.

Asturies.com

Cuba ye l'únicu estáu d'America Llatina sin desnutrición infantil


El Fondu de las Naciones Xuníes pa la Infancia (Unicef) confirmó que Cuba ye l'únicu estáu d'América Llatina sin desnutrición infantil, mientres nel mundu esisten 146 millones de neños y neñes que la sufren.

El 28% d'estos menores son d'África, el 17% d'Oriente Mediu, 15% d'Asia, 7% de Llatinoamérica y el Caribe, 5% d'Europa Central, y 27% d'otros estaos en desarrollu, precisó l'últimu informe d'Unicef denomáu Progresu pa la infancia, un balance sobre la nutrición. Cuba ye l'únicu estáu d'América Llatina y el Caribe qu'eliminó la desnutrición infantil. En medio del bloquéu económico, comercial y financieru impuestu por Estaos Xuníos dende va cuasi mediu sieglu a la islla, la Organización de las Naciones Xuníes pa l'Alimentación y l'Agricultura (FAO) reconoció los avances del estáu caribeñu na llucha contra la desnutrición.

L'Estáu cubanu garantiza una canasta básica alimenticia y promueve los beneficios de la llactancia materna, manteniendo hasta'l cuartu mes de vida la llactancia esclusiva y complementándola con otros alimentos hasta los seis meses d'edá.

Amás, entrégase diariamente un llitru lleche a tolos neños de cero a siete años d'edá. Xunta otros alimentos como compotes, xugos y viandes que se distribuyen de manera equitativa.

La ONU sitúa a la República de Cuba a la vanguardia del cumplimientu de materia de desarrollu humano.

Fonte: Infoasturies

viernes, 23 de septiembre de 2011

ALSA comprométese a respetar la toponimia



TRES LES RECLAMACIONES CONTINUES D’UN USUARIU

Según asoleyó’l blogueru Vítor Suárez, la compañía de tresportes ALSA -de niciu asturianu- ta acabantes de comprometese a emplegar la toponimia n’asturianu, pel momentu, na so páxina web. Ello, supondría un avance na normalización del nuestru idioma nesti ámbitu, yá que se trata d’unu de los tresportes más emplegaos del nuestru país.

Nel día d’ayeri espublizóse nel blogue "Fueya en blanco" un post, nel que l’autor aseguraba tener confirmao dende ALSA -tres un mes de comunicación con ellos- l’usu de la toponimia asturiana na so páxina web. Concretamente, el mensaxe recibíu foi’l siguiente:

Estimador Vítor:

Por medio de la presente, acusamos recibo de su atenta comunicación y le informamos que, ALSA está procediendo a adaptar su sistema al objeto de que en la web www.alsa.es, se reseñen los topónimos, en bable y en castellano, de las localidades pertenecientes a la Comunidad Autónoma del Principado de Asturias en las que las empresas de ALSA prestan servicios de transporte.

Sin otro particular, agradeciendo su interés.

Atentamente.

Fonte: Aruelu



* Dende Frayando Cadenes queremos dar la norabona al ciudadanu Vitor Suarez, responsable del blogue Fueya en Blanco, por brengar y algamar esti compromisu por parte d'ALSA. Esperemos que cumplan cola so pallabra.

lunes, 19 de septiembre de 2011

Morrió Manolín el de Llorío, guerrilleru comunista que combatió n'Asturies hasta 1945


Manuel Alonso González, Manolín el de Llorío, morrió a los 93 años en La Pola Llaviana.

Con 18 años alistóse tres el güelpe d'estáu de xunetu de 1936, llevaba dende los 14 nes xuventúes comunistes. Pasaría 10 años combatiendo, primero como milicianu y depués como guerrilleru, formando parte de la perconocía partía de los Caxigales. Un chivatazu llevaralu a la cárele en 1945 condergáu a muerte, la pena foi conmutada y pasó venti años presu en delles cárceles franquistes. Manolín el de Llorío recibió un merecíu homenaxe en vida esti febreru pasáu. Agora, como yera la so voluntá, les sos cenices depositáronse na cueva El Rapusu, nel picu La Peruyera, cerca d'El Condao, que-y sirvió de refuxu guerrilleru va más de 70 años.

Infoasturies

N'Ast denuncia l'ausencia de profesores d'asturianu en 22 colexos.


Incapacidá del sistema educativu pa garantizar los drechos llingüísticos asturianos.

