Marcha de los trabayadores de Vesuvius

El proximu xueves 18 de Xunu, los trabayaores de Vesuvius iniciarán una marcha dende Riañu hasta Uviéu.
Saldrán a les 08,30 hores dende la fabrica.

Sofitalos y xúnite a ellos!

Entrevista a Patrick Zimmerman

Xunu 12, 2009 por Pablo R. Alonso


Patrick Zimmerman (California, 1981) llegó a Asturies curiosamente’l pasáu 8 de setiembre cola intención de recoyer información pa la so tesis doctoral, que trata sobre’l nacionalismu asturianu dende la transición ("Domesticated Nationalism: Asturian Regionalism and Cultural Politics since the Spanish Transition, 1974-2008."). Hai unes selmanes esti doctorandu de la Universidá Carnegie Mellon de Pittsburgh abandonó'l nuesu país de vuelta pa los Estaos Uníos depués d’un trabayu de campu que lu llevó a entrevistase con bona parte de los protagonistes del asturianismu de los últimos trenta años. Unos meses nos que, por cierto, l’investigador norteamericanu tamién tuvo tiempu pa deprender el nuesu idioma.

Asturies.com quixo falar con Patrick Zimmerman enantes del so regresu pa que tresmitiera a los nuesos llectores la so visión del pasáu, presente y futuru del asturianismu.


La primer pregunta ye obvia ¿Qué lleva a un californianu a interesare por Asturies y el nacionalismu asturianu?

Hai tiempu que m’interesaben los nacionalismos n’España, los problemes no que cinca al Estáu de les autonomíes y la Transición. A partir d’ehí necesitaba garrar un exemplu de nacionalismu pa la mio tesis. En principiu pensé en Galicia o n’Asturies porque había menos coses escrites sobre dambos y nun soi tan presuntuosu como pa creer que podía aportar dalgo importante sobre los dos nacionalismos más estudiaos, el catalán y el vascu. Entós siguiendo los conseyos del mio director de tesis decidí enfocar el mio estudiu namás nún. Intereséme por Asturies por razones epistemolóxiques y tamién personales. Siempre quixera conocer los paisaxes y la gastronomía d’equí. Y nel planu epistemolóxicu interesábame saber lo que pasó y enforma lo que nun pasó: Por qué n’Asturies nun asocedió lo que n’otres partes.

Como diz l’asturianismu políticu nun ta prácticamente estudiáu, quiciás los trabayos más relevantes nesta estaya sean los de Pablo San Martín

Sí, Pablo San Martín ye l’investigador principal. Tamién hai un estudiu inéditu de Tino Brugos, del cuál editó un capítulu nel so llibru ”Conceyu Bable: venti años”, pero’l restu del so trabayu nun lo llei, y la verdá ye que prestaría abondo lleelu.

¿Con qué tesis partía sobre l’asturianismu? ¿Qué esperaba alcontrar?

Bueno, ya sabía qu’había una identidá destacada, una llingua propia, un movimientu obreru contestatariu y pensaba que diba topar más vinculación ente esi movimientu obreru y l’asturianismu. Había dalgún nexu, sobre too ente Andecha Astur y la Corriente Sindical d’Izquierda, más no personal que no organizativu, pero en CC.OO y UGT tan muncho menos interesaos nel asturianismu y eso sorprendióme.

Falando de desconexones, n’alguna entrevista anterior falaba usté de la desconexón qu’hai ente la masa de falantes de la llingua del país y l’asturianismu

Yo creo qu’a lo llargo de los trenta años hai pocos exemplos de xente que voten en razón de la llingua. N’algunos casos puede vese l’asturianu hasta como una prioridá pero non absoluta, y entós cuando la xente “pro-asturianista” vota failo por intereses más cercanos, como los venceyaos a la economía, o por razones ecolóxiques o temes sociales. Entós creo qu’eso esplica un poco les razones pa que’l nacionalismu tenga poco éxitu políticu mientres que tien bastantes éxitos nel ámbitu cultural, como ye que s’implantase na sociedá la percepción de que l’asturianu ye una llingua, ente otres coses polo ye, o la lliteratura que tien bastante éxitu.

