jueves, 31 de marzo de 2011

La CSI gana les eleiciones a la xunta de personal funcionario

A lo llargo de la xornada d'ayeri, 30 de marzu, tuvieron llugar les eleiciones pa escoyer la Xunta de Personal Funcionario del "Principáu d'Asturies". Un total de 2017 funcionarios y funcionaries (de los 4.201 que teníen derechu al votu), averaronse a les urnes pa escoyer una Xunta de 29 delegaos. Nesta votación la CSI llogró 7 delegaos (frente a los 4 de 2007), quedando per delantre del restu de fuerces sindicales: USIPA y CSIF con 6 delegaos, CCOO y UXT con 5, y USO que pierde'l so representante.

miércoles, 30 de marzo de 2011

Recibimientu mañana nel Naúticu de Xixón al ministru español de trabayu.

La CSI llama a recibir al ministru de trabayu con too´l calor que´l Pueblu Asturianu sabe dar a sus visitantes. El Xueves 31 de Marzu va visitanos el ministru de trabayu. Como nun podía ser d´otra miente, la CSI convoca nel Náuticu de Xixón a les 09:30 de la mañan, una concentración pa dale un calurosu recibimientu, y comenta-y un par de cosines sobre la reforma llaboral y de les pensiones...

viernes, 25 de marzo de 2011

Arqueoloxía de la discriminación


La Xunta pola Defensa de la Llingua Asturiana acaba de plasmar al comprobar l’ausencia del asturianu y l’incumplimientu de la toponimia oficial en toles instalaciones y señalética del reinauguráu, depués de munchos años, Muséu Arqueolóxicu d’Asturies.

La Conseyería de Cultura vuelve a rise de la llegalidá y del patrimoniu que tien el mandáu de protexer. Depués de 12 años de retrasos y polémiques, y 20 millones d’euros gastaos, nin siquiera ye quien a cumplir unos mínimos razonables nel respetu a la ciudadanía.

Amás, el silenciu cómpliz de la Dirección Xeneral de Política Llingüística, dependiente d’esa mesma Conseyería, dexa en papel moyao la so supuesta “promoción” del idioma y la toponima oficial. Al otru día d’inaugurase un Muséu onde nun se respeta la toponimia oficial, la Dirección Xeneral de Política Llingüística fai una rueda de prensa pa esplicar cómo promocionen la toponimia oficial. Nun pueden reclamar credibilidá cuando la humillación nel departamentu propiu ye la norma que marca la so inoperancia. ¿Cómo pue un departamentu l’Alministración, la mesma qu’aprueba nel BOPA la toponimia oficial, incumplir sistemáticamente la llegalidá toponímica? Nun hai más que ver los paneles: "Morillón" (pol oficial Moriyón), "Gamonedo" (pol oficial Gamonéu), "Cabañaquinta" (pol oficial Cabanaquinta), etc.

Por eso, dende la Xunta pola Defensa de la Llingua reclamen la rectificación inmediata de tolos elementos d’información, señalización y descripción del Muséu Arqueolóxicu d’Asturies p’adaptalos a la llegalidá vixente en materia de toponimia. De la mesma manera, esiximos la presencia de la llingua asturiana n’igualdá de condiciones coles demás llingües presentes nel Muséu, porque l’unicu billingüismu qu’entienden los responsables de Cultura paez ser col inglés.

Fonte: Aruelu.

Presentación de Conceyu Abiertu por Gráu




La Casa Cultura de Gráu acueye esti llunes 28 de marzu l'actu presentación de Conceyu Abiertu por Grau. De magar les 19:30 hores va cellebrase un conceyu abiertu, al que tan convocaos tolos vecinos y vecines de Grau, onde se va desplicar que ye un conceyu abiertu y qué ye Conceyu ABiertu por Grau amás d'aldericar sobre los conflictos llaborales a nivel municipal y otres problemátiques del conceyu.

jueves, 24 de marzo de 2011

Este sábadu preséntase Conceyu Abiertu por Xixón.

Conceyu Abiertu por Xixón preséntase esti sábadu 26 de marzu a las 12:00 hores nun actu públicu que se va cellebrar en la Campa Torres.

Darréu, a les 13:30 hores, cellebrárase una espicha nel Centru Social L’Ayalga, asitiáu na cai Prendes Pando, 11, a la que tola sociedá xixonesa y asturiana ta convidada.

Nesti actu quieren presentase les propuestes p'ameyorar la situación del conceyu y de la política municipal de cares a la relación alministración-ciudadanía, siempres dende la perspectiva de braera democracia popular.

Fonte: http://www.conceyuabiertu.org/

Unos 2.000 estudiantes manifiéstense n'Uviéu


Unos 2.000 estudiantes universitarios tomaron ayer el cientru d'Uviéu na manifestación más numberosa de los últimos años.

Convocaos poles asamblées d'estudiantes de la Universidá estudiantes de toles facultaes de la Universidá concentráronse na Plaza d'España pa llueu aniciar un percorríu que los llevaría hasta les puertes de la Xunta Xeneral primero y al claustru del Edificiu Históricu de la Universidá dempués, onde finó la movilización estudiantil contra'l Plan Boloña.

