jueves, 28 de julio de 2011

La verdá y namái que la verdá.



Un veteranu de guerra del exércitu d'EEXX diz les coses tal como son. Por supuestu esti vidiu va tardar pocu en ser censuráu de Youtube probatiblemente.

miércoles, 27 de julio de 2011

Plataforma escontra'l teleféricu en Morcín


Movimientos populares escontra'l teleféricu.

L'Agrupación Morciniega Independiente vien d'anunciar la so intención de convocar a toles persones que tean a la escontra de la construcción del teleféricu que'l PSOE quier construyir dende Cardeo hasta la cume de La Madalena,asitiada nel conceyu de Morcín.

Por ello dende AMI ven necesario coordinar una plataforma ciudadana na que puedan participar tanto persones a títulu individual como partíos políticos y organizaciones de toa triba que compartan la vindicación de la organización morciniega.

Pa entamar anuncien la intención de recoyer firmes,ya inviten a toles persones interesaes nello a participar pañando firmes pa "ganar la batalla ente toos y toes".

Pa más información el so perfil na rede social, onde puede atopase tamién el so corréu lletrónicu.

Fonte: Infoasturies

Ganaron les idees.

lunes, 25 de julio de 2011

Adrià Pet: ''cada movimientu debe adaptar la propuesta de la Unidá Popular a la so propia realidá''


"Nos Països Catalans hai un desconocimientu grande del movimientu independentista asturianu"
Aprovechando la so estancia n'Asturies pa participar nuna xornada organizada por Conceyu Abiertu, InfoAsturies quixo entrevistar a Adrià Pet, miembru de les Candidatures d'Unidat Popular (CUP), Endavant y la Cordinadora Obrera Sindical (COS), pa que falar de les CUP y otres cuestiones del independentismu catalán.

-¿Que ye la CUP?
Les CUP son les Candidatures municipalistes de la Esquerra Independentista, y como tal trabaya coles demás organizaciones de la Esquerra Independentista pola lliberación nacional, la xusticia social, la defensa del territoriu y la lliberación de xéneru tanto dende les instituciones como col trabayu en comuña colos movimientos sociales tanto de fuera como de dientro de la Esquerra Independentista.

-¿Cómo s'organiza?
La CUP organízase n'asamblees llocales, que s'aconceyen periódicamente en reuniones intercomarcales nes que s'atopen representantes de diferentes CUP d'una mesma zona territorial p'aldericar diferentes aspectos que-yos afeuten y otros que s'aldericarán n'aconceyamientos superiores como'l Conseyu Políticu o l'Asamblea Nacional. El Conseyu políticu ye la reunión de los representantes de toles CUP a nivel nacional, qu'aveza a aconceyase cada 2 meses. L'Asamblea Nacional, a la que pueden asistir tolos militantes de la CUP aconceya una vez al añu pa concretar les llinies polítiques, estratéxiques y organizatives de la organización.

-¿Cómo entamó'l proyeutu?
Les primeres candidatures alternatives venceyaes a la Esquerra Independentista presentáronse nes primeres elleiciones municipales posteriores a la muerte del Dictador Francisco Franco (que non de la dictadura), tando tovía ensin organizar algamaron notables resultaos, depués entamaron a coordinarsey surdieron nueves candidatures durante los años 80. Pero l'españíu d'anguaño de les Candidatures d'Unitat Popular entamó col revivir de la Esquerra Independentista organizada después de 1995 y colos resultaos algamaos en 2003 nun garrapiellu de municipios.

-¿Cuales pienses que son las claves del ésitu que tán teniendo?
Principalmente enfotase nel trabayu dende la base, trabayar dende los barrios y los municipios pa la construcción nacional, en comuña colos movimientos sociales y les organizaciones de la Esquerra Independentista. Tamién la base d'esti espoxigue s'atopa nuna una apuesta real y coherente pola democracia participativa-aspeutu qu'aplica a diariu- y pola xusticia social, aplicando una llinia política en defensa de les clases populares. Per otru lláu, el cansanciu de les clases populares pa cola política tradicional profesional, fizo averase progresivamente a la xente a nueves formes de facer política, como la que propón la CUP,alloñada de la política profesional y de les propuestes partidistes o interesaes y basada nel alderique na cai y la politización de la sociedá.

-¿Ye un modelu d’unidá popular estrapolable a otros países?
Cada país tien que guetar el so modelu propiu en bas a la so realidá cultural y social, anque esti modelu basáu na democracia participativa, el drechu d’autodetermín y la xusticia social, ye una posible rempuesta a les desixencies populares que vimos nos díes caberos coles lluches de los indignaos. Anque cada movimientu debe adaptar la propuesta de la Unidá Popular a la so propia realidá, hai que decatase de que ye un modelu emplegáu n’otros países, coles sos carauterístiques y que nun inventamos nós pero sí lu adaptamos al nuesu país y a la coyuntura d’anguaño.

-¿Cómo se ve la realidá asturiana desde los PPCC?
La verdá ye qu’hai un desconocimientu grande del movimientu independentista asturianu pol silenciu al respecto de los medios de comunicación masivos, pero vese con almiración y atención la llucha de la clas obrera asturiana polos sos drechos y emancipación. Con too ello, sí que s’atopa una mayor curiosidá sobre’l movimientu d’emancipación d’Asturies dende la militancia de la Esquerra Independentista qu’años atrás.

-¿Además d’a nivel municipal,son les CUP un proyeutu con aspiraciones elleutorales a nivel nacional?
Anguaño nun esiste nengún proyeutu al respecto, anque si esiste’l debate sobre la participación de la CUP en futures elleiciones autonómiques,pero ye un alderique entá por iguar, y agora ye difícil albidrar cuál sedrá’l futuru d’esti.

-¿Cuál ye,a grandes rasgos, la realidá social del independentismu nos PPCC?
Anguaño l’independentismu nos PPCC atópase nun bon momentu de continuu espoxigue y eclosión de nuevos proyeutos; campañes como los referendums pola autodeterminación ficieren que’l sentimientu independentista tea multiplicándose per tol país, y el movimientu organizáu de la Esquerra Independentista ye cada dia una alternativa mas real al independentismu que representen otres alternatives como por exemplu ERC.

-¿Cuál ye la vuesa posición respeuto al modelu organizativu d’otres organizaciones independentistes (ERC,SI...)?
Alrodiu’l modelu organizativu la diferencia principal ye’l fechu de que’l movimientu independentista tien los pies fuertemente afitaos na cai y nos movimientos sociales, y esta ye l’apuesta que fae que les diferentes CUP nun aparen d’espoxigar nos municipios nos que se presenten y tamién el que-yos fae siguir alantre con fuercia y ánimu en casu de nun algamar resultaos nes instituciones.

