viernes, 31 de diciembre de 2010

Feliz añu 2011.


Que l'añu qu'entra seya l'entamu a la fin de la construción política d'un movimientu asturianu qu'afite na soberanía nacional y na xusticia social los sos pegoyos básicos. Que andechemos toxs baxo unes idees d'igualdá personal, coleutiva y que la solidaridá faiga de nós meyores persones y meyores asturianos. Que finen les rocees infantiles y ensín arrenunciar a nada seyamos quien a axuntanos dende'l respetu y la igualdá, pero siempres formandonos y aldericando, sele y tolerantemente.
Pero nun escaezcamos que'l camín d'esti pueblu primiu, como'l de tantos nun ye otru qu'algamar la so independencia política y económica, nun hai otra. Debemos saber xugar les nueses cartes, pero la solución ye bien cenciella: Ser militantes patriotes asturianos día a día y facer práctica política d'ello. Ser revolucionarios, non por que temos alloriaos señores, non. Sinon porqu'esti sistema ye miserable y s'apoya nos más pa facer asquerosamente ricos a una minoría que conderga a esa mayoría popular. Ye necesaria la tresformación política, social y económica.
Finalmente, de nuevu, deseavos el meyor posible, y qu'esti 2011 faiga de nós meyores militantes asturianos, pero sobre too, meyores persones. Recordavos tamién que podeis ponevos con esti blogue en contautu pa lo que vos pete na direción de correu lleutrónicu : frayandocadenes@gmail.com
Asturies, a la gueta'l so determín!
Asturies a la gueta l'Estáu Socialista!
¡ PUXA ASTURIES !

Cuatro guardies civiles condergaos por tortures graves


Penes de cárcele pa cuatro axentes del cuerpu militar español por tortures
L'Audiencia de Gipuzkoa condergó a a cuatro guardies civiles por un delitu de tortures a Mattin Sarasola ya Igor Portu, anque impón-yos condenes mínimes pa estos casos. La resolución xudicial niega credibilidá a la versión oficial que vieno defendiendo'l Ministeriu del Interior d'Alfredo Pérez Rubalcaba dende xineru de 2008.

La sentencia señala al sarxentu Juan Jesús Casas García como autor d'un delitu de tortures graves y de mancadures, polos que-y impón cuatro años y mediu de prisión; al guardia civil José Manuel Escamilla, a dos años y mediu de prisión pol mesmu delitu; y a los agentes Sergio García y Sergio Martínez, a dos años de prisión y ocho díes de llocalización permanente.

Los cuatro foron inhabilitaos por 8 años y a la Guardia Civil y la Policía española, por responsabilidá civil subsidiaria, al pagu de 18.000 euros a Igor Portu y 6.000 euros a Mattin Sarasola «pol daño físicu y psíquicu causáu» a ambos.

Amnistía Internacional lleva años denunciando la esistencia de tortures nel Estáu español por parte de les fuercies policiales.

Fonte: Infoasturies

jueves, 30 de diciembre de 2010

Los trabayadores del taller de Barros siguen en llucha.


La incertidumbre sigue nel tallerón llangreanu onde dende ayeri les movilizaciones de los trabayadores se tan radicalizando pa ver si d'una vegada por toes la patronal de Duro dexa yá'l so terrorismu. El terrorismu patronal que fai que l'Ayuntamientu de Llangréu faiga xestos de cara a la galería pero a la hora de la verdá mira pa otru llau, pues ye incapaz d'aparar esta situación, como ye incapaz de llevar alantre una xestión democrática y pal pueblu. L'alcaldesa robló nel so día un alcuerdu cola empresa que dabai " carta blanca " a los directivos p'abandonar el Conceyu. ¿ Ye éticu que'l PSOE llocal agora eche pestes contra DF ?
Una vegada más los ciudadanos nun se sienten representaos polos políticos, nin estos son capaces de representar a los ciudadanos. L'únicu procesu que pue tener ésitu pa que los 90 despidos nun se dean y DF nun abandone Llangréu, que nun escaezcamos, ye la cuestión de fondu, ye que Llangréu, el Nalón, les cuenques y toa Asturies enseñen músculo. Cualesquier agresión d'esti calter nun ye pa otra cosa que siguir col desmantelamientu planificau d'Asturies. El conflictu en Barros nun ye namái que'l vivu espeyu de lo que va pasar y pasa nel país enteru. Como asturianos y asturianos nun podemos facer otra cosa que sofitar a los trabayadores en llucha y auto-organizar una rempuesta popular, asturiana y consecuente.
¡Puxa la llucha de la clas trabayadora!
¡ Non al desmantelamientu d'Asturies, puxemos pol país !

sábado, 25 de diciembre de 2010

Mañana domingu 26 d’avientu Darréu cellebrará’l so III Congresu Nacional


La organización política de mocedá nacionaliego independentista, Darréu, entama esti prósimu domingu 26 una cita perimportante pa tola rede de militantes y simpatizantes. Llega’l III Congresu Nacional de Darréu, que sedrá puntu d’alcuentru ente toles persones que conformamen esti proyeutu políticu que vien desenrrollandose dende l’añu 2004.

El Congresu Nacional de la moceda independentista va cellebrase en Xixón, col enfotu de ser el referente pa la aición política que Darréu escueya facer nel futuru. L’analisis de la so realidá ye perimportante nesti Congresu, nel cual se visionarán y analizarán los aspectos organizativos, tauticos y políticos onde la organización de mocedá cree que ye importante ameyorar. La valoración de los puntos fuertes de Darréu y l’autocrítica son dos pegoyos a tratar nesti aconceyamientu de la mocedá independentista revolucionario.

El resultáu d’esti III Congresu Nacional pue ser lo qu’oriente a Darréu y los sos militantes nos prósimos meses y años, polo que ye fundamental que los militantes y simpatizantes se vuelquen nesti eventu; "pa construyir una alternativa fuerte de calter soberanista hai que construyila dende la mocedá, que ye’l futuru del país, y dende una visión popular revolucionaria, como forma d’analizar la realidá de la nuesa nación y del mundu enteru"

Fonte: Aruelu.

miércoles, 22 de diciembre de 2010

Fai! y Darréu piden conxuntamente la vuelta de la selección asturiana


Les organizaciones soberanistes Darréu y Fai! vienen d’amosar el so descontentu pola nueva ausencia d’un partíu de la selección asturiana de fútbol. Esta nueva crítica súmase a la de Xuventú Asturianista y Bloque por Asturies.

“Un partíu amistosu con otra selección nacional sedría un éxitu bultable”, señalen dende les organizaciones a la par que critiquen que la selección asturiana de fútbol lleve ocho años ensin xugar.

Amás, los nacionalistes destaquen qu’un partíu d’esti calter “podría ayudar al fúbol asturianu” y sorrayen que “la crisis capitalista tamién pasa factura a los clubes deportivos más modestos”.

“El Gobiernu del Principáu d’Asturies y la Real Federación Asturiana de Fútbol los responsbles d’esti murniu panorama pal fútbol asturianu y los sos siguidores”, denuncia’l comunicáu conxuntu de Fai! y Darréu. Al empar, argumenten que “marxinar cualesquier síntoma del fechu nacional asturianu” ye la razón de que nun haiga partíu.

Oficialización y normalización
Por último, les organizaciones independentistes pidieron la oficialización de les selecciones deportives asturianes y la so normalización. Amás d’unes “federaciones que seyan consecuentes cola defensa de los intereses del deporte del País y que nun tean en manes del Réxime españolista del PSOE-IU-PP”.


Fonte: Asturies.com


Comunicau íntegru: http://www.fai-asturies.org/



Xuntanza solidaria colos pres.o.s. politicos


El prosimu sabadu 25 el Muerganu Antirrepresivu Popular Sofitu convoca, por segundu añu consecutivu, una xuntanza solidaria xunta la cárcele española de Villabona. Pese a la represión sufrida l’añu pasáu por parte de la delegación del gobiernu español n’Asturies, el nuesu oxetivu ye recuperar esta movilización, que nel pasáu yera habitual, y afitala nel calendariu de movilizaciones de los asturianos mas conscientes, que conoz la realidá na que vive, y concienciaos, que actuen consecuentemente con la so conciencia.

En Sofitu sabemos que’l plan del gobiernu español pasa por tapecer la esistencia de los presos politicos, neto que la tortura, pa dar una sensación de llegalidá y xustificar asina’l so incumplimientu de los "Derechos Humanos". Esta llegalidá, baxo la sida de la llucha contra’l terrorismu, crea lleis que mos afecten a toos, ya sía un trabayador lluchando pol so empléu o un vecín contra la especulación urbanistica y nel futuru entamara a perseguise’l pensamientu peligrosu o les opiniones diverxentes de lo politicamente coreutu como vimos hai poco col mozu xixonés que foi unviáu a la audiencia nacional de Madrid por verter les sos opiniones na so paxina d’una rede social a la que solo teníen accesu los sos amigos y conocíos.

Apostamos pol llema "La unica forma de ser solidariu ye prauticando solidaridá" como una frase que recueye’l nuesu pensamientu y afalamos a acudir esti sabadu con nós ensín medrana a cualquier intentu represivu. Primeru porque ya l’añu pasáu cualquier gastu foi sufragáu solidariamente por mediu d’actos festivos, amás que tolos papeles del actu tan en regla, y segundu porque tenemos que ser conscientes que’l fechu de ser solidarios con una persona represaliada nun ye nengún delituy nun podemos dar al PSOE la grandeza de que nós mesmos lo veamos asina.

Pa finar, si tas interesáu n’acudir puedes contautar con nós en sofitu@nodo50.org

lunes, 20 de diciembre de 2010

Aiciones propagandístiques en sofitu a los trabayadores de Duro Felguera por parte de Darréu.

Militantes de la organización política de mocedá Darréu, llevaron a cabo demientres esti fin de selmana delles aiciones propagandístiques nel Conceyu de Llangréu en sofitu a los trabayadores de Felguera Construcciones Mecániques, del grupu Duro Felguera. Recordamos, como alvertimos la selmana pasada dende esta organización mediante una nota de prensa que l'únicu fin que la patronal busca ye'l pieslle de la factoría pa dedicase a la especulación. Asina 90 families puen quedar na cai, y el Conceyu de Llangréu nuna situación llaboral inda más llaceriosa de la que vive anguañu.

La mocedá soberanista y socialista de Darréu nel Conceyu de Llangréu nun vamos quedar paraos demientres vemos como van arramplando tol nuesu texíu productivu, renegando al conceyu a un futuru más qu'escuru. Si'l conflictu nun s'igua nun duldaremos en siguir realizando dende les nueses posibilidaes aiciones d'esti tipu, a la par qu'informatives. Tamién queremos dende equí treslladar tol nuesu sofitu a los trabayadores de Barros, y amosar la nuesa más fonda solidaridá. Anque esperemos enquivocanos, nun paez que nin dende'l Gobiernu del Principáu d'Asturies nin dende'l municipal, llideráu por Esther Diaz vayan a facer muncho porque la Duro siga na llocalidá.
Semeyes ya información na páxina web de Darréu.