Les Asamblées d'Estudiantes movilícense contra «un modelu universitariu hostil que quita fondos pa beques y los sostituye por préstamos» o que «impón un endurecimientu brutal del Réxime de Permanencia» o que supón «la espulsión de la Universidá pa quienes nun puean permitirse una dedicación esclusiva», ente otres munches custiones. Tamién hebo profesores que sofitaron la protesta "En defensa de la Universidá pública'

El rector Vicente Gotor y la vicerrectora Paz Suárez Rendueles, recibieron a una nutrida delegación de representantes estudiantiles. Gotor comprometióse a «contratar profesoráu pa desdoblar grupos en casu de masificación» y a estudiar el Reglamentu de Permanencia col Conseyu Social, además de a revisar planes d'estudios y títuloseos que se suprimieren optatives. Gotor amosó la so "preocupación polos precios públicos de los créditos", anque dixo que yera competencia del "Principado" que la xubida del preciu de la matrícula fore esti cursu un 5,5% el másimu permitíu.

Fonte: Infoasturies.

miércoles, 23 de marzo de 2011

Democracia a la española: El supremu veta a Sortu de la inscripción de partios


Finalmente. el tribunal supremu español vetó la inscripción de la formación d'izquierda patriota vasca Sortu, faciendo asina qu'esta formación tea perdificil concurrir a les eleiciones de mayu. Na votación hebo 3 votos a favor de da-y a la formación, la cual nun paez representar a tolos soberanistes d'izquierda vascos, la posibilidá d'inscribise nel rexistru de partios políticos.


Una preba más de que l'Estáu español nun ta dimpuesta a solucionar el conflictu políticu n'Euskal Herria, y una preba más que'l reformismu en política nun val un res cuando ties delantre un modelu d'Estáu diseñáu pola tecnocracia franquista.

Xixón. Charra-Alderique con Miren Etxezarreta


Esti sábadu 26, a les 10 de la mañana y nel Centru Municipal Integráu d'El Llanu, la Plataforma Contra la Crisis entama una charra-alderique con Miren Etxezarreta (catedrática d'Economía Aplicada de la Universidá de Barcelona), col propósitu de que nos sirva dempués pa definir principios y actuaciones nuna Asamblea que vamos celebrar a partir de les 4 de la tarde... Viennos enriba'l nuevu tsunami de los "salarios y productividá", al pie de les últimes aspiraciones de los amos de la España cañí que se vieron con Zapatero y que quieren ente otres maravíes "una Reforma Llaboral en serio", porque l'anterior paez-yos poca cosa; que contenga lo que llamen "el despidu suxetivu": despidu llibre ensin pasar polos tribunales, por aciu l'aplicación d'una tabla d'indemnizaciones" que, según paez, nun afiten porque-yos dará vergüenza. Anque nun paez que-yos quede enforma, yá que tamién lu dictaron que los convenios nun s'anueven automáticamente (la famosa ultra actividá), amás d'una aplicación severa de la normativa sobre'l absentismo y otres lindezas pa que "al panorama llaboral español, nun lu conoza nin la madre que lu parió"...

¿Hasta o­nde vamos ser capaces de soportar los retayos, pa siguir aumentar les sos tases de beneficios a los capitalistes?... Yá va siendo hora de lluchar pa partir el trabayu y la riqueza.

http://www.csi-asturies.org/

martes, 22 de marzo de 2011

CSI y Conceyu Abiertu falaron sobre la crisis económica y la xunidá d'aición dende la esquierda


Na tarde d'esti llunes 21 de marzu cellebróse na Casa Sindical de Xixón una xunta de representantes de la executiva de la Corriente Sindical d'Izquierda (CSI) y de la xunta nacional de Conceyu Abiertu. Nesa xunta tratáronse una perinteresante bayura de temes, dende les polítiques gubernamentales que tienen como oxetivu’l convertir Asturies nun parque enerxéticu en función de planificaciones estatales, hasta la necesidá urxente de desendolcar dinámiques unitaries de too tipu, que fructifiquen n'espacios coleutivos d'alderique y aición pa la defensa eficaz de los intereses de clase de los y les trabayadores asturianos/es.

Tamién esistieron coincidencies al rodiu de que la presencia institucional tien que ser fundamentalmente un altavoz al serviciu de los movimientos sociales de base dientru d’una estratexa de confrontación belixerante cola clase política que gobierna Asturies.

Na semeya: Samuel Fernández, secretariu xeneral de la CSI, y Javier Cubero, coordinador llocal del Conceyu Abiertu por Xixón.

Fonte: Infoasturies

lunes, 21 de marzo de 2011

Echa andar el Conceyu Abiertu por Samartín


Esti sábadu al mediu día presentóse nel Centru Social de L'Entregu Conceyu Abiertu por Samartín nun actu públicu al qu'asistieron una ventena de persones. Na presentación intervinon Mariu Arbesú como coordinador de Conceyu Abiertu y los promotores de Conceyu Abiertu por Samartín Xulio Llaneza, Lucas Díaz y Ástor Llaneza.

Tres la desplicación de los oxetivos del movimientu de xunidá d'aición dende la base Conceyu Abiertu fecha por Arbesú tomaron la pallabra los miembros de Conceyu Abiertu por Samartín. En primer llugar Lucas Díaz lleó un manifiestu del conceyu nel que s'analizaba la situación del Conceyu fincando na estaya llaboral, la mocedá, el mediuambiente o la cris demográfica. Ástor Llaneza intervino pa desplicar qué ye Conceyu Abiertu por Samartín, "una plataforma ciudadana municipalista, soberanista y d'izquierda". Xulio Llaneza pieslló les intervenciones fincando en dos idegues fundamentales: la democratización del Conceyu, entamando dende les collaciones y de la necesidá d'abrir el Conceyu a los ciudadanos y la necesidá d'un conceyu más asturianu y la defensa de la cultura.


