jueves, 30 de junio de 2011

Concentración contra la represión el vienres en Xixón

A lo llargo del pasáu 14 de xunu, cinco mozos asturianos/es foron detenios/des. Cada cual, en llugares distintos: dos en Carreño, ún en Xixón y dos na Cuenca del Caudal. Los/es cinco fueron detenios/des nuna especie de redada, pola brigada d’información de la policía nacional.

¿Qué tienen en común ente ell@s? La so pertenencia a una organización llegal y pacífica: el Partido Comunista de los Pueblos de España. Se les acusa de llanzar cócteles molotov escontra los caxeros automáticos de dos sucursales bancaries, demientres les lluches de Duro Felguera del pasáu mes de xineru. Los/es compañeros/es ñegan completamente esta grave acusación (afitada en supuestos ya ensin nenguna preba) qu’amás ye contraria al mou d’actuar de la organización na que militen. Dafechu, nesos díis sofitaron pacíficamente les marches de protesta de los trabayadores de Duro Felguera.

Posteriormente la policía nacional les acusó d’un delitu de terrorismu y decidió poner a disposición de l’Audiencia Nacional a trés d’ell@s. Inmediatamente, se produxeron concentraciones de sofitu n’Uvieu y en Xixón, esixiendo la so lliberación, asina como en numberosos puntos del Estáu Español (Las Palmas, Madrid, Barcelona, Valencia, Bilbo,...) y del mundiu; movios pola solidaridá énte una inxusticia.

L’Audiencia Nacional desestimó la imputación por terrorismu, considerando l’aición de la policía como desmedía, y dándo-y cursu al Xulgáu d’Instruición nº1 de Llangréu.

Sabemos qu’esto nun ye nenguna casualidá. El contestu nel que se producen estos fechos ye’l del procesu de movilizaciones más importante de los caberos años, nun momentu en que a los trabayadores y les sos families se nos impon pagar una crisis que nun provocamos. Poro se intenta criminalizar a aquellos lluchadores, militantes u organizaciones que se enfrenten díi a díi a los retayos y la degradación de les nueses condiciones de vida. N’Asturies los recientes casos de Fer, o los/es 15 de Cangás, resulten clarificadores a esti respective. Nun momentu en que la llucha ye más necesaria qu’enxamás, la detención y encarcelamientu de los compañeros de la CSI Cándido y Morala hai unos años empobinaben yá nesta direición: la represión y el castigu exemplar énte el conxuntu del movimientu obreru y los seutores más combativos de la sociedá, utilizando pa ello tola lexislación que se vien desendolcando cola escusa de la llucha escontra’l terrorismu.

De la mesma manera que respondimos estos ataques cola movilización dende la Plataforma escontra la Represión y poles Libertaes convocamos una CONCENTRACIÓN pal próximu vienres 1 de xunetu, na plaza del Parchís de Xixón a les 20:00 hores pa denunciar esti atropellu escontra los derechos democráticos básicos faciendo un llamamientu a toles organizaciones sindicales y polítiques de la esquierda, al conxuntu de los/es trabayadores y de la mocedá a movilizase en defensa de estos/es compañeros/es.

¡BASTA DE REPRIMIR A L@S QUE LLUCHEN!

¡SI TOQUEN A ÚN, TÓQUENNOS A TOOS/ES!

Movilización de los trabayadores de Saint Gobain


Alredor d'ún cientu de trabayadores de la plantilla de Saint Gobain n'Avilés concentrose frente a la fábrica col enfotu de pidir meyores llaborales.

El total de la plantilla de Saint Gobain n'Avilés sofitó güei la cuarta xornada de movilizaciones en protesta pola falta d'alcuerdos na negociación del nuevu conveniu colectivu.La movilización,amás de la concentración,consistió nel paru de la fábrica durante cuatro hores en caún de los turnos llaborales.

Según representantes sindicales la multinacional busca ampliar la subcontratación a toles actividaes ayenes a la fabricación y separtar los sueldos del IPC.Pela so parte,los trabayadores reclamen una reducción de la xornada llaboral y garantizar que'l salariu tea venceyáu al IPC y,en casu de que la compañía tenga beneficios,que la xubida seya mayor que l'índiz.

Alviértese tamién que la negociación sedrá llarga y dura,polo que les movilizaciones sedrán más "numberoses y radicales".

Fonte: Infoasturies

miércoles, 29 de junio de 2011

Darréu quier denunciar la nueva represión n'internet y desixe garantíes democrátiques pal mozu que s'enfrenta a xuiciu n'A.N.


Darréu denuncia'l siguimientu qu'hai n'internet per parte de les fuercies represives y pide garantíes democrátiques pal mozu independentista xixonés que s'enfrenta a un xuiciu n'Audiencia Nacional española.

La organización de Mocedá Independentista Revolucionario Darréu quier facer públicu'l casu d'un mozu xixones que s'enfrentará a un xuiciu en prósimes feches y cuya petición de conderga ye de 18 meses de carcele. Esti mozu independentista tendría esta conderga por facer públicos nuna rede social unos comentarios que según la fiscalía constituyen un presuntu delitu “d'enaltecimientu del terrorismu”. N'avientu de 2009 esti mozu foi lleváu a l'Audiencia Nacional onde se-y obligó a declarar dientru de la “Operación Arpón” baxo llexislación anti-terrorista.

Anguañu'l casu torna a l'actualidá pola resolución de la fiscalía, que pide añu y mediu de carcele pa esti ciudadanu. Dende la mocedá d'izquierda soberanista Darréu queremos espresar el nuesu refugu a esti xuiciu yá qu'esta persona encausada solo dio la so opinión nuna rede social. Caltenemos que namái por eso, por una opinión contraria a les autoridaes del Estáu español, una persona nun merez enfrentase a una petición penal asina. Per otru llau garantizamos garantíes democrátiques plenes pal mozu xixonés nel trescursu del procesu.

Fuera del casu enconcretu dende la organización xuvenil Darréu queremos pidir a la mocedá qu'emplega les redes sociales un pocu de precuru, yá que la policia española controla estos espacios d'internet pa perseguir a determinaes persones que consideren incómodes pal sistema español y busquen de forma casi constante dalgún indiciu o motivu pa criminalizar y reprimir. Poro, llamamos a la mocedá a facer un usu d'estos espacios críticu y combativu, pero con responsabilidá, yá que les fuercies d'ocupación, como dicimos, busquen cualesquier motivu, por mínimu que seya pa reprimir y criminalizar les idees propies de les persones.

Tamién queremos reflexonar sobre'l supuestu delitu que cometió esti mozu “d'enaltecimientu al terrorismu”. Nel Estáu español se persigue a determinaos sectores políticos col supuestu envís de finar col terrorismu, o ciberterrorismu, como dicen nesti casu, pero d'otra miente nun ye enaltecimientu del terrorismu que personaxes públicos salgan xustificando y defendiendo'l xenocidiu de Francisco Franco, por poner un exemplu. O que se xustifique'l terrorismu d'Estáu o les aiciones de grupos parapoliciales potenciaos pol Estáu español. Dende Darréu lo tenemos nidio: la llibertá d'espresión solo val pal españolismu. Los que nun tamos nes coordenaes de la “nación” española, somos críticos col sistema del capital y los mercaos, y puxamos pol autodetermín de los nuesos pueblos tenemos llendada la llibertá d'espresión. Pa nós hai llímitaciones, pa ellos non.

www.darreu.org

Contra la privatización de Caxastur. Miércoles 29. 17 h. Hotel Reconquista


La privatización ye robu y corrupción.

El próximu 29 de xunu votase na Asamblea Xeneral de la Caxa la cesión del negociu financieru -depósitos, creitos, oficines, participaciones empresariales, propiedaes inmobiliaries., etc.- al bancu priváu Effibank resultante de la fusión de la nuesa Caxa con Caxa Cantabria y Caxa d'Estremadura.

Esta decisión supon la privatización de Caxastur y la lliquidación d'un modelu d'aforru popular asociáu al desendolcamientu d'Asturies que cunta con más de 130 añu d'historia y que supunxo una aportación de primer orde en términos de xeneración de riqueza y d'empléu directu ya indirectu p'Asturies, amás d'una ferramienta insustituible de cohesión y progresu al traviés de la Obra Social financiada colos beneficios de la Caxa.

martes, 28 de junio de 2011

Llamada a conceyu abiertu al Pueblu d'Uviéu


VIENRES 1 DE XUNETU -19:00 H. -SALÓN D'ACTOS CIBERCENTRU DE LA LILA- CAI LA LILA,17

El Vienres 1 de Xunetu “Conceyu Abiertu por Uviéu” cellebrará’l un conceyu abiertu, que tendrá llugar nel Salón d’actos del Cibercentru de La Lila, asitiáu na cai La Lila 17.