Un nuevu ciclu hestóricu


Ye innegable, y yá un tópicu común l’afirmalo, que l’apuesta política de Francisco Álvarez-Cascos nestes elecciones supuso’l piesllu d’un ciclu hestóricu en Asturies y l’apertura d’otru nuevu. Y non menos ciertu ye qu’inda desconocemos la inmensa mayoría de les característiques que van presentar los vinientes escenarios políticos acullá de la presencia d’un partíu asturianu que definíu como rexonalista asítiase nes coordenaes ideolóxiques d’un nacionalismu español autonomista y cuadonguista, al mesmu tiempu que confronta colos partíos sucursalistes denunciando la esistencia d’una incompatibilidá ente les necesidaes de la sociedá asturiana y los proyectos políticos de calter estatalista. ¿En qué pue desaguar l’actual convulsión del panorama políticu asturianu? ¿Y qué factores sociales, económicos, políticos y culturales puen desencadenase nel marcu d’una crisis global tanto n’Asturies como en tolos marcos nos que ta integráu’l nuesu País?

Al igual que pasa col movimientu “¡Democracia real YÁ!/15-M” tamos énte un fenómenu que desborda toles situaciones previstes modificando sustancialmente la realidá de l’arena pública, y que colos datos de los que disponemos agora’l común de los mortales tovía ye bien ceo pa poder analizalo en fondura. Mientres la Hestoria amosa qu’hebo una gran variedá de fenómenos que si bien nun principiu se caracterizaron por un determináu nivel d’ambigüedá tanto nos sos presupuestos ideolóxicos como na so axenda política, tuvieron dempués la capacidá de romper cola inercia de la apatía social ampliando’l marxe estructural d’oportunidá política esistente nesi momentu.

Evidentemente dende una posición maximalista se pue amenorgar la significación de determinaos fenómenos a una simple dinámica de “rexeneración” del marcu estructural vixente, pero cuando un procesu de “rexeneración” del sistema faise necesariu ye porque’l modelu xestionariu hasta entós dominante dientro del “status quo” ta agotáu y la so sustitución resulta vital pa la estabilidá futura del sistema. Poro anque tou proyectu de rexeneración “reformista” implica una mínima reconocencia d’una serie de contradicciones particulares coles mires de garantizar que l’acumuladura xeneral de contradicciones permaneza dientro de les llendes de lo estructuralmente caltenible, esa mínima reconocencia abre la posibilidá de la formación de nuevos actores sociales al traviés d’una quiebra relativa de la hexemonía esistente hasta esi momentu.

Asina anque Il Gattopardo seya una fonte de reflexón bien interesante tamién pue derivar nuna mala escusa pal inmovilismu tácticu. Y de toes formes nun ye ésti’l momentu afayadizu pa dedicase a xugar con boles de cristal, ensin escaecer amás qu’esa práctica nun ye más que’l síntoma de l’ausencia d’una dinámica propia.

Poques coses tán nidies de momentu, pero una d’elles ye la desapaición del “asturianismu políticu” como estratexa vidable dientro del mundiu nacionalista. Si nel tiempu del xacobinismu colonial del PSOE l’ambigüedá conceptual de la etiqueta tenía determinaes virtúes asina como un potencial, nel contestu actual apura una clarificación de les xeres, estremando ente asturianismu cultural y nacionalismu políticu, o ente autonomismu rexonal y soberanismu nacional.

Y de la mesma manera que se pue y se debe afirmar ensin complexos que la reivindicación programática de “la Oficialidá y l’Autogobiernu” nun implica en si mesma nengún proyectu de construcción nacional, tou fenómenu de mases en clave rexonalista tien de valorase como una meyora al respective del escenariu de los caberos trenta años. Reconocer sobre un papel qu’Asturies ye una nacionalidá cultural o una nación hestórica tampoco ye ser nacionalista, anque si quien lo fai tien una determinada audiencia si pue ser beneficiosu pal procesu nacionalitariu nuna determinada fase hestórica. Nel “Principat” el PSC o “Iniciativa per Catalunya Verds” puen tener un perfil más o menos catalanista pero nun son nacionalistes catalanes, y la realidá asturiana ye que güei nesti país tenemos dos fuercies con representación parlamentaria qu’asumen en mayor o menor grau una determinada sensibilidá haza la cultura asturiana y la reivindicación autonómica: Foro Asturias ya IU.

El casu ye que Foro Asturias ya IU tán configurándose como ferramientes cada vuelta más válides (o al menos eso paez) pa determinaos sectores del “asturianismu” que siempres tuvieron como oxetivu prioritariu’l camudar determinaes polítiques culturales que s’aplicaben dende les Alministraciones municipal y autonómica. Ye más, precisamente l’asunción de demandes “asturianistes” por parte d’estos dos organizaciones polítiques permite y fuerza a avanzar haza la mayor concreción y visibilización d’un proyectu nacionalista acullá de reivindicaciones de calter básicu que son comunes a un ampliu abanicu de posiciones ideolóxiques

En definitiva, pasamos d’un escenariu onde la centralidá política taba ocupada pol PSOE y que se caracterizaba pola negación d’Asturies como País, a otru onde la dinámica de cambéu paez que va favorecer una mayor definición de les distintes posiciones alrodiu del oxetu y del suxetu nacionales.

Javier Cubero

domingo, 24 de julio de 2011

Prohibíu actu de Causa Galicia de güei en conmemoración del Dia de la Patria Galega


Causa Galiza recibió la denegación del permisu municipal pa facer güei la tradicional romeria pa conmemorar el "Día da Patria" que se cellebra mañana 25 de xunetu. La denegación vien dempués de que'l 30 de xunu el Conceyu si diere permisu pa la cellebración y dende Causa Galiza denuncien un “evidente exemplu d'apartheid políticu”, anunciando que va tomar les aición llegales pertoinentes. Causa Galiza comunicó que “les persones que defendemos el drechu d'autodetermín pa Galiza menifestaremonos y festexaremos el Dia Nacional de la nuesa Patria pese a quien-y pese”, l'organismu xuniteriu trabaya pa que a la fin se pueda cellebrar la romería.

Infoasturies

jueves, 21 de julio de 2011

Manifestación de sofitu a la revolución cubana


El Martes 26 de xunetu a les 20 hores na Plaza L'Humedal de Xixón.

El Comité Asturianu de Solidaridá con Cuba y escontra'l bloquéu convoca'l Martes 26 de Xunetu una manifestación con motivu de la conmemoración del asaltu al Cuartel Moncada en Santiago de Cuba,antiguu cuartel militar que foi asaltáu por 135 guerrilleros -Fidel y Raúl Castro ente ellos- el 26 de Xunetu de 1953.L'asaltu fracasó,pero supunxo l'entamu de la llucha escontra'l dictador Batista que finó en 1959 col triunfu de la revolución.

L'actu convocáu na plaza xixonesa cunta col sofitu d'organizaciones como Andecha Astur,Darréu,Corriente Sindical d'Izquierdes,,Unidá Nacionalista Asturiana,SUATEA,PCA,UJCE,PCPE,CJC/CMC,Cosal-Xixón o USO.

Infoasturies

Conceyu Abiertu cellebró la charra-alderique alrodiu de la CUP


L'actividá entamada pol Conceyu Abiertu d'Uviéu estendiose durante unes tres hores.