Más info: www.conceyuabiertu.org

domingo, 20 de marzo de 2011

CCOO y UXT sofiten la matanza imperialista en Llibia.


Comisiones Obreres y Unión Xeneral de Trabayadores comunicaron esti pasáu sábadu 19 de marzu el sofitu a la intervención militar de la ONU y el amosaron tar d'alcuerdu col Gobiernu del Estáu Español de Zapatero de que l'Estáu sofite militarmente la intervención. Asina lo ficieron públicu darréu d'un actu en sofitu al xuez represor Baltasar Garzón. Cándido Méndez y Fernández Toxo coincidieron na necesidá d'actuar, y amás de facelo de forma rápida.

El cabezaleru d'UXT afirmó tar d'alcuerdu col sofitu d'España y dixo " creo que sedría necesariu que s'actuara con muncha rapidez". Pela so parte, el responsable de CCOO sorrayó que " Paezme perbien que d'una vegada, anque paez qu'un pocu tardi, la comunidá internacional dea amparu al pueblu llibiu". Dende CCOO Méndez tamién dixo tar d'alcuerdu col Gobiernu español por tomar la decisión d'" andechar a normalizar la situación, y qu'actúe en defensa de la democracia y de los drechos del puebli llibiu".

Asina, tanto CCOO como UXT s'axunten a la llarga llista d'organismos oficialistes que sofiten la intervención imperialista en Llibia. Con esto, estos sindicatos del poder tan sofitando la matanza en Llibia, de la que nun va ser víctima Gadafi sinon el pueblu de Llibia. CCOO y UXT sofiten l'espoliu económicu que les grandes potencies imperialistes se repartirán darréu. CCOO Y UXT SOFITEN L'IRAK DE SARKOZI.

Concentración contra la guerra imperialista mañana

Mañana a les 19:30 delantre'l Teatru Campoamor d'Uviéu va desendolcase una xuntanza contra la ocupación militar de Llibia y contra la nueva ofensiva imperialista.

CCOO-UXT MANPORREROS DE ZP

Trevín prohibió una concentración antirracista n'Uviéu


Esti sábadu, a pocos díes del Día Internacional de llucha contra la xenofobia y el racismu (21 de marzu), el delegáu del gobiernu español n'Asturies, Antonio Trevín, prohibió una concentración contra el racismu convocada por delles organizaciones sociales, sindicales y polítiques delantre del Teatru Campoamor.

Trevín si consintió una concetración ultraderechista del Frente Nacional de claru calter xenénofobu na céntrica plaza de la escandalera onde se llegaron a xuntar una decena de persones. Unes 200 persones que s'axuntaron pa denunciar el racismu y la xenofobia foron reteníes pola policia española nes prósimidaes del teatru y desplegaron una pancarta contra'l racismu. La policia identificó a una docena de persones tres ser los encargaos de comunicar que Delegación de gobiernu prohibiere la concentración que fore solicitada y nun toviere nenguna rempuesta negativa.


Fuerces antidisturbios de la policia española retiraron los carnets d'identidá a una docena de persones durante una media, dandose la situación de que tres lleer el comunicáu y decidir dar por acabada la concentración contra'l racismu, la policia obligaba a les persones que ellí concentraes a permanecer a la espera que decidieren devolver la documentación a los sos dueños. A la vez, la mesma policia menanciaba con responsabilizar a les persones que solicitaron la concentración y a los identificaos de cualesquier incidente qu'asocediere.

Los manifestantes antifacistes nun cayeron en provocación denguna en ningún momentu y dedicáronse a amosar la refuga al racismu, polos drechos de les persones inmigrantes, de toles persones glayando llemes como "Roben los bancos, non los inmigrantes", "Riopedre nun ye inmigrante", "Nativa o estranxera la mesma clase obrera", "sobren racistes, non inmigrantes", "Asturies será la tumba del facismu" o "Nun pasarán"

Antonio Trevín, desplegó un esaxeráu continxente policial, con numberosos efeutivos apostaos nel centru d'Uviéu, a pié, furgonetes, motos,... La concentración, exeplu de xunidá d'aición antifacista y convocada en tiempu record, foi sofitada por organizaciones y coleutivos como Cambalache, L'Arcu la Vieya, Soldepaz Pachakuti, SOS Racismu, Asturias Acoge, Alambique, Ateneu Llibertariu d´Uviéu, COSAL, Radio QK, Colectivo SocialyJusticia, CienporCien Cubano, Darréu, Fai!, JCA, CJC, CGT, CNT, CSI, SUATEA, PCA, PCPE, Andecha Astur o ASCIZ.
Fonte: Infoasturies

EEUU, Francia y el Reinu Xuníu ataquen Llibia


Obama diz protexer "los intereses d'EEUU y del mundu" al anunciar que "l'aición empicipió"

Aviones franceses destruyen cuatro tanques del exércitu llibiu cerca de Bengasi mientres que los Estaos Xuníos bombardea dende'l mar y el Reinu Xuníu cola so aviación. Estaos como Rusia, Cuba, Venezuela o Bolivia tan amosándose contrarios a la guerra y Alemaña anunció que s'abstién de participar.

El presidente español José Luis Rodríguez Zapatero, anunció que'l Reinu d'España va participar nes operaciones con 4 aviones de combate F-18 y un avión cisterna, una fragata F-100, un submarín, un avión de xixilancia marítimo y va movilizar polo menos 450 militares.

"España asume la so responsabilidá" dixo Zapatero, qu'informó al rei Juan Carlos y a Mariano Rajoy y va comparecer el martes nel Congresu pa pidir la convalidación d'esta decisión.

