Apuntes sobre la resistencia kurda y la so identidá

El procesu d’identificación del pueblu Kurdu como nación entamo relativamente tarde. Pesie al calter eminentemente kurdu de les griesques kurdes del sieglu XIX, estes nun pasaron d'una oposición al Sultanatu y al poder del Sha. Nun esistien conceiciones de los modos de vida alternativos. El compromisu cola identidá kurda taba venceyáu a la creación d’un Reinu Kurdu a imaxe y semeyanza de los sultanatos tradicionales. D’esta mena, el pueblu kurdu nun tardó en reconocese realmente como nación.

Foi namás na segunda mitá del sieglu XX cuando la noción d’una identidá kurda entamó a desendolcase a partir de debates ente inteleutuales, na so gran mayoría representantes de la izquierda política turca. Por embargu, a esta tendencia faltába-y potencial inteleutual pa superar les nociones más tradicionales d’una identidá kurda asociada al orde tribal y a los xeques.

Los partíos comunistes con tendencies real-socialistes y los partíos lliberales o feudales taben lloñe d’entender la idega d’una nación kurda o de los kurdos como grupu étnicu. Foi solamente nos años 70, cola apaición del movimientu estudiantil de tendencies izquierdistes,qu'una concienciación de la esistencia d’una identidá kurda foi difundía.

El procesu d’identificación étnica desarrollóse nes rellaciones conflictuales ente la conceición nacional chovinista turca y la conceición nacional feudal kurda. Per un llau, esistía la confrontación cola hexemonía ideolóxica del sistema, bien de veces disimulada como izquierdista, y pel otru llau, confrontación cola aristocracia kurda, que tradicionalmente collaboraba col sistema.

Llibrase d’estes fuercies sociales, polítiques ya ideolóxiques nun foi fácil. Esixó potencial inteleutual y trabayu práuticu ya organizacional. Esto llevó direutamente a la resistencia. Dende los 70, les lluches kurdes pa la so emancipación entamaron a madurar, yá trescurrieron trenta y cincu años. Nesti tiempu nun solamente ayudó a concenciar al pueblu kurdu sobre la so identidá y ofreció posibles soluciones a la cuestión kurda, evidenció tamién que’l pueblu kurdu y la so causa nun puen ser suprimíos pola fuercia nel llargu plazu.

Dengún sistema pue sobrevivir por un periodu tan llargu si pretende superar les contradicciones sociales utilizando la so fuercia. La llucha pola emancipación kurda tamién amuesa que los pueblos nun puen desarrollase ensin enantes reconquistar la so dignidá social.

Lluís Fanjul. Militante de Darréu

La Corriente Sindical d'Isquierda señaló güei que les últimes midíes adoptaes por Zapatero suponen la "lliquidación definitiva" del Estáu de Bientar.

La Corriente Sindical d'Isquierda señaló güei que les últimes midíes adoptaes por Zapatero suponen la "lliquidación definitiva" del Estáu de Bientar pa tola clase trabayadora y sociedá en xeneral, que les sos midíes tán empuestes "a protexer entá más los beneficios ya intereses del capital". Esta situación que va suponer más medría del desempléu y un empeoramientu de les condiciones llaboral y social, señaló'l sindicatu, lleva implícitamente acompañada una situación social na que va aumentar la esclusión social, la probeza y la precariedá llaboral.

"Esto ye visible na congelación de les pensiones a partir de 550 euros, toos aquellos pensionistes que puedan tar sobreviviendo con 600 o 700 euros van ver conxelaes les sos percepciones económiques de forma indefinida ente que la carestía de la vida sigue aumentando de forma alarmante", manifestaron dende CSI. El sindicatu sostien que la gravedá d'esta situación va vese apinada cuando'l restu les alministraciones, 'Principado' y Conceyos, realicen los sos planes p'amenorgar los gastos na cantidá que tán obligaes poles nuevu midíes.

"Hasta fai bien poco tiempu, tantu Zapatero como CCOO y UXT, dicíen que nun se tomaría nenguna midida qu'afectara los intereses de el trabayadores, pretendiendo apangar asina'l gran descontentu social que se taba xenerando. Y agora vemos como tol pesu del plan de Zapatero recai sobro los llombos de les clases más desfavorecidas", señaló'l sindicatu.

Ante esta pergrave situación, dende la Corriente Sindical d'Esquierda refuguen y conderguen l'aplicación d'estes midíes y faen un llamamientu a tola clase trabayadora asturiana y al pueblu asturianu, en xeneral, a salir a la cai "siguiendo l'exemplu de los nuesos compañeros y compañeres de Grecia" pa refugar lo que supon esti ataque letal al conxuntu de la clase obrera y sectores populares.

Fonte: Infoasturies.

Andecha Astur refuga cualesquier pasu atrás nos derechos sociales

Andecha Astur asoleyó nuna nota prensa "el más absolutu rechazu otra vuelta más a les polítiques neolliberales y xabaces del PSOE", qu’esta vegada dende’l gobiernu de Madrid "pretenden llantanos pola fuercia una reforma llaboral y un “reaxuste estructural” que nun ye sinon un eufemismu del tixeretazu que van dar al gastu social y los servicios que beneficiaben a quienes más lo necesitaben" denuncia la organización política asturiana. "Estes medíes además vienen daes polos organismos internacionales del gran capital, que por supuestu, atienden a los porgüeyos de les grandes fortunes y non del Pueblu Trabayador, lo mesmo que pasó hai unes selmanes en Grecia" critiquen.