Esti sábadu desendolcose nos llocales de la Corriente Sindical d'Izquierda n'Uviéu una charra-alderique entitulada "CUP:Una esperiencia d'unidá popular" cola presencia d'Adriá Pet, militante de la CUP, del sindicatu COS y del partíu políticu Endavant nel conceyu de Sitges. L'actu entamó con una charra del militante catalán na cual se trataron distintos temes como la caracterización específica de la CUP como frente institucional de la Esquerra Independentista catalana (EI).

Foi d'especial interés la esplicación del procesu políticu vivíu nos Países Catalanes a lo llargo de los caberos venti años cola descomposición del MDT, la esperiencia d'ERC como proyeutu posibilista al curtiu plazu, y la rearticulación de la Esquerra Independentista.Tamién pudo afondase nel furrulamientu orgánicu de la CUP nos ámbitos llocal y nacional.

Posteriormente desenrrollose un alderique alrodiu de temes como'l problema de les múltiples militancies, l'articulación del sindicalismu independentista catalán al traviés de la COS, o l'equilibriu esistente ente la CUP como marcu de rellaciones unitaries y organizaciones partidistes como Endavant.

Fonte: Infoasturies

martes, 19 de julio de 2011

La esmolecedora situación del movimientu de reivindicación llingüística


Va tiempu que m’esmolez la situación que vive’l movimientu de reivindicación llingüística n’Asturies. Nun hai estructura, nun hai militancia y nesto tien muncho que ver una mala xestión del asuntu, de la que somos responsables toos, unos por acción o inacción, otros por callar, cola meyor de les intenciones toos, nun lo pongo en dulda.
Les organizaciones reivindicatives nun funcionaron más que pa deunciar graves ataques en momentos puntuales, pero nunca pa crear ambiente reinvindicativu o sacar propuestes a la sociedá. Vamos siempres per detrás y claro, llévennos la delantera. Son poques les escepciones. Amás, el PSOE consiguió que se reproduciera’l so discursu y ponenos a toos, o a cuasi toos, a falar de la “non obligatoriedá”, cayendo nes trampes más tontes y unviado un mensaxe erronéu a la sociedá.

Nos conceyos, la reivindicación directamente nun esiste. En Xixón, por exemplu y yá que ye’l casu que meyor conozo, nun se fizo un seguimientu del incumplíu “Plan de Normalización Llingüística”, y de les obviaes “Ordenances d’usu y promoción del asturianu”, tampoco opinó naide, pa bien o pa mal, del llabor de la Oficina de la Llingua. Convocóse a una comisión de siguimientu, qu’ensin funciones de nengún tipu aconceyó delles vegaes a lo llargo la llexislatura, ensin que naide dixera nada, ensin que se conocieren les sos conclusiones.
Toi cansáu d’oyer “a ver cuándo nos dan la oficialidá”. Esi usu del verbu “dar” esmolezme fondamente. Naide nun mos “va dar” nada, naide va regalanos el reconocimientu d’esi drechu de tolos asturianos de que l’asturianu seya oficial. Esti posicionamientu pasivu esmolezme. Cambiemos esi verbu pasivu por un verbu activu y en primer persona “vamos consiguir la oficialidá”.
Per otru llau, la oficialidá ta siendo precisamente la escusa de munchos (probablemente inconsciente) pa quedar paraos. Pa dalgunos paez que namás tenemos qu’esperar sentaos a que “mos dean la oficialidá”, pa que de sópitu tean solucionaos tolos problemes de la llingua asturiana. La oficialidá nun va ser nenguna varina máxica, la llucha pola ofiacialidá tien de dir en paralelu a una llucha pola normalización, entá más importante y necesaria, enantes y dempués d’algamar esi estatus llegal pal asturianu. Cada pasu va dase con munchu sudu y pocos aplausos y asina va ser siempres, ye un camín pindiu y llamargosu.
Echo de menos más atención a la normalización llingüística, más reivindicación a la empresa y los medios de comunicación privaos (como sí asocedió nos años 70 y 80 con ciertu ésitu), menos crítica a la Conseyería de Cultura (la única que fai dalgo, anque seya mínimu pol asturianu) y más a otres conseyeríes, toles demás, que nun ficieron nada pol asturianu y pueden facer permuncho.

L’arrequexamientu lleváu alantre pol PSOE, convirtiendo al asturianu nuna cuestión esclusivamente cultural, folclórica si se quier, foi siguida pol movimientu asturianista con ganes, como’l burru que sigue la cenahoria. Tenemos de cambiar estos vezos ente toos si queremos entamar a construyir nós el discursu llingüísticu.
Los cambios políticos abren espectatives nueves pa la nuesa llingua, pero nun van venir soles, nunca “van danos” la oficialidá, sinón que tendrémos que-yos la arrancar de les manes, peleala. Una bona propuesta pa entamar ye pidir que’l nuevu organigrama de Gobiernu lleve la Viceconseyería de Política Llingüística a depender de la Conseyería de Gobiernu, de forma que se convierta nuna ferramienta tresversal na alministración y non nuna oficina qu’espida sovenciones pa publicar llibros, películes y campañuques de mil temes que nun tendríen porque financiase col presupuestu dedicáu a la normalización. Otra, esixir un riguru cumplimientu de la Llei d’Usu, promesa electoral del partíu anguaño nel Gobiernu d’Asturies.
De la mesma forma que m’esmolez esta situación, préstame ver l’acción llevada alantre por munches persones, cada día, protestando, reclamando los sos drechos, entamando iniciatives col envís de normalizar l’asturianu, dende’l silenciu munches vegaes. Tenemos d’aprovechar a estes persones y echar a andar iniciatives colectives que seyan útiles pa garantizar el futuru del asturianu y tenemos de facelo yá. Nun podemos siguir caminando pel camín que mos marquen otros. Ye’l momentu de convertir l’esmolecer n’acción. ¿Sedremos quién?

Inaciu Galán y González

¡¡¡¡ OFICIALIDÁ DARRÉU !!!!



L'asturianu o bable ye la llingua llariega d'Asturies. Depués de cuasi cuarenta años de llucha cívica per parte'l Pueblu Asturianu reclamando esti drechu y de pasinos de formiga tien de ser el momentu anguañu de dar el pasu final. Esti idioma solo va normalizase col estatus oficial que-y cuerrespuende depués de sieglos d'agresiones y manipulaciones hestóriques y culturales contra'l nuesu país y la identidá cultura de nueso.


L'actual presidente del gobiernu d'Asturies, que diz representar al país asturianu testualmente tien la responsabilidá de finar con esti conflictu d'una vegada. Si tanto cree nel país de los asturianos que normalice esti país. Pues los países normales tienen la so propia llingua reconocía pola so propia llei...


Por dignidá, cultura y drechu: ¡L'ASTURIANU LLINGUA OFICIAL YÁ!


domingo, 17 de julio de 2011

Non a la drecha rexonalista.

Señor Cascos, yá sabemos qu'Asturies ye'l país de los asturianos, y qu'asina lo entendien personaxes como Xovellanos o Fernández de Miranda. ¿ Y qué ? D'equí alantre vien un nuevu ciclu pa toxs, que nun mos pue garrar de sopitu. Esti ye'l nuevu gobiernu d'Asturies, el mesmu que fala d'Asturies como país dientru de la grandeza de la indisoluble nación española con una identidá basada por ciertu nes fabes, la gaita, la santina y pocu más.