La ciudá d’Uviéu,dientru de la tónica xeneral del país,vien viviendo dende va décades un déficit democráticu frutu de les polítiques caciquiles ya favoratibles a intereses ayenos al pueblu desendolcaes polos distintos gobiernos,n’especial el del PP con Gabino de Lorenzo a la tiesta por ser el que más años lleva na poltrona.Como resultáu sofrimos privatizaciones de servicios básicos y clave nel bientar del pueblu uvieín -basoria,llimpieza,instalaciones deportives,tresporte municipal,agua…-,amiguismu,clientelismu y mala xestión económica cola complicidá de fuercies que se dicen “de la oposición”.

Poro,dende Conceyu Abiertu por Uviéu encamentamos a toos y toes a acudir y entamar una dinámica participativa y de democracia direuta que fine col gobiernu “pal pueblu ensin el pueblu” y qu’entame con un modelu de conceyu “del pueblu pal pueblu”,nel nuesu y nel restu de conceyos d’Asturies.

De cómo entamar a algamalo falaremos,énte otres custiones, esti Vienres dende les 19 hores nesti actu abiertu a toos y toes.

Pa cualquier dulda o suxerencia: uvieu@conceyuabiertu.org

www.conceyuabiertu.org

Folixa solidaria


El Muerganu Antirrepresivu Popular Sofitu convoca pal Sabadu 2 de xunetu una cena solidaria pa siguir faciendo frente al pagu de multes, gastos xudiciales y campañes. Por ello dende SOFITU entamamos un nuevu actu solidariu-festivu que nesta vegada consisti nuna folixa nel CSA SESTAFERIA de Xixón con bebora, xinta, música y bon ambiente’l prosimu sabadu 2 de Xunetu de magar les 21 hores cola fin de siguir recaldando perres pal pagu de multes, gastos de xuiciu, abogaos y tolo que caltien la represión. El Preciu ye namás de 10 euros.

Rexonalismu, federalismu y asturianismu, 1876-1936


Esti prósimu xueves, 30 de xunu de 2011, cellébrase en Xixón la conferencia Rexonalismu, federalismu y asturianismu,1876-1936 a cargu de Javier Cubero de Vicente.

L'actividá empieza a les 20:00 hores nel Club de Prensa Asturiana de Xixón, salón d'actos del Centro San Eutiquio (a la vera de la ilesia de San Pedru en Cimavilla) y preséntala Inaciu Galán.

lunes, 27 de junio de 2011

El camín de Santiagu escaez la llingua que lu vio ñacer.


Un proyeutu sobro la diversidá llingüística del Camín de Santiago, escaez la llingua asturiana.

Énte l’anunciu públicu de la rialización d’un proyeutu européu que, impulsáu pol Istitutu Navarru del Vascuence, la Secretaría Xeneral de Política Llingüística de la Xunta de Galicia, la Oficina de la Llingua Bretona, l’asociación del Estudiu de Filoloxía Aragonesa, la Universidá Christian-Albrechts de Kiel (Alemaña) y Euroccat (Eurocongresu 2000 de los países occitanos y catalanes), cuenta con financiación de l’Axencia de la Cultura de la Comisión Europea, teniendo comu oxetivu la promoción, espardimientu y dignificación de les llingües y cultures minoritaries de los territorios que traviesa’l Camín de Santiago, l’Asociación Cultural N’Ast asoleyó un comunicáu sobre esti proyeutu.
N'AST valora positivamente esti proyeutu nel sentíu "en que reivindica la esistencia d’una Europa cultural y lingüísticamente diversa acullá de los Estaos anguañu esistentes, poniendo amás de relieve la importancia hestórica del Camín de Santiagu comu canal de comunicación y exa vertebraora de la Europa occidental". Igualmente valora de manera positiva’l qu’al traviés d’esta iniciativa per primer vegada la Propuesta Ortográfica del Estudiu de Filoloxía Aragonesa "va ser utilizada con proyeición internacional al ser usada en tolos materiales del proyeutu: paneles d’una esposición itinerante, dípticos publicitarios, un portal multilingüe, etc."

Polo tanto, denuncia N'AST, "nun podemos dexar de llamentar l’ausencia del nuesu País y de la llingua asturiana nun proyeutu de tala significación". Pa l'asocuación en defensa de la llingua y cultura asturianes "una vegada más Asturies torna esapaecer del mapa comu resultáu del despreciu istitucionalizáu y de la voluntá de marxinación de la castra que gobernó Asturies, a lo llargo d’estos caberos trentas años, haza tolos trazos específicos de la identidá asturiana". Esta nueva constatación "de la dura realidá, cuando menos, tendría de llevamos a tolos seutores comprometíos cola reivindicación llingüística del Asturianu a una reflexón colleutiva sobro’l más qu’evidente estancamientu que carecemos comu movimientu na nuesa capacidá de condicionar ya influyir tanto no social comu no istitucional a nivel asturianu ya internacional", rematen la nota prensa.

Fonte: Infoasturies

Unes 5.000 persones axúntense en Nantes pa pidir la rexunificación de Bretaña


Nantes, capital hestórica de Bretaña

Unes 5.000 persones axuntáronse, el sábadu 18 de xunu, en Nantes pa reclamar la rexunificación del departamentu del Loira Atlánticu a la "rexón" de Bretaña, xunto colos departamentos de Costes d’Armor; Finisterre; Ille y Vilaine; y Morbihan, amás de reivindicar los drechos democráticos, llingüísticos y culturales del pueblu bretón. Dellos partíos nacionalistes bretones, asina como diferentes asociaciones culturales y en defensa de la llingua, asistieron a la manifestación, que terminó con una persona detenida, dempués de llanzar güevos y boles de pintura en varios edificios institucionales franceses.

Negativa de los políticos

La manifestación, que ye convocada cada añu, tuvo un puntu d’inflexión en 2008 cuando más de 10.000 persones manifestáronse pa reclamar les demandes hestóriques bretones. Esti añu quería ser una reivindicación a los partíos políticos pa qu’afronten el conflictu, énte les elleiciones presidenciales franceses que se llevarán a cabu en 2012. Anque la Constitución francesa permite la rexunificación de les rexones ente sí o d’adscripciones a otros departamentos baxu referéndum, los políticos mayoritarios d’éstes son mui reticentes a la rexunificación. Sicasí, los dirixentes llocales reconocen que la cooperación ente esti departamentu y Bretaña ye cada vegada mayor, tal y como reconocieron unos díes enantes de la manifestación los presidentes de les rexones del Loira Atlánticu ya Ille y Villaine, los cuales declararon qu’había una clara xunión ente estes dos entidaes. De toles formes, afitaron que la xunión alministrativa "podría causar más problemes de los que resolvería".

Una división de Pétain

Actualmente la nación bretona ta dividida alministrativamente ente la rexón de Bretaña y el departamentu del Loira Atlánticu (el cual alcuéntrase dientru de la rexón del País del Loira). Esta división tien los sos entamos nel réxime collaboracionista colos nazis de Vichy del xeneral Pétain, y entá nun se modificó. En 1972 y en 1982, cuando se crearon los conseyos rexonales y aprobárase la llei de descentralización francesa, la mayoría de diputaos bretones pidieron la inclusión del departamentu bretón na rexón. Finalmente, el mapa dexose tal como taba. Los nacionalistes bretones piden la xunión del Loira Atlánticu, yá qu’aparte de ser una parte importante del antigüu condáu de Bretaña (la capital yera Nantes), tamién consideren que, nel marcu d’una rexón como’l País del Loira (de claru acentu francés) se ta perdiendo la poca identidá cultural y llingüística bretona que queda nel departamentu.

Fonte: Aruelu.com

viernes, 24 de junio de 2011

La farsa del casu "Bateragune" escontra'l sindicalismu combativu



SOLIDARIDÁ: Comunicáu de sofitu a Rafa Díez y al sindicatu LAB

Dendi Asturies, la Corriente Sindical d’Izquierda quier asoleyar el so sofitu y solidaridá con Rafa Díez Usabiaga y los sos collacios del sindicatu LAB, que van ser xulgaos pol “delitu” de llevar fasta les caberes consecuencies, la defensa de la llibertá y los drechos del Pueblu Trabayador Vascu.

Pa nos, perbaxu la farsa’l nomáu casu “Bateragune”, lo que se quier tapecer ye un nuevu montaxe xudicial y policial que namás tien comu finxu la represión de los representantes sindicales más combativos y coherentes d’Euskal Herría y l’intentu d’esaniciar la resistencia de los y les trabayadores vasques.

N’Asturies y, en concretu na Corriente Sindical d’Izquierda, conocemos perbien lo qu’apareyen esta triba de xuicios y acusaciones. Y, darréu d’ello, facemos de nueso la causa d’estos collacios y vamos facer cuantu tea nes nueses manes p’algamar la so asolución y la so puesta en llibertá.