Asina, sorrayen vemos como PP, PSOE, les asociaciones d’empresarios y dellos organismos capitalistes internacionales, "glayen al unísonu les sos consignes catastrofistes sobre la economía estatal, echando balones fuera sobre la so propia responsabilidá na situación y col mayor de los cinismos culpando a les clases populares" por llevar al “endeudamientu del estáu”.

Andecha critica qu'un gobiernu se diz “socialista” garre como propies les propuestes de les clases poderoses anunciando recortes nos sueldos del funcionariáu, baxaes nes pensiones, desapaición de les ayudes a la dependencia y en definitiva en tixeretazos en toles prestaciones públiques y de la seguridá social. "Van desapaecer además dalgunes de les medíes estrella o meyor estrellaes del gobiernu ZP", el nomáu “cheque ñacaru” que, critiquen, "se regalaba por igual a quienes lo necesitaben y a quien tuviera una renta alta" y tamien la reduición de los 400 euros nel IRPF que "d’igual mou nun facia distinciones ente ricos y probes". P'Andecha estos recortes "ta claru que solu vamos carecer los de siempres, la clase trabayadora" y la reforma llaboral que "va cebase en nos con un mayor abaratamientu si cabe del despidu, retrasu de la edá de xubilación y otra vuelta na tuerca de la precarización de los contratos y les condiciones de trabayu."

Esti gobiernu, "el del socialismu de los ricos", critiquen "nun piensa en recuperar l’impuestu sobre’l padremuñu, nun piensa n’aumentar la persecución del gran fraude fiscal que ye una autentica tomadura de pelu, gravar les rentes más altes, en definitiva, facer que quienes más tienen seyan los que más aporten a l’ayalguería pública y arrecostinen col mayor coles consecuencies d’una crisis qu’ellos provocaren".

¿Como puen falar d’amenorgar l’endeudamientu públicu con estos recortes qu’a la fin en númberos ye calderilla, cuando entá tan tresvasando a la banca los 50.000 millones d’euros del dineru de toos y toes que-yos regaló’l gobiernu col silenciu de la izquierda institucional y les grandes centrales sindicales hai unos pocos meses? entruga Andecha apuntando a esti tresvase como responsable de la multiplicación de la deuda pública y que foi "al bolsu de les mismes persones que son responsables de metenos de llenu n’esta crisis del gran capital y qu’agora pretender marchar de rosines con cara de disimulu y lliteralmente tomandonos por bobos y por bobes".

Dende Andecha Astur asoleyen "el más firme de los rechazos a estes polítiques neolliberales y antipopulares" apostando por dir na direición contraria: "Por exemplu gravando les rentes altes y los grandes padremuños económicos, quien más tien ye quien más tien que dar. Queremos que la banca que recibió millones d’euros públicos pase al manes de toes". Andecha nagua porquemeyora de les infraestructures n’Asturies siga alantre "superando la delda hestórica pa con esti país", pero "con criterios racionales y non eleutorales, fuxendo del megalomanismu y de la destruición innecesaria de la tierra". Apuesta tamién pola ganadería, l’agricultura y la pesca n’Asturies, "modernizando estos seutores pero ensin perder les sos señes tradicionales de sostenibilidá y respetu col mediu ambiente" y defende "les condiciones llaborales y l’accesu garantizáu a un trabayu dignu".

En definitiva,Andecha Astur defende y va defender "los nuesos drechos como país y como Pueblu Trabayador" y poro dende esta organización llamen a la rempuesta social "ante fechos tan graves", asina "la rempuesta del pueblu griegu ante los mismos fechos tienen qu’allumar al pueblu asturianu y al restu de los pueblos del estáu español y d’Europa".

Fonte: Infoasturies.

Más de 3000 mails piden más asturianu na RTPA

La XDLA califica d'ésitu la campaña de mailing, con más de 3.000 correos unviaos a los direutivos del Ente Públicu, y anuncien que van denunciar a la RTPA énte la Procuradora.

La Xunta pola Defensa de la Llingua Asturiana entamó va unes selmanes una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, amás del respetu a la toponimia oficial na programación en castellanu.

Dende la XDLA ufrieron un modelu de carta y les señes de corréu electrónicu de la dirección de la RTPA a les que la mandar. Gracies al corréu testigu de la iniciativa pudieron ver cómo, hasta'l día de güei, son más de 3.150 los mails qu'aportaron a les diferentes cuentes de los dirixentes del serviciu públicu de televisión d'Asturies. La XDLA quier agradecer l'ésitu d'esta campaña a toles persones que participaron nella.

De la mesma manera, dende la organización anuncien qu'esta campaña va siguir activa pa toles persones que quieran sumase y, amás, va completase cola presentación d'una quexa énte la Procuradora Xeneral d'Asturies, “qu'habría tener ente les sos funciones la defensa de los derechos de la ciudadanía asturiana y el cumplimientu de les disposiciones llegales d'ámbitu autonómicu, estatal y européu”, apunten pa finar.

Fonte: www.asturies.com

Vidiu de la manifestación pola oficialidá de la llingua asturiana.

Equí ta'l vidiu de la manifestación del Día de les LLetres Asturianes 2010. La manifestación cuntó cola presencia d'unes 5.000 persones que nun dexaron de vindicar el so drechu cívicu como asturianos y asturianes a tener una llingua col estatus que-y cuerresponde.




¡ OFICIALIDÁ YÁ !