D'equí n'alantre a siguir faciendo camín na reconstrución nacional y social. L'únicu camín que tien Asturies ye la emancipación nacional y la cayía de la cadarma capitalista. Nun hai otru camín. Los políticos de poltrona como ésti señor solo miren pol so bolsiellu, y anque suene cansín... solo'l pueblu salva al pueblu.

Veremos que determín toma Álvarez Cascos pa colos temes de la identidá nacional d'Asturies, esperemos que seya más flexible que los perros ultraespañoliegos de la FSA. Lo que ta nidio qu'en materia social mos vien enriba lo que plantegaba'l PSOE o quiciabis entá más agresivu pa col nivel de la vida del Pueblu Trabayador Asturianu. Esta vegada, una persona que taba a piques d'arruinase salvo'l culu col discursu'l rexonalismu, mañan a lo meyor una persona cola mesma situación fala n'abertal de nacionalismu. Nun tien qu'importanos al nacionalismu d'izquierda.

La única alternativa válida ye crear frentes de llucha dende la izquierda popular y revolucionaria y la soberanía nacional d'esti país, conxugando dambes idees, yá que son la mesma. Pa eso hai que politizar a la sociedá, buscar simpatizantes y militantes, facer activismu, tomar la cai, desenrrollar calces d'información y trabayar y trabayar y trabayar. Pero trabayar coles coses bien llendaes a los oxetivos de ca estaya del futuru movimientu de lliberación nacional. La independencia y el socialismu del nuesu país nun va aportar cola "real politic" que promueve xente como ésti señor de Foro Asturias. Solo Asturies sedrá llibre cuando'l so Pueblu tome concencia y seya'l solu, como suxetu políticu colleutivu, el que faiga y fine'l camín.

A los supuestos nacionaliegos y asturianistes qu'entamen magar d'agora a facese allucinaciones con Foro Asturias y finen colando ellí dici-yos alón y puntu. Son xente que nun quinxo afrontar el camín que la izquierda nacionaliega coherente lleva faciendo dende hai más de 30 años. A esa xente nun hai qu'echar de menos, yá que ye xente oportunista y cobarde. Asturies sedrá llibre o nun sedrá.



¡ Non a la drecha rexonalista !


¡ Puxa Asturies roxa y dixebrá !

sábado, 16 de julio de 2011

El CUPA alcuerda un nuevu Reglamentu col Rector: Podrán presentase tesis n’asturianu


El Conceyu Universitariu pol Asturianu (CUPA) aconceyó na tarde del vienres con Vicente Gotor, Rector de la Universidá d’Uviéu, col envís de buscar una solución pal conflictu denunciáu pol CUPA y pol que nel nuevu Reglamentu d’Estudios de Doctoráu nun se permitía la presentación de tesis n’asturianu. Dende’l CUPA anuncien “salimos con compromisu de redacción que permite presentar tesis n’asturianu y que va aprovase esti xueves en Conseyu de Gobiernu”.

Javier Cubero ya Inaciu Galán, miembros del CUPA, tuvieron nel conceyu nel que Vicente Gotor prometió aprobar una nueva redacción del Reglamentu, nel Conseyu de Gobiernu de la Universidá, del próximu xueves 21 de xunetu. El nuevu borrador, queda de la siguiente manera no que cinca al usu del asturianu:

Artículu 25, 2.a) La memoria que recueye’l llabor fechu na tesis doctoral redactaráse n’español. Sicasí, la Comisión de Docotoráu va poder autorizar la so redacción n’otru idioma oficial de la Unión Europea, previu informe de la Comsión Académica del Programa de Doctoráu, y siemprres que se garantice que los miembros del Tribunal tán en condiciones de xulgala. N’esti casu, la memoria ha contener el resume y les conclusiones n’español. Coles meses condiciones, y d’alcuerdu col artículu 6.2 de los Estatutos de la Universidá d’Uviéu, la redacción podrá facese en llingua asturiana.

Pal CUPA “d’esta manera dase solución a un problema hestóricu” na Universidá d’Uviéu yá que van poder presentase tesis n’asturianu “ensin torgues de tipu llegal pesie al deficiente estatus del asturianu”, que dende’l CUPA creen necesario “declarar oficial p’acabar con toes estes torgues d’una vez”.

El CUPA quixo agradecer el sofitu nesta iniciativa de los ciudadanos que presentaron la protesta propuesta por esta organización a la Universidá d’Uviéu, “que recibió cientos d’apoyos particulares”, afirmen. Amás reconocen “el llabor de l’Academia de la Llingua Asturiana nesti procesu y de profesores y estudiantes de la propia Universidá, coles sos valioses aportaciones”.

Agradecen al Rector “ la solución d’esti conflictu” y celebren “la fin d’esta situación de marxinalidá qu’esistía pa la llingua asturiana dende va más de 400 años y que vien causando dellos casos qu’enfrentaron a la Universidá d’Uviéu colos sos alumnos nos xulgaos”. Una norma qu’hasta agora venía contradiciendo a los propios estatutos de la Universidá y la Llei d’Usu del Asturianu de 1998 que, recuerden, diz que “Tolos ciudadanos tienen derechu a emplegar el bable/asturianu y a espresase nél, de pallabra y por escrito”.

Dende’l CUPA afirmen que tará, de magar esti momentu, “sollertes al cumplimientu d’esti Reglamentu” y animen “a tolos doctorando a facer y presentar la so tesis n’asturianu”, agora que, recuerden “van cuntar col sofitu llegal algamáu gracies a esta redacción nueva del Reglamentu de Doctoráu”.

El CUPA amuesa nel comunicáu unviáu poco dempués del conceyu’l so contentu polo que consideren “una bona noticia pa la llingua asturiana y pa la Universidá d’Uviéu y amás, el cumplimientu d’unu de los oxetivos principales del CUPA dientro del procesu de normalización del asturianu na Universidá”.

ASTURNEWS

viernes, 15 de julio de 2011

Y siguen aneciando


Ayeri foi l'alderique d'investidura na Xunta Xeneral, del que güei podemos ver,lleer y escuchar muncho nos "mass-media".

De tolo que llevo visto hasta'l momentu hai dalgo que llámame l'atención penrriba'l restu,anque nun ye dalgo nuevo nin siquier surpriendente: la FSA sigui aneciando,sigui enfotada de manera enfermiza nel so comportamientu antiasturianu.

Asina, a lo llargo l'alderique énte Cascos y Javier Fernández, esti caberu foi dexando numberoses perlles, calificando a FAC de "rexonalismu victimista y confrontador" ,afirmando qu n'Asturies siempre hebo un "sentimientu integrador haza españa" y, yá pa finar, falando de que n'Asturies "nun fai falta rexeneración política nin social".Too mentires, too neciura.