¿Hai desconexón tamién ente si movimientu cultural que tien ciertu puxu y el feble movimientu políticu?

Na rellación ente dambos movimientos non, porque munches persones participen de dambos. Lo que faltó ye tomar ventaya de la popularidá de coses como la música asturiana en clave política, por exemplu. Ye obvio que Nuberu, Carlos Rubiera, Dixebra o Llan de Cubel son músicos y grupos abiertamente nacionalistes y la xente que compra los sos discos ye consciente d’ello. Lo que faltó nes formaciones polítiques nacionalistes ye’l saber como tomar ventaya d’ello. Hai más xente que compra esos discos que los que voten nacionalista.

Nel alderique sobre’l nacionalismu asturianu organizáu pola Tertulia Cultural “Pachín de Melás” y nel qu’usté participó xunto a Ignaciu Llope y José Luís Carmona, comentóse qu’hubo dos momentos claves na historia del asturianismu políticu. Ún foi na época de la Transición, especialmente nel añu 77 cola primera convocatoria democrática, y lo que pudo ser y nun foi con aquella Unidá Rexonalista, que podría haber algamao un escañu nel Parlamentu español si llega a realizase la proyectada xuntanza col Partido Socialista Popular y qu’a la fin nun se consiguió, quedando Unidá Rexonalista con 11.000 votos. ¿Esta foi la primer gran frustración del asturianismu?

Fue un momentu que causó bastante decepción y lo mas importante ye que causó tamién que muncha xente marchare pa casa, pa otros partíos más minoritarios o pa sectores más radicales. Nesti casu, con Unidá Rexonalista mostróse cuál yera’l númberu real d’asturianistes en términos de votos. Muncha xente comentó, y yo toi d’alcuerdu, que l’asturianismu políticu tenía más fuerza cuando naide sabía exactamente que fuerza electoral podía tener. Depués de los 11.000 famosos votos del añu 77 yá se supo. Y fueron pocos. Home, si hubiesen sumao los 42.000 del PSP nun yeren pocos. Pero naquellos años hai otru momentu clave: l’atracu al Banco Herrero. Foi un momentu que dio una publicidá increíblemente mala y que marcó, enforma nos primeros años de los 80 y que puede que siga marcando, la visión esterna que se tien del nacionalismu asturianu porque hai xente qu’iguala nacionalismu con ETA. Y el Banco Herrero dio un argumentu a esi pensamientu. Naquel socesu intervinieron xente rellacionada colos poli-milis (ETA p-m) qu’entraron nel Conceyu Nacionalista Astur al traviés del CAR (Comites d’Acción Revolucionaria) tres una votación interna nel CNA, a pesar que la mayoría del vieyu CNA, la so cúpula na que taben xente como Carmona o Dubardu Puente marcharen depués d’esa votación, les sigles del CNA quedaron venceyaes al socesu y eso influyó na percepción de la xente.

¿Durante estos trenta años l’asturianismu podría dicise que “pagó los platos rotos” de nacionalistes catalanes y vascos?

Había ciertu mimetismu, más de lo vasco que de lo catalán. Claramente l’asturianismu na percepción de la mayoría de los ciudadanos vincúlenlo a los demás nacionalismos del Estáu español. Sicasí l’asturianismu nun ta tanto “pagando los platos rotos” de vascos o catalanes, ye que ye un movimientu muncho más mozu que los otros o mesmamente que’l gallegu, nel sentíu de nacionalismu modernu. Si había una corriente rexonalista nos años 20 y 30 pero hai una ruptura absoluta ente esa corriente y lo que ñaz con Conceyu Bable en 1974. Ye más una cuestión de tiempu que de los “vecinos”.