Muerre l’últimu representante del Conseyu Soberanu d’Asturies


Quiciás el titular pueda resultar estrañu, pero axústase dafechamente a la realidá. Cola muerte del que fuera primer Presidente Autonomicu asturianu, Rafael Fernández, muerre tamién l’últimu representante del Conseyu d’Asturies que, el 24 d’agostu de 1937, se declaró “soberanu”. Asturies vivía, naquel entós, una situación d’acosu y derribu poles tropes franquistes que, depués del paséu militar pol País Vascu y Cantabria, aprestábase a facer lo mesmo nel nuestru país. La resistencia qu’atopó nun tuvo nada que ver colo anterior. Cada metru que conquistaron fue a costa de munchu sacrificiu y muncha perda de vides. Neses circunstancies, y a la vista’l desentendimientu o la falta organización por parte’l poder central, el Conseyu d’Asturies y Lleón decide proclamase “soberanu”. Rafael Fernández, ocupaba nesi momentu la cartera de Facienda, pasando nesi momentu a ocupar la d’Orden Públicu. Pa que los que nun lo conozan lo sepan, esti ye’l testu del “Decretu de Soberanía”:
“Artículo 1º.- El Consejo Interprovincial der Asturias y León, a partir de la fecha y hora de este decreto, se constituye en Consejo Soberano de Gobierno de todo el territorio de su jurisdicción y a él quedan integramente sometidas todas las jurisdicciones y organismos civiles y militares que funcionen en los sucesivo dentro del referido territorio.

Artículu 2º.- El propio Consejo Soberano, a la vista de los acontecimientos favorables que se produzcan en el curso de la guerra, determinará el momento de despegarse de las funciones soberanas que hoy asume.


Artículo 3º.- De este decreto se dará cuenta al Gobierno de la República para su convalidación, sin perjuicio de su absoluta vigencia, impuesta por imperio de las circunstancias, desde este mismo momento de su promulgación. Dado en Gijón a las 24 horas del día 24 de agosto de 1937″

Esti fue, xunto a los doscientos años de Monarquía Asturiana, y la declaración de Guerra a Napoleón, un de los momentos en qu’Asturies fue soberana. Llamentablemente, nun sirvió pa facer frente al avance imparable del fascismu, pues la diferencia en númberu y armamentu yera aplastante. Pero quede afitáu un momentu históricu importante, del qu’agora esapaez l’últimu personaxe vivu que participare. Bien ye verdá que, cuando tornó del esiliu, Rafael Fernández, xenru de Belarmino Tomás, faló a la escontra d’aquella declaración de soberanía, pero’l fechu ciertu fue qu’él formó parte del Gobiernu d’una Asturies soberana. Eso naide lo pue negar. Anque agora la xente fale d’otres coses.


Autor artículu: Vicente G. Oliva, Asturbulla.org

Darréu énte les pallabres hipócrites de Javier Fernández.



Dende la organización de mocedá Darréu queremos treslladar a les moces y mozos del país la nuesa postura alredor de les caberes pallabres de Javier Fernández, onde afirmaba'l que'l oxetivu últimu del PSOE ye facer d'Asturies “ una tierra pa quedase”. Onde tol que quiera pueda trabayar, aseguró'l secretariu xeneral de la Federación Socialista Asturiana.

Como mozos y moces sentímonos indignaos por estes pallabres. Creemos que facer proselitismu dende la FSA-PSOE, prometiendo una Asturies pa vivir y trabayar nun ye éticu nin tolerable por denguna persona que se sienta parte d'esti país. Los máximos responsables políticos d'esti éxodu de compatriotes, que colen del país a la gueta d'unes espectatives de vida más dignes nun son otros que'l Gobiernu, gobernáu anguañu por PSOE ya Izquierda Xunida. Poro, vender agora promeses d'unes espectatives llaborales y sociales segures n'Asturies ye escaecer tola responsabilidá d'ellos mesmos cola emigración forciada.

Como'l so antecesor, Tini Areces, paez ser que Javier Fernández vive n'otru mundu estremáu al de la ciudadanía asturiana. Si Areces falaba de la emigración de mocedá como de “lleenda urbana”, Fernández prefier prometer un futuru n'Asturies a la mocedá ensín que se dean condiciones polítiques, económiques o sociales pa qu'esto fuere posible. El Réximen de la FSA que llevamos careciendo durante décades, yá s'encargó de frayar el texíu económicu y vendelu al “menor postor”.

Asina, Darréu quier denunciar al Gobiernu d'Asturies PSOE-IX como los máximos responsables d'esta situación, que coles sos polítiques d'axentes colonizadores fundieron a la mocedá d'esti país. Javier Fernández nun ye namái qu'un mentirosu más, como foi Tini Areces, al cual dende los sectores populares y soberanistes tenemos que desgastar. Pedimos a la mocedá qu'amuese'l so descontentu coles promeses vacies de la FSA y s'organice en clave nacionaliega y d'izquierda tresformadora. Solo asina, dende'l soberanismu/nacionalismu asturianu podremos ser dueños del nuesu propiu destín, y finar d'una vegada por toes, cola crisis permanente que carez Asturies.

¡ PSOE VENDEPATRIES !

¡PUXA ASTURIES DIXEBRA Y SOCIALISTA!


Fonte: www.darreu.org

viernes, 17 de diciembre de 2010

CSI Mocedá refuga los despidos en Duro Felguera


Dende CSI Mocedá queremos manifestar la nuesa más fonda solidaridá colos trabayadores de los talleres de Barros de Duro Felguera. El Espediente de Regulación d'Emplegu mediante el cual pretende amenorgase la plantiya nun 60% despidiendo a 90 obreros implica un nuevu pasu na destrucción del texíu productivu asturianu en función de planes y oxetivos que nada tienen que ver colos intereses de la mayoría social.

Lo que se pretende ye preparar primero'l zarru de Barros, y más tarde el d'otros talleres de Duro Felguera n'Asturies, siguiendo cola mesma estratexa políticu-empresarial que se lleva aplicando a lo llargo de décades nesti país: la del desmantelamientu progresivu acompañáu de falses soluciones individuales. Non puede entendese a Barros como un casu aislláu sinón como un pasu más nun procesu que namás conduz a tresformar al valle y a toa Asturies nun verdaderu desiertu industrial, onde a los mozos y moces que nun emigremos estos años últimos fora de Asturies namás correspuéndenos un presente de paru y de sobresplotación llaboral según los casos.

Énte esta situación, acompañada de retayos cada vez más radicales d'ayudes y prestaciones sociales, a los mozos y moces d’Asturies si aspiramos a tener la más mínima opción d'ameyorar les nueses condiciones de vida como colectivu namás mos queda un camín non menos radical: el de la llucha directa, confrontando abiertamente colos responsables gubernamentales y empresariales y xenerando situaciones incontrolables que supongan un coste político y económico pa ellos.

¡Nenguna agresión a Asturies, ensin rempuesta!

Villanueva de la Tercia pide la 'nacionalidá asturiana'


La llocalidá Villanueva de la Tercia, perteneciente alministrativamente al conceyu de Villamanín y a la provincia de Lleón, fartos del maltratu que reciben del ayuntamientu quieren dixebrase de Villamanín y tan dimpuestos a asumir la «nacionalidá» asturiana, pasando a formar parte del Conceyu L.lena: «Si l'Alcalde ta interesáu, que nos convoque y buscaremos xuntos una fórmula", señala Ana Gutiérrez, portavoz de los vecinos, al diariu La Nueva España.

Villanueva de la Tercia ye un pueblu que s'alcuentra ente Villamanín y Payares. La carretera N-630 que crucia el puertu pasa xusto pol mediu de la población y nelli viven dalgo menos de cincuenta families. La Xunta vecinal de Villanueva de la Tercia ta mui molesta pola abandonu que sufren por parte del Ayuntmaientu de Villamanín, gobernáu por Óscar Gutiérrez (PP).

Los vecinos son conscientes que la dixebra ye cuasique dalgo imposible, pero planteguen esta posibilidá convencíos de que ye la meyor solución pal pueblu. Los vecinos d'esta parroquia quieren un cambiu d'aires y tan dimpuestos tanto a incorporase a La Pola de Gordón o a L.lena. "Munchos vecinos residen n'Asturies y taríemos encantaos si nos quieren acoyer", señala Ana Gutiérrez.

Nun ye nueva la situación de que pueblos, parroquies o conceyos del norte de la provincia de Lleón pidan la so incorporación a Asturies dende que se formare l'actual estáu de les autonomíes, habiendo tamién dalgunos casos de zones pertenecientes a Galicia que tamién lo pidieran nel so momentu.

Fonte: Infoasturies

miércoles, 15 de diciembre de 2010

Charra-alderique, 'Asturies y la Constitución Española'


La plataforma ciudadana y soberanista "Democracia p'Asturies" anuncia la cellebración d'una charra-alderique que se va cellebrar esti vienres 17 d'avientu n'Uviéu, a partir de les 18:30 hores nel llocal de la Corriente Sindical d'Izquierda n'Uviéu alredor de la Constitución española "y como afeuta a Asturies esti modelu d' Estáu español y supuesta democracia".

L'actu, que va tar moderáu por Javier Cubero va cuntar con tres ponentes: Nacho González, por parte del Bloque por Asturies, Iván Martínez, militante d'Andecha Astur y Fonsu Suárez militante de la organización Fai!.

Dende "Democracia p'Asturies" conviden a tolos ciudadanos interesaos a acudir a l'actu y "dar la so visión sobre como afeuta la Constitución del Reinu d'España al desendolcamientu del nuesu país, a sentir les opiniones de los representantes d'estes organizaciones polítiques y a dar suxerencies a les mesmes, como tamién a la plataforma democrática".

Fonte> infoasturies.net

martes, 14 de diciembre de 2010

Comunicau de Darréu en solidaridá colos trabayadores de Duro Felguera.


Darréu desixe que se garantice'l futuru de Duro Felguera en Llangréu ensin despidos

Noticia asoleyada en www.darreu.org:

El conceyu de Darréu en Llangréu quier treslladar una vegada más, el so sofitu a los trabayadores de Duro Felguera, que nesta ocasión tan asistiendo a una nueva agresión. Una agresión peligrosa enforma, pues la empresa quier reducir la plantilla de los talleres de Barros nun 60%, o lo que ye lo mesmu, despedir a 90 trabayadores de los 150 que conformen l'actual plantilla.

Dende Darréu queremos espresar el nuesu refugu a esti nuevu plan de la direutiva de la empresa, que nun ye más qu'un nuevu intentu pa pesllar les instalaciones de la empresa en Barros y finar cola actividá de la empresa en Llangréu. Ye murnio que'l conceyu que vio ñacer a la empresa seya'l mesmu de la quier facer colar, pa entamar a dedicase a la especulación. Especular y escaecer dafechu, les décades que los trabayadores enriquecieron a los sos dirixentes. Otra vuelta la especulación quier desmantelar una bona parte del nuesu texíu industrial cola escusa de reducir pérdides, anque son conocios los multimillonarios beneficios que s'embolsen los cabezaleros de la empresa.

Poro, dende Darréu desiximos como mozos y moces, y tamién como llangreanos qu'apare esta situación. Que se vea onde foi a parar la financiación pública que se-y dio a Duro Felguera y qué compromisu quier la empresa col Conceyu de Llangréu. Tamién queremos sorrayar el papel hipócrita del gobiernu llocal del PSOE, el mesmu paez tener escuros intereses, pautaos cola empresa en dellos terrenos del conceyu, propiedaes anguañu de la Duro.