L'Asociación Cultural N'Ast améstase al colleutivu de profesores de llingua asturiana na so denuncia de "que la situación alministrativa d’anguañu implica qu’un total de 22 colexos de la Comunidá Autónoma nun van cuntar, al menos fasta’l díi 3 d’ochobre, con docentes qu’impartan esta asignatura".

L'asociación camienta que "una vegada más la llingua asturiana y la comunidá asturfalante tornen a ser marxinaos, yá que numberosos alumnos que deseyen estudiar l’asignatura d’asturianu nun van poder incorporase con normalidá a ésta nestos entamos del cursu escolar. Colo que un drechu fundamental como ye l’estudiu escolar de la llingua materna va ser negáu a munchos neños y neñes d’Asturies".

Pa finar, dende N'Ast valoren "qu’apura dignificar globalmente l’asignatura de llingua asturiana con toles consecuencies, dende la situación llaboral de los/es profesores, fasta los conteníos académicos, o la estabilidá y estensión de la so ufierta en tolos centros d’enseñu del País".

Infoasturies

Les y los trabayadores pague la cris con muertes


La Corriente Sindical d’Izquierda quier denunciar el xorrecimientu de los acidentes llaborales n’Asturies. Son yá 20 los trabayadores finaos por acidente llaboral no que va d’añu; una cifra enforma más alta que la producía nel mesmu periodu del añu anterior y que, pa esti sindicatu, dirá espoxigando ca añu más.

Pa la CSI, les causes d’esta situación tan nidies. Cola disculpia de la cris, la mayoría los empresarios amenorguen les inversiones en seguranza, considerándoles un gastu que ye posible aforrar. Al empar, el paru, la temporalidá y la precariedá de les condiciones de trabayu, faen que los y les trabayadores tean la obligación de desendolcar el so llabor ensin les condiciones de seguranza afayadices, pola llercia a perder el so trabayu.

Amás d’ello, el sistema de subcontrataciones fae que, en ca esllabón de la cadena, les condiciones de seguranza empeoren, demientres que los planes de prevención nun furrulen y la xera de la Ispeición de Trabayu en materia de seguranza amuésase ineficaz dafechu.

Pero nun ye sólo la CSI quien denuncia esta situación. Son los mesmos xueces y fiscales quienes tienen pernidia la indefensión de los y les trabayadores.

Pa Francisco Javier Rodríguez Santocildes, entitular del Xulgáu de lo penal númberu 2 d’Uviéu, en sopelexos a los medios de comunicación, dixo que “los empresarios faen imposible atopar responsables de los acidentes de trabayu. Esti xuez llega a entrugase, lliteralmente, si “¿acasu se suiciden los trabayadores?”, en referencia a la imposibilidá d’atopar responsabilidaes.

El teniente fiscal del Tribunal Supremu, Juan José Martín-Casallo, alvirtió de que “la cris ta prevocando un amenorgamientu nes condiciones de seguranza llaboral y na desixencia, pela parte los y les trabayadores, de meyores en materia prevención, pola mor a la llercia a perder el so puestu de trabayu.

Otru fiscal, esta vegada de l’Audiencia de Córdoba, Fernando Sobrón, afitó que “los delitos en materia seguranza multiplicáronse por cuatru, fasta’l puntu que la Fiscalía nun tien capacidá pa pescudar tolos acidentes llaborales que, en dalgunos casos, nun tendríen de recibir esi nome, sinon el de delitos penales. De fechu, los acidentes leves nin siquier se pescuden”.

Esti mesmu fiscal alvirtió de la tendencia a “descargar la responsabilidá del empresariu sobro los y les trabayadores, cuandu la braera causa ye la desixencia d’una priesa anormal nel cumplimientu’l trabayu”. Pero, a la escontra d’estos argumentos, la CSI güella cómu los empresarios continúan impunes delantre los acidentes llaborales, demientres que los y les trabajadores son perseguíos, multaos y encarcelaos cuandu defenden los sos drechos.

Asina les coses, la CSI desixe la intervención darréu de xueces y fiscales pa qu’en llugar de condergar y encarcelar a los y les trabayadores, depuren les responsabilidaes penales de los empresarios y sancionen severamente la pasividá de la Ispeición de Trabayu.

Pa la CSI, ésta ye la única manera d’echar la galga a esta sangría y torgar que más trabayadorens paguen cola so vida les consecuencies d’una cris de la que nun son culpables

Fonte: aruelu.com

lunes, 12 de septiembre de 2011

Intervención política l'ochu setiembre de Pablo Perez


Intervención como conceyal de Noreña de Conceyu Abiertu nel actu políticu final de la manifestación del Día de la Nación Asturiana.

