martes, 3 de noviembre de 2009

Darréu escontrá l'asfaltáu de la Ruta l'Alba

La organización independentista de mocedá asoleyó na so páxina web la siguiente noticia:


"La organización de mocedá Darréu punxo delles pancartes a l’entamu de la Ruta l’Alba como refuga a l’asfaltau de la mesma. Les pancartes punxieronse en Soto d ‘Agues y na zona d’obres.

Van destinase 684.000 euros a la destrucción de 3 nuevos kilómetros de la ruta l’Alba correspondientes al recorriu ente Puente na Vega y Cruz de los rios. Esti nuevu asfaltau ye complemetariu a un primeru que se fizo ente los pueblos de Soto d’ Agues ya’l puente de Retorturiu.

Demientres la execución de les obres tan xenerándose munches protestes de montañeros, senderistes y pola propia xente de los pueblos afeutaos, ente les reivindicaciones de la xente puen sintise coses como “Que’l formigón supondrá un grave impautu ecolóxicu pa les especies presentes na ruta” y que “La ruta, al nun ser de gran dificultá nun necesitaba asfaltase”. Amás, la ruta pierde la so esencia al llantar n’ella’l formigón, elementu urbanu dafechu, alloñáu de lo que tien de ser una ruta montañera y de senderismu y que supón un grave impautu medioambiental.

Poro dende la organización de mocedá Darréu dexisimos que se dexe nidio l’informe de impautu ambiental,creemos que los erros que se tan produciendo colos informes nun son más que decisiones polítiques, y una agresión más a la ñatura y el territoriu asturianu cola fin última de siempres, qu’estos mesmos, los de siempres, saquen perres.

Dexiximos la inminente realización d’un estudiu “de calidá” de impautu medioambiental tanto del primer tramu como del segundu. Camentamos que los pueblos afeutaos pol formigonáu de la ruta deben tar informaos dafechu, y non embullaos con informes fraudulentos. Amá,s caltenemos que ye salvaxe l’actuación en si del fechu d’echar formigón na ruta. Una aición que fadrá que los ciudadanos y ciudadanes s’esmolezcan, pues ye un cambéu mui agresivu y ensín dengún xaciu posible.

Pedimos responsabilidades direutes d’estos informes a la viceconseyera de mediu ambiente Belén Fernández y el so equipu, pues camentamos que ye intolerable un ataque asina a la ñatura, por fierru que quieran quita-y a l’asuntu.

¡ BASTA DE MANIPULACIÓN!

¡ POLA DEFENSA DE LA NUESA TIERRA !

¡ POLA DEFENSA DE LA ÑATURA ¡"

Fai! fala de "violación de l'autonomía universitaria" y pide amparu al Rector.


Fai! fala de "violación de l'autonomía universitaria" na entrada inxustificada y reiterada de la policía nel Campus de Santuyano y pide amparu al Rector
La organización, presente nel Claustru de la Universidá d'Uviéu, fexo públicu un comunicáu nel qu'espresa la so indignación pola violación reiterada del espaciu universitariu per parte d'axentes de la policía, n'actitú despreciatible y humillante pa coles/os presentes, a la gueta d'estupefacientes ente los y les estudiantes.

Sigún se denuncia, el pasáu 22 d'ochobre de 2009 nel campus d'Humanidaes de la Universidá d'Uviéu, un grupu d'axentes entamaron una inxustificada redada a la gueta d'estupefacientes ente les y los estudiantes que s'atopaben nesi intre na terraza de la cafetería del campus, espaciu que ta embaxo de la xurisdicción universitaria pa la que la institución tien contrataos a vixilantes de seguridá privada. La persecución, mesa a mesa, n'actitú de superioridá, dexó ablucaos y ablucaes a les y los presentes, en primer llugar, pola entrada nun recintu universitariu, supuestamente ensin permisu del Rector nin d'otros muérganos universitarios, y en segundu llugar poles maneres de los propios funcionarios, qu'amás abandonaron les dependencies ensin la incautación de sustancies prohibíes.

Nun ta de más recordar que, la constitución española nel so artículu 27.10 recueye'l derechu a l'Autonomía de la Universidá, como garante de les llibertaes y la independencia frente a les presiones esternes qu'impidieren la llibertá de cátedra, la difusión cultural, del saber y l'estudiu y la investigación, en virtú de lo cual la entrada de les fuerces de seguridá del estáu tien que tener el preste del propiu Rector universitariu.

Poro, y como nesti mesmu añu nun ye la primer nin la segunda vegada qu'esta escena se repite: acosu a les y los estudiantes nel campus con perros antidroga, nuna actitú que Fai! cree mui alloñada de toa óptica academicista y de formación cultural, la organización pidi amparu al Rector de la Universidá pa que torgue cualquier tipu de violación y asaltu de los derechos de les y los universitaries y universitarios n'ámbitos académicos y de divulgación científica.