Finalmente llamamos a tola mocedá de Llangréu a que se solidarice colos trabayadores afeutaos pol Espediente de Regulación d'Emplegu y qu'amuese'l so sofitu nes convocatories que se vayan a facer. Ye fundamental la unidá ciudadana pa qu'esta estratexa de DF pa dedicase a la especulación, nun se llegue a executar. El mugor d'esti pueblu engrasó les sos máquines munches décades pa qu'ellos tuvieren esos beneficios astronómicos, y agora quieren pesllar Barros pa dempués pesllar Asturies.

¡FUTURU P'ASTURIES! ¡FUTURU N'ASTURIES!

Declarada la oficialidá de la llingua galesa


Dempués d’años d’alderique


Foi la llexislación más complexa y llarga aprobada fasta agora pola Asamblea Nacional de Gales, pero’l pasáu día 7’l galés, la llingua celta mesma del país, pasó a tener l’status de llingua oficial, per primer vegada na hestoria del autogobiernu en Gales. La llexislación, una de les promeses del actual Gobiernu de coalición del Partíu Llaborista (LP) y del Plaid Cymru (PD), inclúi tamién una serie de midíes pa garantizar l’usu del idioma na vida pública.

De primeres, la llei crea un comisionáu pa la llingua galesa, que va sustituyir a la Welsh Language Board, y que va tener como oxetivu principal fader cumplir midíes que garanticen la proteición de los drechos de los falantes.

Tamién inclúi un sistema p’asegurar que los muerganismos públicos y dellos privaos ufierten servicios en galés. D’ente los privaos, trátase principalmente de compañíes elléitriques, de gas y de telecomunicaciones, ente otros, les que tendrán d’axustar col comisionáu pa la llingua qué usu faen del galés.

Otros muerganismos creaos de nuevu son un tribunal de la llingua galesa, nel que los falantes van poder recurrir cuestiones rellacionaes cola provisión de servicios nel idioma, sigún el Welsh Language Partnership Council, un muérganu consultor que va aconseyar col Gobiernu galés sobre la estratexa a siguir sobro la llingua.

Al pesar de que’l Gobiernu considera l’aprobación de la llei marcó "un día hestóricu" pa la llingua galesa, dellos seutores protestaron pola falta d’ambición de la midida. Cymdeithas, la principal organización pa la llingua, ye’l principal esponente. Declararon que falta un principiu fundamental: la reconocencia de los drechos de los falantes. Argumenten que ye una llei que da poder a los funcionarios, pero non a la xente, y que lo que fai falta ye dar servicios llingüísticos "en llugar d’esperar que los falantes protesten" cada vegada que quieran utilizar la so llingua.

De fechu, ún de los diputaos del Plaid Cymru, Bethan Jenkins, presentó una enmienda a la propuesta de llei nesta llínia, que foi refugada por 32 votos a la escontra y 16 a favor. Jenkins proponía un cambéu qu’establecía drechos concretos pa los falantes, y tamién proponía que la oficialidá de la llingua fuera incondicional, yá que nel testu orixinal hai una llista d’esceiciones que condicionen l’status.

Fonte: Aruelu.

1.132 pueblos a puntu de quedar ensin xente


627 llocalidaes yá tan despoblaes.

Unes 1.132 entidaes de población de 68 conceyos de la Comunidá Autónoma del 'Principado de Asturias', tienen como muncho 5 vecinos y vecines, según consta nel nomenclátor d'Asturies 2006-2009. Yá hai 627 llocalidaes despoblaes anguañu. Los datos confirmen la sangría demográfica de les zones rurales, que, pa enriba, presenten un avieyamientu altu de la población.

Mirando por conceyos con más númberu de pueblos en pelligru de quedar ensin población, Mieres ye'l que tien más, 125 núcleos onde vicen ente 1 y 5 persones,, d'ellos 37 tienen namás un vecín. Amás esti conceyu yá ye'l que tien más pueblos vacíos (122). El segundu conceyu más afectáu ye Villaviciosa, con 85 pueblos en riesgu. Síguilu Samartín con 65 pueblos, Llaviana, con 58 y Llangréu con 54.

Ente los conceyos menos afectaos tán conceyos como Avilés, Caravia, Colunga, Llanes, Navia, Noreña, Onís y Peñamellera, con un pueblu en riesgu de quedar despobláu.

Fonte: Infoasturies.

lunes, 13 de diciembre de 2010

XXVI edición de los Premios Andrés Solar


La Xunta pola Defensa la Llingua Asturiana ta acabante de dar anuncia de los ganadores de los Premios Andrés Solar na so XXVI edición. Nesta ocasión el Pegollu foi pal trabayu del equipu del programa Camín de Cantares. El Madreñazu foi pa Herminio Sastre, Conseyeru d’Educación y Ciencia.

La entrega de los Premios va facese’l día 18 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de dellos músicos de la escena folk asturiana, que van facer reellaboraciones de temes tradicionales asturianos.

Andrés Manuel Solar Santurio (1955-1984) foi un escritor en Llingua Asturiana consideráu ún de los meyores del Surdimientu pesie a la so pronta muerte a los 29 años. Militante d'izquierda nacionalista, nel Ensame Nacionalista Astur (ENA), tamién participó na defensa de la llingua na Xunta pola Defensa de la Llingua Asturiana.

Los Premios Andrés Solar algamen nesti 2010 la so XXVI edición y como nos sos 26 años de vida, los premios tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa o promoción del asturianu. Esti reconocimientu materialízase n’El Pegollu, que nesta ocasión quier reconocer el trabayu de tol equipu que fai posible’l programa Camín de Cantares y en concretu, al responsable de la idea, Ramón Lluis Bande y al conductor del mesmu, Xosé Antón Fernández, Ambás. La Xunta quier reconocer l’usu que fai de la llingua asturiana esti programa, nun exemplu de normalidá y puesta en valor de les nuestres señes d’identidá. La recuperación de les tradiciones, sobre manera nel ámbitu musical, y too ello cola conducción del propiu programa col asturianu como llingua vehicular, son dalgunes de les razones poles que se dan esti premiu. Pol so apueste decidíu a lo llargo de 6 temporaes, ensin complexos, y pol so exemplu de que l’asturianu nun ye un llastre, sinón daqué que xuega al nuestru favor, la Xunta pola Defensa de la Llingua Asturiana decidió concede-yos esti 2010 el El Pegollu de los Premios Andrés Solar.

Los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”, que na edición de 2010 va pal Conseyeru d’Educación y Ciencia del Principáu d’Asturies, Herminio Sastre. Como responsable máximu na Conseyería d’Educación y Ciencia, la Xunta topa delles razones poles que castigalu con esti premiu. Tres la resolución recién del Tribunal Superior de Xusticia d’Asturies, qu’afita que los ratios mínimos d’ocho alumnos nun son conformes a derechu y manda al Gobiernu asturianu que cumpla la llei y garantice la enseñanza del asturianu, el nuevu conseyeru de Educación preséntase en comparecencia pública calificando l’aplicación de la llei como “despilfarru”, despreciando’l derechu reconocíu de los estudiantes asturianos a poder estudiar asturianu y anunciando recursu contra la sentencia, colo que la Xunta pola Defensa de la Llingua Asturiana considera qu’Herminio Sastre ye bon merecedor del antipremiu.

La entrega de los Premios va facese’l día 18 d’avientu a les 19:30 hores nel Salón d’Actos del Antiguu Institutu de Xixón. Tamién, como tolos años, depués de l’actu va haber una espicha. Esti añu va ser nel chigre xixonés Canteli, y la entrada val 20 euros. Pa dir, hai qu’acutar sitiu, y pa ello pue llamase al teléfonu 985229553 o mandar un corréu a info@exunta.

Fonte: Infoasturies.

sábado, 11 de diciembre de 2010

La UNESCO reafirma que l’asturianu ta en peligru de morrer


L’asturianu sigui en peligru de desaparición. Asina lo afirmó la Organización de les Naciones Xuníes pa la Educación, la Ciencia y la Cultura (UNESCO) nel Atles de les Llingües del Mundu en Peligru.

Según l’Atles de la UNESCO, la llingua asturiana asítiase nel nivel 2 de peligru -“definitivamente en peligru”- que ye cuando los menores nun deprenden l’idioma como llingua materna. L’aragonés tamién taría nesti nivel según la UNESCO.

Otres llingües peninsulares como’l vascu alcuéntrense nel nivel 1 de peligu: los neños falen l’idioma, que pue tar restrinxíu a ámbitos del llar; mientres que’l catalán o’l gallegu yá nun s’alcuentren nesti Atles de les Llingües del Mundu en Peligru gracies a les polítiques de normalización llingüística y l’aumentu de falantes.

Pa la UNESCO existen amás otros trés niveles de peligru nos que la llingua asturiana pue cayer: “gravemente en peligru”, cuando falen los güelos, los pás entienden y los neños nun lo faen; “críticamente en peligru”, güelos y mayores son los falantes más mozos; y “estinta”, cuando nun tien falantes dende 1950.

Nos últimos setenta años más de 220 llingües desapaecieron del mundu y, según les indicaciones d’esti Atles, l’asturianu pue ser una más d’elles.

FONTE: ASTURIES.COM

jueves, 9 de diciembre de 2010

Cena Solidaria


El Muerganu Antirrepresivu Popular Sofitu convoca pal Sabadu 11 d'Avientu una cena solidaria pa siguir faciendo frente al pagu de multes, gastos xudiciales y campañes que nel añu qu'acaba foron pergrandes. Ente otres coses desarrollamos campañes en defensa del mozu acusáu de "ciberterrorismu", l'acusada d'agredir a Areces o la detenida nun actu d'UPyD. Amás tuvimos xuicios escontra un miembru de la policia española d'idoloxía neonazi que acosa a mozos uvieínos o ficimos frente al pagu de multes, dellos miles d'euros, a persones a lo llargu l'añu.

Por ello, y pa nun aparar de facelo, entamamos estos actos politico-festivos que cola edición de material mos aíden a facer frente a la represión institucional.

El menú pa la cena del sabadu 11 d'Avientu ye de: Ensalaes variaes, tapes (chorizu a la sidra, matachana...), tortos de picadiellu, postres caseros y sidra.

Como ye vezu el llugar escoyíu ye'l Centru Social Sestaferia, cerca de la estación de cercanies de Xixón, y la hora escoyía ye les 20 hores.

Planta-y cara'l facismu!!!
Puxa la llucha y los que lluchen!!!
Sofitu.

lunes, 6 de diciembre de 2010

El procesu de Burgos.

Hestoria de como'l poder popular pue aparar la maquinaria facista del Estáu, y como inda güei nun hai munches diferencies coles situaciones represives d'antañu.





Bolivia rebaxa ochos años la xubilación y nacionaliza les pensiones


L'Asamblea de Bolivia aprobó la reforma de les pensiones qu'amplía los beneficios y nacionaliza l'alministración del sistema, que taba en manes de dos fondos privaos pertenecientes al bancu BBVA y a la empresa suiza Zúrich.

La nueva llei, ún de los puntos claves del Gobiernu del presidente Evo Morales, aprobóla'l Senáu tres la so ratificación la selmana pasada na Cámara de Diputaos.