Primero,el rexonalismu de FAC,anque custionable,podemos llegar a aceptalu como tal,pero hasta'l momentu nun amosó más que tímides intenciones y una defensa d'Asturies basada nel cuadonguismu y nun populismu a l'asturiana motiváu en gran midida pola so necesidá de diferenciase del so hermanu ximielgu na mayoría d'ambitos,el PP. Podría ser rexonalismu, pero dende llueu mui débil como pa llamalu "confrontador",conceptu que,supongo,sedrá aplicáu pola FSA a tou aquel que nun prautique'l nacionalismu centraliegu español.

En segundu llugar, que "n'Asturies hebo siempres un sentimientu integrador haza españa" ye dalgo perdiscutible,ye ñegar que n'Asturies siempres hebo un sentimientu,a vegaes mayor y a vegaes menor,de descontentu pa col so papel dientru d'esti estáu.Anguaño encuestes que dicen qu'Asturies ye,per detrás d'Euskadi y Catalunya, el territoriu con menor identificación pa con españa,o fechos hestóricos como la proclamación de la República Independiente d'Obreros y Campesinos d'Asturies.Son un par d'exemplos de que Javier Fernández miente.

La tercera afirmación,"n'Asturies nun fai falta rexeneración política nin social". Atalanto lo que quier dicir el voceru del PSOE: nun ye necesario echar abaxo la rede clientelar texía por ellos y la so órbita sindical; nun ye necesario aire nuevo nes instituciones asturianes que,d'una vegada, gobiernen non sólo pal pueblu,sinon que tamién con elli; nun ye necesario que se sepa que nel gobiernu asturianu hebo corrupción. Poniéndonos nel so pelleyu,ye comprensible lo que diz: trátase de conservar la poltrona.

En definitiva, Javier Fernández,en nome de la FSA, punxo un enfotu obsesivu n'aspectos como les "rellaciones Asturies-España" o nel supuestu carácter rexonalista de Foro Asturias, custiones coles que la sociedá nun s'escandaliza porque nun hai un cambeu pergrande respecto a lo que veníemos teniendo,y anque lu heba ello nun supondría una torga,sinon tolo contrario.

Una oposición normal gastaría enerxíes n'atacar a Cascos poles sos intenciones privatizadores y de recortes de lo público,poles sos polítiques económiques en beneficiu del que más tien, o por unes intenciones en política cultural y llingüística insuficientes pa la conservación y puxu de lo de nueso, pero esto ye Asturies, y la FSA la santa inquisición que llucha porque n'Asturies les instituciones seyan más papistes que'l papa no qu'a españolía se refier.

Con esti testu quería amosar el mio refugu como ciudadanu asturianu,considerando qu'anque nun me representa nengún de los partíos presentes na Xunta Xeneral, éstos deberíen amosar más sensibilidá y seriedá nos temes que la sociedá quier que se trate,anque seya pidir millagros por cómo ta configuráu'l sistema.

Y si siguen aneciando,pior pa ellos. Daquién-yos pidirá cuentes nel futuru.

Adrían Calvillo.

miércoles, 13 de julio de 2011

Charra-alderique 'Les CUP: Una esperiencia d'unidá popular'


Sábadu 16 de Xunetu a les 19 hores nos llocales de la CSI n'Uviéu.

Conceyu Abiertu por Uviéu entamará esti sábadu la charra-alderique "Les CUP:Una esperiencia d'unidá popular"nos llocales de la Corriente Sindical d'Izquierdes n'Uviéu (Avd. Hermanos Menéndez Pidal, 14 baxu).

Nella cuntaráse cola presencia d'Adriá Pet,militante de la Candidatura d'Unitat Popular,movimientu políticu catalán independentista y d'izquierdes que basa'l so ámbitu d'actuación nos municipios colos finxos básicos de la llucha pola igualdá social,la construcción nacional de los Paíssos Catalanes y la promoción y espoxigue del texíu asociativu catalán.

Dende Conceyu Abiertu por Uviéu anímase a asistir col enfotu de "conocer y afondar na esperiencia independentista popular catalana que vien desendolcándose con ésitu creciente dende va años,énte la decadencia de los modelos organizativos tradicionales".

martes, 12 de julio de 2011

Decenes de persones movilizáronse esti sábadu escontra’l desmantelamientu de Les Cuenques



Delles decenes de persones participaron esti sábadu pasáu 9 de xunetu na xornada entamada dende la organización xuvenil d’izquierda soberanista-Darréu y CSI-Mocedá por unes Cuenques pa vivir y trabayar dignamente. La xornada, qu’encuádrase dientru l’actividá que munches persones tan desendolcando en pro d’un futuru pa los conceyos de les Cuenques y que trata d’aparar el desmantelamientu que ta sofriendo esta rexón d’Asturies resultó positiva na opinión xeneral de la xente implicada.

Con ciertu retrasu, alredor de les 12:20 hores echó a andar la marcha contra’l desmantelamientu dende’l Parque Vieyu de la llocalidá llangreana de La Felguera. Demientres duró la marcha hebo tiempu pa canciar consignes reivindicatives y esparder el mensaxe de la necesidá de superar l’actual estáu de les coses nos valles del Caudal y el Nalón. Cientos de fueyes informatives fueron distribuyíes nos alredor de 6 quilómetros de camín hasta la llocalidá de L’Entregu (SMRA). La xente foi mui receptiva colos/es movilizaos/es y caltuvo una actitú perpositiva coles reivindicaciones d’estos y la idega xeneral de la xornada. Enantes de finar la marcha hebo tiempu pa averase a les istalaciones d’Alas Aluminium pa desixir una solución pa los/es trabayadores.


Depués de dalgo más d’hora y media s’aportó a la fin al centru social entreguín La Semiente, onde finó la marcha. Ellí se realizó una espicha que puxó pola autoxestión del centru y na cual hebo un ambiente positivu participando n’ella munches persones. Asina, hebo un ambiente relaxáu y distendíu hasta qu’entamó la charra-alderique que tenía como llema “les cuenques: una crisis estructural” a les 17:00 hores.

Na charra-alderique foron ponentes Paloma García pola organización de mocedá Darréu, Javier Cubero por CSI-Mocedá y Pablo Álvarez, delegáu de prevención nel Tallerón de Barros de Duro Felguera. Los tres coincidieron en señalar como les cuenques pasen por una crisis estructural y na necesidá de superar l’actual modelu social, económicu, y políticu amoldando un nuevu modelu haza les necesidaes de la mayoría social en les cuenques mineres. Amás Pablo Álvarez, trabayador de Duro Felguera, cuntó dende una perspectiva crítica la so visión de lo que vivió y ta viviendo nel taller de Barros y tolo que pasó nel últimu conflictu llaboral. Darréu de les intervenciones entamó una mesa reonda moderada por un compañeru de CSI-Mocedá, la cual s’allargó enforma y na que la xente coincidió enforma en que foi bien enriqueceora.

En resumen, la convocatoria d’esti pasáu sábadu valió p’axuntar a persones d’estremaes sensibilidaes con un mesmu oxetivu, el de puxar por un proyeutu de futuru pa les cuenques mineres contra l’hipotecamientu al que tamos asistiendo anguañu. Un futuru, por supuestu, dignu y que tea como pegoyu les necesidaes de les persones que viven en les cuenques y nesti país y non el caltener los privilexios de los mercaos y los políticos sucursalistes del Réximen.


