Esti sabadu 18, metanes les fiestes de San Mateo n'Uviéu, CSI-Mocedá escolingó énte más de 2.000 persones qu'enllenaben la Plaza'l Sol, una pancarta que dicía "Que devuelvan lo que robaron. 29-S Fuelga" y los simbolos del PSOE y PP azotando billetes sobre'l conocíu personax del xuegu’l monopoli. Dende les mocedaes del sindicatu asturianu quixeron "recordar y dedica-y esta aición a Valeriano Martínez Pérez, camioneru de 44 años qu'hai 31 años foi asesináu pola guardia civil n'Uviéu cuando participaba nun piquete na fuelgona’l 79".
Estos 31 años, diz CSI Mocedá, enseñáronmos munches coses como "la traición de la izquierda española tornada n'autenticos focos de corrupción, la continuidá de la drecha española col rexime facista, la conversión de los sindicatos mayoritarios n'empreses privaes a sueldu de los partíos y empresarios, la utilización de les fuercies de seguridá y de la xusticia españoles pa la represión a los movimientos contestatarios, la utilización de los medios de comunicación pa la criminalización y marxinalización de los mesmos movimientos" o que "cada reforma llaboral pa la creación d'emplegu sirve como escusa pa recortar los drechos algamaos con sudu y llárimes y que los nuesos muertos nun valen nada".
CSI-Mocedá denuncia qu'Asturies "ta llamada a ser un vertederu" con regasificadores, centrales, molinos, torretes, almacenes de CO2..."como parte’l plan pa tornanos nuna "pila" xigante qu'alimente les empreses de Madrí, la qu'alimentamos tamién con mano d'obra barato", pa lo que "desaniciaron la nuesa forma tradicional de vida, la nuesa cultura, la vivienda, la universidá y el trabayu dignu, obligándonos asina a colar a la gueta d'una vida meyor fuera d'Asturies. Quieren acabar con nos pero nun van a ser quién". CSI-Mocedá llama a la mocedá asturiano, "la que tenga la suerte de tar trabayando", a secundar la fuelga xeneral del 29-S y a dir a la manifestación del mesmu día a les 13 hores na Plaza l'Humedal de Xixón.