Na curtia esperiencia que tamos algamando en Noreña no que cinca al trabayu institucional, prestaríame compartir dalgunes observaciones que van llevanos a una conclusión perimportante.

El casu ye que, per un llau, pue paicer qu’al tener representación municipal, facer política pa nós, ello ye dinamizar y tresformar la sociedá na que vivimos, dicía que pue paicer que facer política pa nós podía ser más fácil agora, y desplícome, si ye verdá que tenemos más potencia de trabayu, dalgo más de prensa qu’enantes, pero lo de que seya más “fácil” nun ye asina nin de lloñe y esto debío básicamente a 3 cuestiones qu’ensiguida comprenderéis:

La primer custión ye que la nuesa propuesta política d’izquierdes, asturiana y soberanista nun ye bien acoyía pol poder, que ve peligrar los sos privilexos, y ye por esto qu’enxamas cesarán les campañes de criminalización y represión. Faigamos lo que faigamos van tratar de tiránoslo enbaxu y esto ye dalgo colo que yá cuntábemos y tenemos que siguir cuntando.

Una segunda custión, quiciaves menos conocía, ye que les instituciones tienen la so propia inércia y ello fai perdifícil camudar dalgo n'elles, másime teniendo namás un representante de 13.

Nel Ayuntamientu, como n’otres instituciones, esisten una pila de normes, lleis, reglamentos y mierdes que nun sólo nun valen pa garantizar derechos sinon que, na práutica, van ser usaos como un arsenal d’escuses al serviciu del poder pa desmovilizar cualisquier tipu de movimientu que nun-yos interese. Y pueo dicivos que n’esto nel mio pueblu son rialmente buenos, anque claro tá, estes torgues y pilancos nun son d’aplicación a los “suyos”.

La tercer custión que fai que nun seya fácil facer política ye la percepción que se tien de la mesma, ye dicir, como’l poder lo que pretende ye “profesionalizar” o meyor dicho “mercantilizar” la política, lo que faen ye despolitizar la sociedá al máximo, métennos miéu, fuércennos a vivir na cuerda floxa y depués preséntense a si mesmos como salvaores. "Nun-vos preocupar, sabemos que tais pasándolo mal, votainos y dexáinos que vos salvemos…"

Romper esta percepción que fai que la xente pida a los políticos, al conceyal, al diputáu, etc..., el que la xente pidamos que se faigan coses ensin participar n’elles ye dalgo muy malo, porque, per un llau, pídense coses que nun se puen facer y, per otru, nun se deprende como furrulen les instituciones y como podemos superar les torgues que mos imponen. Ye básico desprofesionalizar no posible la política y implicar a la sociedá nel nuesu proyeutu y hai qu’entamar camudando esa mítica espresión de "tenieis que facer esto"… o "hay que facer aquello" por "que vos parez si facemos esto" o "tenemos que facer aquello".

Partiendo d’estes 3 custiones:

Qué'l nuesu proyeutu va escontra los privilexos del poder y ye d'esperar que faigan tolo que puedan pa criminalizanos y repriminos, lo que nun quita que la razón acabará trunfando y esa ta de la nuesa parte.

Qué les instituciones tienen muncha inércia a favor del status-quo y de fechu la batalla ye precisamente que nun seya la institución la que mos camude a nós, sinon al revés.

Qué’l poder trata d’alienanos y despolitizanos y esto fai que’l pueblu desconozamos lo mecanismos que tenemos pa poder influyir na toma de les decisiones que van afeutar a les nueses vides.

Partiendo d’esto la conclusión ye que:

Algamar representación institucional ye un trabayu que lleva tiempu y esfuerzu; l’empeñu y la constancia d’un grupu de trabayu ye dalgo qu’el pueblu trabayaor sabe valorar. Pero hai más, pa que se pueda valorar, tien que conocese, tien que sabese y pa eso hai que trabayar nes distancies cortes, hai que falar colos vecinos y vecines, dase a conocer, esparder el nuesu discursu y recoyer les aportaciones de la xente, sacar l'alderique a la cai… Esto ye lo que realmente permite algamar representación.