Esti ye’l camín que tenemos de percorrer: la llucha pola causa de los y les trabayadores y la solidaridá ente los pueblos. Esti ye’l camín que siempres percorrieren Rafa Díez y los sos collacios y ésti ye’l camín nel que siempres van tener a la CSI al empar.












San Xuan 1897: Fiestes sangrines

Na víespera de San Xuan de 1897 dióse en Mieres una revuelta popular que fo duramente reprimida, dexando cuatro muertos y munchos más feríos. Sería ún de los últimos motines de subsistencia que se dieron nuna Asturies qu’entamaba’l procesu d’industrialización.

Yera’l Mieres de finales del sieglu XIX un conceyu que daba los primeros pasos de la revolución industrial, onde más de la mitá de la población activo yeren trabayadores industriales, especialmente del metal, yá que la minería tovía nun tenía’l puxu que garraría nes décades siguientes, y onde tovía un terciu de la población activo yeren llabradores que vivín únicamente del trabayu agropecuariu. Yera amás un conceyu con un altu nivel de precariedá, onde les perres llegaben pa mui poco y la menor suba de los precios de los artículos de primera necesidá implicaba pa munches families pasar fame.

Daquella, tolos artículos taben gravaos con impuestos indirectos, llamaos consumos, que cargaben especialmente los artículos de primera necesidá. Les autoridaes de cada conceyu contrataben con un particular el cobru de los arbitrios, y el rematante encargábase depués de cobrar les tases, polo que la concesión a unu o a otru d’esos cobros xeneraba grandes rivalidaes ente los negociantes de cada conceyu. Nel casu de Mieres, los consumos d’esi añu xeneraron munchu malcontentu ente los vecinos: D’un llau, ente los aspirantes a quedase col cobru de les tases, y d’otru, ente los comerciantes y el pueblu trabayador, yá que la suba de les tarifes implicaba una suba de precios.

El 22 de xunu una manifestación espontánea pasó peles cais de Mieres del Camín. Entamáronla les muyeres, y sumáronse obreros de les factoríes cercanes, ente elles Fábrica de Mieres. Concentraos delantre la Casa Conceyu, una comisión subió a negociar col alcalde, el conservador Gutiérrez Díaz-Faes, que taba reuníu col empresariu Martínez, el principal arrendatariu de los consumos del conceyu. Les peticiones yeren, básicamente, el control de pesos y midides, pa evitar estafes de los comerciantes a los obreros, el control de calidá de la carne y el tocín, el control del pesu del pan y la baxa de les tarifes de consumos nos artículos de primera necesidá, compensándola con una suba a los artículos de luxu. Nun se llegó a un alcuerdu. Una segunda comisión, formada por muyeres, tampoco sacó un ris del alcalde y l’empresariu arrendatariu.

Depués de correse ente los manifestantes el rumor de que l’empresariu Martínez insultara a los trabayadores, la masa xibló-y de la que salió de la Casa Conceyu, y nun lu lincharon gracies a otru notable local, Jerónimo Ibrán, que taba na plaza negociando colos manifestantes. Cuando Martínez subía pela escalera de la so casa, dende una ventana de la mesma arrefundiaron cacharros que cayeron enriba los manifestantes, mancando a dellos. La masa esprecetada desixó-y al alcalde que detuviere a Martínez y ésti fíxolo depués de da-y munches vueltes y cuando los ánimos yá taben mui encesos.

Nesto, llegaron unos 200 manifestantes del valle Turón, sumándose a los cientos que yá había na plaza, y formóse una tercera comisión que subió a negociar otra vuelta. La masa, ca vez más numberosa, diba emburriando contra la Casa Conceyu, obligando a los guardies civiles a recular, y xenerando tensión abonda. Una mano imprudente arrefundió’l primer peñazu contra la Casa Conceyu, y de secute la xente entamóla colos cristales del edificiu, que foron cayendo con gran estrueldu. La guardia civil entamó a disparar, y cayeron muertes dos persones. Mientres unos manifestantes escapaben, otros intentaben encarase colos guardies, que siguieron disparando causando otru muertu más y munchísimos feríos (ente ellos unu que morrería al otru día). La mayoría de los feríos fuéronlo per detrás, lo qu’indica que taben escapando cuando-yos llegó’l tiru. Ente la guardia civil, hubo trés mancaos por peñazos o arma blanca. El teniente Díaz Cármenes, que diera la orde de disparar, fo l’encargáu de la investigación posterior, faciendo asina de xuez y parte. Dos compañíes de soldaos viaxaron d’Uviéu a Mieres p’ayudar na represión de la revuelta y tuvieron nel conceyu hasta’l día 7 de xunetu.

Depués de la traxedia, les autoridaes mierenses decidieron echa-y la culpa a los cabezaleros socialistes Varela y Pérez, que fueron deteníos el día 23 baxo l’acusación de ser los promotores del conflictu, anque esa estratexa nun prosperó yá que’l motín yera espontáneu, anque los empresarios malcontentos col repartu del cobru de les tases influyeren enforma pa xenerar el clima necesariu pa la revuelta.

Esti motín, xunto colos que se darín nos años siguientes n’otros conceyos como Xixón o Uviéu, son les últimes manifestaciones n’Asturies de les formes de protesta social espontánea propies de la sociedá preindustrial, tanto pol conteníu (oposición a la suba de precios nos artículos de primera necesidá, y non llucha planificada por meyores sociales o llavorales) como pola forma, nun momentu en que les organizaciones obreres yeren tovía mui pequeñes y nun taben en condiciones de dirixir les lluches. En tou casu, nel motín de San Xuan vemos les primeres traces de la transición de les formes de llucha espontánies a les más organizaes, yá que los obreros de les fábriques punxéronse en fuelga p’apoyar les reivindicaciones de les muyeres. Años estos contradictorios, onde les clases populares diben descubriendo nueves formes d’organización y protesta, y onde les autoridaes de la Restauración namás tenín la represión como respuesta a les xustes demandes d’un pueblu probe y afamiáu.

[24-IV-2004]

Faustino Zapico

Fonte: http://faustinozapico.com/blogue/san-xuan-1897-fiestes-sangrines/

jueves, 23 de junio de 2011

Detención d'activistes polos drechos animales


La Guardia Civil detuvo a once persones n'Asturies, Bizkaia,Madrid y Galicia cola acusación d'"ecoterrorismu".

La operación,dirixía dende xulgaos gallegos,entamose escontra los activistes por "tar vinculaos al frente de lliberación animal" como "ecoloxistes radicales". Tolos deteníos foron treslladaos a Santiago acusaos de lliberar animales en circos,zoos y granxes de visones.

Dende les organizaciones polos drechos animales denuncien que la operación busca criminalizalos y algamar cabeces de turcu pa satisfacer a los grupos de presión y multinacionales qu'empleguen la esplotación animal.

Fonte: Infoasturies

martes, 21 de junio de 2011

[2002] Caxastur

Uviéu, xineru de 2002. Militantes d'Andecha Astur na Plaza la Escandalera demientres la campaña a la contra Cajastur. Pola normalización llingüistica dientru la caxa aforros, la igua del nome d'ésta a "Caxastur" y por una caxa al serviciu de les necesidaes y les perres de lxs asturianxs, non del gran capital.

domingo, 19 de junio de 2011

Trevín n'evidencia y solidaridá activa

L'Audiencia Nacional treslladó'l so sentir fai unos díes, nun hai motivos pa dicir que'l supuestu ataque a dos caxeros automáticos seya terrorismu ( ¿ye verdá que s'atacaren esos caxeros o ye la mentira d'aniciu del montaxe?). El tema ye que'l casu va pal xulgáu de Llangréu, onde estes persones sedrán xulgaes dientru d'un tiempu. Dende equí queremos desixir la so completa llibertá ensín cargos. Agora ye'l momentu de poner n'evidencia'l montaxe policial que maquinó y manexó Antonio Trevín.

Asina, tres paecer evidente'l montaxe nun hai que descartar nueves formes de facer dañu dende l'Estáu neofranquista español a la izquierda de clas d'Asturies. Estos díes valieron pa qu'a lo menos tola izquierda trabayare nun mesmu sen y con una mesma esmolición. El nacionalismu/soberanismu asturianu supo tan al altor de les circunstancies con delles amueses de solidaridá y comunicaos bastante nidios, sicasi'l d'UNA-BLOQUE quedó un pocu curtiu, anque ye d'agradecer que dende esa coalición s'asoleyare dalgo, pues cuando'l casu Fer dende esos seutores del nacionalismu nun se vió denguna opinión formada y consensuada pública del llau del militante soberanista asturianu. Poro, hemos de valorar positivamente'l llabor de la izquierda tresformadora y revolucionaria, anque s'espeyaron dalgunes deficiencies, pues la capacidá de rempuesta na cai foi bien axustada o cuasi que probe. Ye pernecesariu enanchar una rede de comunicación qu'énte montaxes como esti sepan dar forma y rempuesta solidaria a coses asina. Habrá que tar soyertes y tamién axilizar la construición de dalgo asina.

