domingo, 9 de mayo de 2010

Miles de persones pidieron la oficialidá del asturianu n'Uviéu


Unes 5.000 persones manifestáronse peles cais d'Uviéu nel XXXI Día de les Lletres Asturianes.

Un añu más, la vidicación de la Oficialidá de la Llingua Asturiana tomó les cais de la capital nel Día de les Lletres Asturianes. La tradicional marcha que convoca la Xunta pola Defensa de la Llingua Asturiana, tuvo'l sofitu de delles organizaciones polítiques, sindicales y sociales axuntando miles de persones que percorrieron la cai Uría dende la Estación del Norte pa dir finar delantre del Teatru Campoamor onde un voceru de la organización convocante lleó'l manifiestu. Una bandera d'Asturies y un bon ensame pandereteres abrieron el cortexu que tuvo xixiláu por dos dotaciones antidisturbios de la policia española, cortesía d'Antonio Trevín, delegáu del Gobiernu español n'Asturies.

Pasaes les 19:30 hores arrancó dende la Estación del Norte la marcha pola oficialidá del asturianu qu'esti añu axuntó más xente que nos años últimos. A la convocatoria de la Xunta pola Defensa de la Llingua Asturiana axuntáronse sindicatos como SUATEA o la Corriente Sindical d'Izquierda y organizaciones polítiques como PAS, Andecha Astur,Darréu, UNA, Fai!, PCPE, CMC y la coalición gobernante IU-BA-LV.

La marcha finó cola llectura del manifiestu delantre del campoamor xusto enantes del empiezu del Actu Institucional de l'Academia de la Llingua Asturiana dientro del teatru.

Fonte: Infoasturies.