Pero hai más, entá, y tien relación coles otres observaciones, y ye qu’esti empeñu, esta constancia esti trabayar nes distancies cortes ye lo que-y da fuercia a un representante institucional pa poder facer coses, pa poder influyir na institución, incluso siendo namás unu.

Ye’l puxu la xente por meyorar, por finar coles inxusticies y cola discriminación, ye esa rempuesta social dinámica y organizada, la que permite qu’una determinada propuesta salga alantre o non.

El pueblu, organizáu y siempre que braeramente sienta como suya la propuesta, ye dicir siendo co-participe, ye capaz de forzar a les organizaciones polítiques con representación a atender a les razones, anque seya namás de cuandu en cuandu.

Resumiendo lo que se demuestra en Noreña ye que trabayando, con constancia y coherencia, el nuesu proyeutu políticu pue entrar nes instituciones y amás cola misma receta toi seguru que podremos facer camudar a les propies instituciones.

Se que la mayoría ya conocíeis esto, pero aún asina prestame recordalo güei equí, ya que siendo precisamente yo'l conceyal, quiero que naide se llame a engaños y que se sepa que lo que se puede y no se puede llograr en Noreña y n’otros conceyos nun va depender de mi, sinon de toes y toos. Ehí ta’l kit.

Sedrá difícil que lleguemos a ser mayoría, ye verdá, pero tamién ye verdá que nun fai falta ser mayoría pa poder condicionar la política y lliderar un proyeutu de trasformación social.

Asina qu’espero que teamos viendo los primeros pasos d’un llargu camín empobináu a algamar la llibertá y la xusticia social n’Asturies y nel restu’l mundu, que tampoco nun escaecemos los deberes que mos asisten pa con otros pueblos.

¡Xuntes podemos!

¡Puxa Asturies Socialista!

* Pablo Pérez Fonseca ye conceyal de Conceyu Abiertu por Noreña

domingo, 11 de septiembre de 2011

Suatea reclama que l'asturianu sía llingua vehicular na educación


Por cuenta de la celebración del Día d'Asturies, el sindicatu educativu Suatea acaba de facer públicu un comunicáu onde solicita que'l currículu d’Educación Infantil recueya la llingua asturiana, que s'eliminen les ratios mínimes d'alumnáu pa recibir clases, el reconocimientu de la especialidá pa los maestros, que nos centros s'axeiten planes llingüísticos pa que l'idioma sía vehicular en delles árees y que s'atienda a la demanda en FP, Escueles d'Adultos y d'Idiomes y Universidá.

El sindicatu diz qu'esti añu’l Día d’Asturies tien la novedá del cambiu de Gobiernu, «Gobiernu que parez mostrar intenciones bones na promoción y desarrollu de les nuestres señes d’identidá y cultura», indiquen dende Suatea, recordando qu'Emilio Marcos Vallaure, conseyeru de Cultura, contestó n’asturianu a una demanda de Xuristes pol Asturianu, «dalgo histórico y d’un cambiu d’actitú que toos y toes esperábemos». Tamién recuerden la promesa electoral fecha por Álvarez-Cascos de desarrollar reglamentariamente la Llei d'Usu.

Con too, indiquen que les declaraciones y promeses necesiten midíes urxentes. Por eso, esixen que’l currículu d’Educación Infantil recueya la nuestra llingua y que, mentes nun lo faiga, «s’atiendan toles demandes d’escolarización recoyíes polos centros». Tamién soliciten que s'eliminen les ratios mínimos d'alumnáu «y actuar acordies cola Llei d'Usu y acatar la sentencia recién del Tribunal Superior de Xusticia d'Asturies». Otra manera, piden que les places d'asturianu y gallego-asturianu pasen a formar parte de les cuadros de personal orgánicos de los centros, la creación inmediata de la especialidá y la convocatoria d'oposiciones, «n'igualdá de condiciones de les otres especialidaes docentes».

Amás, dende Suatea afirmen que van tar atentos pa que s'avance dientro del marcu normativu d'anguaño, «pero ensin dexar d'esixir la oficialidá como única ferramienta llegal que garantiza’l respetu efectivu de los derechos llingüísticos de tolos asturianos».

Fonte: Les Noticies

sábado, 10 de septiembre de 2011

Conceyu Abiertu llama a trabayar “dende los conceyos y los movimientos sociales”


Alredor d’un centenar de persones participaron na manifestación qu’entamó Conceyu Abiertu n’Uviéu nel Día d’Asturies. La formación busca convertise nuna alternativa trabayando “dende los conceyos y los movimientos sociales”.