"L'aprobación ye histórica y va cambiar la realidá de tola xeneración de xubilaos que taba esperando esta llei qu'inclúi a otros sectores", dixo tres la votación el presidente del Senáu, René Martínez, según un comunicáu.

La llei, productu de cuatro año de negociaciones nes que tuvieron escluyíos los empresarios, rebaxa la edá de xubilación de 65 a 58 años, rebaxando dicha llenda ente los mineros y les madres, y amplía'l beneficiu a trabayadores autónomos, como los llabradores.

El Gobiernu y los sindicatos yá acordaaron dicha reforma, polo que los trámites parlamentarios malpenes llevaron trés selmanes. Morales envió'l proyectu'l 16 de payares, prometiendo que sería un regalu de Navidá pa los trabayadores.

"Esta ye la nueva política de redistribución (...), pa la busca de reducir la probeza y pa la igualdá de los trabayadores", declaró Morales pa xustificar la reforma.

Fonte: Asturies.com

Que falen los xirones, que glayen les muries


N’avientu convocatoría autónoma d’aición colectiva-individual



Ante lo que ta pasando y el silenciu complice que los medios de comunicación fain de les reivindicaciones nacionales yá sociales, "ye hora de faenos visibles en tolos requexos d’Asturies".

Durante tool mes d’avientu entamase una campaña intensiva pa faer visible el conflictu nacional yá social que vivimos anguañu. Que falen los xirones, que glayen les muries, qu’esconsonen les conciencies. Na campaña inviten a toes y toos a participar cola so "creatividá caleyera".

Fonte: Aruelu.com

jueves, 2 de diciembre de 2010

Nueva rempuesta na cai a los recortes sociales


Una vegada más, cientos de persones salieron a la cai ayeri en Xixón, ente un fuerte despliegue policial, pa denunciar los recortes sociales que cola esculpia de la crisis se tán llevando alantre dende'l gobiernu español y les sos consecuencies n'Asturies.

Convocaes polos sindicatos CSI, CGT, SUATEA y SF unes dos mil persones percorrieron les cais de Xixón nuna manifestación que taba sofitada por numberoses organizaciones como PCA, PCPE, UNA, Andecha Astur, Bloque por Asturies, Darréu, Fai! o CMC.

Ente los participantes atopábense una delegación de los bomberos d'Asturies y delles seiciones de los sindicatos convocantes.

Como datu, apuntar qu'UNA y BA escenificaron el so procesu de converxencia participando nel actu con una pancarta firmada conxuntamente.

Demientres el recorríu, el hip hop de K-Nalón y Arma X animó abondo nuna nueche fría como la d'ayeri. Nel Náutico finó l'actu cola llectura de dellos comunicaos.

Reproducimos darréu, la intervención de la Corriente Sindical d'Izquierda.

Vamos aperta-yos les tuerques

Esti iviernu llegó antes de tiempu porque fai meses que mos abelluguemos de les tormentes de los mercaos y vemos cayer reformes como chuzos.Tamién sentimos el fríu de les estadístiques del paru que quieren reducimos a una cifra, un porcentaxe que sirva como arma electoral. Por eso, agora, toca falar de lo que yá nun cabe en nengún panfletu.

Dicen que nun se pue cambiar el mundu, pero ellos tán faciéndolo. Ye más, n’Asturies diéron-y la vuelta y ta cayéndomos enriba:

1.Les persones mayores caven nes zanxes mientres les moces paraes miramos dende la valla.
2.Yá nun semamos la tierra sinón qu’enllenamos la compra con grasa saturao de publicidá.
3.Los banqueros salen a la cai p’atracamos a punta de móvil. Amás, pagamos porque mos despida la patronal mientres les empreses sindicales ritualicen la nuestra derrota.
4.Los paquetes de rescate fúndenmos na miseria porque los que ganen daveres nun trabayen.
5.Les escueles son como arsenales, porque nun fabriquen otro que carne de cañón
6.Voten los especuladores mientres mos detienen por nun mos manifestar col burca constitucional
7.La nuestra sociedá salta en cachos por culpa del terrorismu de mercáu, pero criminalien a los menores por salir de la televisión y atrevese a ser de carne y güesu.
8.Les inmigrantes cumplen condena anque los lladrones viaxen en limusina y non en patera.
9.Los únicos paraísos que queden son los fiscales... y el bancu del parque ye’l bancu tuyu y cada vez el de más xente.

Los retos son grandes, pero paecen mayores porque tamos de rodiyes. La tristura nun ye solo la política de los que dominen. Ye tamién la condición pa que les sos polítiques sían dominantes.

10.Por eso nun tamos tristes. Nun mos importa llegar a tener achaques, pero nun queremos arrugues na conciencia nin piedres en corazón.
11.Queremos abandonar tanto la política triste como’l victimismu que mos fai soportable lo que yá nun aguantamos más. 12.Namás asina vamos dexar de ser, antes de cada partida, les derrotaes.

Sabemos cómo salir de la so crisis y nun olvidamos cómo entremos.

13.Nun queremos salir del paru pa volver a la precariedá.
14.Nun tenemos por qué rescatar fondos d’inversión a costa de les pensiones públiques.
15.Si funde’l barcu, nun vamos trancar astilleros pa salvar a los que viaxen en primer clas.
16.Vamos acompañar a les muyeres que lluchen porque nun queremos olvidar lluches como les d’IKE pa instalamos n’IKEA.
17.Nun queremos abellugamos na nuestra vida privada, porque ye del bancu y, amás, ye una vida privada de vida. 18.En definitiva, nun vamos competir na Fórmula 1 del neolliberalismu igual que vosotres nun quixistis estrozar el cielu con un Sima 1000.

Agora tócamos recordar quién fuimos y quién queremos ser.

19.Los que manden sacaron la tixera.
20.La esquierda que nun ye nada ensin derecha, perdió los papeles.
21.Entós, tendremos que sacar piedra pa nun aguantar otra vuelta de tuerca.

Fonte:Infoasturies.

sábado, 27 de noviembre de 2010

Medios de comunicación, llingua y subvención: Prensa escrito


Esti artículu llega, quiciás, un pocu tarde, yá que les subvenciones salieron en xunetu, pero hasta agora nun lleera'l documentu del BOPA.
Voi pasar darréu a analizar la Resolución de 22 de julio de 2010, de la Consejería de Cultura y Turismo, por la que se conceden y deniegan subvenciones para la Línea 7: A las actividades de medios de comunicación para la normalización social del asturiano o gallego-asturiano.


Nesta primer parte del artículu que voi dir espublizando nel blogue voi centrame nes subvenciones a la prensa escrito ordenaes de mayor a menos cuantía:



* Selmanariu “Les Noticies”, tol añu
46.674,80 €


* Páxines nel suplementu “La Nueva Quintana” (LNE)
26.381,40 €


* Páxines nel suplementu “Cultura” (LNE)
21.308,10 €


* Suplementu “Alitar Asturies” (El Comercio)
18.264,10 €


* Publicación en El Comercio de un “Cursu d’asturianu”
17.249,40 €


* Suplementu mensual “Lletres” en La Voz de Asturias
17.249,40 €


* Publicación d'un cursu básicu d'asturianu y edición de páxines informatives sobre concursos (La Voz de Asturias)
14.205,40 €


* Páxines n'asturianu nel periódicu “El Fielato”
12.176,00 €


* Páxines nel suplementu “La Oreja Verde” (LNE)
11.161,40 €


* Páxines nel diariu del Festival Internacional de Cine de Xixón
10.146,70 €


* Artículos d'opinión en distintes seiciones de La Nueva España
8.117,40 €


* Páxines informatives n'asturianu en Asturias Exterior
7.102,70 €


* Programa escolar (El Comercio)
6.088,00 €


* Páxines n'asturianu nel periódicu “El Nora”
5.073,30 €


* Páxines n'asturianu en Qué! Asturias
4.058,70 €


* Páxines n'asturianu en “La Voz de Lena”
4.058,70 €


* Suplementu mensual “Asturies, ayer y güei” nel periódicu Oviedo Diario
4.058,70 €


* Páxines n'asturianu nos periódicos “La Cuenca del Nalón” y “Montaña Central”
3.044,00 €


* Artículos d'opinión n'asturianu a media páxina (La Voz de Asturias)
3.044,00 €


* Páxines n'asturianu en “El Faro de Carreño y Gozón”
3.044,00 €


* Páxines n'asturianu en “Atlántica XXII . Revista asturiana de información y pensamiento”
2.029,30 €


* Publicación de trés especiales informativos nel diariu Qué! Asturias
2.029,30 €


* Publicación d'un especial sobre novedaes editoriales en llingua asturiana (Qué!)
2.029,30 €


* “Al llau del llar (páxines asturianistes)” en los periódicos Ciudadlineal y Comarcacaudal
2.029,30 €


TOTAL: 250.623,4 €



Tres estos datos, qu'a min abultenme ablucantes, podemos sacar delles conclusiones:


* Subvencionase too, o cuasi too, lo que proponen los grandes medios editoriales. Comparando cola tirada añal y fixa de Les Noticies, les cantidaes que reciben LNE, EC y LVA son descomanaes dafechu.



* Subvencionase la opinión, pol simple fechu de publicala n'asturianu. Ye dicir, que si nun se paga a los medios pola so publicación eses opiniones taríen torgaes, lo que pue xenerar que l'articulista cuide bien lo que va escribir porque-y pueden zarrar el grifu pal añu siguiente.



* Da igual la tirada de los medios, yá qu'espacios a onde lleguen perfeutamente los conteníos n'asturianu con mayor tirada tamién tienen una subvención propia, como Carreño, Gozón, La Cuenca... Y ello nun implica nin mayor calidá nin variedá nos temes.



* Los temática que recibe subvención ye principalmente artículos d'opinión y temes culturales (subvención de publicidá pa lliteratos incluyida) o "asturianistes", nuna clara estratexa de merca de voluntaes d'esti mundin.



* Hasta medios "alternativos", como Atlántica XXI, piden subvención poles sos páxines n'asturianu. Nun esiste voluntá, nin por parte de xente comprometío, pa publicar n'asturianu como dalgo normal ensin pidir perres por ello.



P'acabar, podemos dexar afitao que'l repartu que se ta faciendo agora mesmu de les perres pa la prensa escrito ye inxustu dafechu y nun garantiza la normalización social, sinón, en munchos casos, enllenar el bolsu de xente que ta a la escontra de dicha normalización, o'l de los propios implicaos nesti procesu, lo que lleva a aselar el discursu y poner les coses más fáciles pal desenrollu de la inesistente política llingüística y pal consiguiente llaváu de cara del Gobiernu del Principáu.



Doscientos cincuenta mil euros dan pa muncho pero, cola actual coxuntura pa la prensa escrito, nun tamos pa tirar el dineru. El claru descensu en calidá y oxetividá de Les Noticies ye una amuesa de qu'hai qu'apostar por una rexeneración d'esti mediu. Nun pue ser qu'un selmanariu, esencialmente lliterariu y con milenta suplementos lliterarios más, siga morriendo adulces y dea les sos boquiaes con nun se sabe qué oxetivos.