Asinamesmo, Fai! quier dexar afitada la so defensa de la llegalización de les drogues prohibíes anguaño, pa finar cola lacra de la economía somorguiada que xeneren y la hipocresía d’una sociedá que mira pa otru llau mentres narcotraficantes y el propiu sistema saquen tayada. Una llibertá de consumu que nun puede dexar de llau una pernecesaria información a la mocedá y al restu de la sociedá sobre les consecuencies sanitaries del consumu de toles drogues, ensin escepción, dende l’alcohol y el tabacu a les denomaes “drogues dures”, recordando que la mesma Universidá ye ún de los espacios más importantes p'afondar na información y formación de la sociedá y, n'especial, del coleutivu más xuvenil.

N'Uviéu, a 30 d'ochobre de 2009

Darréu sofita al trabayador despedíu en Duro Felguera y desixe la so readmisión.



La organización de mocedá Darréu asoleyó un comunicáu esti últimu fin de selmana col envís de sofitar al sindicalista despedíu en Felguera Construcciones Mecánicas y asina desixir la so readmisión. El comunicáu ye'l siguiente:

El pasáu 25 d’ochobre la direición de Felguera Construcciones Mecánicas,
que ta dientru’l grupu Duro Felguera fixo públicu’l despidu d’un de los
trabayadores que formaben el comité d’empresa. Esti trabayador, Juan Pablo
López Barroso, lleva 10 años en Duro Felguera, 6 de los cuales tuvo
participando nel comité d’empresa, siendo voceru de los trabayadores en
munchos casos.

La empresa lu despide por un supuestu problema de salú, que lu impide
trabayar supuestamente, cosa que ñega l’afectáu. Amás, DF se defiende
presentando un informe mélicu qu’ellabora una mutua a la cual paga DF. El
despediu, por contrariu tien informes de la seguridá social, más imparcial
por supuestu, que ñeguen que nun puea desendolcar el so trabayu. L’afectáu
punxo una denuncia nos tribunales a la empresa por esti fechu.

Nun dexa de ser curiosu que’l trabayador despedíu, que pue desendolcar el
so trabayu perfechamente, presentará fai un mes varies denuncies ente la
Inspeción de Trabayu. Nestes denuncies acusaba a la direición de Felguera
Construcciones Mecánicas de cometer “ práctiques d’acosu llaboral y
sindical”. Darréu, un mes dempués vien el so despidu, escudandose la
empresa n’argumentos falsos. Nun ye la primera vegada que acusen a la
direición de DF, la so filial nesti casu, de práctiques d’acosu y
represión escontra los sos trabayadores. El propiu trabayador califica de
montaxe’l despidu y l’aición de la direción de la empresa, pa asina
desfacese d’un trabayador que resulta-yos molestu.

Poro, dende la organización de mocedá Darréu caltenemos qu’esti despidu
nun ye namás qu’un montaxe, como califica’l propiu trabayador. Montaxe que
sirve a DF pa quitar de delantre a un sindicalista que defiende los
drechos llaborales de lxs compañerxs y los suyos propios, daqué que
camentamos que nun tolera la direición de la empresa. Asina, dende la
Mocedá Independentista Revolucionario desiximos la readmisión del
despedíu, yá que paezmos un nuevu atropellu a la llibertá de los
trabayadores y un nuevu ataque de la patronal n’Asturies. Ún de los
munchos que vienen asocediendo nestos tiempos caberos. Una patronal, que
lloñe de pensar nel futuru d’Asturies economicamente apuesta pol
desmantelamientu llaboral d’Asturies. Y emplega como ferramienta represiva
pa desendolcar esti desmantelamientu la represión, les amenaces y los
depidos, acompangaos colos ERES.

Asina llamamos a la mocedá a participar y sofitar la movilización
qu’entama l’Asamblea de Trabayadores de Felguera Construcciones Mecánicas
esti prósimu llunes 9 de payares a les 9:00 nel xulgáu de Mieres. Esta
convocatoria se fai coincidiendo col xuiciu del sindicalista y despedidu.
Ye perimportante que’l trabayador y el restu d’estos nun ten solos y la
mocedá s’implique nestes movilizaciones, pues el futuru que mos quieren
dexar estos lladrones ye mui escuru, y ente esto debes dar rempuesta.

¡ DESPEDÍU READMISIÓN!

¡POL FUTURU LLABORAL EN LLANGRÉU Y N’ASTURIES!

¡PUXA LA LLUCHA DE PUEBLU TRABAYADOR!