Hebo abonda unanimidá nel analis de la xornada, considerando a esta perpositiva y con dellos comentarios de tornar a repetir actividaes d’esti calter. Per otru llau dende la organización queremos da-y les gracies a toles persones que participaron nes estremaes actividaes y d’una forma u otra movilizáronse contra’l desmantelamientu de les cuenques mineres.

Andecha Astur camienta qu'Areces quier blindar la so xubilación col Niemeyer


Acusa a Areces de querer blindase una xubilación dorada a costa del Niemeyer y desixe la so dimisión comu presidente honoríficu de la Fundación a la qu’agora quier beneficiar a costa del dineru públicu.

Andecha Astur denuncia que "nel actual contestu de cambiu políticu que se vive nel nuesu país ye particularmente indigno y estremadamente escandaloso la pretenesión del PSOE de dexar les istalaciones del Niemeyer en manes d’una Fundación compuesta na so mayoría por socios privaos y de la que’l Sr. Areces ye Presidente honoríficu ná menos que por un plazu de 50 años, el másimu previstu por llei".

La formación política asturiana sorraya que "nos edificios colos qu’anguañu los responsbles del PSOE quien financiar les sos xubilaciones, gastárense más de 40 millones procedentes de lso impuestos de tolos asturianos", y que cola so cesión a una Fundación presidía pol saliente presidente "lo que paez perseguise de mena descarao ya imoral ye un pelotazu de xubilación de calter estraordinariu".

Andecha Astur remembra que ya denunció en multitú d’ocasiones "cómu’l PSOE caltién n’Asturies un modelu de xestión de los bienes públicos comu si se trataren d’una ayalga a saquiar pa caltener les sos camarilles parasitaries y el sistema clientelar que xeneraren al so alrodiu", pero agora, afirmen, resulta "patético" ver al depuestu Areces "perder los papeles p’agarrase a la nuea fonte de financiación que pue suponer la mencionada Fundación".

Andecha Astur caltién y defende la xestión pública de los bienes financiaos con fondos públicos, y fai un llamamientu "a la poca dinidá que puea tener quien tan llamentablemente gobernó n’Asturies", desixendo la dimisión del Sr. Areces del so cargu de Presidente honoríficu de la Fundación Niemeyer, "puestu pal que nun fexo méritu dalu quien, amás, foi el Presidente demientres varies llexislatures de gobiernos qu’agora tan baxo sospecha por corrupción de varios de los sos miembros y que, aina o ceo, tendrá de responder poe ello comu másimu responsable del “Principado” en dichu periodu".

Infoasturies

domingo, 10 de julio de 2011

La CSI denuncia un nuevu casu de persecución policial


La Corriente Sindical d’Izquierda quier denunciar un nuevu episodiu de persecución policial, esta vegada haza ún de los sos afiliaos, responsable de la seición sindical de la CSI nel taller de Barros de la empresa Duro-Felguera y que tien un papel destacáu na defensa los puestos de trabayu y los drechos llaborales de los trabayadores de tala empresa.

Demientres dellos díes, esti afiliáu de la CSI decatóse de tar sometíu a un seguimientu costante pela parte la Brigada d’Información de la Policía. Fasta que’l pasáu xueves, 7 de xunetu, foi reteníu por dellos miembros de tala Brigada.

Acabante rexistrar el so coche, atoparon-y preseos de pesca que, pa la Brigada d’Información, yeren “susceptibles de remanase en conflictos llaborales”, polo que se-y cursaren delles denuncies y, amás d’ello, dióse avisu a la policía llocal pa poder enanchar les denuncies por multes de tráficu y probatibles irregularidaes nel coche.

Pa la CSI, esto nun ye nuevo, yá que nun ye la primer vegada que los sos afiliaos y afiliaes carecen esta triba persecución. La CSI camienta que toos estos sucesos parten diréutamente del Delegáu del Gobiernu n’Asturies, Antonio Trevín, que dende hai años, nun tien torga en perseguir, detener y encarcelar a tou aquél y aquélla que mangue resistencia y nun entre pel aru del corruptu sistema políticu y empresarial xeneralizáu na nuesa tierra.

Y nun se trata namás d’esti sindicatu. Nes caberes selmanes, vienen produciéndose detenciones arbitraries escontra militantes d’organizaciones polítiques y sindicales, con esperpéntiques acusaciones de “terrorismu” que fasta la mesma Audiencia Nacional refugó.

Dende la CSI camentamos que quien exerce el braeru terrorismu ye una casta política y empresarial corrupta, que conderga a los y les trabayadores al paru y la probitú, qu’amontona la riqueza nes manes de banqueros ensin escrúpulos, que reprime y criminaliza indiscriminadamente toa forma d’oposición y que, a la fin, pretende finar cualisquier triba de llucha societaria o llaboral n’Asturies.

La CSI quier sopelexar que, nel so llabor de defensa, tanto de los drechos llaborales y societarios comu de les llibertaes públiques, nun va dar un pasu atrás nin siquier pa tomar impulsu y fae un llamamientu a toles organizaciones y movimientos sindicales, políticos y societarios, asina comu al conxuntu de los y les trabayadores d’Asturies, pa continuar lluchando escontra d’un sistema sofitáu na inxusticia y na acumulación de riqueza nes manes d’unos pocos privilexaos.

viernes, 8 de julio de 2011

Les cuenques, crónica d’una muerte programada.



La quiebra global del sistema socioeconómicu que caltién los Estaos modernos que conocemos lleva dellos años siendo motivu de noticia y actualidá, anque los medios informativos, al serviciu de la banca y los grandes mercaos falen de “recesión”, “desaceleración” o “crisis”, pero esti últimu términu suel emplegase cola boca pequeña. Crisis ye un conceptu más catastrofista qu’otra cosa, pero nunca nun ye catastróficu, que ye l’axetivu col que meyor podemos definir la situación. Ta pernidio si, el sistema neolliberal frañó, anque’l camín qu’escoyeron los que manexen el tenderete ye’l de “reformar o refundar el capitalismu” pero non enterralo. Toos/es sabemos qu’estes situaciones son cícliques y que con esti modelu tornaremos otra vuelta a tar asina o pior ( tovía nun tocamos fondu).

Lo ciertu ye que pesie a la crisis social y económica que se palpa na cai, y nel mundu, en les cuenques nun acabamos de ver munches diverxencies cola situación que vivimos tradicionalmente. Dirán dalgunos/es, ¿qué querrá dicir esti allumáu con eso? Pues una cuestión simple: en les cuenques nun tenemos denguna crisis puntual, vivimos en crisis, en crisis permanente. Podría dicir incluso qu’esa situación de crisis permanente afeuta a tol país de nueso, a toa Asturies, pero voi cientrame en les cuenques, que ye onde yo faigo vida.

