lunes, 30 de noviembre de 2009

Solidariedá cola mocedá d'Euskal Herria.


El pasáu sábadu dalgo más de 20000 presones salieron a les cais de Bilbo a vindicar el drechu del pueblu vascu a decidir por si mesmu y a refugar les detenciones a les moces y mozos independentistes.
Tamien n'Asturies la organización xuvenil Darréu asoleyó un comunicáu que reproducimos equí:

La Mocedá Independentista d’Asturies ente’l caberu casu de represión a la mocedá abertzale

El pasáu 24 y 25 de payares 24 mozos y moces, supuestos militantes de la organización Segi foron prindaos pola policía española y la guardia civil. Amás, les fuercies d’ocupación ficieron decenes de rexistros n’otres tantes cases, centros sociales y chigres de calter independentista con dellos saquéos. El númberu ye de 92 rexistros. La operación policial tuvo presente en Bizkaia, Araba Guipuzcuoa y Nafarroa. Estos díes siguieron los rexistros y les detenciones.
Dende Darréu queremos amosar el nuesu sofitu colos compañeros represaliaos y secuestraos pol Estáu facista español. Camentamos que la so llucha ye la nuesa, y qu’ente la xuventú debemos de tar xunios. Xuníos pa lluchar escontra’l mesmu enemigu: España, y polos mesmos oxetivos, la independencia y el socialismu de los nuesos pueblos. Asina animamos a la mocedá asturiano a solidarizase colos deteníos, y damos-y tol nuesu sofitu a la mocedá d’Euskal Herria pa siguir lluchando.

Nun ye denguna sorpresa, pero paezmos preocupante esta última operación. Preocupante por que foron deteníos pol simple fechu de ser xóvenes independentistes y socialistes. Por pensar asina, por tener eses idegues, llexítimes nun supuestu Estáu de drechu. Pero non, una vegada más, l’estáu "democráticu" español viola la pallabra democracia, de la que tantu presume y secuestra a xóvenes pa convertilos en presos políticos. L’estáu nun tien denguna escusa p’acusalos de “terroristes”, y nun pue facer otra cosa más que repetir una mentira mil vegaes, y asina convertila nuna verdá nos sos medios de manipulación. Esta ye la democracia española moderna y tolerante, y cualesquier mozu o moza pue sofrila pol simple fechu de tener idegues propies.

Dende Darréu creemos que la dinámica violento-represiva nun ye namás qu’un pasu p’atrás nel camín a la paz pa Euskal Herría, camín qu’intentó plantegar la Izquierda Abertzale fai unes selmanes y que foi refugáu pol españolismu a les primeres de cambiu. Tal paez ser que l’españolismu necesita esti conflictu pa intentar xustificar de dalguna mena la so represión. Y facer d’esta represión dalgo ensín fin, anque tean les de perder.

Asina, desiximos la puesta en llibertá de los independentistes deteníos. Desiximos tamién que tolos proyeutos políticos y sociales seyan respetaos nel Estáu español y que la mocedá vasca pueda espresase llibremente ensin mieu a les represalies del capital-facismu español. Pedimos a les organizaciones revolucionaries de mocedá d’Asturies y del mundiu enteru que seyan conscientes d’esti grave casu y tomen el camín de la solidariedá colxs demás compañeros de llucha.

Por últimu, facemos públicu, otra vuelta, el nuesu rechazua la llei de partíos y la llei antiterrorista. Lleis que siempres van a cayer sobre los mesmos, onde paez que namás hai unos culpables y son culpables en función de los sos ideales. Atalantamos qu’estes tienen un fonderu xacíu antidemocráticu. Solo’l llibre drechu de les ciudadanes y ciudadanos vascos mediante’l procesu d’autodetermín iguará’l conflictu, respetando’l camín qu’esti pueblu tome democráticamente.

¡Llibertá pa los 34 xóvenes independentistes vascos!

Puxa Asturies llibre. Gora Euskal Herria Askatuta.

Darréu cellebra la readmisión de Pablo Barroso y da-y la norabona.

Comunicáu de la organización de mocedá independentista ente la readmisión del trabayador en Duro Felguera:

La Mocedá Independentista Revolucionario quier da-y la norabona a Pablo Barroso, trabayador de Duro Felguera, despedíu de Felguera Construcciones Mecánicas, despedíu por ser un emplegáu incómodu y al cual la empresa tendrá que readmitir. Esto vien de que’l trabayador y sindicalista ganó’l xuiciu y el so despidu resultó improcedente, noticia que recibió Pablo’l pasáu miércoles.

Animamos dende Darréu a que tolos trabayadores tomen l’exemplu de Duro Felguera y sigan organizándose en defensa de los sos drechos llaboral y cola fin de tener un presente más dignu que fadrá del futuru dalgo meyor. Agora la empresa tendrá que readmitir al trabayador, el cual escoyió tornar a trabayar y refugó la indemnización de más de 35.000 euros.

Creyemos qu’esta noticia a pudo ser otra si nun fuera pola solidaridá de la clas obrera, en concretu los sos compañeros y compañeres de DF, que secundaron una fuelga de 24 hores y s’aconceyaron delantre los xulgaos el díi del xuiciu. Poro, hai qu’eloxar la rempuesta popular de los trabayadores, qu’evidenció lo illegal del despidu.

Nin los ERES, nin la represión, nin les amenaces, nin la especulación van facer que dexemos a los que manden vender Asturies ensín facer un res nós. Caltenemos que ye un momentu de resistencia popular onde’l Pueblu Trabayador Asturianu tien de tar xuniu en defensa de los sos drechos y d’un trabayu dignu, que faiga de fuercia de resistencia al desmantelamientu industrial, social y cultural que mos quieren llantar.

¡ Puxa’l Pueblu Trabayador Asturianu !

¡ Non a la represión llaboral de la patronal !

¡ Non al desmantelamientu d’Asturies !