Nunos tiempos onde'l formatu papel va morriendo y van quedando cada vuelta menos medios, paezme que ye hora de gastar les perres nesti tema con xacíu y, si hai que subvencionar prensa escrito, enfotase na fechura d'un diariu de gran tirada, abiertu, plural y modernu. Un diariu que compita de llunes a domingu coles portaes de los trés grandes periódicos aculturizantes del país y que dea les noticies n'asturianu y dende una perspeutiva asturiana, arreyáu amás a una difusión seria nes teunoloxíes nueves y n'Internet. Nesti sen, lleva falándose tiempu d'una iniciativa privada que diría pel camín, supuestamente allugada nel centru políticu (ta por ver), pero que podría ser dalgo interesante y a tener en cuenta. Viendo'l panorama... dellos, naguamos por ello.


Vitor Suarez

L'Asturianu, seña d'identidá d'un Pueblu


L’Asturianu como llingua propia d’Asturies merez un tratamientu que sea equiparable al que reciben otres llingues propies n’otres comunidaes autónomes…por exemplu, el catalán en Catalunya. L’asturianu ye patrimoniu inmaterial que fai falta caltener y tresmitir a les xeneraciones vinientes y nesti aspeutu l’oficialidá faise un pasu necesariu na so superviviencia como llingua.

El marcu llegal nel que s’atopa l’Asturianu ye probe y insuficiente, hai muncha xente a la que se-yos niega la tramitación de documentos n’Asturianu. Esti depende, en gran midía, de la voluntá que tenga l'encargáu d’recoyer y tramitar esa documentación yá que puede nun aceptala poniendo como pretestu qu’al nun ser l’Asturianu llingua oficial desiste el continuar col cursu normal dicha tramitación, a nun ser que s’apurra una copia de dichu documentu en castellanu.


Asina en munchos casos nun se reconoz y poro nun existe'l derechu al usu del Asturianu nes rellaciones cola alministración. Un derechu que ta reconocíu na Llei 1/1998 de 23 de Marzu D’Usu y Promocion del Asturianu.



Demando al igual que munchos falantes d’asturianu que l’Estatutu d’Autonomia recueya’l calter oficial del asturianu.


Xosé González González.


viernes, 26 de noviembre de 2010

¿Vas aguantar otra vuelta de tuerca?


Los sindicatos CSI, CGT, SUATEA y SF convoquen una manifestación en Xixón el 1 d'avientu contra'l plan d'axuste del gobiernu español.

Col llema ¿Vas aguantar otra vuelta tuerca? dellos sindicatos convoquen una nueva movilización escontra los recortes sociales de Zapater. Asturies avanza hacia les 100.000 persones paraes y "ye'l momentu de recuperar les llaves del nuesu futuru". EL 1 d'avientu na manifestación, con salida na Plaza l'Humedal de Xixón a les 19:30 hores, va vindicase, ente otres cuestiones, un emplegu estable y dignu, renta básica universal, repartu del emplegu o la prohibición de faer hores.

MANIFIESTU DE LA CONVOCATORIA

Asturies avanza hacia los 100.000 paraos y paraes, mientres que l’Estáu español acércase a los 5 millones. El 40 % de la mocedá y, polo menos, el 30 % de les muyeres ta nel paru. Cola reforma llaboral y los recortes sociales, el gobiernu abarata y facilita’l despidu, baxa los sueldos, favorez l’emplegu temporal y precariu, empeora les condiciones llaborales y dexa nel paru a los y les trabayadores.

El 72 % de los y les pensionistes cobren menos de 1.000 €. El 58,5 % (más de la metá) cobren menos de 600 €. Quieren aumentar a venti’l númberu d’años de cotización pal cálculu de les pensiones (fálase, incluso, de tola vida llaboral). Quieren aumentar, tamién, el númberu d’años de cotización p’algamar la pensión contributiva (actualmente 15 años). Aumenta a cuarenta’l númberu d’años p’algamar el 100 % de la pensión (actualmente 35 años). Xuben la edá de xubilación a los 67 años.

Con too ello, la cuantía de les pensiones reduzse un 5 % de media. El gobiernu plantega recortes sociales pa faer “un plan d’aforru énte la crisis”, pero regaló 150.000 millones d’euros a los bancos (los causantes verdaderos de la crisis). Énte esto, ye menester crear una banca pública qu’actúe como dinamizadora de la economía productiva y que ponga frenu a la fartonería de la banca privada, crear un impuestu nuevu sobre los beneficios bancarios, eliminar les SICAVS (ún de los abellugos de les grandes fortunes que, por una bula del gobiernu, coticen al 1 % en vez d’al 35 %) y gravar toa operación financiera con destín a un paraísu fiscal o que nun tenga una fin productiva.

El gobiernu sigue ensin poner frenu a un fraude fiscal que supón una estafa superior al 30 % de lo recaudao por Facienda. Ye menester un plan de llucha escontra esti fraude fiscal y que pague más el que más tien. Por eso ye menester implantar un impuestu nuevu sobre los beneficios de les grandes empreses y multinacionales obligándoles a reinvertir el 50 % de los beneficios nel sitiu onde s’asienten les plantes.

Ye imprescindible la creación d’un fondu de reserves financieres, a cargu de les organizaciones empresariales, pa financiar les empreses en crisis o en quiebra. Cuando consiguieron beneficios multimillonarios lleváronlos a paraísos fiscales; agora diben sirvir pa reflotar empreses. Tamién ye necesario llanzar un plan pa “sacar a flote” la economía somorguiada, que supón una bolsa de fraude (dineru negro) de más de 65.000 millones d’euros. Queremos que se pongan en práutica una serie de midíes que redistribuyan la riqueza y garanticen un nivel de vida dignu pa toes y toos:

- Emplegu estable y salariu dignu pa toes y toos.

- Renta básica universal. Drechos básicos (alimentos, salú, vivienda y educación) garantizaos pol Estáu. Paralización de los procesos d’embargu y desahuciu a los y les trabayadores en situación de precariedá o desemplegu.

- Repartu del emplegu: reducción de la xornada llaboral ensin perda de salariu.

- Prohibición de faer hores. Trabayar toes y toos pa trabayar menos.

Fonte: Infoasturies.

jueves, 18 de noviembre de 2010


La iniciativa soberanista y ciudadana "Democracia p’Asturies/Democracy for Asturies" convóca un conceyu abiertu el llunes 22 de payares, qu’entamará a les 19:30 hores nel llocal de la Corriente Sindical d’Izquierda n’Uviéu, na Avd. Hermanos Menéndez Pidal, 14 baxu.

Dende Democracia p’Asturies sorrayen que, "cualesquier militante de les estremaes organizaciones asturianes o independientes ta convidáu a amestase a esti conceyu".

Nel conceyu van falase dellos temes; como la valoración que se da a la plataforma a día de güei, el desenrollu de nueves iniciatives baxo la iniciativa Democracia p’Asturies, "ya un tema perimportante que podría plantegase sedría encarar dende’l soberanismu d’izquierda’l Día de la Constitución Española, prósimu 6 d’avientu."

Un de los obxetivos de Democracia p’Asturies ye "que xente d’estremaes organizaciones ya otres persones non militantes anguañu s’axunten nesti conceyu pa intercambiar posiciones y puntos d’agüeye pa facer de "Democracia p’Asturies" un referente xunitariu y ciudadanu de la defensa de los drechos nacionales y sociales."

Fonte: Aruelu.com

Darréu va participar nel Festival Internacional de Cine de Xixón


Alderique «Europa, un espacio para la juventud», tres la proyeición de L'aprenti

La mocedá independentista va tar presente nel alderique "Europa, un espacio para la juventud", Darréu va participar el prósimu miércoles 24 de Payares nel Festival Internacional de Cine de Xixón, nel marcu del ciclu monotemáticu d’esti añu ¿Europa? ¿Qué Europa?. Nel alderique van participar voceros del Conseyu de la Mocedá de Xixón, del Conseyu Nacional de la Mocedá de Portugal y Darréu.

L’actu entama a les 19:45 y tendrá llugar na Sala 2 de los cines centro de Xixón baxo’l títulu: «Europa, un espacio para la juventud». Entama pola proyeición de la película L’aprenti pa siguir darréu con un alderique onde, xunta'l presidente del Conseyu de la Mocedá de Xixón y un miembru del Conseyu Nacional de la Mocedá de Portugal, la izquierda independentista asturiana aldericará y plantegará la so visión del procesu de construcción del marcu económicu-políticu de la Xunión Europea d’anguañu, les perspectives pa la mocedá y el papel d’esta en tou esti procesu.
Fonte: Infoasturies.

Asturies antifacista 2010.

lunes, 15 de noviembre de 2010

Fai! asoleya 2000 pegatines en defensa de la ruralidá d'Asturies


"Dende Fai! axuntamonos a la defensa de la ruralidá asturiana como elementu tanto tradicional como ecolóxicu como necesariu pal autodesendolcu del País y l'equilibramientu d'una economía popular y asturiana.

Comprendemos tamién que ye importante entamar dando-y d'una vez puxu al movimientu ruralista asturianu, escaecíu tanto polos partíos políticos como pol propiu movimientu d'esquierda asturiana y desorganizáu dafechu pola falsa conceición de que les zones rurales yá nun tienen nin tendrán futuru n'esti mundu globalizáu y capitalista nel que nos tocó vivir.

Por eso ye tiempu de dicir non al escaezu del seutor primariu asturianu, non a la cerrazón tradicional de la esquierda alredor de l'industrialismu y non a la destrucción d'estes zones pa usu y disfrute d'empreses destructores de la natura".

Fonte: www.fai-asturies.org

jueves, 11 de noviembre de 2010

La Xunta prepara una clas na cai pa protestar pol incumplimientu de la sentencia sobre l'enseñu del asturianu


Tres la reciente resolución del Tribunal Superior de Xusticia d’Asturies, qu’afita que los ratios mínimos d’ocho alumnos nun son conformes a derechu y manda al Gobiernu Asturianu a cumplir la llei y garantizar la enseñanza del asturianu, el nuevu Conseyeru d'Educación presentóse en comparecencia pública calificando l'aplicación de la llei como “despilfarru”, lo que la Xunta pola Defensa de la Llingua Asturiana califica como "ningunéu del drechu reconocíu de los estudiantes asturianos a poder estudiar asturianu".

La XPDLA anuncia, poro, recursu contra la sentencia y l'entamu d'una nueva campaña de movilizaciones pa desixir el cumplimientu de la llei de manera inmediata. La primer d’estes movilizaciones va ser una concentración y clas na cai que va facese a les 13 hores del próximu sábadu 13 de payares, na plaza la Escandalera d’Uviéu.

Fonte: Asturnews.

lunes, 8 de noviembre de 2010

Marruecos arrasa'l campamentu sah.arianu d'El Aaiún


El campamentu de resistencia sah.arianu llevantáu pel entornu d'El Aaiún alcuéntrase "totalmente destruyíu" y nestos momentos "la guerra sigue na ciudá", según declaró a Europa Press la cooperante española Raquel del Castillo.

"Llegaron dellos muertos al hospital, procedentes tanto del campamentu como de la ciudá", declaró en conversación telefónica dende'l llugar de los fechos. "Toles h.aimes tán quemaes, el campamentu ta destruyíu dafechu", prosiguió Del Castillo, dirixente de la organización non gubernamental Thawra.