La razón pa dicir que les comarques mineres lleven décades en crisis permanente ye fácil de ver. La meyor preba ye simplemente facer memoria ente toles xeneraciones que vivieron los caberos 30 años. Toles persones coincidirán nunos mesmos recuerdos del panorama social, económicu y políticu: muncha conflictividá, muertos nel trabayu, munchos despios masivos, precariedá, altes tases de paru y los mesmos gobernando. L’ambiente nel que medramos toos/es ye’l mesmu, solo cambien dalgunos detalles. Esos recuerdos faen que caltenga qu’esta zona d’Asturies arrecostina un problema estructural, mui fondu, como un cancanu qu’aportó al güesu d’una persona y traxó consigo yá la tráxica metástasis.

Poro, pueo dicir que deberíen ser honestos y falar a los/es ciudadanos/es de les cuenques cola verdá, dicinos qu’estos conceyos tienen enriba una crisis estructural, un status quo, que se necesita superar pero naide da’l pasu polo arreyáu que ta nel Nalón y el Caudal. Paez que forma parte de la nuesa idiosincrasia. ¿Qué facer? Entamar a esconsonar y facer frenti a les imposiciones que sufrimos en les cuenques dende neños/es. La ciudadanía nun tien qu’aferrase a milagros o pensar que somos desafortunaos por casualidá. Más bien hai que decatase que’l modelu industrial, políticu y sindical que predomina en les dos cuenques más importantes d’esti país nun val y nun da pa más. Los/es trabayadores d’Alas Aluminium fueron les últimes víctimes del mesmu y probatiblemente yá se dieron cuenta d’ello. El problema ye que se tea que llegar a eses situaciones pa danos cuenta.

Tenemos qu’entamar a ser más críticos y dar pasu al cambiu. Pero eso nun va llegar si nun somos toos/es más participativos/es y conquistamos los nuesos drechos colleutivos con llucha, como ficieron los nuesos antepasaos, nun queda otra. ¿Qu’hai enfrenti de nós pa complicanos la vida y torganos el futuru? Pues sindicatos vendios a la patronal que manexen fondos públicos a deu, políticos que solo obedecen imposiciones de la Unión Europea y Madrid y empresarios ensín dengún apegu polos drechos de los/es trabayadores, nin tampocu, por estos valles tan guapos enllenos de fósiles industriales. Pero perenriba de tola cadarma del poder y de tolos sos axentes qu’acabo citar ta’l meyor arma d’ellos: la comodidá. El día que apaguemos la televisión, miremos poles nueses vides y non pola de famosillos/es y llevantemos del sofa tendremos muncho fechu. Solo con superar esta situación d’adormecimientu y comodidá programada daremos el mayor pasín pa ser dueños del nuesu futuru. A los qu’hipotequen el nuesu futuru a cambiu de intereses personales egoistes quedara-yos pocu nel altar de la hestoria de les cuenques. Yá tuvieron muncho’l traseru sentáu. Tovía tamos a tiempu.

Xose A. González – estudiante y militante de Darréu.

Denuncien torgues pa escolarizar a neños d’infantil y primaria nes clases d’asturianu


El sindicatu SUATEA fizo llegar a los medios la denuncia de l’asociación de padres y madres del Colexu d’Educación Infantil y Primaria Tremañes, en Xixón. Esti centru escolarizó l’asignatura de Llingua Asturiana nel Segundu Ciclu d’Educación Infantil polo menos dende’l cursu 2002-2003 fasta’l cursu 2007-2008, incluyíos. Según espliquen los padres d’esti colexu “nos cursos 2008-2009 y 2009-2010 el Colexu caltuvo esta asignatura namás en Primaria, porque la Conseyería nun reconoció l’horariu suficiente pa que’l mayestru la materia la impartiese tamién n’Infantil”. Esti situación solucionárse nel cursu 2009-2010, “por fin, el Colexu pudo recuperar la normalidá nesti aspeutu, tornando impartirse Llingua Asturiana en toles estayes educatives; pa ello cuntó con una mayestra que compartía’l so horariu de trabayu col CEIP de Xove”.

El problema vien cola plantía anunciada pola Conseyería d’Educación pal cursu 2011-2012 que según espliquen “contempla un solu mayestru p’atender la escolarización d’asturianu en tres Colexos: Tremañes, Xove y Honesto Batalón”. De facese realidá esti endurecimientu les condiciones, los padres anuncien “qu’obligaría a qu’otra vuelta les families d’Educación Infantil de Tremañes nun puedan exercer el so drechu estatutariu a que los sos fíos cursen esta materia”.

Según estos mesmos padres “la Conseyería sabe perbién que la escolarización de la Llingua Asturiana en tola ufierta educativa del Centru (Infantil y Primaria) figura nos sos documentos oficiales (PEC, PXA) y que cunta col sofitu de tolos sos muérganos de gobiernu”, amás recuerden qu’esta escolarización “cuntó siempres col decidíu sofitu de tola Comunidá educativa y, cimeramente, col de les families, como amuesa’l fechu de que cuasi’l 100% del escolináu d’Educación Infantil curse davezu esta materia”.

Pa la organización de padres y madres d’esti colexu “los cambeos previstos na plantía pal prósimu cursu asitíense ñidiamente fora’l marcu llegal afitáu pa la escolarización de la nuesa llingua” yá que, recuerden, “la Llei 1/1998, de 23 de marzu, d’usu y promoción del Bable/Asturianu, nel so artículu 9, afita que’l Gobiernu asturianu “asegurará la enseñancia’l bable/asturianu y promoverá’l so usu nel sistema educativu”, mentres que l’artículu 10 diz que’l Gobiernu d’Asturies “garantizará l’enseñu’l bable/asturianu en toles estaes y graos”.

Amás ponen como exemplu la sentencia 1770/09 dictada, n’avientu de 2009, pol Tribunal Superior de Xusticia d’Asturies, que reconoció dafechamente que les enseñancies de Llingua Asturiana tán recoyíes nel currículu’l Segundu Ciclu d’Educación Infantil, reguláu pel vixente Decretu 85/2008, de 3 de setiembre (BOPA nu 212, del 11 de setiembre de 2008).

Dende l’asociación de padres y madres reconocen que’l CEIP Tremañes “cumplió cola so obligación d’ufrir a toles families d’Educación Infantil la opción de cursar estudios de Llingua Asturiana nesta estaya” y recuerden l’ésitu de la convocatoria “cuasi’l 100 % de les families optan voluntariamente por esa ufierta formativa”, polo que son munchos padres los que se ven “agravaos pol fechu de qu’unos años los sos fíos pueden estudiar esta materia y otros años la Conseyería d’Educación tórga-yos esi drechu, al ñega-yos el profesoráu necesariu”.

Califiquen esta situación de “grave” y piden a la Conseyería d’Educación que proceda a garantizar “el drechu que les nueses families tienen a que les sos fíes y fíos estudien asturianu en toles estayes educatives del CEIP Tremañes”. Pa garantizalo, afirmen “a l’Alministración abasta-y con asegurar un mayestru qu’imparta esta materia nos Colexos Tremañes y Xove”.

Asturnews

Camela, actuación estelar del Festival de la Sidra


Rescampla l'ausencia de grupos locales que puxen pola música y el folklore'l país.

