miércoles, 2 de junio de 2010

L’Imperiu y la Guerra


Va dos díes, en curties pallabres, señalé que l’imperialismu nun podía resolver el pergrave problema del consumu d’estupefacientes qu’azota a la población del mundu. Güei deseo encetar otru tema al mio xuiciu de gran trescendencia.

L’actual peligru de que Corea del Norte seya atacada por Estaos Xuníos, a partir del recién incidente que tuvo llugar nes agües d’esi país, seique pueda evitase si’l Presidente de la República Popular China decide utilizar el derechu de vetu, prerrogativa que nun-y gusta n’absolutu a esi país exercer nos alcuerdos que s’alderiquen nel Conseyu de Seguridá de Naciones Xuníes.

Esiste un segundu y más grave problema pal qu’Estaos Xuníos nun tien respuesta posible: el conflictu creáu tocante a Irán. Ye daqué que se vía venir claramente desque’l Presidente Barack Obama pronunció’l so discursu’l 4 de xunu de 2009 na Universidá Islámica d’A el-Azhar, en El Cairu.

Nuna reflexón qu’escribí entós, cuatro díes más llueu, cuando dispunxi d’una copia oficial del discursu, utilicé numberoses cites p’analizar la importancia del mesmu.

Voi Señalar un númberu d’elles.

"Rexuntamos nun momentu de tensión ente Estaos Xuníos y musulmanes alredor del mundu…"

"…el colonialismu negó-yos derechos y oportunidaes a munchos musulmanes,…la Guerra Fría de cutiu utilizaba a los países de mayoría musulmana como axentes, ensin tener en cuenta les sos aspiraciones propies."

Impresionaben realmente esi y otros razonamientos en boca d’un Presidente afroamericanu, que paecíen verdaes evidentes como les conteníes na Declaración de Filadefia’l 4 de xunetu de 1776.

"Vini equí a buscar un nuevu empiezu pa Estaos Xuníos y musulmanes alredor del mundu, que se base n’intereses mutuos y el respetu mutuu…"

"Como nos diz el Sagráu Corán, ’tengan conciencia de Dios y digan siempres la verdá’."

"…ye parte de la mio responsabilidá como Presidente d’Estaos Xuníos lluchar contra los estereotipos negativos del Islam uquier que surdan."

Siguió asina esbillando temes escabrosos del universu de contradicciones insolubles qu’envolubren la política d’Estaos Xuníos. "Metanes la Guerra Fría, Estaos Xuníos desempeñó un papel nel derrocamientu d’un gobiernu iranín escoyíu democráticamente."

"Dende la Revolución Islámica, Irán desempeñó un papel en secuestros y actos de violencia contra militares y civiles estaunidenses."

"Los estrechos venceyos d’Estaos Xuníos con Israel son bien conocíos. Esti venceyu ye infrayable."

"Munchos esperen, en campamentos pa refuxáu na Ribera Occidental, Gaza y tierres de la redolada, una vida de paz y seguridá que nunca tuvieron."

Güei sabemos que sobre la población de Gaza cai con frecuencia un agua de fósforu vivu y otros componentes inhumanos y crueles, llanzaos sobre la Franxa, con roxura verdaderamente nazi fascista. Sicasí, les afirmaciones d’Obama paecíen vibrantes y n’ocasiones sinceres, en tanto diba repitiéndoles una y otra vegada, metanes febril cuerre cuerre pel mundu, uquier qu’a la so hora programada llegaba l’avión númberu ún de la Fuercia Aéreo d’Estaos Xuníos.

Ayeri 31 de mayu, la comunidá internacional foi conmocionada col asaltu, n’agües internacionales a decenes de milles de la mariña de Gaza, de cásique un cientu de soldaos de les fuercies especiales d’Israel, que baxaron dende helicópteros n’hores de la madrugada, disparando frenéticamente contra centenares de pacífiques persones de diverses nacionalidaes, causándo-yos —según informaciones de prensa— non menos de 20 muertos y decenes de mancaos. Ente les persones atacaes, que tresportaben mercancíes pa los palestinos sitiaos na so propia Patria, había ciudadanos norteamericanos.

Cuando Obama faló na Universidá Islámica d’A el-Azhar del derrocamientu d’un gobiernu iranín escoyíu democráticamente" y darréu añedió que "Dende la Revolución Islámica, Irán desempeñó un papel en secuestros y actos de violencia contra militares y civiles…", referíase al movimientu revolucionariu promovíu pol Ayatollah Ruhollah Jomeini, que dende París, ensin una sola arma, entartalló a les Fuercies Armaes del más poderosu xendarme con qu’Estaos Xuníos cuntaba nel Sur d’Asia. Yera bien difícil que la más poderosa potencia del mundu aguantara la tentación d’instalar ellí una de les sos bases militares, al Sur de la URSS.

Fai yá más de cinco décades, Estaos Xuníos entartallara otra Revolución absolutamente democrática, cuando derrocó’l gobiernu iranín de Mohammad Mossadegh. Esti foi elixíu Primer Ministru d’Irán el 24 d’abril de 1951. El senáu aprobó la nacionalización del petróleu, que fuera la so bandera de llucha, el 1 de mayu d’esi mesmu añu. "Los nuesos llargos años de negociaciones con países estranxeros ―declaró― nun dieron resultancia hasta equí."

Ye obviu que se taba refiriendo a les grandes potencies capitalistes, que controlen la economía mundial. Irán tomó posesión de les instalaciones énte la intransixencia de la British Petroleum, qu’entós llamábase Anglu-Iranian Oil Company.

El país nun tenía posibilidaes de formar téunicos. Gran Bretaña retirara’l so personal calificáu, y respondió con bloqueos de pieces y mercaos. Unvió la so flota de guerra en zafarranchu de combate al país. Como resultáu, la producción petrolera d’Irán menguó de 241,4 millones de barriles en 1952, a 10,6 en 1953. Neses favorables condiciones la CIA entamó’l golpe d’Estáu que derrocó a Mossadegh, hasta la so muerte que tuvo llugar trés años dempués. La monarquía foi reestablecida y un poderosu aliáu d’Estaos Xuníos xubió al poder n’Irán.

Estaos Xuníos nun fixo otra cosa colos demás países que nun seya eso; desque se creó esa nación nos suelos más ricos del planeta, nun respetó nunca los derechos de los pobladores indíxenes qu’ellí vivieron mientres milenios o fueron importaos como esclavos polos colonizadores ingleses.

Toi seguru, sicasí, de que millones de norteamericanos intelixentes y honestos entienden estes verdaes.

El Presidente Obama puede pronunciar cientos de discursos, tratando de conciliar contradicciones que son inconciliables en desterciu de la verdá, suañar cola maxa de les sos frases bien articulaes, mientres fai concesiones a personalidaes y grupos carentes dafechu d’ética, y dibuxar mundos de fantasíes que namái caben na so cabeza y qu’asesores ensin escrúpulos, conociendo los enclinos suyos, semen na so mente.

Dos entrugues obligaes: ¿va poder Obama esfrutar les emociones d’una segunda eleición presidencial ensin que’l Pentágonu o l’Estáu d’Israel, que nel so comportamientu nun acata en nada les decisiones d’Estaos Xuníos, utilicen les sos armes nucleares n’Irán? ¿Cómo va ser la vida nel nuesu planeta dempués d’eso?


FIdel Castro Ruz