La manifestación, que tuvo encabezada por una pancarta col lema ‘Soberanía y xusticia social. Más Asturies, menos España’, salió puntual de la Estación del Norte en direición al Palaciu de Presidencia. Ehí tuvieron llugar les intervenciones polítiques, que corrieron a cargu de Paula Martín, de Darréu; Xesús Nel García Muñiz, de N’Ast; y Mariu Arbesú, d’Andecha Astur, tres coleutivos que sofitaben la convocatoriu de Conceyu Abiertu.

Mentes, Javier Cubero foi l’encargáu de lleer el discursu de la formación nacionalista. El voceru de Conceyu Abiertu señaló que n’Asturies “corren malos tiempos dende hai años” y auguró que los que van tán viniendo “van ser tovía peores, con una crisis económica global que se yustapón a la crisis estructural que vive la nuesa patria”. Darréu criticó les “respuestes que da la oligarquía española” pa salvar la crisis, como la reforma llaboral y la de la Constitución “postfranquista”, pa depués añadir que “siempre van alcontrar otru día más pa siguir llendando entá más esos derechos y llibertaes civiles que tantu sangre, cárcel y sufrimientu costaron algamar”. “Asina que yá sabemos cuala ye l'alternativa oligárquica: más neolliberalismu, más precariedá llaboral, más desigualdá social, más represión policial y más españolismu”, continuó.

Por esti motivu, Cubero señaló que los asturiano han d’enfotase “na articulación d'espacios d’alcuentru dende los cualos dir desendolcando ferramientes d’aición coleutiva cola finalidá d'intervenir de manera eficaz na sociedá”, direición que tomó dende’l so nacimientu Conceyu Abiertu “pa la reconfiguración y revitalización d’esi Movimientu de Lliberación Nacional qu’Asturies precisa más que nunca p’avanzar hacia una democratización plena y real,; hacia la materialización efeutiva de la soberanía popular dende'l municipalismu; y l’autodetermín como alternativa imprescindible pa poner fin a la subordinación estructural del país a proyeutos contrarios a los nuesos intereses como pueblu”. A continuación, refugó’l “posibilismu institucional” y defendió la iniciativa de Conceyu Abiertu, “que nun ye un proyeutu de máximos, sinón de mínimos, pero d'unos mínimos nacionales y democráticos nel marcu d'una llinia política empobinada a la creación d'una alternativa soberanista dende la izquierda”.

“Nestos momentos Conceyu Abiertu nun ye l’alternativa que precisa esti país, pero, precisamente, esa alternativa ye lo que nos años vinientes vamos ellaborar de forma progresiva al traviés del trabayu dende la base, dende los conceyos y dende los movimientos sociales. Asina ye como vamos dir definiendo a Conceyu Abiertu como proyeutu d'unidá d'aición al llargu plazu dende la izquierda soberanista. Porque en política nun esisten nin los milagros nin les casualidaes. O se ta dientro de les estructures del poder o se ta fuera intentando articular el contrapoder popular nel marcu d'una dinámica constante de rearticulación societaria y de movilización caltenible nel tiempu, finalizó Cubero. Tres les intervenciones polítiques, los presentes celebraron una espicha.

Fonte: Asturies.com

viernes, 9 de septiembre de 2011

Propuesta d'una mesa xunitaria pa les eleiciones estatales


¡Tenemos mieu! ¡Vivimos con mieu! Mieu a perder el trabayu; mieu a buscar trabayu y nun atopalu; mieu a nun poder pagar la hipoteca o a nun poder independizase de los pas; mieu a nun disfrutar d’una pensión nel futuru…

Los medios de comunicación de mases que, por supuesto, tán controlaos polos poderosos, atemoricen a la xente a diariu: el mieu a una recesión económica nueva, a los ataques de los mercaos, a que se funda la bolsa; mieu a un rescate como’l de Grecia…

Según en que momentu y los intereses que tengan ellos, deciden a qué tenemos que tener mieu: al gripe A, a les armes de destrucción masiva, al terrorismu internacional, a la recesión económica…
El mieu ye’l arma mayor de control social. El mieu ye l’arma meyor escontra la rebeldía. El mieru ye antirrevolucionariu. El mieu bloquea a les persones, paraliza a les sociedaes. El mieu ye’l nuesu peor enemigu.