Como última cuestión y respetando anque nun compartiendo la postura del PCPE respeutu a Comisiones Obreres y l'entrar nel sindicalismu oficialista y consiguir postures dende dientru de calter revolucionariu asoleyar dende equí solo una idega. El PCPE-Asturies y tamién a nivel estatal, da-y a CCOO un balón d'osixenu con postures sindicales y polítiques coherentes, dando a esta gran central sindical dalgún seutor o comité qu'entá anguañu sigui furrulando pola clas trabayadora y de forma honrada. Pero d'otra miente, anque'l PCPE tea'l so determín y el so enclín haza'l sindicalismu de CCOO ésti sindicatu nun movió un deu alredor de lo qu'asocedió esta cabera selmana. ¿ Val la pena siguir puxando dientru d'un sindicatu tan mezquín ? ¿ Anque t'acusen falsamente de terrorismu y el to sindicatu mira pa otru llau merez la pena siguir al pie de la lletra anguañu l'ayalga d'obra que mos dexó Lenin? ¿ Nun sedrá meyor dexar esa teoría-praxis pal momentu en que seya necesaria y el momentu seya pre-revolucionariu o a lo menos caliente?

jueves, 16 de junio de 2011

L'Audiencia nacional española nun considera 'terroristes' a los comunistes deteníos


Nuevu ridículu de la delegación del gobiernu español n'Asturies.

Los trés militantes del PCPE deteníos el martes quedaron en llibertá con cargos tres declarar güei na Audiencia Nacional española tres ser acusos de delitos de terrorismu. Finalmente, pese al enfotu de la policia y de la delegación del gobiernu español n'Asturies de mandalos a Madrid como terroristes, el tribunal nun considera que los supuestos fechos polos que foron deteníos nun puen calificase de terrorismu y que sedría de daños polo que sedrá'l xulgáu d'instrucción de Llangréu quién analice los fechos .

martes, 14 de junio de 2011

Represión a dos militantes del PCPE-Asturies.




PCPE - 14/6/2011 - Asturies/Estáu Español

Na tarde d'esti martes, día 14 de xunu, presentáronse dellos policíes de paisanu na sé'l PCPE en Candás y, ensin mediar desplicación denguna, lleváronse deteníos a Vanesa García Rodríguez y a José Iván Fernández, esti últimu ye ñembru del Comité Central del PCPE.

Al estilu de la Brigada Político-Social de l'anterior dictadura, personose un grupu bien grande de policíes secretes, en dos vehículos, que requirieron a los dos ñembros del Partíu y que los llevaron presos, ensin que mediaren desplicación denguna y ensin que pudieren siquier informar a otra persona que tamién s'alcontraba nel llocal nesi momentu.

Esta actuación policial vien a ser una espresión más de la llínia d'acosu que los cuerpos de policía desendolquen contra l'actividá política del PCPE y de los sos militantes. Respuende a una intencionalidá política de tratar de torgar l'actividá política del Partíu, que s'encara direutamente colos intereses de la dictadura del capital, la oligarquía y los aparatos del Estáu que los protexen. Esta aición, amás, realízase nun momentu nel que'l gobiernu de la socialdemocracia impulsa la nueva reforma llaboral que quier desaniciar los drechos de la negociación coleutiva, y que quier colocar a la clas obrera a los pies de la patronal.

Nengún acosu, por violentu que seya, va impedir la continuación de l'actividá política del PCPE al lláu de la clas obrera na llucha pol socialismu ya'l comunismu. Cualaquier ataque nesta situación nun fai más que medrar la moral de llucha del Partíu, ya'l so determín d'encarar estes aiciones col sofitu del pueblu de la clas.

El PCPE desixe la llibertá inmediata de los sos dos ñembros, ensin cargos de tipu dengún.

El PCPE denuncia l'actuar de les fuercies policiales de la dictadura del capital, actuar que -una vez más- pon de manifiestu'l cálter de clas del Estáu y de los sos aparatos de represión.

¡LLIBERTÁ PA VANESA YA IVÁN DARRÉU!
¡VALIÓ DE LA REPRESIÓN PA COL COMUNISMU!

Nota prensa del PCPE

Movilización escontra les llínies d’alta tensión


Marcha, concentración y xinta popular

El Coleutivu d’Afeutaos pola Llínia Costa Verde qu’agrupa a los vecinos afeutaos por esta llínia y les sos subestaciones que va pasar pelos conceyos de Gozón, Carreño, Xixón, Sariegu, Sieru, Nava y Bimenes, convoca esti prósimu domingu 19 de xunu una marcha con salida a les 12 hores na Teyera d’El Monticu en Serín fasta’l práu onde Red Eléctrica tien prevista la instalación de la subestación Costa Verde en Serín, una de les pieces de la llínia de 400 KV Tabiella- Enllace Sama a Velilla.

Dende esti coleutivu, animen a la xente a participar nesta marcha-concentración del domingu, con posterior xinta (a la que cadún deberá llevar la so propia comida) a les 13:00 h. nel llugar de fin de la marcha.

Fonte: Aruelu.

Les actividaes de la XV Fiesta de la Oficialidá de la Llingua Asturiana van principiar el 22 de xunu


Bimenes yá zarró'l programa de la Fiesta de la Oficialidá de la Llingua Asturiana. La esposición del concursu de cómic n’asturianu va abrir les actividaes el 22 de xunu, anque la folixa va desarrollase la primer fin de selmana de xunetu.

La Casa Cultura de Santuyano ye’l sitiu que va acoyer, ente’l 22 de xunu y el 6 de xunetu, n’horariu de 16 a 20 hores, la esposición de les obres presentaes al VI Concursu de Cómic n’Asturianu de la Mancomunidá de la Sidra, una actividá na que collaboren los Servicios de Normalización Llingüística, Cultura y Mocedá de la Mancomunidá de la Sidra. Nel mesmu llugar, el llunes 27 a les 19.30 hores, va presentase el llibru ‘Cánigu lliterariu’ y va celebrase una llectura de testos na llingua’l país por parte d’autores de la zona. Tamién van abrise les pliques del XIV Concursu de Cuentos pola Oficialidá del Asturianu.

Al día siguiente, a la mesma hora, va proyeutase ‘Los viaxes de Gulliver’, una de les primeres cintes doblaes al asturianu, obra de Gonzali Producciones. Los responsables d’esti trabayu van esplicar a los presentes cómo ye’l procesu pa doblar una película al nuesu idioma. Ente les actividaes de la XV Fiesta de la Oficialidá de la Llingua Asturiana tamién hai espaciu pal teatru costumista. En concretos, los yerbatos y visitantes van poder disfrutar de la representación de ‘Xuacu y Telva’ pol grupu de teatru ‘El Hórreo’, de Barcia (Valdés). Va ser el xueves 1 de xunetu, a les 19.30 hores na Casa Cultura de Santuyano.

Mentes, el vienres, a les 19.30 hores, va celebrase la entrega de premios del Concursu de Cuentos y la llectura pública de la obra ganadora por parte del so autor o autora. De siguío, alredor de les 20.30 hores, va ser el tiempu del humor de la mano de Ludivino Díaz González, ‘Pin de la Cotolla’, que va presentar el so espectáculu ‘Cotollaes’.

El sábadu, día grande d’esta folixa que conmemora l’aprobación nun Plenu de la oficialidá de la llingua asturiana nel conceyu yerbatu –torgáu llueu pol Tribunal Constitucional–, los actos de la mañana van treslladase a Martimporra, a la Casa Conceyu. A les 12.30 hores va lleese’l pregón, qu’esti añu va ellaborar Adolfo Camilo Díaz, escritor, dramaturgu y xestor cultural, pa llueu celebrar una misa n’asturianu oficiada por José Manuel García de Jesús y cantada por El Corriellu la Pandorga. Pa les 13.30 hores tán previstes les actuaciones del Ensame de Música Tradicional y del Grupu de Baille de Los Yerbatos.

Pela tarde, l’activá va pasar de nuevo a Santuyano cola celebración, a les 18 hores, del XII Concursu de Gaiteros y Gaiteres Mozos. Dos hores más tarde va actuar el grupu folk Na que contate y, a les 21 hores, van entregase los premios del concursu de gaiteros. Hai que destacar que nesta xornada festiva dellos restoranes del conceyu ufren un menú especial ‘Fiesta de la Oficialidá’ con platos típicos del país. Los establecimientos que participen son l’Asador Noval, Bar El Llugar, Mesón San Cipriano y Hotel El Boreal.

Programa completu

Fonte: Asturies.com

Nora Antifa entama'l "Nora Sounds Attack".