"La guerra nestos momentos sigue na ciudá", esplicó Del Castillo. Sintiéronse "disparos" nes principales aveníes d'El Aaiún y "la xente deféndese colo que pue", prosiguió. "Arrampuñaron un camión antidisturbios de los marroquinos y deféndense con él", añadió.

El Polisariu denuncia la tortura d'un activista

Pela so parte, al copresidente del Comité pal Respetu de les Llibertaes y los Derechos Humanos nel Sáhara Occidental (Corelso), Ennema Asfari, detuviéronlu y torturáronlu "brutalmente" les autoridaes marroquines mientres la nueche del domingu al llunes, según denunció'l Ministeriu de los Territorios Ocupaos de l'autoproclamada República Árabe Saharagüi Democrática (RASD).

Nun comunicáu, el Ministeriu indica qu'a Asfari detuviéronlu sobre les 20.00 hores (21.00 hores n’Asturies), n'El Aaiún, capital del Sáh.ara Occidental, por efectivos de la policía secreta marroquina (GUS) y otros individuos que lu torturaron "hasta que perdió la conocencia".

Nel mesmu comunicáu, el Polisariu informa que se llevantaron barricaes na avenida de Smara de la capital sah.ariana cola quema de neumáticos, palos, y tolo que s'alcuentra al pasu pa protestar pola intervención de les fuerces marroquines contra'l campamentu de protesta llevantáu nel entornu de la ciudá.

Concentración d’apoyu n’Uviéu

En respuesta a estos fechos y en solidaridá col pueblu sah.arianu, l’Asociación d’Amigos del Pueblu Sah.arianu convocó pa esti llunes 8 a les 20.00 una concentración delantre del Teatru Campoamor.

Fuerces asturianes como’l Bloque por Asturies yá anunciaron que van participar nesti actu. En nota de prensa, los nacionalistes recordaron que “España ye la mayor responsable de tol drama que ta viviendo la población sah.ariana nos territorios ocupaos y nos campamentos de refuxiaos en Tinduf”, y criticaron que se “combaye con Marruecos poniendo delantre de los derechos humanos y el derechu internacional los intereses económicos”.

Fonte: Asturies.com

viernes, 5 de noviembre de 2010

AI esixe más formación en derechos humanos a les fuerces de seguridá


Amnistía Internacional presentó un informe nel qu’analiza la formación en derechos humanos de les fuerces de seguridá del Estáu. Los resultaos son “preocupantes” pa la organización pro-derechos humanos.

“La formación que reciben los axentes de Policía Nacional y los miembros de la Guardia Civil, especialmente mientres el so ingresu al cuerpu, ye claramente insuficiente, con una carga lectiva residual que prácticamente invisibiliza los derechos humanos, cuando estos tienen d'enseñase como parte del papel y les funciones de les fuerces de seguridá, non como daqué suplementariu y opcional. Tienen de formar parte de tola formación inicial de los nuevos axentes, pero tamién de la formación que reciben a lo llargo de la so vida profesional”, asegura Esteban Beltrán, director d'Amnistía Internacional n'España.

Los aspirantes a Policía Nacional y Guardia Civil, y los mesmos profesionales, nun reciben una visión xeneral nin una actualización sobre la situación de los derechos humanos n'España, nin se-yos apurre información sobre los encamientos d'obligatoriu cumplimientu al Estáu español per parte d'organismos internacionales –como'l Comité contra la Tortura o'l Comité pa la Eliminación de la Discriminación contra la Muyer-, y que podríen contribuyir tamién a asitiar el contestu de derechos humanos nel que les fuerces de seguridá van tener qu'actuar.

Nun esiste nengún procedimientu que dexe detectar a alumnos o alumnes con valores o actitúes contraries a los derechos humanos y que deberíen imposibilitarles pa llevar a cabu'l so llabor.

La formación que reciben nun fai referencia a la situación actual de los derechos humanos, nin al contestu d'acoyida d'inmigración, nin al aumentu de la diversidá cultural na sociedá española nin al problema de discriminación que dende va décades sufren les persones d'etnia xitana.

Too ello, amás, produzse mientres Amnistía Internacional sigui recibiendo denuncies y documentando añu tres d'añu violaciones de derechos humanos per parte de dellos miembros de los cuerpos y fuerces de seguridá.

Falta de voluntá política
El Ministeriu del Interior, responsable n'última instancia de la formación que reciben los axentes de los cuerpos y fuerces de seguridá del estáu, amuesa una falta de voluntá política p'asitiar el respetu y la defensa de los derechos humanos como núcleu de la formación que reciben los que s'encarguen de caltener l'orde y aplicar la llei.

Esto produzse a pesar de lo qu'establecen los principios básicos d'actuación de la Llei Orgánica 2/1986 de Fuerces y Cuerpos de Seguridá que se refieren en repitíes ocasiones a los derechos y llibertaes reconocíos na Constitución Española, que traen implícitamente la necesidá de garantizar una bona formación en materia de derechos humanos a el que integren los Cuerpos y Fuerces de Seguridá del Estáu, y lo que marca'l Plan Nacional de Derechos Humanos aprobáu pol Gobiernu en 2008.

Amnistía Internacional aconceyóse con interlocutores del Ministeriu del Interior y llamenta la indiferencia cola que reaccionaron a les conclusiones y encamientos que la organización presenta nesti informe. Nun fixeron comentarios y tampoco atendieron explícitamente nenguna de los sos recomendaciones.

La organización quier impulsar un alderique primeru y la toma de decisiones dempués sobre la necesidá d’aumentar de forma significativa, en cantidá y en calidá, la formación en derechos humanos que reciben les fuerces de seguridá n'España, y con ello facer más fácil y efectiva la so xera cotidiana, vital pa la defensa del Estáu de derechu y los derechos humanos.

Fonte: Asturies.com

L’asturianu algama representación nel claustru de la Universidá


El xueves 4 de payares la Universidá d’Uviéu vivió les elecciones al Claustru, máximu órganu de representación de la Universidá. Con un 88% d’abstención, hubo bonos resultaos pa candidatures comprometíes cola llingua asturiana.

Les urnes electorales tuvieron abiertes en tolos centros de la Universidá d’Uviéu por mor de les elecciones al Claustru, l’órganu universitariu de decisión más importante. Nél ta presente’l rector, Vicente Gotor, y un total de trescientos miembros escoyíos por tola comunidá universitariu.

22.050 yera’l númberu total d’estudiantes que podíen votar pa escoyer a 72 representantes d’estudiantes nel claustru; sicasí, namás que fueron a les urnes 2.426 alumnos, lo que da como resultáu un 88% d’abstención ente los estudiantes.

L’escrutiniu da la victoria electoral a la Unión De Estudiantes (UDE), con 37 representantes. “Centrase n’aquello qu’interesa al cuerpu estudiantil, como l’aplicación efectiva de Boloña”, ye ún de los oxetivos d’UDE, según indicaron miembros d’esti colectivu en nota de prensa.

La llingua asturiana nes llistes
Ente’l total de candidatures, destaquen pol compromisu de da-y puxu a la llingua y cultura asturiana na universidá la de la Xunta d’Estudiantes Pol Asturianu (XEPA) y les impulsaes pol Movimientu Estudiantil Críticu y Asambleariu (MECA).

La candidatura de XEPA, encabezada por Llorián García y que se presentó namás qu’a la Facultá de Filoloxía y Lletres, nun foi a algamar representación. Sicasí, les impulsaes por MECA ficiéronse con un total de 16 claustrales, lo que convierte a esi movimientu estudiantil na segunda fuerza de la Universidá d’Uviéu.

“Ente otres reivindicaciones taba’l da-y un pesu importante al asturianu na Universidá, fomentar la cultura asturiana y l’usu normal de la llingua dientro de les instituciones de la Universidá”, señala a ASTURIES.COM Sergio Naves, ún de los miembros de MECA escoyíu como representante na Facultá de Derechu.

Contra los númberos claustros
Otres de les reivindicaciones de les estremaes candidatures impulsaes por MECA ye la “oposición frontal” al Plan de Boloña y el rechazu a los númberos claustros, daqué que quieren implantar en delles facultaes y que torga l’accesu llibre a dalgunos estudios universitarios.

“Agora mesmu, por falta de recursos económicos de l’alministración, ponen esa excusa pa dexar d’invertir perres en profesoráu y intentar torgar l’accesu a nuevos estudiantes a la universidá”, denuncia Naves sobre los númberos claustros.

Movilización estudiantilD'otra miente, el miembru de MECA fai balance de los resultaos:“El PSOE al traviés de la so candidatura, la UDE, subió’l porcentaxe del númberu de claustrales, ente otres coses, por mor de la fraccionalidá qu’existe anguaño ente la xente afín al PP”.

Del movimientu del qu'él forma parte sorraya que “convirtióse na primera fuerza en movilización”, daqué que calificó de "positivo" pa esta fuerza asturiana que tien como oxetivu cimeru la movilización estudiantil.

www.asturies.com

miércoles, 3 de noviembre de 2010

Borreguismu nun ye republicanismu.

Homenaxe al osu que mató a Favila, entamáu por tol entramáu de FAMYR, los mesmos que reclamen tamién con banderes de la II República española la Revolución Asturiana de 1934.





Como vemos, estes imaxenes recuerden a les de Gil Robles en Cuadonga mesmamente. Españolistes, cola mesma bandera que defendió'l mesmu y enllenando de banderes estatales la zona rural asturiana pa homenaxear a un supuestu osu que mató al Rei Favila. Ahestoricismu puru y duru, una visión totalmente difuminada de lo que foi la hestoria y sacada fuera de contestu dafechu. ¿ Que diferencia hai ente esto y el cuadonguismu ? ¿ Camudamos la esencia de salvación de la patria y de la monarquía española pola salvación de la República burguesa española, y que? ¿ Que diferencies hai ?. Un actu estúpidu y fuera de sitiu. Un actu que quitai credibilidá a tolo que ta faciendo FAMYR puxando pola memoria hestórica, a la que siempres antroxen con un estatalismu cuasi que xacobín. De toxs ye sabío que los compatriotes que se llevantaron en 1934 contra l'Estáu nun sentiense de denguna forma españolistes. Solo revolucionarios, solo guetaben la tresformación social y valtiar l'Estáu español, fondamente burgués.
PUXA ASTURIES SOCIALISTA

lunes, 1 de noviembre de 2010

Lago: “Puen facese coses al marxe de la sociedá del consumu”


Iván Lago y David Tejerina son miembros de l’asamblea que xestiona’l Centru Social Sestaferia de Xixón. Esti proyectu celebra siete años d’existencia basaos nuna filosofía alternativa y cola cultura y llingua asturiana siempre presentes.

Vamos al principiu de too ¿Por qué nació’l Centru Social Sestaferia va siete años?
Iván. Bueno, nació sobre too porque había una necesidá de crear un espaciu de reunión que sirviera pa dinamizar, pa facer actividaes y pa que d’ehí surdieren otres iniciatives.
Yera un momentu nel que les okupes nun taben saliendo palantre y vióse como una opción el buscar un local n’alquiler y crear ehí esa idea que teníemos.