L’otru momentu clave, más recién y quizás más traumáticu foi’l de Coalición Asturiana nel añu 1991. El nacionalismu entra finalmente nes instituciones por mor del pactu ente PAS y UNA, algamando Xuan Xosé Sánchez Vicente un escañu na Xunta Xeneral. Un acontecimientu que pudo significar l’espoxigue definitivu del asturianismu políticu pero que visto casi venti años depués paez que quedó en nada ¿Cómo valora esi momentu?

Como la cume d’un procesu desarrolláu a lo llargo de finales de los 80. Hai que dicir que na historia del asturianismu dende los 80 nunca hubo un solu partíu nacionalista. Nin siquiera nel 91 porque nesi momentu yá esistía Andecha. Sicasí, la xuntura d’Unidá Nacionalista Asturiana col Partíu Asturianista foi probablemente’l momentu de más unidá nel mundu nacionalista: había xente desde de centru-derecha hasta d’izquierdes. D’esa xuntura quedó fuera un sector más radical que formaría Andecha Astur y que quedó fuera por dos razones, nun fiase de Xuan Xosé Sánchez Vicente y por nun aliase con “burgueses”; había razones ideolóxiques y personales. Esos fueros los famosos 9 espulsaos, o que marcharon, de la UNA y que formaron Andecha Astur, por eso nunca hubo una unidá completa. Pero la gran masa de la xente nacionalista d’aquel momentu si formaron parte de Coalición Asturiana. Foi una oportunidá claramente perdida de consolidar un movimientu nacionalista. Depués nel 1995 el PAS en solitariu repitió l’escañu pero hai que conseñar que foi nel peor momentu electoral del PSOE, cuando’l Partido Popular ganó les elecciones autonómiques, la única vez que nun les ganara’l PSOE y eso influyó en que Xuan Xosé conservare l’escañu. Toi convencíu de que si PAS-UNA hubieren siguío en coalición la presencia del nacionalismu asturianu sería más visible y con resultaos electorales meyores que los del añu 1999, anque hai que dicir que nesi añu tampoco hubo una baxada grande de votos del PAS, llueu si la hubo, pero nesi añu perdióse l’escañu y perdióse la visibilidá.

¿Y como ve anguaño’l panorama del movimientu nacionalista asturianu?

Ta nel momentu más baxu. Nel planu cultural bastante activu. Agora tamos viviendo un momentu nel que los primeros escolinos que tuvieren asturianu yá son adultos, tan n’época universitaria o del primer empléu y hai que ver como van funcionar estes nueves xeneraciones. Tamién veo una xeneración asturianista “de la vieya guardia” un poco pesimista, non toos, pero que sienten más esi fracasu. Persones como Xuan Xosé Sánchez Vicente, Ignaciu Llope o Carmona tan bastante pesimistes, como pudimos ver nes intervenciones d’estos dos últimos na tertulia que mencionamos enantes.

Curiosamente hai un furacu demográficu que mencioné yá na tertulia porque hai pocos trentañeros asturianistes (anque realmente hai pocos trentañeros en xeneral n’Asturies) nun sé si porque marcharen hai años desilusionaos del asturianismu o simplemente ye que nun había.

A too ello hai qu’amestar que la idea d’unidá, d’unión, d’axuntar xente del asturianismu garróla en parte Izquierda Unida yá dende la década pasada con postures a favor de la oficialidá o la declaración de cooficialidá en conceyos gobernaos por ellos como Llangréu. Un averamientu al asturianismu que continua anguaño na figura de Valledor.

Un datu llamativu ye qu’ inicialmente titulaba la so tesis “El nacionalismu domesticáu” ¿Por qué esi términu?