Esti sábadu a partir de les 23:00 h ( Diañu Rock Bar, La Pola Siero).

CARTELU:

- DORIS ( HIP HOP COMEDY PRESNTANDO L`SO NUEVU TRABAYU TO ERA BROMA )

- WANYE &GORY ( MNR )

- HECK( MNR)

- AÑON ( MNR)

- OMAR ( XIXON HIP,HOP)

- OZONOMAN ( FREEDON FIGTHERS )

- MICRU LLIBRE

- INTRODUCCION ESPECIAL A CARGU DE PABLO X. SUAREZ Y SERGIO TABOADA ( TIMBA POETICA)

ENTRÁ DE BALDRE ( GRATIX , FREE , POR LA PATI , 0 EUROS )

AMA LA MUSICA ODIA AL RACISMU

Conceyu Abiertu por Noreña votó pol cambiu nel Ayuntamientu


Na sesión de conformación del nuevu Ayuntamientu votó cambiu y decidió sofitar al candidatu d’Independientes por Noreña (IPÑ)

Tres la cellebración de dos conceyos abiertos onde taben convocaos los vecinos y vecines de Noreña que quixeren participar, Conceyu Abiertu por Noreña ( CA NOREÑA) decidió por unanimidá votar a favor de la candidatura para Alcalde de José Ángel Blanco, candidatu de l’agrupación d’ellectores Independientes por Noreña (IPÑ) poles razones siguientes:

1. Echar a Movilla y propiciar un cambiu democráticu.

El votu a favor de la candidatura de José Ángel Blanco propíciase, primeramente, pola necesidá d’echar a Cesar Movilla de l’alcaldía, que, como reiteramos públicamente, ye la torga principal pa la necesaria rexeneración democrática de Noreña nel sieglu XXI. Conocemos la so forma d’actuar, el funcionamientu antidemocráticu y caciquil, la so trayectoria política veleta (CAS, URAS, UNI, PSOE) y la so nula visión política como serviciu a la comunidá derivada de too ello. Poro, fízose necesario intentar forzar un cambiu democráticu que mos llibrara d’esta visión mercenaria de la política.

2.Un alcalde d’una agrupación d’ellectores

Al marxen de la valoración ideolóxica que podamos tener sobre IPÑ y el so programa, ye un fechu oxetivu que José Ángel Blanco ye un candidatu d’una agrupación d’ellectores de Noreña, lo mesmo que CA NOREÑA, polo que, a priori, les sos decisiones nun dependen d’estructures polítiques mayores col so centru de decisión n’Uviéu o nel Reinu d’España. Nesti sentíu, igual que CA NOREÑA, respuenden namás ante los y les noreñenses y esti fechu animanos superar les obvíes distancies ideolóxiques esistentes ente ambes agrupaciones.

3. El votu a unu mismu como inmovilismu ante una oportunidá histórica

Consideramos que’l votanos a nos mesmos na votación pa escoyer alcalde, nuna situación política como l’actual con 7 formaciones representaes nun Plenu de 13 representantes y siendo conoceores de les graves consecuencies de siguir como fasta agora, pese a poder ser una opción respetable, paeznos insuficiente ante la palpable necesidá de rexeneración y cambiu que pide Noreña. L’inmovilismu ante tan grave situación nun yera una posibilidá. Abstenese nunca foi una opción, el Pueblu llega al Ayuntamientu pa decidir y votar en concencia.

4. La falsa izquierda

Negámonos a pensar que’l Partido Socialista Obrero Español (PSOE) se pueda considerar un partíu d’izquierda n’actualidá. Va muncho que la FSA-PSOE se convirtió nun partíu al serviciu del Poder y non de los trabayadores. Nun sirve l’argumentu de que’l PSOE ye izquierda. Vien demostrando en Noreña, n’Asturies y nel Reinu d’España que la so fórmula ye’l recorte de los derechos de los trabayadores, la represión a les voces disidentes, la emigración de la mocedá, l’españolismu más ranciu, la especulación más xabaz y un llarguísimu etcétera. Y sobre too, ¿Daquién piensa que Cesar Movilla ye d’izquierdes?

5. Compromisos adoptaos por IPÑ

Dende’l 22 de mayu, CA NOREÑA mantuvo conversaciones con toles formaciones que-y lo solicitaron (IPÑ, PSOE y FAC) considerándoles positives toes elles y nes que s’espresó con franqueza y sinceridá les nueses opiniones y propuestes, fincando na necesidá de facer un llabor contructivu en favor del Conceyu y la dimposición a desenrrollar un llabor constructivu dende la oposición, pero esixente nes nueses reivindicaciones básiques recoyíes nel programa ellectoral participaticu. Con too ello, de les conversaciones con IPÑ consiguióse’l compromisu per escrito y firmáu polos 3 conceyales d’esta formación p’avanzar n’estayes tan importantes como la democracia participativa (impulsu al estatutu de participación ciudadana), los derechos llingüísticos de tolos noreñenses y la normalización social del asturianu ( impulsu ordenances asturianu), defensa del patrimoniu ( iniciu de trámites pa declarar Bienes d’Interes Cultural, midíes pa esclariar y resolver la situación del Puente ferroviariu del Rebalde) y midíes d’aforru (retribuciones del gobiernu, implantación software llibre, aforru enerxéticu,..). Esti fechu, qu’interpretamos como l’asentamientu de una fueya de ruta sobre la que desendolcar el nuesu programa, permítenos apostar pola candidatura a la alcaldía de IPÑ.

Hai que dexar mui claro que, con esta decisión, Conceyu Abiertu por Noreña namás vota un alcalde y qu’en dengún casu se llega a dengún alcuerdu más allá de los compromisos consiguíos d’IPÑ, requisitos pa poder apoyar al so candidatu como alcalde. Hai que sorrayar igualmente que la decisión foi tomada unánimemente nel conceyu abiertu cellebráu el xueves 9 de xunu.

lunes, 13 de junio de 2011

Gabino apuráu



Semeya d'Uviéu. Gabino nun se corta un pelu.

domingo, 12 de junio de 2011

La sesión d'investidura de Noreña ensín bandera española na Casa Conceyu.

La sesión d’investidura cellebrose nel ayuntamientu de Noreña ensin bandera d’España na balconera.


Na mañana d'ayeri na llocalidá noreñense cellebrose la sesión d'investidura na Casa Conceyu, y nesta ocasión hebo una ausencia solliñable: la de la bandera d'España. Asina, s'anició la llexislatura ensín bandera española na balconera del edificiu consistorial. El motivu d'esta ausencia, según informen ciudadanos de la llocalidá ye la voluntá popular de la xente, yá que la bandera d'España nun ye pa los/es noreñenses un símbolu col que s'identifiquen. Asina, cola llegada a la institución municipal d'un proyeutu d'izquierda soberanista y democracia participativa paez que se dan pases na normalización d'Asturies como identidá nacional. Esperemos qu'esto quede nuna simple aneudota darréu de lo que tien de venir.

Conceyu Abiertu por Noreña, que concurrió a los comicios como agrupación d'ellectores perpasó'l númberu de votos p'algamar un conceyal y quedó a piques d'algamar el segundu. Por otru llau dende esti coleutivu municipalista d'izquierda soberanista tan faciendose periódicamente asamblees abiertes a tolos/es vecinos/es y éstes tan teniendo un ésitu importante, axuntando en conceyos abiertos a más de 60 persones. Ayeri, muncha xente de la villa condal sofitó na toma de posesión de la conceyalía a Pablo Perez, que va ser quien va representar a lxs ciudadanxs nos plenos. Pablo Perez, que foi escoyíu conceyal, ye militante d'Andecha Astur y lleva munchos años yá trabayando dientru la izquierda soberanista asturiana.
Per otru llau, dos de los conceyales de la nueva corporación municipal, Pablo Pérez de Conceyu Abiertu y Inaciu Iglesias de Foro Asturias, ficieron en llingua asturiana les sos intervenciones nel plenu, cosa que va ser vezu agora nel restu de plenos de la llexislatura según informaron dambos conceyales. Pablo Pérez de Conceyu Abiertu amás de prometer n’Asturianu fízolo tamién por imperativu llegal

sábado, 11 de junio de 2011

Un garrapiellu de 40 militantes abandonen la Chunta Aragonesista


Critiquen la deriva ideolóxica del partíu hacia "posiciones más vendibles eleutoralmente"

Un grupu d'alrodiu de 40 militantes,incluyendo ex-alcaldes y ex-conceyales de ciudaes como Zaragoza,vienen de presentar la so baxa del partíu al considerar qu'abandonó los sos valores d'entamu, "nidiamente nacionalistes aragoneses y d'izquierdes".Nel comunicáu asoleyáu,denuncien la estructura y furrulamientu del partíu al consideralu contrariu a la crítica y la llibertá d'espresión,y afirmen que la decisión de colar tomose enantes de les elleiciones.