A lo primero de too entamemos con un ciber pa dar serviciu gratuitu d’Internet, que d’aquella taba empezando; una pequeña barra, pal consumu diariu de la xente que pasaba per ehí; y un almacén pa tener archivu d’organizaciones, local de reunión pa colectivos y actividaes: charres, proyecciones, etc. Eso ye un poco lo que motivó l’arranque de Sestaferia.

El proyectu de Centru Social nació tamién con unos oxetivos ideolóxicos ¿Cuála ye la “filosofía” de Sestaferia?
Iván. Pues l’oxetivu ye, dende una perspectiva anticapitalista, dar cabida a toa una serie de movimientos alternativos que quieran dar una respuesta diferente al estáu de les coses. Tamién servir d’espaciu a colectivos que nun taben cómodos notros sitios – como pue ser la sindical, o’l Conseyu de la Mocedá-; y sacar alantre un proyectu autoxestionáu, ensin subvenciones, que se financia namás coles cuotes de los socios y pola actividá del local.

Eso ye lo básico, tampoco yera un proyectu ambiciosu nel sentíu que nun nos punximos un montón d’oxetivos; sinón partir d’unes premises pa cubrir unes necesidaes básiques. Y llueu nun poner llímite a quien quiera usar esti espaciu, más allá de lo que nos plantearan coincidiera un poco cola llínia que tenemos.

¿Por qué l’autoxestión pa sacar alantre’l proyectu?
Iván. Ye un poco tamién parte de la mentalidá de la mayoría de los socios qu’entamaron el proyectu. Amás, nun entendíemos que pudiera ser d’otra forma porque creemos que la independencia ye necesaria pa, nun momentu dau, salir criticando cualquier cosa o plantando cara al Ayuntamientu o Principáu o cualquier institución. Porque sinón, les crítiques tán coaccionaes nel momentu nel que tas metiendo perres del bolsu que dependen d’esa institución. Siendo autosuficientes garantizamos esa capacidá de crítica.

Los Centros Sociales tienen davezu oxetivos de dinamizar el barriu, espardiendo’l mensaxe del Centru ente los vecinos ¿Cómo ye la rellación de Sestaferia col vecindariu?
David. Col barriu la rellación mayor ye cuando entamamos les fiestes d’El Carmen, que facemos una comida popular autoxestionada con 300 raciones de fabes, que repartimos de mou gratuitu. Yá llevamos cinco años faciéndola y, al traviés d’eso, sí que se dan rellaciones cola xente mayor y cola xente que vive nel barriu.

Lo que pasa ye que tamién ye un barriu raru, porque pasó de ser una zona con cases antigües a agora entrar les nueves construcciones, con pisos de 40 ó 50 millones y entós caro, va variando la xente que vive nel barriu. Entós más vida facémosla cola xente que ye d’equí de tola vida, que non colos “nuevos ricos” que lleguen agora.

Iván. Tamién hai que dicir que, hasta que nun empecemos a facer les fiestes, la xente tenía como un poquiñín de recelu, nun s’atrevíen a entrar nel local. Y, dende que ficimos les fiestes d’El Carmen, entamamos a tener muncha más rellación colos vecinos y empezaron a venos como xente más cercano.

Na llínia d’esto que señaláis; dende’l movimientu de centros sociales ¿Cuál creéis que ye la clave de les actividaes a facer pa entrar en conexón col barriu y tresmitir el mensaxe del proyectu del Centru?
Iván. Hai que tener en cuenta a la xente que quies llegar. Entós cuando organices una cosa política mui concreta, vas tener un públicu marcáu. Pero si quies tener rellación real cola xente del barriu, tienes que facer otru tipu d’histories más abiertes. Sicasí, en les fiestes d’El Carmen, tenemos unes premises: son unes fiestes llaiques; autofinanciaes; repártense fabes pero ensin preciu establecíu, polo que cualquier persona pue sentase a xintar anque nun tenga perres; esos son los valores que tresmitimos al barriu y que, amás, la xente ye mui receptivo. Tolos años vien la xente mayor a date les gracies por montar estes fiestes y facer coses pol barriu.

Entós creemos qu’esto tien un valor porque crees una conciencia; puen facese coses al marxe de la sociedá del consumu, ensin esparabanes nin creando una movilización de la virxen, pero sí que tien un valor. Esi ye’l camín p’abrise, porque podríemos facer una cosa con una carga más política, pero evidentemente nun díbemos tener la mesma repercusión.

David. Tamién hai que dicir qu’anque munches de les actividaes nun sean estrictamente polítiques, al traviés d’elles llegues a la xente y xeneres un gusanín que pue facer que dempués s’involucren en temes mas políticos. Ye una manera de llegar a otra xente qu’a lo meyor si ficieres directamente temes de la izquierda clásica, pues nun llegaríes.

Dixisteis que nacisteis, ente otres coses, pa dar espaciu a coletivos ¿Qué organizaciones pasaron per Sestaferia?
David. Pues unos cuantos… COSAL, FUSOA, Refugaya, la Xunta pola Defensa de la Llingua Asturiana, l’asociación d’amigos del Canabbis, Sofitu… lo más nuevo ye’l grupu de baille tradicional que se reúnen pa baillar tolos llunes. A esi nivel yo creo que’l local ta bastante consolidáu.

Iván. Tamién faen asamblees puntuales xente como’l colectivu de paraos, cuando’l tema de Fer, xornaes de música asturiana…; vamos que nun hai un llímite nin una llínia política estricta que tengamos de requisitu pa que la xente puea participar equí. Ye un ámbitu mui ampliu; nun s’exise que la xente que quiera facer coses piense como nós, anque bono, otra cosa ye si vien el PSOE a pedir espaciu… esto como mínimu xeneraría una polémica que tendría que debatise n’asamblea.

Yá que cites l’asamblea ¿Too’l furrulamientu ye asambleariu?
Iván. Sí. Por exemplu nós güei tamos falando equí pero nun somos nengún cargu, namás xente de l’asamblea. Equí tolos socios tienen posibilidá d’espresase, con un funcionamientu horizontal.

David. Esti sistema - como lo de nun tener subvenciones nin lliberaos- fai que les coses vayan más lentes, pero creemos que ye seguru, afitáu y con unos criterios de conciencia claros.

Y falabéis tamién d’ociu alternativu ¿Qué actividaes destacaes se desendolcaron nesti tiempu?
Iván. Lo más destacao son les fiestes populares d’El Carmen, pero destaca tamién por exemplu los actos homenaxe a la Revolución d’Ochobre que ficimos nel 70 y 75 aniversariu. Tamién foi mui importante la campaña d’apostasía. Y llueu yá a nivel más concretu pues xornaes de música asturiana; charres, con importante presencia de la izquierda llatinoamericana – por mor de la rellación col COSAL-, de Palestina… nun se, son munches coses y ye complicáu facer un resumen.

David. Tamién ye importante la distribuidora que tenemos de llibros, discos, y demás material alternativu. Agora va salir tamién otra cosa interesante que ye d’un sociu del local qu’entamó a facer un documental sobre movimientos alternativos n’Asturies n’estremaos ámbitos. Entemez música, centros sociales… y sal Cambalache, la revista Atlántica XXI, el Diagonal-Asturies, la xente de L’Arcu la Vieya, tamién Xune Elipe… y quería presentar el documental nel Festival de Cine de Xixón. Nun se sabe si’l festival va garralo, pero sinón va presentase en Sestaferia, anque si sal nel festival tamién lo proyectaremos equí.

La cultura y la llingua asturiana tamién tienen presencia en Sestaferia…
Iván. Home, eso pa nós ye básico. Forma parte de Sestaferia dende la so fundación. Tolos materiales qu’editamos van n’asturianu o como muncho en billingüe y siempre fuimos mui sensible con ello. El fechu de que la Xunta Pola Defensa de la Llingua Asturiana s’aconceye equí pues ye una muestra del apoyu total de Sestaferia a la llingua.

Tamién destaca una actividá novedosa que ye’l grupu de baille tradicional. Ye un grupu formáu por xente mozo que tolos llunes axúntase equí pa baillar. Nun ye un colectivu de recuperación, sinón un grupu de xente que-yos presta’l baille y que nun conocíen los bailles tradicionales y decidieron xuntase equí pa deprender a baillar.

David. Nel tema de cultura asturiana tamién ta la idea de facer un taller prácticu de facer sidra. Al final esti añu nun se va poder facer, pero d’equí a un tiempu vamos facelo. Tamién na distribuidora tenemos muncha música asturiana y llibros de Trabe, Suburbia… de munches editoriales de lliteratura asturiana.

¿Qué tal la rellación colos otros centros sociales d’Asturies?
David. Tenemos muncha rellación con Cambalache y con Picu Rabicu y L’Arcu la Vieya d’Uviéu. Tamién col CSOA La ReFLEXón mientres duró. Yo creo que con colectivos con tol mundu.

Iván. Sí, lo único que lo que nun existe ye una rede y una coordinación permanente ente tolos centros, pero sí que se busquen compartir actos como por exemplu cuando vien un autor a Asturies, pues que fale un día en Cambalache y otru equí. Cuando surden estes oportunidaes avisamos a los otros centros porque-yos pue interesar compartir actividaes.

Esti domingu 31 celebráis el séptimu aniversariu ¿Qué va haber nel actu?
Ivan. Va facese una folixa amagüestu, porque siempre nos presta facer coses rellacionaes cola cultura tradicional asturiana. Va haber castañes, sidra dulce, frixuelos, música tradicional en directo – con miembros de dellos grupos folk como Felpeyu-, va tar el grupu de baille convidando a baillar a la xente, va presentase un vidiu sobre les fiestes d’El Carmen…Tamién la facemos conxuntamente cola tienda de comerciu xustu Picu Rabicu, que celebren el so décimusegundu aniversariu.

Pa dir acabando… ¿Un balance d’esti tiempu?
David. Agora creo que tamos nun momentu potente del local y que puen salir munches coses nueves que xeneren ilusión. Tuvimos altibaxos nestos siete años pero agora van dase munches actividaes y espectatives nueves. Tamién algamemos que dempués de too esti tiempu sigamos calteniendo unos 60 socios, pagando una cuota mensual y eso te da una fuerza porque se ve que la xente valora’l proyectu. Amás que furrulamos por voluntariáu y cadún tenemos el nuesu trabayu y los nuesos problemes diarios, lo qu’implica compromisu personal.

Per otru llau queremos dir faciendo actividaes más potentes, actividaes que llenen xente. Porque a veces montes daqué y te tires una tarde sólo y nun te vien nadie, entós eso casi nun paga la pena. Tamién tenemos que meyorar tema de la comunicación, qu’ehí tenemos déficits pa dar a conocer el proyectu y amás hai qu’añadir que los medios de comunicación convencionales tampoco reflexen les nueses actividaes, cuando se tán faciendo coses importantes y con muncha participación.

¿Y les perspectives y oxetivos de futuru?
Iván. L’oxetivu ye esparder la existencia d’esti espaciu, un llugar abiertu pa toos los que quieran buscar un espaciu alternativu al marxe del sistema. Equí hai un sitiu onde namás hai que traer un proyectu en positivo y ganes de trabayar y nós vamos dar cabida a toos esos movimientos alternativos.