Nun va un mes que tomó posesión como Alcalde de Nava y al “asturianista” Emilio Ballesteros yá-y tan lloviendo les crítiques pola so xestión na estaya cultural. A la improvisada organización de la tradicional folixa de San Xuan súmase agora’l fechu de que la principal actuación musical del Festival de la Sidra d’esti añu ye la del grupu madrilanu Camela, creador del estilu tecno-rumba, tan afitáu na cultura musical asturiana.

Por contra, rescampla l’ausencia de los grupos locales que se dediquen a puxar pola música y el folklore’l país, casu de la Banda de Gaites La Raitana (na que s’integren gaiteros y gaiteres de Nava y Piloña), del grupu de baille La Flor del Pumar o del grupu folk “Na que contante”, formáu por mozos de Nava y Bimenes. Polo menos, el programa d’actividaes ta asoleyáu n’asturianu, dalgo raro teniendo en cuenta que va dos años Asturianistes por Nava criticó al gobiernu municipal d’entós, del PSOE, precisamente por eso, por asoleyalu namás que na nuestra llingua. Esto ye “Compromisu por Asturies” y lo demás cuentu.

Infoasturies

Contra'l desallugu de la sede del sindicatu SAT en Xódar (Xaén)


CSI: Comunicáu ante la represión sindical del SAT

Dende la Corriente Sindical d'Izquierda solidarizamonos col sindicatu SAT y refugamos, rotundamente, l'actitú fascista del equipu municipal del conceyu de Xódar (Xaén), gobernáu pol PSOE, pola orde de desallugu de la sede sindical de los compañeros/es nesta llocalidá. El PSOE, col so comportamientu facista, álzase como'l masimu executor de la dura represion que, dende va años, sufren los compañeros/es del SAT pol simple fechu de reivindicar trabayu, tierra y dignidá.

El PSOE pretende asina esanicialos como sindicatu pola so persistencia na llucha contra los grandes terratenientes andaluces, y por consideralos responsables d'esmazcarar tola corrupcion politica, desamarrada pol PSOE en toa Andalucia.

Dende CSI desiximos la devolucion inmediata de la sede sindical y el cese de la represion contra los compañeros/as d'esti sindicatu que, ademas d'espulsalos de los sos locales sindicales, llévase-yos una y otra vez ante los tribunales, xúlgase-yos, sanciónase-yos y condérgase-yos, quedando entá trescientos xuicios por cellebrase. De la mesma, desiximos de manera fulminante la dimision de too l'equipu de Gobiernu municipal de Xódar y de tolos responsables d'esta xabaz y criminal represion fascista.

miércoles, 6 de julio de 2011

Darréu participará nel Festival de la Sidra de Nava




La organización de mocedá d'izquierda soberanista participará nel Festival de la Sidra de Nava que va a cellebrase los díes 8,9 y 10 de Xunetu.

Darréu pondrá a dimposición de toles persones que lo quieran el sábadu el puestu d'información y material na llocalidá naveta.

La militancia tará nel puestu p'atender toles consultes de los navetos y visitantes, repartir propaganda de la mocedá soberanista y poner el so material a la venta ente los asistentes. Per otru lláu,dende la organización anuncien l'anovamientu del so material, asoleyando nuevos modelos de chapes y camisetes de cara a autoxestionase pa desenrrollar les sos actividaes.

Dende Darréu encamienten a averase al puestu,participar o informase alrodiu del movimientu políticu que representa.


Infoasturies

martes, 5 de julio de 2011

CSI denuncia'l despidu de 31 persones na empresa "Unísono"


Conflictu llaboral en defensa del puestu de trabayu.

Según informa la Corriente Sindical d'Izquierdes,la empresa de telemarketing Unísono vien d'entregar cartes de despidu a 31 trabayadores alegando un "descensu nel númberu de llamaes",lo que-yos permite despidilos con una indemnización d'ocho díes por añu trabayáu.

Denúnciase que'l descensu,amás de nun tar probáu,puede debese a la desviación del trabayu hacia los centros que la compañía tien en Chile,Colombia y Portugal.

Unísono empresta serviciu a compañíes y asociaciones como Telecable,OCU y HC energía;ésta compañía cabera podría acabar de llevar tol serviciu telefónicu a Portugal,lo que supondría'l pieslle dafechu del centru de trabayu de Xixon.
Poro,la plantilla d'Unísono desendolcó una xornada de fuelga l'ún de Xunetu,ya'l sindicatu de clas asturianu anuncia que pidirá responsabilidaes a HC energía y a la direición de la compañía.

viernes, 1 de julio de 2011

Sábadu 9 de xunetu: Xornada contra’l desmantelamientu de les cuenques


Les comarques mineres arrecostinen una fonda crisis estructural que mos lleva a falar d’una crisis permanente nestes últimes décades. El pieslle d’empreses, la precariedá, el paru xuvenil y la emigración forciada dexen a estos conceyos nuna situación socioeconómica y los políticos gobernantes y los sindicatos amariellos nun dan salides a tala situación. Per otru llau son rápidos pa aprovechase d’esta crisis y sacar beneficios personales y personalistes, pa ellos y los sos allegaos nel Réximen.

Poro, la mocedá, farta d’esta situación dicimos basta. Les cuenques necesiten un cambeu radical y esti solo pue llegar cola movilización y la llucha contra’l hipotecamientu del nuesu futuru. Asina dende Darréu y CSI-Mocedá entamen pal prósimu sábadu día 9 de xunetu una xornada por unes cuenques pa vivir y trabayar dignamente.

La xornada va acoyer pela mañana una marcha a pie contra’l desmantelamientu del Nalón y el Caudal y pol futuru de los nuesos conceyos. La marcha saldrá a les 12:00 hores dende’l Parque Vieyu de La Felguera (Llangréu) y percorrerá bona parte del Valle del Nalón hasta L’Entregu (Samartín del Rei Aurelio), onde finará énte’l Centru Social La Semiente. Dempués de la marcha tola xente ta convidada a una espicha con precios populares pa reponer fuercies nel centru social entreguín. Darréu d’esto, tamién en La Semiente van cellebrase unes charres baxo’l llema “Les cuenques: una crisis estructural”. La charra-alderique, programada pa les 17:00 cuntará con dellos ponentes del ámbetu sindical, políticu, xuvenil y social que se dirán anunciando nos díes vinientes.

Dende la organización de mocedá revolucionario y soberanista Darréu y la Corriente Sindical d’Izquierda-Mocedá llamen a tola población d’Asturies y sobremanera de les cuenques a participar con nós activamente nesti día en toles actividaes programaes. Ye perimportante amás la implicación de la mocedá, yá que va ser esti coleutivu’l más afeutáu pol desaniciu socioeconómicu que viven les comarques mineres nun futuru prósimu. Ye más, la mocedá lleva siendo la mayor afeutada dende fai munchu tiempu. Asina los convocantes llamamos a la participación y a caltener la llucha día si día tamién en defensa d’un futuru dignu pa les cuenques y tamién pal conxuntu d’Asturies. La ofensiva neolliberal sigui avanzando y nun mos va regalar nada, namái queda movilizase contra ella.