Según les últimes informaciones Italia y Canada tamién taríen atacando yá Llibia. El presidente del Congresu llibiu, Mohammed Zwei declaró que nun se xustifica la ofensiva militar estranxera.

Manifestación en defensa de la Universidá Pública - Miércoles 23 de marzu, Uviéu

jueves, 17 de marzo de 2011

Namás los especuladores amenacen los drechos sociales


RACISMU: Concentración contra l'actu del partíu facista Frente Nacional n'Uviéu

El partíu neonazi Frente Nacional tién previsto facer una concentración na Plaza la Escandalera d'Uviéu el prósimu sábadu 19 de marzu a les 18:30h baxo'l lema: "Por los derechos sociales, por la seguridad de los españoles y contra la inmigración". Como actu de refuga, la Ruta contra'l Racismu y la Represión y otres organizaciones convoven el mesmu día a la mesma hora delantre'l Teatru Campoamor d'Uviéu.

Enantes d'esa concetración, el vienres 18 a les 11:30h, ta convocada una rueda de prensa na Plaza La Escandalera pa denunciar la complicidá ente les polítiques del gobiernu y la violencia de los grupos facistes.

Fonte: www.csi-asturies.org

Preséntase Conceyu Abiertu por Samartín


Esti sábadu 19 de marzu va cellebrase l'actu de presentación pública de Conceyu Abiertu por Samartín del Rei Aurelio. La presentación de la plataforma ciudadana llocal va facese nel salón d'actos del Centru Social de L’Entregu a les 12:00 hores y, nelli, va desplicarase qué ye Conceyu Abiertu por Samartín y van tratase delles problemátiques del Conceyu.

Según informen dende Conceyu Abiertu esta presentación oficial "anicia'l procesu de constitución formal de Conceyos Abiertos en distintos conceyos del país" como Gráu, Xixón, Noreña, Villaviciosa o Llangréu onde la conformación de les plataformes yá ta avanzada y n'otros conceyos onde'l procesu ta entamando.

Fonte: Infoasturies

Protestes de los pescadores


Cortes de carretara con barricaes en Cuideiru.

Los marineros asturianos que se dediquen a la pesca de la xarda volvieron cortar la carretara N-632 na so segunda xornada de protestes pol pieslle anticipáu de la costera de la xarda. Los marineros corten el tráficu a la altura de Las Dueñas (Cuideiru) y aseguren que la midida llévalos a un espediente de regulación d'empléu qu'afectaría a más de 300 trabayadores del sector.

Los trabayadores del mar vienen movilizándose y yá ficieron una concentraron de protesta n'Avilés y protagonizaron otros cortes des carreteres en Navia y Cuideiru.

martes, 15 de marzo de 2011

Andecha Astur denuncia la complicidá del PSOE y los grupúsulos d'estrema derecha


El Delegáu del gobiernu criminaliza les lluches obreres mientres dexa via llibre a concetraciones contraries a la llei.

Andecha Astur quier denunciar la complicidá de los partíos del Poder, nesti casu’l PSOE-FSA, quien al traviés del delegáu del gobiernu español n’Asturies vien criminalizando y reprimiendo nos caberos tiempos toles lluches obreres que tienen llugar nesta Asturies de los cien mil paraos (100.000), la incontable emigración y la crisis permanente, mientres al mesmu tiempu, foméntense situaciones y grupúsculos qu’afalaguen el racismu y la xenofobia, nun intentu claru de dividir al pueblu y separtalu de los verdaderos problemes y los sos culpables.

Asina mientres hai menos d’un mes Antonio Trevín amenazó a tola clas trabayadora diciendo que les protestes taben “cruzando llinies roxes” y que nun diben tolerase más protestes, enterámonos de que’l partíu del calter españolista y neonazi “Frente Nacional” vien de convocar una concentración na céntrica escandalera n’Uviéu con un llema de marcáu calter xenófobu y anti-inmigrante non español que por supuestu, tien los parabienes del Sr. Trevín.

Andecha Astur atalanta qu’estes son les dos cares de la mesma moneda como ye’l neolliberalismu del PSOE ya que per un llau somete a Asturies a polítiques neocolonialistes que fomenten l’esfarrape de los medios de vida tradicionales condenando al paru y la emigración a tolos asturianos y asturianes, too ello pol porgüeyu d’España que nun dubia en retayar tolos drechos y conquistes sociales qu’algamó’l pueblu a lo llargo de sieglos de llucha. Mientres reprime a los que lluchamos escontra esta situación d’autoritarismu pseudodemocráticu, tantu, los sos medios d’información como los grupúsculos facistes campen a les sos anches faciendo’l xuegu puercu a estes mesmes polítiques atacando a la mocedá combativa y que busca superar esta situación o intentando semar odiu y separtar a les clases populares según nacionalidaes.

Andecha Astur nun entiende estes protestes siendo Asturies una comunidá que sufre la emigración y non al revés, ya que como se fizo público hai unos díes, el númberu de persones que vienen a vivir equí puramente testimonial y incluso tan emigrando d’Asturies igual que los nativos, pola falta d’oportunidaes.

Atalantamos que si hai llinies roxes, estes ya foron cruzaes hai tiempu tantu pol PSOE como pol Estáu Español a quienes representa’l Sr. Trevín. Encamentamos al delegáu español a qu’aplique por una vegada les mesmes lleis a toos por igual y arriendes del so conteníu xenófobu faiga cumplir l’artículu 5 de la Llei Orgánica 9/1983 impidiendo la concentración neonazi col envís d’evitar altercaos o de poner en riesgu la seguridá de los bienes o les persones.

