martes, 12 de enero de 2010

L'Alcalde y la Conceyala de Cultura de Llanera censuren y torguen un actu de Fai!

Noticia estrayía de la páxina web de la organización soberanista:


L'asamblea que Fai! tinía convocada pa esti vienres 8 de xineru na Casa la Cultura de Posada (Llanera) nun pudo cellebrase arriendes de la so cancelación unillateral y ún día enantes de la so cellebración per parte del Alcalde y la conceyala de cultura. L'anulación del permisu, que fuere concedíu con tolos pilancos por qu'esti se ficiere usando la llingua asturiana, llegó a 24 hores de la cellebración de l'asamblea, que yá llevaba díes publicitada y anunciada al traviés de cartelería, distribuciones de correos y contautos personales ente xente del conceyu.

Cronoloxía de los fechos:

29 d'avientu:

-Miembros acreditaos de Fai! nel conceyu entreguen na Casa'l Conceyu la solicitú pa la confección d'un mural y un llugar pa cellebrar l'asamblea na Casa la Cultura o Casa de la Mocedá de Posada.

-L'alministración ínstalos a dir a la Casa la Cultura y entrugar si ellí hai sitiu disponible pa esi día y hora, lo que se confirma ensin problema per parte del funcionariu encargáu, qu'avisa a un compañeru pa que'l día de l'asamblea se permita l'usu d'un proyector.

- Na vuelta a la Casa'l Conceyu, confírmase-yos a los funcionarios la disponibilidá de la Casa la Cultura y entrégase la solicitú. Nesi intre espétase-yos a los militantes de Fai! que "l'asturianu nun ye cooficial y que quiciabis nun l'aceuten". Darréu d'esto, p'asegurase consulten telefónicamente y dicen que sí, que nun hai problema. Queda afitáu l'actu, diséñase un cartelu que s'esparde pelos núcleos de población más importantes del conceyu y fáise una convocatoria pública, na que s'avisa tamién al traviés d'una llista de corréu a xente del conceyu.

4 de xineru:

- Pónense en contautu con una militante de Fai! per teléfonu dende la Casa'l Conceyu pa espetar que "la solicitú nun pue tar n'asturianu" y qu'asina nun pue quedar. Oblígase a los organizadores, con una convocatoria na cai, a tornar l'escritu al castellán. Sicasí, los militantes de Fai! en Llanera entreguen una fueya billingüe, onde, na parte superior, ta l'escritu n'asturianu y, na inferior, en castellán.


7 de xineru

- Nueva llamada per parte de los funcionarios del conceyu, que telefónicamente comuniquen que la solicitú ta denegada. Inmediatamente y énte la gravedá de los fechos demándase-yos una contestación per escrito, que devuelven col siguiente testu manuscritu y qu'esclaria mui poco: "Habló Belén Concejala con el Alcalde. (se lo deniega). Se les avisó x teléfon. 7/01/10. (denegado).

- Al tiempu, avísase de que "va a llamavos la conceyala", xusto tres de dar un mensaxe contradictoriu del tipu "vete a vela a la Casa la Música agora" nel que la funcionaria se corrixe al "decatase de que ta de vacaciones -casualmente- esi día y el siguiente".

- Fáise otra petición pa que, teniendo en cuenta que l'actividá ta convocada y publicitada, s'ufra un sitiu alternativu y torna a repetise la solicitú pa mural. El pidimientu ta namás n'asturianu. Avísase de que "si nun se traduz nun va ser aceutáu", a lo que'l representante de Fai! se ñega.

- La conceyala, -que casualmente ruempe de sópitu, ente la gravedá de la crisis alministrativa xenerada, el so periodu de descansu vacacional y entra pela puerta de la Casa'l Conceyu- llama telefónicamente a los representantes de Fai! pa dicí-yos qu'aconceyaron "ella y l'alcalde" y que la solicitú ta "denegada". Diz entós, nuna clara postura censora, "qu'ellos tienen que tar informaos de lo que va facese nos sos llocales y que se-y tien que facer un escritu nel que se diga de qué se va falar, de qué va tratar l'asamblea y cómo va ser y qué va dicir el mural que se faiga".

- D'urxencia, y como última midida, Fai! entrega un nuevu escritu nel que se fala brevemente de los motivos polos que públicamente se va cellebrar l'Asamblea, asina como pa poné-y final con un mural qu'afale la participación y la implicación de la población de Llanera nes problemátiques del so conceyu. El testu ye entregáu y la téunica municipal informa de qu'ella, l'alcalde y la conceyala van aconceyar pa decidir finalmente.

- Pa finar, a les 14.30, trancando yá les dependencies públiques, confirmen la denegación de la solicitú per cuarta vegada consecutiva. Entrúguense les razones y nin siquiera s'aporten contestaciones per escrito, nin s'informa oralmente de les razones qu'impiden el derechu a la llibre reunión en dependencies públiques.


VALORACIÓN DE Fai!

- A la corporación del conceyu de Llanera, gobernáu por José Avelino Sánchez, y la so conceyala de "Cultura" y Muyer, María Belén Rodríguez López, del Partido Popular, molésta-yos que nes instalaciones públiques se desendolquen actividaes que "nun controlen".

- Esti tipu de fechos constata qué ye lo qu'entienden la inmensa mayoría de políticos por llibertá d'espresión, d'aconceyamientu, por usu de dependencies públiques, por non discriminación llingüística, por xestión eficaz, por tresparencia, por tratu dignu al ciudadanu, por "democracia": apartar pa otru llau lo que molesta, esbillar lo políticamente correuto y les actividaes que-yos interesen y que nun faigan rescamplar la so xestión asturianófoba y corrupta.

- Queda claro que determinaes ideoloxíes nun tan bien vistes por dicha corporación cuando se censura un actu que pretendía promover l’asociacionismu y l'autorganización nel conceyu, seguramente al decatase de que los principios de la nuesa organización nun tan mui averaos a los del partíu que gobierna.

- Con esto Fai! pide a tolos ciudadanos y especialmente a los vecinos de Llanera’l so sofitu pa poder articular a pesar de toles torgues un movimientu que saque a la lluz los verdaderos problemes del conceyu y los d’Asturies en xeneral.
Desiximos una vegada más una esplicación al alcalde de Llanera y a la conceyala de Cultura y Muyer de por qué se dexó en manes de la Casa de la Cultura la concesión del local pa celebrar l’asamblea pero depués se denegó dicha concesión ensin motivu dalu.

- Afirmámonos na necesidá de facer esti tipu d'actividaes trabayando dende les bases de los conceyos, dexando mui claro que naide nin nada va facer qu'arrenunciemos a da-y la palabra a la xente y al pueblu de Llanera. Fai! yá trabaya pa llograr una nueva convocatoria pa esti mesmu conceyu ensin inxerencies nin censures.