Marxinación y represalies escontra "Cucha y País"

Otru puntu de denuncia destacáu son los episodios de "nengunéu y represalies" escontra'l grupu críticu "Cucha y País" -izquierda y país-, corriente interna de la CHA que busca "integrar l'aragonesismu dende'l federalismu hasta l'independentismu na gueta conxunta de l'autodeterminación d'Aragón",destacando asina la defensa de "valores como'l socialismu,el republicanismu,l'internacionalismu desde la solidaridá colos pueblos del mundu,l'ecoloxismu, el feminismu y el pacifismu col enfotu d'algamar una sociedá democrática ya igualitaria".

Desconócense entá los planes de futuru d'esti grupu de xente crítico,que súmense a otros colectivos que colaron de la Chunta Aragonesista nos caberos años.

Fonte: Infoasturies.net

COFPA denuncia la 'desvergüenza' d'Areces na so carta de despidida


El tovía Presidente del 'Principado' unvió esti miércoles una carta de despidida a los emplegaos públicos pola intranet de l'Alministración, na que presume d'intentar " al traviés de diverses midíes fortalecer la Función Pública y dignificar el trabayu n´Alministración".

El Conceyu por Otra Función Pública n'Asturies (COFPA) camienta que resulta "difícil amosar un mayor sarcasmu y una dosis más alta de desvergüenza si se tienen en cuenta dalgunos de los principales finxos de la xestión de la Función Pública asturiana nes últimes llexislatures".

COFPA exemplifica esti posicionamientu nes siguientes cuestiones:


- Convocatoria d'una "carrera profesional" al marxe de la llegalidá, anulada pola Xusticia

- Concursos de méritos anulaos, con centenares de puestos ocupaos de forma provisional, torgando'l derechu a la promoción profesional en condiciones d'igualdá en más d'una década

- Abusu de la llibre designación, con cuatro sentencies consecutives declarando la illegalidá del sistema en más de 300 puestos de trabayu

- Blanquío d'estes illegalidaes per aciu de lleis "ad hoc" dirixíes a evitar el cumplimientu de les decisiones xudiciales

- Supresión de les ayudes sociales a los emplegaos públicos

- Sistemes salariales discriminatorios

- Privatización de servicios públicos

- Fuxida del Derechu Alministrativu per aciu d´una trama d'empreses y fundaciones

- Escándalu de corrupción saldáu ensin nenguna responsabilidá política

"Verdaderamente, l'estáu nel que s'atopaba la Función Pública asturiana nel añu 1.999 dexaba un ampliu marxe pa la meyora y la dignificación. Doce años dempués, la situación de dexeneración tocó fondu", remata'l so comunicáu el Conceyu por Otra Función Pública.

Fonte: Infoasturies.net

Asturies terminó l’añu con una deuda total de 1.633 millones d'euros


Jaime Rabanal, conseyeru d’Economía y Facienda, dio a conocer les cifres de la Cuenta Xeneral del 2010 que ta acabante d’aprobar el Conseyu de Gobiernu. La deuda total de l’Alministración ye de 1.633 millones, el 7,1 por cientu del PIB.

Un añu enantes yera del 4,8 por cientu del PIB, lo que muestra una medra de más de dos puntos nel 2010, dalgo que Rabanal achacó al esfuerciu del Gobiernu del país en caltener la economía nacional. Pela so parte, la media estatal ye del 10,9 por cientu. De la cantidá total de 1.633 millones de deuda que tien Asturies, 1.524 millones correspuenden a l’Alministración y 109 al sector públicu, incluyendo asina la deuda d’organismos y empreses públiques.

Al finar 2010, l’endeudamientu formalizáu representa menos de la metá de los ingresos corrientes del país: un 47,1 por cientu n’Asturies frente al 79,5 por cientu estatal. Tamién la deuda per cápita queda n'Asturies (1.506 euros) perbaxo de les comunidaes autónomes (2.463,6 euros).Rabanal prevé que la deuda nel exerciciu 2011 quede sobre los 1.800 millones d’euros.

El conseyeru en funciones aprovechó la so intervención pa facer un llamáu a la “responsabilidá” a tolos responsables políticos. "Convién nun facer ruíu con delles coses", señaló, apelando a la prudencia a "los que vienen y los que se van".

Fonte: Asturies.com

miércoles, 8 de junio de 2011

Petición de 18 meses de conderga pa un independentista asturianu


A.O.R, mozu independentista de Xixón, tendrá qu'alfrentase a un xuiciu cola fecha entá por determinar por "apoloxía del terrorismu". L'acusación básase na so presunta responsabilidá en delles opiniones espublizaes nuna rede social onde se "xustificaba" l'atentáu nel que morrieron dos Guardias civiles en Calviá (Baleares).

La fiscalía considera que los comentarios sedríen "humillantes" y constituyen delitu "d'enaltecimientu del terrorismu",y por ello pidirá 18 meses de conderga pal xoven asturianu.

Precedentes de persecución y treslladu

A.O.R. sufrió una detención fecha pol subgrupu de ciberterrorismu de la Guardia Civil, con sede en Madrid,n'Avientu del añu 2009, siendo treslladáu a la capital del estáu y obligáu a declarar n'Audiencia Nacional como parte de la "Operación Arpón" desendolcada va dos años. Nunca nun llegaron a espublizase nin especificase públicamente los comentarios concretos qu'orixinaron el procesu.

Noticia: infoasturies

SUATEA fai que’l Conseyu Escolar del Estáu apruebe enmiendes en rellación col asturianu


Dos enmiendes presentaes por SUATEA foron aprobaes pol plenu del Conseyu Escolar del Estáu que tolos años fai públicu un informe sobre la situación del sistema educativu. Éstes permiten un reconocimientu mayor del nuesu patrimoniu llingüísticu.

Según espliquen dende’l Sindicatu Unitariu y Autónomu de Trabayadores de la Enseñanza d’Asturies (SUATEA), tán acabantes de consiguir, al traviés de la confederación STEs-Intersindical y la conseyera Beatriz Quirós, que s’aprobaren dos enmiendes referentes a la llingua asturiana nel plenu del Conseyu Escolar del Estáu, organismu que por estes feches ellabora, aprueba y fai públicu l’informe sobre l’estáu y situación del sistema educativu del añu anterior. “Nesti informe danse datos sobre la situación de les llingües del Estáu nel sistema educativu y d’escolarización nun separtáu que dende va años nómabase ‘IV.2.10. Las lenguas oficiales en el sistema educativo’, onde clasifíquense los datos d’escolarización que se dan de caúna d’elles en cuatro modelos llingüísticos según s’empleguen les llingües como instrumentu d’enseñanza y aprendimientu. Gracies a una enmienda de SUATEA aquel separtáu pasa a nomase ‘IV.2.10. Las lenguas oficiales y propias de las comunidades autónomas en el sistema educativo’, lo que supón un pasu alantre nel reconocimientu del nuestru patrimoniu llingüísticu qu’enantes nun se vía reflexáu nel epígrafe y agora algama’l mesmu estatus llingüísticu que les otres llingües”, apunten dende’l sindicatu.

Anque nesi informe yá se reconocía la esistencia del asturianu, ésti nun daba nengún datu sobre la so escolarización nin el tipu de modelu d’enseñu que se sigue n’Asturies. “Tamién gracies a una enmienda de nueso s’inxerten estos datos”, añaden. Sicasí, tres conocelos, SUATEA quier denunciar “la ruindá de la escolarización depués de más de 30 años de ‘promoción’ obligada de la nuestra llingua pol Estatutu d’Autonomía y la falta de datos oficiales globales en Bachiller y Educación Infantil que nós dicimos, de forma estraoficial, alléguense al 0 por cientu”.

Fonte: asturies.com

Alas Aluminium despidirá a la mayoría de la plantilla


L'alministración concursal de la empresa asitiada na cuenca'l Nalón anunció'l despidu de casi tola plantilla tres nun atopar inversores interesaos nella.

La mayoría de los 270 trabayadores d'Alas Aluminium, anguaño baxo ERE temporal,sedrán despidíos nos prósimos díes. L'anuncia foi comunicada al comité d'empresa,a quien se-y desplicó que caltendrase dalgún puestu del trabayu en llabores de caltenimientu col enfotu de qu'apaeza una empresa interesada.

Alas Aluminium ta participada nun 49% pol sector público,que lleva invertíos más de 16 millones d'euros nuna compañía qu'anguaño acumula 60 millones d'euros en deudes. Pesie a les promeses de la conseyería d'industria de la esistencia d'inversores interesaos,les xestiones del gobiernu asturianu fracasaron otra vegada,como yá anunciaba'l colectivu de trabayadores,cola alta conflictividá social como disculpa d'un nuevu fracasu empresarial nes cuenques mineres.