Denunciamos asina que los únicos enemigos de los drechos sociales son aquellos que los retayen, ye dicir el neolliberalismu del PP y PSOE-IU. N’Asturies ye tierra d’emigrantes y non de racistes, poro, facemos un llamamientu al pueblu pa que muestre’l so refugu a esta concentración y señalamos d’antemano, que la única responsabilidá polos daños que produza la presencia facista organizada nes cais d’Uviéu será del Sr. Trevín y del PSOE.

Cites marxistes incómodes pa la izquierda española.


"Si los miembros d'una nación conquistaora desixeren a la nación que conquistaron y que continúen sometiendo qu'escaeciere la so posición y nacionalidá específico, que desaniciare les diferencies nacionales, etc..., esto nun sedría internacionalismu, nun sedría más qu'apregonar la so sumisión al xugu, ya intentar xustificar y perpetuar el dominiu'l conquistaor baxo la esculpia l'internacionalismu". Friedrich Engels ( 1872 ).


"L'error de la izquierda centralista ta nel fechu de que, por medrana a face-y el xuegu al nacionalismu burgués de les naciones oprimíes, benefició non solo al propiu nacionalismu burgués, sinón también al nacionalismu ultra-reaccionariu de la nación opresora".

" El proletariáu nun pue acallentar el problema, particularmente 'fadiu' pa la burguesía imperialista, rellativu a les llendes d'un Estáu sofitáu na opresión nacional. El proletariáu nun pue dexar de lluchar a la escontra'l caltenimientu pola fuercia de les naciones primies dientru les fronteres d'un Estáu determináu, y eso equival xusto a lluchar pol drechu d'autodetermín. Tien de desixir la llibertá de dixebra política de les colonies y naciones que la 'so' nación prime. En casu contrariu, l'internacionalismu del proletariáu sedría vacíu y de pallabra; nin la confianza, nin la solidaridá de clas ente los obreros de la nación primía y la opresora sedríen posibles; quedaría ensín desenmazcarar la hipocresía de los defensores reformistes y kautskianos del autodetermín, que nun dicen un res de les naciones que la 'so propia' nación prime y retién pola fuercia nel ' so propiu' Estáu". Vladimir Ilich Ulianov, Lenin. ( 1916 ).


domingo, 13 de marzo de 2011

Cuando la política ye un negociu.


Pongamos un exemplu cualesquier.

"San Obama" aumenta'l presupuestu contra Cuba


Les perres destinaes del Gobiernu federal d'Estaos Xunios d'América a la llucha contra'l pueblu cubanu medrará en más de 4 millones de dólares.

Pesie a la crisis presupuestaria de la Casa Blanca, el presidente d'EEXX Obama solicitó xubir el dineru destináu pa la llucha contra la Cuba socialista nun 34 % respeuto al presupuestu que manexen anguañu, según datos oficiales.

Pa 2012 s'espera que cifres estraordinaries s'empleguen na Oficina d'Asuntos Cubanos en Washington y nel proyeutu SINA. Por supuestu nun paga la pena recordar qu'estes perres son destinaes a espionaxes, guerra sucia contra la isla y el so pueblu, caltener y garantizar el bloqueu comercial. Amás ye ñatural tener presente que les perres qu'emplega EEXX ca añu nos sos medios-empreses informatives en difamar a tolo que güela a Cuba y la so revolución nun han de ser una cifra pequeña.

Cenciellamente, la noticia ye paradóxica y vien a confirmar que'l señor Obama ye'l mesmu perru con un collar estremáu. Vien a confirmar que la política d'Obama pa con Cuba ye inda más dura que la que siguía l'anterior criminal de guerra qu'ocupó la Casa Blanca. Y vien a confirmar qu'Obama ye igual o pior que los sos antecesores, y que nun dulda en destinar estes cifres multimillonaries na llucha contra tolo que nun entre nel " American Way of Life", y nun importai qu'esti " Way of Life" tea en procesu de cuestionamientu internu y que los retayos sociales y económicos tean a la orde del día nel so país. Lo que cuenta ye tapecer la evidencia de que mentando nos EEXX cientos de persones, sobremanera neños y neñes, muerren de fame ca selmana y munches viven na cai, en Cuba eso nunca nun pasa. GRACIES SAN OBAMA. ¿ CHANGE ? NOT, THANK YOU

viernes, 11 de marzo de 2011

Un pocu d'humor nunca nun sobra.



Vidiu cómicu y sarcásticu a más nun poder faciendo chancia y crítica de la figura del xefe del Estáu Español, herederu de Franco, Juan Carlos I. El monólogu, de 1994, foi censuráu nel so día. ¡Que vos preste!

¡ Monarquía NON ! REPÚBLICA SOCIALISTA ASTURIANA!

La Federación Asturiana de Bolos independízase


Cuidar los bolos "espresión de la cultura asturiana" másima prioridá.

A falta de la comunicación oficial y la publicación de los nuevos estatutos nel «Boletín Oficial del Principado», la Federación Asturiana de Bolos dexa de pertenecer a la Española tres la cellebración d'una asamblea onde por 68 votos a favor, 6 en contra y 4 abstenciones fízose oficial la dixebra que vien anunciándose dende va tiempu siguiendo los pasos de la Federación cántabra que tamién s'independizare de la española y cola que caltién alcuerdos de collaboración.

