Por una rempuesta conxunta nel 25 de mayu.

Tamos a 11 de mayu, queden esautamente 2 selmanes pal 25 de mayu, día nel que fai 202 años los asturianos y asturianes irguiéronse nun llevantamientu popular pa derrocar a los franceses y puxaron poles sos propies instituciones. Día que remenbra l'exerciciu de soberanía de 1808 y amuesa unos valores pa los patriotes nos que toxs deberiemos tar d'alcuerdu.

Tamos a 2010 y la nuesa llingua entá nun tien l'estatus llegal y políticu que-y cuerresponde, Asturies nun ta considerada nin nación hestórica, tan estrozando'l país d'oriente a occidente y de sur a norte, tanto ñatural como nacionalmente. Los asturianos y asturianes tienen qu'emigrar del so país pa vivir dignamente con un trabayu y vamos algamar los 100.000 paraos. Los ataques al padremuñu asturianu siguen por parte l'españolismu de poltrona y xulgáu. L'Estatutu d'Autonomía que tenemos ye fechu pola voluntá de la metrópoli madrilana, non pola voluntá popular asturiana. L'Asturies pola que naguamos nun ye más qu'un suañu y la realidá ye la d'un provincianismu faltosu y predemocráticu. Les empreses siguen pesllando y la clas trabayadora asturiana yá nun tien la concenxa de clas coleutiva qu'antañu tenía. Asturies ta siendo condergada a ser el vertederu industrial y enerxéticu del Estáu Español y a la par desactiven el texíu industrial. El tren d'alta velocidá fadrá ricos a los de siempres y esfarrapará'l mediu rural. Estos problemes son solo una riesta exemplos de la problematica na que tamos.

Asina, ye pernecesariu una rempuesta nesti 25 de mayu, data simbólica pa tolxs patriotes d'Asturies. El 25 de mayu ye hestoria y polo tantu ye de lo pocu que nun mos puen arramplar los españolistes. Tenemos que da-yos una rempuesta conxunta ente toles persones que puxamos polos drechos nacionales y sociales d'esta vieya nación. Ente tolos coleutivos y organizaciones polítiques y culturales patriotes. La situación ye llaceriosa y reclama una rempuesta importante. Les organizaciones tienen que ser tolerantes ente elles y comunicase pa llegar a daqué, dexando les diferencies a un llau y faciendo un actu en comuña denunciando la situación d'anguañu y remenbrando lo que pasó en 1808. Tenemos que tomar l'exemplu d'esa data y puxar pola soberanía popular d'Asturies dende la unidá. Hai que xunise p'actuar, ganar confianza y averanos ente toxs.

Poro, dende la humildá encamientase a sumar fuercies, a comunicase y a enfotase a que nesti prósimu martes 25 de mayu la sociedá civil asturiana tea la opción de manifestar el so refugu a la situación d'esti pueblu y la necesidá d'un avance na soberanía. Denguna organización tien convocáu pa esi día dengún actu entá, tamos a tiempu. Y esa oportunidá solo pue venir de les organizaciones, y si nun ye conxunta pue ser un ésitu igual, pero'l clima d'optimismu que da una convocatoria conxunta y d'unidá enxamás algamaralo. Por un 25 de mayu conxuntu, soberanista y popular.

II Folixa Nacional Asturiana entamada por Fai! pa remenbrar el 25 de mayu.

Avérase’l 25 de mayu, fecha histórica na qu’en 1808 Asturies declaróse soberana. Por eso, dende la organización soberanista Fai! van facer alcordanza d’estos fechos con música en directo y reivindicación na “II Folixa Nacional”. Ska, rock, hip hop y electrónica van sonar nesti eventu qu’axunta les actuaciones de La Tarrancha, Arma X, Galán, Da Robotz y, per primer vegada n’Asturies, los aragoneses Mallacán. L’actu va ser el prósimu 22 de mayu en Xixón.


Ye verdá que les comparaciones son odioses y que cada grupu tien la so propia personalidá, pero al sintir Mallacán más d’ún va etiquetalos como los Dixebra aragoneses. Rock contundente, influencies xamaicanes y soníos tradicionales d’Aragón formen la base sonora d’esta banda que tien más de 14 años a les sos espaldes. Con lletres reivindicatives y n’aragonés, Mallacán va visitar Asturies per primer vegada presentando “Mar de suenios”, el so caberu trabayu.


Xunto a los aragoneses van participar dellos nomes destacaos de la escena asturiana. La Tarrancha col so mecigayu-ska, el hiphop combativu d’Arma X y la propuesta rap-ska-punk de Galán aprovechen ocasión pa poner enriba les tables los sos respectivos nuevos discos: “Ö-3-3”, “25 Otoños” y “Barriendo pa fuera”. D’otra miente, el DJ Da Robotz va aportar los sones más electrónicos de la nueche con influencies de soníos folk asturianos.


Esta alcordanza a la historia d’Asturies va tener llugar el prósimu sábadu 22 de mayu a les 20.00 na Casa Sindical de Xixón. Les entraes anticipaes yá tán a la venta en dellos llocales de Xixón, Uviéu, Avilés, Mieres y Llanera con un preciu de 6 euros y 8 en taquiella.

Recordar la nuesa historia

“Remembrar los fechos de 1808: declaración de soberanía total d'Asturies, la creación del exércitu defensivu asturianu y de la bandera asturiana; pa qu'estos nun caigan nel escaezu per parte de les asturianes y asturianos”, esi ye l’oxetivu que tien el coleutivu d’esquierda soberanista Fai! con esta “II Folixa Nacional” qu’a mou de xarana caltién encesa la nuesa memoria.