Pesie al güelpe recibíu,l'asamblea de trabayadores anuncia la continuidá de les movilizaciones entamaes va meses y de la llucha pol caltenimientu del puestu de trabayu.

Fonte: infoasturies.net

viernes, 3 de junio de 2011

Asturies nes aules


¿Hasta qué puntu los IES asturianos eduquen a los guah.es nel conocimiento de la so rialidá más cercana, esto ye, l’asturiana? ¿Hasta qué puntu hai una voluntá efectiva de formar ciudadanos con un mínimu de conocimientos sobre la tierra na que viven? La rialidá ye que poca o nenguna.

Nun ye solo que la llingua asturiana nun tea reconocida llegalmente col mesmu status que los demás idiomes que se falen del Reinu d’España. Nun ye solo que tea ausente del sistema educativu como llingua vehicular mientres mos venden la moto de les “llinies billingües” castellán-inglés que son les más de les veces una comedia. Nun ye solo que nun se permita l’usu del asturianu pol profesoráu fuera de la mesma asignatura de Llingua. Ye que, amás, xuégase a la invisibilidá absoluta de la situación llingüística d’Asturies al traviés de los manuales escolares.

¿Cómo va ser un problema lo que nun esiste?

Los llibros de testu d’ESO y Secundaria de Llingua y LLiteratura Castellana, esos mesmos llibros que teóricamente tienen qu’afayase al currículum asturianu, a la de falar de les “llingües y dialectos” que se falen del Reinu d’España tienen, curiosamente, toos ellos el mesmu escaezu. Toos ellos falen del castellán, el gallegu, el vascu y el catalán como llingües oficiales en tol estáu o partes del mesmu. Falen tamién de les variantes llingüístiques d’estos idiomes, y amás con munchu detalle sigún vamos avanzando de nivel escolar. Asina, en tolos manuales fálase del andaluz, del castúo estremeñu, del canariu, del panocho murcianu, y dellos otros. Cítense los sos trazos definitorios, les sos isogloses y les sos influencies lingüístiques.

Sicasí, lo que nun se menta en ningún momentu (y ye fácil comprobalo: ye abondo con mirar los manuales qu’hai nos departamentos docentes de los IES) ye l’asturianu: un idioma clasificáu como talu pola comunidá científica internacional, con una cifra de falantes reconocíos non inferior al cuartu de millón de persones, con un cientu de títulos publicaos tolos años, con una institución académica oficial, con una curtia pero constante presencia mediática en radio, prensa y TV, cenciellamente nun esiste. Nos IES d’Asturies y de tol reinu enséñase que la llingua asturiana nun esiste. Que l’asignatura qu’estudien o estudiaron bien d’ellos nun esiste. Que l’idioma que falen ellos o la so familia nun esiste. Too ello cola bendición de la Conseyería d’Educación, que teóricamente tien de dar el preste a los llibros de testo que s’usen nes escueles del país.

Ye lóxico. Lo que facemos invisible nun ye un problema, y esta administración asturiana tien dende hai trenta años un problema mui seriu cola llingua d’esti país. Xugando a invisibilizala, ayudamos a facela desapaecer, y con ello, el propiu problema.

Nun ye solo la llingua

Pero nun se tapez namás la llingua. L’esaniciu de tolo que güela a asturiano tamién afecta a otres materies. Ente elles, y con gran importancia, la Historia. Anque’l currículum éducativu de les comunidaes autónomes “non históriques”, Asturies ente elles (primera barbaridá: Asturies nun ye “histórica” y polo tanto nun tien Historia) afita que los conteníos propios son del 35% sobre’l currículu xeneral (nes “históriques” ye del 45%) la rialidá ye que nos manuales y programaciones didáctiques que s’utilicen nos IES asturianos rara vez lleguen al 10%, y siempre a lo cabero de la programación, que casualmente ye siempre lo que nunca da tiempu a dar. Y el problema nun ye solo cuantitativu, sinón cualitativu: la Historia d’Asturies que se da ye poca, ye probe, ye anecdótica y ye mala. Y yelo a costafecha, porque pártese de premises errónies dafechu.

Primer error: partiendo de la idea de qu’España esiste dende la nueche los tiempos, más o menos dende Tartessos, o Viriato, la Historia d’Asturies dase dende la concepción d’Asturies como una cachu d’España incluso anantes de la propia esistencia d’España.

Segundu error: consecuencia de lo anterior, entiéndese que lo importante ye la Historia del conxuntu (España) y non de los cachos. Polo tanto, la Historia d’Asturies ye subsidiaria de la española (que, repito, ye anterior a la propia esistencia d’España) y namás debe estudiase n’aquellos aspectos nos que seya necesario pa entender la Historia española.

Tercer error: la Historia como anécdota. La Historia d’Asturies como la sucesión de pingarates que dan color o despliquen determinaos acontecimientos del devenir históricu español, con grandes saltos cronolóxicos que faen imposible una visión de conxuntu.

Resultáu final: Lo importante ye la Historia española, y lo secundario l’asturiana, que namás tien entidá cuando desplica la española. Asina, tien interés la resistencia ástur a los romanos nel sieglu I a.C., dientro del conxuntu de la conquista romana d’Hispania. Lo que pasa depués nun tien la mayor importancia hasta’l sieglu VIII, onde la invasión islámica pon n’acción a Pelayo y los anicios del Reinu de los Ástures, importantes pa entender la mal llamada “Reconquista”. Depués de la fin del reinu ástur, nel sieglu X, vuelve’l mantu de silenciu que dura cásique 900 años, hasta que la ilustración asturiana del sieglu XVIII vuelve a poner Asturies nel mapa… d’España. Depués, otra vuelta’l silenciu, hasta los anicios de la industrialización y el movimiento obreru, la revolución de 1934, la guerra civil, les fuelgues mineres de los sesenta y yá, la desapaición definitiva.

Lo importante… ¿Pa quién?

Nun vamos falar equí, porque’l tema da pa muncho más qu’estes llinies, de cómo s’estudien los conteníos anantes mentaos, munches veces teñíos d’un esencialismu que mete mieu, especialmente cuando se fala del reinu ástur, pesie a que’l paradigma cuadonguista yá ta más que superáu nos ámbitos científicos. Vamos falar de lo que nun s’estudia, porque nun ye visto como importante. La cuestión ye: importante… ¿pa quién?

¿Nun ye importante pa conocer la Historia d’Asturies lo que pasa nel períodu que va dende la invasión romana hasta la islámica, especialmente nos sieglos VI-VIII, de los que l’arqueoloxía ta dando datos perinteresantes dende hai unos años, y que mos falen d’una sociedá organizada y en plena mutación económica que la invasión islámica nun fexo otro qu’afondar? ¿Nun ye importante conocer la Edá Media asturiana, cola apaición de les poles que tanto condicionen el desendolcu económicu posterior? ¿Nun ye importante saber que d’aquella l’asturianu yera la llingua oficial de l’alministración civil y eclesiática? ¿O cómo se conformaron les élites feudales asturianes y la so permanente confrontación coles castellanes, que tien como cimera la brutal guerra qu’estroza Asturies a lo cabero del sieglu XIV y qu’acaba cola creación del Principáu qu’anguaño sufrimos?

¿Nun ye importante saber que na Edá Moderna Asturies yera un país atrasáu y marxináu na monarquía, fonte de mano d’obra migrante, como amuesen los miles d’asturianos en Madrid, tan cruelmente retrataos polos escritores castellanos del “Sieglu d’Oru”? ¿Nun lo será tamién saber que’l sistema estamental nun ye funcional n’Asturies porque la condición de noble d’una parte perimportante de la población facía inviable la división social basada nel nacimientu? ¿O que, a lo cabero del sieglu XVI, hubo una peste que mató posiblemente a un terciu de la población asturiana? ¿O que nel sieglu XVIII, tando los países de la Corona d’Aragón ensin fueros nin antogobiernu nengún, tenía Asturies el so propiu parlamentu dende diba sieglos? ¿O lo que supunxo la llegada del maíz pa una economía asturiana condergada a la fame periódica?

¿Ye importante saber qu’en 1808 Asturies proclamóse soberana dende les sos instituciones lexítimes y ella sola declaró la guerra al Imperio napoleónicu, criando, ente otres coses, l’actual bandera azul y mariella qu’adorna tolos edificios oficiales y que tolos asturianos lleven con arguyu? Suma y sigue. Podín ponese más exemplos, pero con estos ye abondo. ¿La respuesta? Claramente, non. Nun ye importante pa entender la Historia d’España (y repito que nun entramos siquiera a deconstruir esti mesmu conceptu) que n’Asturies, un territoriu de perpocu pesu demográficu, económicu y políticu, morriera va cuatrocientos años un terciu de la población de peste, pero sí lo ye pa entender l’asturiana. Nun ye importante, o más bien funcional, pa desplicar el conflictu nacional en Cataluña, Vasconia o Galicia saber que cuando Cataluña taba ensin institución propia nenguna, Asturies tovía les conservaba. Pero sí lo ye pa entender la Historia d’Asturies.