El presidente de la federación Desiderio Díaz en referencia a la Direición Xeneral de Deportes declaró que "¡Son la máquina de meter mieu!" . Amás de los desencuentros conocíos ente federacion asturiana y española, Díaz argumento que en la federación están "desbordados de trabayu" y hai que "soltar llastre" . Asina "tar en la española, amás, cuéstamos perres, nun nos aporta nada y xeneranos una carga enorme de trabayu". La prioridá ye clara "tenemos que cuidar los bolos, que ye la espresión de la cultura asturiana, y dedicar tol esfuerzu a la promoción", esplicó Desiderio Díaz.

Presión del "Principado"

Nes últimes selmanes dende la federación denuncióse l'acosu a la federación al traviés de la política d'ayudes como una presión pa condicionar les decisiones democrátiques na institución deportiva asturiana y que nun formalizare la so independencia. Ente la situación delles asociaciones culturales amosaron la so solidaridá pa cola federación refugando l'actuación del "Principado" y les poques ayudes a la federación.


Fonte: Infoasturies.

miércoles, 9 de marzo de 2011

Debate sobre'l movimientu okupa n'Uviéu


Esti vienres 11 de Marzu l'Atenéu Llibertariu d'Uviéu entama un debate sobre'l movimientu okupa onde van participar delles persones venceyaes al desaloxáu CSO La Reflexón de Xixón.

Les lluches que s’entamaren, como la de los ocupantes de La Reflexón, con represión policial y xudicial que se caltién anguañu, centren esta actividá dientro del ciclu “De parola” qu'entama l'Atenéu Llibertariu, asítiáu na cai Ricardo Montes, 32, baxu, Uviéu.

El textu de la convocatoria ye'l siguiente:

Dende que allá pelos sesenta del pasáu sieglu venti, les ocupaciones de cases y espacios dieren aniciu al movimientu squater n’Holanda y Inglaterra, esti movimientu foi espardiéndo y afitando, mayormente pe la Europa ocidental. La ñecesidá de un techu p’abellugase, cuando menos, o de cuntar con vivienda mínimamente digna, llevó a que persones ensin recursos ocuparen, sóledos o co les sos families, un sitiu ente l’ampliu númeru de viviendes vacíes o abandonaes que xeneraba una sociedá na que dellos individuos gociaben d’un bon nivel de recursos económicos que ios permitíen poseer viviendes desocupaes.

Al tiempu, les ñecesidaes de dello xente, principalmente mozo, d’atropase al rodiu de proyeutos de convivencia o inquietudes sociales y culturales al marxen y a la escontra de los vezos amparaos pel sistema de dominiu, esprecetaron tamién la ocupación de espacios físicos pa entamar y sacar allantre esos proyeutos.

Too ello foi bozando y dando calter a un movimientu okupa que pon en cuestión, amás que los vezos sociales de convivencia y cultura, la sacrosanta figura de la propiedá priváa na que se asienta el mou de vida na sociedá capitalista que mos toca sofrir.

Les lluches que s’entamaren, como la de los acupantes de LA REFLE en Xixón y, tres el desaloxu, los nuevos intentos d’okupación, con represión policial y xudicial que se caltien al dí de güei, danmos ocasión pa esti “de parola”, que ponemos en conocimiento del común.

Fonte: infoasturies

martes, 8 de marzo de 2011

Darréu ente'l Día Internacional de la Muyer 2011


Pa Darréu, mocedá revolucionaro’l 8 de marzu, Día Internacional de les muyeres, ye un día de cellebración, pero sobremanera de reivindicación y de llucha. Cellebración por toles conquistes y los drechos llograos por munches muyeres tres munchos años. Yá en 1911, primer añu de cellebración d'esti día, esixíen que se garantizara'l cumplimientu de drechos como'l votu, l'accesu a cargos públicos, l'accesu al empléu y la non discriminación nel mesmu; y una llarga llista d’otres cuestiones de les que s’encargaron y poles que puxaron los movimientos feministes dende muncho enantes hasta l'actualidá.

Pero ye un día sobremanera de llucha, de llucha por tolos drechos pendientes; de llucha p'amosar que nesta sociedá supuestamente igualitaria na que vivimos, de drechos “llegales” conquistaos y oportunidaes pa toes y toos, siguen esistiendo situaciones de desigualdá. De llucha pa reivindicar una ciudadanía plena de les muyeres; de llucha pa glayar que nun mos sirven les soluciones parciales y midíes puntuales qu'intenten parchear el problema ensin tocar el coral del mesmu; de llucha pa reivindicar que nun ye posible falar de drechos dafechu pa les muyeres nun sistema patriarcal y capitalista.

Y esti 8 de marzu de 2011, nun momentu nel que nos bombardeen con información y supuestes soluciones a una cris que ta afeutando duramente a grandes seutores de la población, dende la mocedá independentista Darréu, denunciamos que les muyeres vivimos nuna situación de crisis permanente y estructural. Esta cris, fai ainda más evidente la insostenibilidá del sistema nel que vivimos. Poro, queremos facer d'altavoz y amosar les munches cares qu'esta crisis tuvo y tien pa les muyeres, diverses pero xuníes nes desigualdaes y sobremanera na llucha. Esta crisis llevamos demasiaos años pagándola entre toos:

Anguaño’l mercáu llaboral, con altes tases de precariedá, concentra a les muyeres nos puestos de menor responsabilidá, menor remuneración, más inestabilidá, menores posibilidaes de promoción. Los seutores social y de servicios, son los más vulnerables ante los cambeos y crisis económiques.
Munches de les muyeres que se ven obligaes a colar a la gueta d’un trabayu dignu, en busca de nueves oportunidaes, atopense con una sociedá que-yos obliga a aceptar los empleos más precarios y peor pagaos.
Munches muyeres vense obligaes a escoyer ente la crianza y l'empléu, y asumir tou tipu de midíes que supuestamente intenten aidar nesto de la conciliación, amenorgamientos, permisos… Midíes que, finalmente, faen evidente la imposibilidá d'esta conciliación ideal nun mercáu llaboral pensáu por y p'homes. Midíes qu'afonden na precariedá futura, nun sistema nel que les sos prestaciones sociales tán direutamente venceyaes colo cotizao na so vida llaboral.
Dende Darréu camentamos comu perimportante afitar que nun pue encadarmase un Movimientu de Lliberación Nacional ensin cuntar coles muyeres. La llucha escontra’l patriarcado va xunida a la de la lliberación nacional y social. Distinguir la posición de clas de les muyeres significa comprender la causa feminista y la so aportación al movimientu revolucionariu.

Les muyeres asturianes tamos triplemente esplotaes: como muyeres, como trabayadores y como asturianes. Esta desigualdá cola muyer cimienta la opresión de clas, yá que a la mesma vegada que la muyer tien de lliberase comu clas popular, tien que lliberase d’estos prexuicios sexistes, que la condicionen de mena ñegativa na llucha pola emancipación de la clas trabayadora y polo tantu, esti machismu patriarcal ye una torga más escontra la nación que naguamos construyir.

Ye perimportante nun escaecer qu’el 8 de marzu ye tolos díes pa una muyer dende que ñaz, y que si de verdá queremos camudar les coses, queremos un cambiu nesta sociedá entá patriarcal y machista, onde ser muyer conlleva una llucha y defensa constante, diaria y permanente de los tos drechos, pa que te respeten comu tal, pa que te traten pol to valir y non pola to condición sexual o de xéneru, debemos paranos y reflexonar, facer un exerciciu d’autocrítica y asina camudar la nuesa realidá diaria a xusta ya igualitaria.

¡L’ÚNICU CAMÍN YE LA LLUCHA! ¡NUN HAI LLUCHA ENSIN LA MUYER!

www.darreu.org

Somos un pueblu humildáu. El Réximen fai lo que-y peta.


Riopedre sal de prisión tres el pagu d’una fianza de 100.000 euros

L’ex conseyeru d’Educación, José Luis Iglesias Riopedre, salió esti llunes de Villabona, onde taba presu dende’l 25 de xineru por un casu supuestu de corrupción na Alministración. Familiares y collacios pagaron una fianza de 100.000 euros.

Dende'l Tribunal Superior de Xusticia d'Asturies (TSXA) informaron de que la salida prodúxose a les 15.35 hores, depués de que'l Xulgáu d'Instrucción númberu 4 de Xixón recibiera a les 13.55 hores el xustificante bancariu y notificara que, por pidimientu, esta circunstancia al Centru Penitenciariu. Siempre según estes fontes, Iglesias Riopedre va tener que comparecer en dichu Xulgáu los díes 1 y 15 de cada mes. Les otres dos persones que tán en prisión provisional pola ‘Operación Marea’, María Jesús Otero, ex direutora de Centros y Planificación de la conseyería y númberu 2 de Riopedre y Marta Renedo, ex xefa de serviciu de la conseyería d’Alministraciones Públiques, nun tienen la posibilidá de salir tres el pagu d’una fianza por riesgu de fuga y alteración de pruebes.

Otra manera, la Plataforma creada por amigos y averaos de Riopedre, valoró güei l'esfuerzu y la premura de les 400 aportaciones que permitieron abonar “antes de prever” la fianza de 100.000 euros necesaria pa la so puesta en llibertá.


Fonte: Asturies.com

lunes, 7 de marzo de 2011

Mañana martes 8 de marzu a les 20h. manifestación polos drechos de la muyer trabayadora


La Plataforma Feminista d'Asturies entama esti martes 8 de marzu, díi internacional de la muyer trabayadora, una manifestación que percorrerá les cais xixoneses, dende la Plaza'l Parchís, a les 20h.

¡Escontra'l Patriarcáu y la doble esplotación de la muyer trabayadora!

viernes, 4 de marzo de 2011

Darréu entama les III Xornaes “Trabayadora Güei, Trabayadora Siempres”


El prósimu día 12 de marzu, Darréu entama les III Xornaes “Trabayadora Güei, Trabayadora Siempres”. La organización de mocedá independentista ufierta delles actividades empobinaes na llucha escontra’l patriarcau ya’l modelu de sociedá vixente como un mural reivindicativu, proyeición d'un documental, una charra alderique y una espicha pa zarrar les xornaes.

El mural va facese en Sotrondiu y el restu d’actividaes van desendolcase na tarde del día 12, nel Centru Social L’Ayalga de Xixón, de magar les 17:30 hores.La proyeición del documental "Esclaves del sexu" que narra delles hestories de muyeres que tuvieron que prostituyise en distintos países europeos víctimes de los malos tratos, de les amenaces y de les continues violaciones executaes con estrema crueldá. Un documental empobináu a denunciar el negociu del tráficu de muyeres pa la so esplotación sexual.

Dempués ta programada una mesa redonda - charra - alderique compuesta por persones de diferentes organizaciones y coleutivos. Ésta, tará orientada a falar sobre la situación de los movimientos feministes y les diferentes visiones del feminismu. Analizaranse temes como la hestoria de los movimientos feministes, la la llucha escontra’l patriarcáu, el feminismu revolucionariu, la violencia machista, el negociu entre otros. Pa finar les xornaes habrá una espicha a precios populares.

jueves, 3 de marzo de 2011

¡ Torna la reconversión, y nos en casina !