Mieu a ser pocos nuna movilización, a que la sociedá nun mos cmprenda y a sentinos sólos cola verdá. Cola verdá, por exemplo, de qu’Asturies ye una nación; que como pueblu asturianu correspondenos el derechu a decidir lo que queremos ser, cómo queremos furrular y qué futuru queremos pal nuesu país.

Cuando atopamos el valor, facemos coses y decimos lo que pensamos, ¿nun son ellos entós los que tienen mieu? ¿Cómo s’entiende si non la censura mediática o’l control policial? Saben qu’equí hai un país cultu, una nación valiente qu’amosó bien de veces la so voluntá de caminar llibre y con dignidá pel sendero de la histora.

Tienen mieu a que los que temos equí nos presentemos a les eleiciones. L’Estáu español reformó la Llei Eleutoral pa llimitar la participación de los minoritarios desixendo a cada organización n’Asturies alrodiu de 1.000 firmes validaes. En rellación a esti asuntu inmediatu, n’Andecha fiximos una reflexón interna: l’Estáu español quier dexar fuera a organizaciones como la nuesa.

La situación d’Asturies anguaño, y en particular la situación de les organizaciones nacionalistes, ye delicada. Dalgunos dixeron que sacaríen dos diputaos y otros qu’el so candidatu aspiraba a ser el presidente próximu d’Asturies, y nun hubo nada d’esto. Siendo autocríticos, quiciabes debamos replanteanos dalguna cosa. Poro, queremos facer una propuesta güei mesmo a les organizaciones asturianes. L’Estáu español bríndanos ensin querer la oportunidá de dar un pasu históricu. Nestes eleiciones estatales que nun son importantes pa nós, pero que podríen servinos d’ensayu pa una xunidá d’aición, proponemos sentanos nuna mesa mañana mesmo, y ensin condicionantes previos, alcordar unos mínimos que nos permitan recoyer les firmes xuntos pola causa común d’Asturies y presentanos asina a les eleiciones estatales.

Esperamos que les organizaciones sían receptives a esta propuesta. En cualisquier casu, sigue firme’l nuesu apueste por dir fortaleciendo rápidamente’l nuesu movimientu políticu d’izquierda soberanista.

Bon día de la Nación Asturiana.

Mariu Arbesú ye voceru nacional d'Andecha Astur y foi'l candidatu de Conceyu Abiertu a les eleiciones a la Xunta Xeneral.

Simplificando lo complexo


Ta la cosa fea, y sobre manera, ta toda mui enrodiellada. Suelen dicir los historiadores que pa calibrar el verdaderu alcance de unos fechos socioeconómicos nun periodo concretu, tienen que pasar unos cuantos años p’analizalos con cierta perspeutiva y ciertu rigor. Pero, na mio opinión, la situación actual que tamos viviendo n’Asturies y nel restu del orbe ye tan intensa y tan fonda que dar esi marxe de tiempu en benficiu del análisis certeru, paezme un derroche y casi un luxu, sobre manera, cuando yá se pueden dir sacando dalgunes conclusiones que mos permitan dir esclariando daqué sobre esti panorama que tenemos ente manos. Sí, ye verdá, como decía a l’entamu, que ta too mui enrodiellau, pero tamién nun ye menos cierto que de la rodiella y lo complexu pue dir dixebrandose lo esencial de la povisa y, d’esta manera, dir esclariando y simplificando esa complexidá.

Nesti sen ye mui interesante y necesario fixase nes coses que se faen y, al empar, omitir les que se dicen. L’aplicación d’esti principiu pequeñu al campu de la política tien unos efectos clarificadores mui efectivos. Esto quier decir, por exemplu, que si omitimos los discursos oficiales de los grandes partíos y centrámonos no que suelen facer cuando tan gobernando les instituciones, alcontrámonos con un proceder mui asemeyau, por non decir idénticu, en beneficiu de unos sectores económicos mui concretos. N’Asturies, tres más de 30 años de democracia, les politiques que s’aplicaron permanentemente en materia económica foron de corte neolliberal, esto ye, de dereches. Y cuando digo esto toi abarcando dende la triste y decadente reconversión industrial de los 80 capitaneada pol socialista Felipe González, hasta l’aprobación na pasada llexislatura de la Llei d’Axuste pol Gobiernu d’Areces y Jesús Iglesias.

