Fai! quier solidarizáse cola militante d'Andecha Astur retenida y llevada a comisaría nun actu d'UPyD enantes d'entamar a formulá-y una entruga a la so cabezalera Rosa Díez.
La organización d'esquierda soberanista quier amosar el so sofitu pa cola compañera y ufre tola so solidariedá col partíu nel que milita tres de ser retenida y treslladada a la comisaría de la "policía nacional española" tres de tentar facer una entruga nún actu públicu del partíu de Rosa Díez n'Uviéu. Sigún informen los medios contrainformativos asturianos, una militante del partíu políticu Andecha Astur qu'acudiere a un actu públicu de la formación españolista Unión Progreso y Democracia foi espulsada pela fuercia y posteriormente treslladada a la comisaría y retenida ellí per parte d'axentes non uniformaos por "llevantar la mano pa facer una intervención" na charra que la so líder, la nacionalista Rosa Díez, taba dando.
Dende Fai! queremos unviar esta nota de sofitu a la militante y, per estensión, al so partíu políticu énte unos fechos que consideramos d'estrema gravedá y enmarcaos nel contestu d'arrequexamientu de la llibertá d'espresión y del restu de llibertaes individuales y coleutives.
A Fai! nun-y estraña qu'una organización que fundamenta la so existencia na defensa de la sacrosanta unidá de la "nación española", acoyendo, treslladando y continuando les tesis primorriveristes na actualidá, faiga usu una y otra vegada de la fuercia pa torgar y criminalizar cualquier tipu de disidencia énte l'odiu qu'esa formación y los sos militantes profesen a les llingües y cultures minoritaries a estinguir pol nacionalismu español. Nesti sen, nun se trata de la primera vegada que les xires provocadores de Díez pel "reinu" xeneren una bayura de protestes y refugues per parte de la población, siendo éstes, amás, silenciaes pola prensa nel meyor de los casos, y manipulaes na so mayor parte.
Ye por ello que, dende Fai! unviamos el nuesu aliendu a la compañera represaliada y facemos un llamáu a denunciar esti tipu de fechos cola mayor contundencia y firmeza, pa desenmazcarar les postures totalitaries y d'imposición del so pensamientu únicu que remanecen de los partíos nacionalistes españoles. Quiciabes tean uníos, pero nin son democráticos nin muncho menos progresistes.
La Corriente Sindical d’Izquierda convoca una concentración pública escontra la Reforma LLaboral que’l Gobiernu ta apautando anguañu coles organizaciones empresariales y los sindicatos CCOO y UXT.
Esta concentración va tener llugar el prósimu vienres 29 de xineru, n’El Parche (plaza l’Ayuntamientu) d’Avilés, entamando a les 19:00 hores. Pa la C.S.I., esta nueva Reforma Llaboral "apareya otra vuelta de tuerca más na estratexa de facer pagar a los y les trabayadores los costes d’una crisis de la que nun son culpables y que namás se debe a l’avaricia y la irresponsabilidá de la patronal y a la pasividá’l Gobiernu, CCOO y UXT ante los sos desmanes".
El despidu de baldre, l’allargamientu la edá xubilación, la reforma y amenorgamientu les pensiones, abaratar y facilitar entá más los Espedientes de Regulación d’Emplegu, nuevos contratos basura o rebaxar les cotizaciones empresariales a la Seguranza Social, son dalgunes de les custiones que se tan negociando y que 'van suponer más precariedá llaboral y peores condiciones de vida y trabayu pal conxuntu los y les trabayadores. A la fin, un nuevu ataque a los drechos de la clas obrera, cola complicidá activa de los dirixentes de CCOO y UXT' esplica'l sindicatu asturianu.
Según CSI, la patronal quier más beneficios, el Gobiernu necesita “paz social” y los sindicatos mayoritarios precisen subsistir, precisen financiación pa continuar coles sos estructures, los sos lliberaos y los sos privilexos. 'Asina, too apunta a un alcuerdu ente ellos que van pagar los y les trabayadores con más paru, más desigualdaes sociales, más probitú y más represión' camienta'l sindicatu.
Ante too ello, dende la CSI vese necesario que la clas obrera atope 'la so fuercia comu coleutivu, tornando´l llugar de trabayu nel escenariu de la llucha social y faciendo un sindicalismo alternativu que-y ponga frenu a esta nueva agresión'.