¿Babayos o ciudadanos?

¿De quién ye la culpa de que nun se dea Historia d’Asturies nos IES asturianos? De l’alministración, en primer llugar, apoderada polos prexuicios ideolóxicos de la España una, grande y llibre, qu’ellabora currículos educativos inaceptables y acientíficos. De la Universidá d’Uviéu, en segundu llugar, que forma a la gran mayoría de los docentes asturianos d’Historia pero que tien la Historia d’Asturies mui ausente de los sos planes d’estudiu, y eso que meyoró la situación abondo si la comparamos con va diez o quince años. De los propios historiadores y docentes de Secundaria, que nun faen –facemos- por rebelase énte una situación ridícula: ¿Ye razonable que los guah.es tengan qu’estudiar la evolución de la Corona d’Aragón na Edá Media y nun estudien nada –repito, nada- de lo que pasó n’Asturies ente los sieglos X y XV? ¿Ye aceptable qu’estudien que la guerra d’Independencia empecipió en Madrid cuando fo n’Asturies?

La enseñanza de la Historia tien como oxetivu formar ciudadanos críticos, conocedores del pasáu colectivu de la so tierra. Hacia esi oxetivu han tar empobinaos tolos esfuerzos educativos. Sinón, tamos formando babayos que ximielguen la bandera y falen al altu la lleva de Pelayo ensin tener la menor noción de lo que tán diciendo. ¿Ye eso lo que queremos? Igual sí, que queda mui guapo sacalos na tele cuando gana Alonso o vien Letizia de visita.

http://faustinozapico.com/blogue/asturies-nes-aules/

(Artículu publicáu nel Boletín nº 160 del mes de mayu de 2011 de SUATEA)

Por Faustino Zapico

Primeres valoraciones de les elleiciones

La plataforma política Conceyu Abiertu decidió, nel aconceyamientu que la so Xunta coordinadora nacional cellebró en Noreña esti sábadu 28 de mayu, treslladar a la sociedá asturiana unes primeres valoraciones al rodiu de les eleiciones del pasáu 22 de mayu:

1. Conceyu Abiertu valora de manera positiva la so participación nes eleiciones municipales, yá que polo xeneral cumpliéronse les espectatives esistentes. Ye mui significativu'l casu de Noreña: onde s’algamaron 267 votos (un 8,63%), lo qu’implica una conceyalía, quedando amás cerca d'algamar un segundu conceyal. Otros conceyos que tamién hai que destacar son Villaviciosa con 177 votos (2,02%), Samartín del Rei Aurelio con 189 votos (1,84%), Grau con 71 votos (1,15%), y Siero con 253 votos (0,95%). No que cinca al conceyu de Xixón la táutica de la unidá d’aición tuvo como espresión el CUPX, y si bien ésti tuvo dellos aspeutos positivos como esperiencia unitaria los resultaos algamaos, unos 730 votos (0,48%), son nidiamente insatisfactorios, siendo asina Xixón la gran esceición dientro del balance positivu que se realiza d'estes eleiciones municipales.

2. Al respeutive de los 1529 votos (0,26%) algamaos nes eleiciones autonómiques, éstos son evidentemente probes ya testimoniales, pero dempués de namás cuatro meses d'andadura como coleutivu políticu la realidá ye qu'entraben dientro de lo posible y nun son mui distintos de los resultaos esperaos. Hai que destacar ya agradecer particularmente tamién el sofitu algamáu en dellos conceyos como Noreña con 152 votos (4,97%), Villaviciosa con 77 votos (0,89%), Siero con 163 votos (0,61%) y Samartín del Rei Aurelio con 80 votos (0,78%).

3. L'analís que se fizo nel momentu de la creación de Conceyu Abiertu nel mes de xineru d'esti añu 2011, de que nun ye posible articular una alternativa política con fuercia eleutoral si nun esiste un trabayu socio-políticu constante dende la base a lo llargo de los años quedó ratificáu a la vista de los resultaos d’otres formaciones polítiques como PAS-URAS o BA-UNA, que quedaron asitiaes nunes posiciones bien distantes de los sos oxetivos eleutorales. Ye más qu’evidente qu'un proyeutu políticu a llargu plazu nun pue venir caracterizáu nin por un perfuerte personalismu, nin por un fantasiosu eleutoralismu alloñáu de la realidá, nin pola ausencia de contenios ideolóxicos nidios lo mesmo que d’oxetivos estratéxicos acullá de la presencia nes instituciones.

4. Conceyu Abiertu va siguir afondando nel so proyeutu de reconstruición nacional dende la base, pos considera que nel actual escenariu ye la única estratexa posible, ya dientro de la so táutica d'unidá d'aición continua tando dispuestu a converxer con toa triba d'axentes sociales y políticos colos que se compartan oxetivos mínimos tanto no que cinca al proyeutu nacional como al programa socio-económicu que tien que da-y conteníu pa caminar haza un ameyoramientu material de les condiciones de vida de los/es asturianos/es.

11 de xunu: Conceyu Xeneral de la Corriente Sindical d'Izquierda

Nuevu conceyu abiertu convocáu en Grau


Los alcuerdos d'estes asamblees van treslladase al conceyu y a los grupos políticos.

El próximu llunes día 6 de xunu va cellebráse un nuevu conceyu abiertu na sala d'audiovisuales de la Casa la Cultura de Grau a partir de les 19,30 hores al que tan convocaos pa tolos vecinos de Grau que quieran plantegar la so problemática. Va tratase la valoración de los gastos ellectorales de los partíos políticos en Grau, la programación de conceyos abiertos en Grau y los sos pueblos y asuntos d'interés vecinal que se propongan.

L'oxetivu d'estes xuntes ye que sían los mesmos vecinos quien tomen alcuerdos sobre los asuntos que -yos incumben ensin esperar a que lo faiga'l gobiernu llocal, que namás consulta a los ciudadanos cada cuatro años y que nin siquier dexa intervenir a los vecinos o votar nos plenos municipales.

CA NOREÑA cellebra un nuevu Conceyu Abiertu


Conceyu Abiertu por Noreña aconceyó con IPÑ y con PSOE p'analizar los resultaos ellectorales.

Siguiendo cola so dinámica participativa CA NOREÑA convoca un Conceyu Abiertu esti próximu vienres 3 de xunu na aula del Antiguu Depósitu l'Agua a partir de les 20:00 hores, nel que se van valorar los resultaos electorales (267 votos y 1 conceyal), intercambiárase información y propuestes y van aldericase estratexes a siguir. CA NOREÑA ellaboró la so llista y programa ellectoral de forma participativa y presentóse a les ellecciones como una agrupación d'ellectores avalada por 130 vecinos y vecines coles mires d'avanzar na democracia participativa y na tresformación social.

Nos últimos díes Conceyu Abiertu per Noreña caltuvo conversaciones con aquelles formaciones que-y lo solicitaron y que pel momentu fueron IPÑ y PSOE, les dos fuerces más votaes y les que dicen aspirar a consiguir l'alcaldía'l próximu 11 de xunu.

Representantes de CA NOREÑA axuntaron el sábadu cola otra agrupación d'ellectores de Noreña, Independientes por Noreña (IPÑ) nun alcuentru que trescurrió con normalidá. Esti martes, CA NOREÑA aconceyó col PSOE p'analizar de forma distendida los resultaos y el nuevu contestu políticu que s’abre en Noreña. Nesti sentíu, Conceyu Abiertu por Noreña quixo treslladar que les circustancias actuales del PSOE de Noreña, con Cesar Movilla al frente, que participó nel gobiernu de Noreña dende 1995 con Centristes Asturianos, en 1999 con URAS, en 2003 con UNI y finalmente col PSOE dende 2007, ye un llastre pa la rexeneración democrática que precisa Noreña y que polo tanto en nengún casu CA NOREÑA votaríalu p'alcalde.

A los dos formaciones tresmitióse-yos la intención de nun entrar en nengún gobiernu nel que tea PSOE o PP por ser responsables máximos de la situación que vive Asturies. Tamién s'espresó la voluntá de CA NOREÑA de realizar una oposición constructiva con cualquier gobiernu que se dea y la nuesa plena disposición a dialogar con toles fuerces polítiques de cara a sacar alantre proyectos beneficiosos pa Noreña.

Nesti sentíu, CA NOREÑA comprometese a sofitar y negociar cualquier iniciativa que considere beneficiosa pa Noreña independientemente de quién sea'l que la proponga y pide al restu de fuerces que faigan lo mesmo de cara a aprovechar la pluralidá esistente pa construyir un conceyu más democráticu.

www.conceyuabiertu.org