Trenta años de politiques económiques de dereches espliquen munches coses nel nuesu país, que van dende la estructuración (desestructuración) social, política y territorial, hasta la proyeición y el pesu ruin del nuesu país nos ámbitos diferentes de decisión estatal y européu, pasando pola apaición del fenómenu de les llamaes ‘lleendes urbanes’, el paru o’l desfarrapamientu medioambiental baxo la marca ‘Paraisu natural’. Polo tanto, prestaríame anunciar, como ‘novedá’, que si bien ye verdá que la cosa ta fea, entovía hai espaciu pal enfotu. Les politiquees basaes na xusticia social, la igualdá y la solidaridá siguen teniendo una fuercia poderosa y tresformadora de la realidá y, amás, son polítiques qu’en materia económica tán por estrenar. Qué dicir, tamién, de les polítiques que debíen potenciar y desendolcar la nuesa identidá y autogobiernu, que se caracterizaron siempre pola so impotencia acomplexada y ‘paletil’.

Polo tanto, a estes altures pue dicise, que nin PSOE nin IU son quien a llevar a la so práutica de gobiernu’l so ideariu programáticu, y esto podemos decilo dende la experiencia que´l propio Bloque por Asturies tuvo cuando decidimos aconceyanos con estes fuercies nun Gobiernu que llevare alantre tales politiques d’izquierda, social, ecolóxica y nacional. El sufrimientu en carne propia d’esa dicotomía entre la teoría y la praxis de la izquierda tradicional, dio al traste colo que nun principiu concibióse como un intento ‘d’estrenar’ una aición política inexistente hasta’l momentu presente. Pero si les polítiques de dererecha aplicaes pola izquierda foron un fracasu, les de derecha aplicaes pola propia derecha (Foro) serán más de lo mesmo, pero peor.

A pesar de too, yo soi de los que cree que siempre hai dalgo nuevu baxu’l sol y, por eso, esti 8 de septiembre, Día de la Nación Asturiana, y n’antoxana d’unes eleiciones al Estáu, a Europa y, posiblemente nacionales, tórnase nun día simbólicu, pa ente otres coses, volver a naguar por un horizonte políticu ampliu, formau por toes aquelles persones, asociaciones, sindicatos, partíos y demás grupos humanos que, llevaos pola fuercia y la convicción d’unes idees básiques, l’amor hacia´l nuesu país y la indignación polo que ta asocediendo, pueda coyer forma y presentase como una opción seria y mayoritaria que devuelva l’enfotu de los ciudadanos d’esti pueblu en sí mesmos y nes sos posibilidades. ¡Puxa Asturies!

Pablo Fernández ye secretariu d'Organización del Bloque por Asturies.

jueves, 8 de septiembre de 2011

Asturies tamién tien drechos.



Oficialidá, soberanía, autodetermín y socialismu son DEMOCRACIA.


¡PUXA ASTURIES LLIBRE Y SOCIALISTA!

martes, 6 de septiembre de 2011

Un garrapiellu d'empresarios europeos declaren el boicó a PayPal


Pola torga de PayPal pa la venta de productos a Cuba.

Alrodiu d'una docena d'empresarios europeos dedicaos a la venta per Internet vienen de presentar una demanda escontra la compañía americana PayPal, dedicada a la la transferencia de dineru énte distintos usuarios al traviés de la rede -propiedá de la conocía compañía Ebay-, por mor del so bloquéu a la compra-venta de productos cubanos, frutu de les lleis d'EEXX que torguen les transacciones cola islla dende va décades, y que la compañía bancaria acata dafechu.

Asina, l'aición súmase a la de la cadena alemana de drogueríes "Rossman" -con unes 2.400 filiales en toa europa-, que vien d'amosar el so refugu al emplegu del serviciu PayPal, porque ésti desixó sacar de la oferta de productos los Puros y Ron cubanos. Poro, éntela negativa de la empresa alemana, ésta decidió dexar d'emplegar el serviciu enantes de que la propia empresa lu suspendiera.

Estos fechos amesten un capítulu más a los agravios económicos escontra la islla que los EEXX vien cometiendo sistemáticamente, y que son sofitaos y prauticaos pol seutor financieru, énte otros, d'esi país, en serviciu mutuu gobiernu-patrón.

Infoasturies

lunes, 5 de septiembre de 2011

Darréu tamién sofita y participará na manifestación soberanista de Conceyu Abiertu.


Darréu sofita la manifestación convocada por Conceyu Abiertu baxo'l llema “Más Asturies, menos España”.