Amás, nestos tiempos de crisis hai que dase cuenta que fai falta trabayar al marxe de la sociedá del consumu porque tamos nuna dinámica onde les perres son lo únicu qu’importa y que lo mueven too; y sí qu’existe posibilidá de cultura, d’ociu y de desarrollar proyectos alternativos ensin necesidá de ser los más radicales.

David. Equí hai varies apuestes y tienes por exemplu’l Conseyu de la Mocedá que recibe una montonera perres del ayuntamientu y nun dexa de ser – como dixo dalguien nel so día – un espaciu de formación de cuadros del PSOE; y tienes la nuesa apuesta, que lo que tenemos punxímoslo nós, nun debemos nada a naide. Podemos dicir con arguyu a cualquier vecinu que, preste-y o nun-y preste lo que facemos, nós nun vivimos a costa del Estáu. Tamos a la escontra d’él y amás nun vivimos d’él.

Fonte: Asturies.com

domingo, 31 de octubre de 2010

Hallowen non, Tolosantos o Samain sí


Los asturianos con una de les nuestres señes d´identidá más valoratibles como ye la imbecilidá somos mui daos a recibir colos brazos abiertos a lo foriato y echar por tierra y desprestixar lo de nueso. Eso nun podía ser menos col "Hallowen" norteamericanu. Vayas per onde vayas tenemos "Hallowen". Bombones, calabaces, antroxos, mázcares, bragues, camisetes, tangues, llinternes y una llarga llista de coses de lo más bayuroso cola marca´l Tíu Sam. Pero equí salionos el tiru pela culata.

El "Hallowen" nun ye más qu´el Samain celta, la fiesta de Tolosantos que se vien cellebrando n´Asturies dende tiempos inmemoriales. Pa entamar el "Hallowen" llevámoslo a lo qu´angüaño son los Estaos Xuníos de Norteamérica los emigrantes asturianos, sí los asturianos, y los irlandeses y agora lo que faen los americanos ye vendelu al mundu cola so visión particular. Ye abondo curioso, y enforma xente nun sabe, que la tradición de la calabaza ye asturiana n´esclusiva porque n´Irlanda lo que vaciaben yeren nabos y esto puede vese na lleenda irlandesa de Stingy Jack que depués derivó en Jack O´Lantern o Jack el Llinterna.

Mio güela cuntame, y nun ye d´una braña perdida en casa dios ye d´El Parruchu en Llabio parroquia de Perlora nel conceyu Carreño, que vaciaba calabaces colos vecinos y collacios y poníenles na quintana y nos cruces de los caminos. Vaciábenles bien, sacaben les mayores y meyores pepites pa semales o pa poneles al sol a secar y xintales, facíenyos unos buracos pa los güeyos, les napies y la boca. Depués nel de la boca poníen les propies pepites de la calabaza o palucos pequeños que facíen de dientes. Coles barbes del maíz podíen ponéi, si teníen gracia, un bigote o na parte d´arriba de la calabaza unes trences, coletes o pelos desordenaos pa que diere más miéu. P´acabar metíen veles en dientro. Lo qu´avezaben comer de llambionada nestes feches yeren los "fritos de calabaza", casadielles, frixuelos y tamién por supuestu amagostaben castañes. Tamién avezaben a facer, igual que l´alborada´l día San Xuan trastaes a los vecinos como camudar les portielles de sitiu, guardar los carros, etc. teníen tamién especial precuru en nun topase cola "Güestia" qu´esa nueche taba pasiando pelos montes y caleyes.

De lo de los antroxos nun s´alcuerda bien y tampoco d´echar agua y comida a los difuntos pa que pasen de llargu y nun lleven a naide de la casa pero diz que dalgo-y suena. Voi siguir intentando que faiga memoria pero mientres tantu podemos siguir coles patoxaes hallowanianes.

Fonte: http://ladecimasinfonia.blogspot.com/

sábado, 30 de octubre de 2010

Denuncien concentraciones xenófobes delantre del Materno-infantil d'Uviéu


Ficieron fotos al centru y a los menores
El Coleutivu Social y Justicia denuncia que demientres dellos díes d'esta selmana hubo concentraciones delanter del Materno-infantil d'Uviéu convocaes pol partíu facista español Democracia Nacional. La última foi esti vienres y nelles reparten panfletos, "concentrándose delles personas con Pancartas y megafoneando esloganes xenófobos". El coleutivu denuncia que los facistes ficieron fotos a los menores y del centru onde residen menores de 0 a 18 ensin que la policia española que taba presente ficiere nada.

Social y Justicia esplica que los concentraos glayaben consignes "culpabilizando a los inmigrantes de la inseguridá ciudadana, del deterioru de la calidá de vida de les ciudaes d'Asturies" y pidiendo "la repatriacion masiva de los inmigrantes sean menores o mayores d'edá".

Ayeri, según esplica'l coleutivu, "ficieron fotogradíes del centru y de los menores" y denuncien que la policia española, que taba presente, "nun fizo aicion dalguna que torgare estos fechos delantre d'un centru onde residen menores de 0 a 18 años", tanto asturianos como d'otros oríxenes.

Fonte: Infoasturies.

jueves, 28 de octubre de 2010

La Xunta denuncia qu'unos 5.000 alumnos nun puen estudiar asturianu


La Xunta pola Defensa de la Llingua Asturiana estima qu'unos 5.000 alumnos nun puen estudiar asturianu "poles maniobres del Principáu", principalmente n'educación secundaria.

El colectivu pidió que s'aplique la Llei de Promoción y Usu qu'establez la posibilidá d'estudiar asturianu sin discriminación y en tolos niveles educativos.

Nuna rueda prensa, Carlos Pulgar, voceru de la Xunta, refirióse a la reciente sentencia del TSXA qu'anula la ratio mínima d'alumnos pa crear grupu d'esta asignatura, con oxetu d'acabar con esti problema. La Xunta esixó que s'aplique la mesma darréu en llugar de recurrila, como anunció'l conseyeru d'Educación Herminio Sastre.

Pulgar calcó "nes maniobres" pa que los alumnos nun estudien asturianu. "Hai alumnos que lu piden y nun saben quién más lo pidía. Nunca llegaben a saber si realmente había ocho alumnos, o más, y nunca acababa saliendo'l grupu d'asturianu", esplicó.

Asina, la Xunta realiza una correspondencia ente los casos que conoz y la proporción de porcentaxes qu'estudien asturianu en primaria y secundaria, pa estimar qu'unos 5.000 podríen quedar cada añu sin cursar esta asignatura por estes práctica.

Refugó amás que la eliminación de la ratio suponga un "espilfarru", como señaló'l conseyeru d'Educación. "Que busque l'espilfarru n'otros ámbitos de la Conseyería de la so confianza, y non nos profesores d'asturianu", señaló. "Los maestros d'asturianu trabayen porque esiste esta demanda ", calcó.

Movilización
Per otra parte, la Xunta pola Defensa de la Llingua anunció la celebración simbólica d'una clase d'asturianu na Plaza la Escandalera d'Uviéu, como primer movilización pa esixir l'aplicación de la Llei de Promoción y Usu. Va Ser el próximu día 13 de payares, a les 13.00 hores.

Una persona vinculada al sistema educativu va esplicar a los asistentes el mecanismu d'esta sentencia y la situación na que tán los maestros d'asturianu.

Fonte: Asturies.com

miércoles, 27 de octubre de 2010

El CMPA declárase antitaurín arriendes d'una resolución propuesta por Fai


Noticia de la páxina web de Fai!:

La organización d'esquierda independentista tres de delles tomes de contautu con otres organizaciones sociales del Conseyu, presentó una propuesta de resolución qu'a la fin foi aprobada, declarándose'l CMPA como antitaurín y poro, d'equí n'alantre, entidá que sofite toles actividaes que se desendolquen p'algamar una Asturies llibre de tortura animal en toles estayes.

Dende Fai! felicitamos a l'Asamblea del Conseyu de la Mocedá por da-y'l preste a la nuesa propuesta, que vien énte una votación que va desendolcase nel Parllamentu Asturianu pa facer d'Asturies un país ensin tortures a los animales nin imposición cultural españolista, encarnada nos festexos taurinos o nos "toros d'Osborne".

Fai!, asina, renueva'l so compromisu con esta llucha, xunto cola presencia en comuña con otres organizaciones de la esquierda nacional nes movilizaciones escontra les corríes de gües o la edición de miles de pegatines reivindicatives.

PUXA ASTURIES ANTITAURINA!!


Testu íntegru de la resolución:

Propuesta de Resolución sobre la defensa de los drechos de los animales

Los animales foron consideraos, fasta agora, como oxetos y xuguetes, negándo-yos cualesquier asemeyu con nós. Esto débese al nuesu "facismu" d'especie, qu'entiende al ser humanu en guerra permanente d'esplotación y esterminiu sobro'l restu de los seres vivos, tornándolos n'inferiores a nós y representándolos como seres que nun carecen dolor y sufrimientu.

Los seres vivos que nos acompanguen na nuesa aventura, nel planeta Tierra, tienen drechu a esistir y a facelo dignamente. La crisis ecolóxica amosónos hasta qué nivel la coesistencia solidaria de toles especies ye un requisitu fundamental pa la nuesa sobrevivencia propia, n'armonía. Ye la separtación radical ente seres humanos y animales lo que nos llevó a la cai ensin salida del cambéu climáticu, la estinción masiva d'especies o la destrucción xabaz de biesques y espacios naturales.

Asturies ye un espaciu privilexáu na península onde'l ser humanu tuvo ciertu respetu pa colos animales. La ganadería foi símbolu de riqueza, na que los/es ganaderos/es siempre tuvieron especial curiáu colos animales, formando parte de la cultura ya identidá del nuesu País.

La gran diferencia qu'introduz el reconocimientu de los drechos de los animales, respeuto a la llucha común polos drechos humanos, ye qu'amplía la nuesa comunidá moral y xenera una nueva fraternidá, diendo más alló de les llendes de la nuesa especie. Esti ye'l retu nuevu que debemos encarar.

Una nueva fraternidá ye necesaria p'abordar los retos de la sociedá del futuru. Y, nesa nueva fraternidá globalizao, el respetu y reconocimientu de los drechos de los animales ha xugar un papel central. La introducción de los seres vivos na comunidá moral de los drechos supón un signu más de civilización, siguiendo la tendencia a espandir el núcleu orixinal de los drechos. Munchos nun atalanten esta propuesta, pero tamién munchos nun pescancien a los abolicionistes de la esclavitú, o a les sufraxistes del movimientu feminista.

Tanto n'Asturies y como nel Estáu español, el vacíu llegal nel reconocimientu de los drechos de los animales ye tan ampliu como'l conxuntu de práutiques rituales ya industriales qu'impliquen muerte, tortura o maltratu animal.



Poro, l'Asamblea del CMPA alcuerda:

− Desixir al Gobiernu Asturianu que se promuevan los cambéos llexislativos precisos a nivel d'Asturies pa declarar a Asturies como país antitaurín: asina mesmo pa dexar de considerar como oxetos o xuguetes a los animales n'espectáculos, circos o otros actos nos que s'humilde o discrimine al animal.

− Que dende'l CMPA se sofite y se participe activamente nes actividaes y/o plataformes promocionaes pola sociedá civil que tenga como oxetivos algamar los cambéos presentaos nel puntu anterior.