Darréu escontra’l paséu de les fuercies d’ocupación en La Pola Sieru
La organización revolucionario ya independentista Darréu quier amosar la so refuga al desfile militar que l’exércitu español fadrá esti prósimu 29 de xineru en La Pola Sieru. La parada militar del Reximientu Príncipe vien d’una moción del Partido Popular sofitada pol PSOE. Asina l’equipu de gobiernu de La Pola Sieru pidió’l desfile a Cabo Noval y nel acuartelamientu aceptaron dafechu. El paseín de les tropes españoles sedrá pela Cai Alcalde Parrondo, perimportante via de La Pola, y cerca de la Plaza Cubierta. La finalidá pal ayuntamientu de Sieru ye rindir homenaxe a los 154 militares que fueron en supuesta misión de “ paz “ al Líbano y vindicar el papel de cabo Noval. Dende Darréu queremos amosar la nuesa refuga a esta Parada Militar en La Pola Sieru, asina como cualesquier otra manifestación militarista n’Asturies. Caltenemos que l’equipu de gobiernu entama esti circu públicu con otros fines a los que dixeron. En primer llugar, l’equipu de gobiernu ufierta a les tropes d’ocupación salir a la cai p’asina face-y la publicidá a l’exércitu español de mena masiva y descarada. Ye una verdá que munchos mozos y moces n’Asturies acaben metiéndose nel exércitu por que nun atopen dengún trabayu y ye la única mena de nun emigrar del país. Con esti ensalzamientu militar l’ayuntamientu polesu quier tapecer la realidá de la emigración forciada y ufiertar una opción que resulta ideal pa los partíos PPSOE, como ye que la mocedá entre a formar parte del exércitu español, una mena de desmovilizar a los mozos y moces ya incluso como ye vezu ideoloxizar a estxs manipulándolos. Esta mena de desmovilización conviértese nun importante sofitu a l’españolismu n’Asturies y trata de llantar na sociedá un modelu violentu, autoritariu y españolista. Ye bien sabíu los roles de les fuercies armaes españoles pa colos sos integrantes realizando una fuerte aición d’adoctrinamientu dientro la xera diaria, lo que nun resulta estrañu si tenemos en cuenta qu’enxamás se depuraron a los altos cargos y oficiales que ya taben na direición del exércitu en vida del dictador Francisco Franco. Darréu tamién quier denunciar que l’exércitu facista español nun solo invade países alloñaos como Afganistán, los Balcanes o’l propiu Líbano, tamién cumple la so función de fuercia d’ocupación na nuesa nación. Ye l’exércitu español, el cual tien como finalidá defender los intereses del réxime capitalista baxo’l que vivimos y perenriba de tou defender a ultranza( a sangre y fueu) la unidá de la “nación” española. La mesma constitución española, de calter neofranquista, da-y a l’exércitu español la responsabilidá de garantizar esta unidá, asina como los porgüeyos de la corona borbónica. D’otra miente nun queremos escaecer que clas de xente ta metía nel exércitu, yá que ye evidente la fuerte presencia d’elementos d’estrema drecha y neonazis nes sos files, nun hai falta recordar que’l caberu muertu antifacista nel estáu español, como tantos otros y otres, morrió a manes d’un neonazi que yera militar de profesión. Tamién queremos denunciar l’altu gastu públicu que supondrá esta amuesa d’españolismu y autoritarismu yá que como siempres sedremos toes y tolos que paguemos tol montaxe y tol adornu “patriota” d’esti tipu de manifestaciones qu’además suel zarrase con un convite pa les “autoridades”. Camentamos amás que’l desfile camudará enforma esi vienres la vida polesa y munches cais veránse cortaes y el mal tráficu sedrá un esmolecimientu más pa los habitantes del conceyu, sobremanera palxs trabayadores. Esti tipu d’actos yá tuvieron llugar en La Pola nel añu 1996 y l’añu 1998, dando munchos problemes ente la población. Asina, pidimos a la población asturiano y polesa qu’esprese la so indignación y el so refugu, sobremanera a la mocedá, nes cais de Sieru demientres trescurra l’actu en La Pola y qu’avérense a la concentración que dende Darréu vamos a entamar nel mesmu desfile faciendo una voz discordante con ellí y tratando de refugar esti actu español n’Asturies. Asina, tamién queremos convidar a qu’otres organizaciones antimilitaristes, independentistes o d’izquierdes convoquen la so concentración de mena llibre y conviértase tou nuna concentración conxunta ente distintes fuercies que nun ven normal esti despropósitu militarista. Llamamos a la xente a movilizase nes casi de Sieru esti prósimu 29 de xineru escontra la parada militar d’estos ellementos autoritarios militares.
¡Nin Cabo Noval, nin fuercies d’ocupación nel nuesu país! ¡Puxa Asturies llibre y socialista!
Falta por comfirmar la hora a la que realizarase la parada militar y el sitiu xustu pa la concentración.