La organización xuvenil independentista y revolucionaria quier vindicar un añu más l'ochu setiembre como un día clave na llucha polos drechos nacionales y sociales del Pueblu Asturianu. Asina, dende Darréu camentamos que la convocatoria más afayaiza pa coles nueses sensibilidaes polítiques ye la que propón Conceyu Abiertu, polo que la nuesa organización sofita la manifestación y llama a participar a tolos nuesos militantes y simpatizantes.

Pa la mocedá independentista revolucionario l'actual situación del país precisa de grandes aiciones de movilización social, polo qu'esta manifestación pue ser un bon aniciu pa entamar una dinámica de llucha na cai baxo los presupuestos políticos de la izquierda soberanista asturiana. Cola actual situación social y nacional ye perimportante establecer frentes de llucha bien amplios al empar que xunitarios y calces d'alderique y entendimientu. Axuntar fuercies baxo consensu alredor de cuestiones mínimes y asumibles por toos/es ye perimportante pa tresformar la realidá asturiana pa meyor.

Dende Darréu solo creemos nuna Asturies onde'l destín lo marquemos los y trabayadores d'esti país, ye dicir, una Asturies onde'l Pueblu Trabayador Asturianu seya quien a facer el so camín autónomu haza la soberanía nacional y social. Entendemos qu'esti compromisu col soberanismu d'izquierda solo asumiolo Conceyu Abiertu cola so convocatoria d'Uviéu. Poro, llamamos a participar na manifestación pola soberanía y l'autodetermín que saldrá esti xueves a les 13:00 hores de la Estación del Norte y que tendrá como llema “Más Asturies, menos España”.

¡ L'ochu setiembre nun tamos pa folixes ! ¡ Sal a la cai a lluchar !

¡ Puxa Asturies llibre ! ¡ Puxa Asturies socialista !


www.darreu.org

domingo, 4 de septiembre de 2011

N'Ast sofita la convocatoria de Conceyu Abiertu pal 8-S



El manifestamientu del Día de la Nación Asturiana convocáu por Conceyu Abiertu.

En rellación a los estremaos actos que diverses entidaes van cellebrar esti xueves 8 de setiembre, Díi de la Nación Asturiana, l’Asociación Cultural N’Ast vien d'amosar los siguientes puntos:

1) El conflictu llingüísticu y cultural esistente n’Asturies tien una esencial dimensión socio-política, y en cuantes que les causes del conflictu s'alcuentren nesa dimensión estructural por fuerza una auténtica solución global d'una o otra miente tien qu'incluyir víes y ferramientes de natura política.

2) Nesi senu N’Ast dende la so fundación foi siempres mui nidia, refugando falses “neutralidaes” de calter apolíticu que rialmente anubríen posiciones complacientes o pasives énte'l desaniciu social de la identidá asturiana, optó siempres por asitiase ensin denguna clas de complexos nel ámbitu del Movimientu de Costruición Nacional d’Asturies, y por confrontar de mena direuta cola principal espresión política del sucursalismu antiasturianu: el PSOE.

3) D'alcuerdu colo anterior N’Ast comu colleutivu cultural d'orientación nacional tien la obligación de pronunciase con motivu de les distintes actividaes polítiques que se van cellebrar esti 8 de setiembre.

4) Yá que de les distintes convocatories esistentes la única que tien un plantegamientu críticu cola subordinación estructural d’Asturies al Estáu español, xunto con una esplicita reivindicación del calter nacional de la sociedá asturiana, ye’l manifestamientu patrióticu de la plataforma socio-política Conceyu Abiertu na ciudá d’Uviéu, en N’Ast decidimos adherimos públicamente a esa movilización y convidar a toos/es los/es nuesos/es simpatizantes a participar nella entendiéndola comu un pasu más na llarga marcha de la llucha pola descolonización cultural d’Asturies.

viernes, 2 de septiembre de 2011

Folixa nel Bar Queen Maeve coincidiendo col día 8 se setiembre.




Dempués de la manifestación que tendrá llugar n'Uviéu el prósimu 8 de setiembre l'avilesín Queen Maeve, chigre alternativu, ufre a toles persones que quieran pasase una espicha-folixa del Día d'Asturies.




P'apuntase na espicha-folixa nun hai más que pasase pol chigre o bien facelo na páxina del Queen Maeve en Facebook. Habrá carne, pescáu, empanaes y muncha sidra con música del país. Hai un bote pa llevar comida de 5 euros, preciu económicu. ¡ Nun te lo pierdas !