Récord hestóricu de persones paraes

Por séptimu mes consecutivu, el desemplegu medró n'Asturies. En febreru cuntabilizáronse 2.064 persones (+2,4%) más al paru asitiandose la crifra total en 88.072 persones. Trátase del nivel de paru más altu na hestoria d'Asturies, dende que'l serviciu públicu d'emplegu ellebora'l rexistru de persones desemplegaes. En febreru el paro subio n'hombres en 871 persones (+2,13%) y en muyeres en 1.193 (+2,65%), en tolos grupos d'edá -sobre too ente menores de 25 años (+4,78%) y en tolos seutores económicos.

Namás el datu de febreru de 1996 con 86.808 persones inscrites s'avera a los datos d'anguañu. Nin siquiera nos peores momentos de las denomaes "reconversiones" industriales y del campu, que poco de reconversión y munchu de destrucción tovieron, se cuntabilizaren tantes persones demandantes de trabayu. Toos estos datos agrávense cuando la población asturiana ye la mesma que va años y que l'altu nivel d'emigración, sobre manera de mocedá, rebaxa les cifres de paru.

Infoasturies

Nueva concentración a les puertes del Palaciu los Neños


Esti Vienres 4 a les 20 hores, la Corriente Sindical d'Izquierda (CSI) convoca una nueva concentración, la tercera ya, escontra la empresa OUTDOOR XTRM S.L. xestora del recintu públicu conocíu como'l "Palaciu de los Neños" d'Uviéu (Parque d'Iviernu). "Esta empresa vién exerciendo con total llibertá l'acosu a los trabayadores y la violación de los sos derechos llaborales" denuncia el Sindicatu asturianu. Anguaño una trabayadora alcuéntrase de baxa "por mor de la persecución sufrida al denunciar estes irregularidaes ante les inspecciones de trabayu" esplica CSI y son munches otres les que tuvieren que colar, dalgunes con graves secueles psicolóxiques. La Corriente ta faciendo una campaña informativa y repartiendo pasquinos a los pas que lleven a los sos neños a esti "Palaciu de la Precariedá", asina como tamién a los trabayadores.

El pasáu Vienres 25, unos cuarenta solidarios y solidaries concentrárense a les puertes del palaciu faciendo llegar la información a un gran númberu de pas y mas, asina como tamien a los y les trabayadores. Pa lleer e panfletu destináu a trabayadores del centru: www.csi-asturies.org

Infoasturies.net

Comedor solidariu y sorteu del "Okupón" en Xixón

Esti prósimu sábado 5 de marzo a les 14 hores van montar un comedor veganu solidariu nel Centru Social Sestaferia na cai Joaquín Alonso Bonet númberu 3 en Xixón, cuyu preciu va ser la voluntá que cada ún o una pueda y quiera dar. Los beneficios van destinase a sufragar gastos xudiciales de persones imputaes por okupación.

Dempués del comedor faerase el sortéu d’una rifa cuyu premiu ye un llote de productos de Sestaferia y de la Tienda de Comerciu Xustu Picu Rabicu.

Aruelu.com

El Xueves de Comadres da entamu al Antroxu asturianu modernu


Asturies va vivir dende esta nueche cinco díes de folixa, mázcares y bona gastronomía. Llega l’Antroxu, festividá asturiana que nel pasáu entamaba col solsticiu d’iviernu y qu’agora resúmese a les xornaes previes al Miércoles de Ceniza.

La primer cita ye’l Xueves de Comadres, xornada nel que les muyeres axúntense pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considerase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla. Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Güei, la folixa treslladóse de la tarde a la nueche y munchos restaurantes ofrecen menús especiales pa esta xornada.

Ye de destacar tamién el llabor de la Tertulia Feminista Les Comadres, que celebra’l so 25 aniversariu, pa potenciar esta fecha festiva. Esti grupu de muyeres entama tolos años una espicha na qu’entreguen dos premios: el comadre d’oru y el felpeyu, ésti últimu a persones o entidaes que desprecien a la muyer. La premiada d’esti añu ye l’alcadesa de Xixón, Paz Fernández Felgueroso, mentes que’l felpeyu foi pa Francisco Javier León de la Riva, alcalde de Valladolid del PP, poles sos descalificaciones sobre Leire Pajín con frases como “cuando veo esos morrinos namái pienso nuna cosa”. Mentes, el títulu de babayu esti añu ye pa Salvador Sotres, escritor habitual en medios de comunición, polos sos comentarios machistes.

Los antroxos de Xixón y Avilés son los más importantes en cuantes a programa institucional y participación. Música y delles actividaes orientaes más a asemeyase a los carnavales de Río, Tenerife o Cádiz, protagonicen estes xornaes na que la xente participa antroxándose, anque con mázcares lloñes de la tradición. Los vienres ye habitual ver a los neños antroxaos nos colexos y en Xixón les charangues calienten motoroes pal concursu de charangues del sábadu y del domingu, que yá va pola so vixésimocuarta edición, con una participación alta. El sábadu, los focos van p’Avilés, onde se celebra’l Descensu de Galiana a partir de les 18.30 hores. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, n’especial la más mozo.

El xolgoriu del Antroxu termina’l Martes d’Antroxu col Entierru la Sardina, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza. De la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadillu y los postres típicos, como los frixuelos y les picatostes.

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín y d’Uviéu. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares. Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa.

Asturies.com