Bueno, lo de domesticáu foi una hipótesis inicial según la cuál el PSOE consiguió domesticar un peligru inicial, un peligru pa ellos, la posibilidá d’otru País Vascu: hubo un momentu nos años 70 onde había la posibilidá de crear, bueno quizás otru País Vascu non, pero si otra Galicia. Sicasí, cuando llegué a Asturies ensiguida descarte esi títulu porque decatéme que la causa de la falta d’espoxigue del asturianismu tenia menos que ver con acciones d’arriba, del poder pa colos d’abaxo, que colos propios asturianistes. Nun quiero dicir tampoco que la situación del nacionalismu sía responsabilidá solo de los asturianistes. Dambos tienen responsabilidá.

Y agora’l títulu cambió a “nacionalismu frustráu” ¿Por qué?

Porque veolo nes cares de la xente: frustración, qu’amas foi una palabra que mencionaron polo menos ente un terciu y la metá de les persones qu’entrevisté pa la tesis ensin nenguna incitación o provocación pa dicila: salió espontáneamente. D’ehí’l cambéu.

¿Y cuál ye’l futuru del asturianismu?

Nun sé. Puede que dependa de la demografía. Cuando llegue otra xeneración habrá que ver si mantién la dinámica d’enfrentamientu ente los asturianistes. El futuru veolu positivu, pero a llargu plazu históricu. Dependerá tamién de factores como la normalización llingüística: yá hai un estándar, hai asturianu nes escueles, hai más de 20000 escolinos esti añu recibiendo clases d’asturianu y esto ye un éxitu claru. La normalización social ye lo más difícil. Sicasí, anguaño ye polémico dicir que l’asturianu nun ye una llingua, que ye un dialectu del castellán. Va 35 años dicilo yera normal. Fui mui sorprendente cuando Conceyu Bable dixo qu’equí había una llingua. Esta popularidá que tien la cultura propia, les señes d’identidá, indíquenme qu’entá queden votantes potenciales, pero hai que saber como atraelos.

Una última cuestión en rellación a lo qu’acaba de dicir ¿Falten líderes o referentes nel asturianismu?

Evidentemente los líderes tienen un rol nesti tipu d’histories pero yo creo que si’l movimientu asturianista s’estendiere na masa social surdiríen. Agora mesmo hai munchos líderes nos partíos que nun quieren ser políticos a xornada completa. Ellos creen muncho nel proyectu pero non pa ser, por exemplu, presidentes d’Asturies. Xuan Xosé Sánchez Vicente ye una escepción. Por exemplu na UNA, si preguntes a Llope si él quier ser diputáu probablemente diríate que non, porque él tien la so carrera profesional. Hai munchos más militantes que persones que quieran liderar esa masa militante. Lo mesmo pasa colos líderes d’Andecha Astur.



Estrayíu d'Asturies.com

Entamar l’alderique, construir alternatives

Yá pasó’l 7 de xunu y la resaca eleutoral vien mui dura pa toos aquellos que vivimos, pensamos y actuamos naguando por unes polítiques alternatives a les que’l circu mediáticu y la clase política mos quieren vender día sí y día tamién.

La finada campaña eleutoral bien pudo ser n’Asturies el guión d’una traxicomedia onde nun faltó de ná y sobraron demasiaes coses. Quiciabes nesti país préstanos abondo “La vida de Bryan” con eso del Frente Popular de Judea y el Frente Judaíco Popular, pero les comedies meyor dexales nel cine porque mos vienen enriba los thrillers psicolóxicos.

Los resultaos eleutorales fueron l’ensayu xeneral de lo que va llegar: mayor avance de les polítiques conservadores y neolliberales, retrocesu de los drechos de los trabayaores, más homexeneidá nel discursu dominante, desencantu social xeneral pa cola política, negación de les señes d’indentidá de los pueblos…. Toos somos conscientes d’ello; ye hora de dexar de caleyar a cuatro pates pa entamar a dar pasos eficaces que planteen una rempuesta madura al diluviu que mos vien enriba.

Munchos fueron los ciberalderiques plantegaos a lo llargu d’esta campaña sobre una obsesiva xuntanza. Munches les actuaciones qu’echaben per tierra eses reflexones. Pero al marxen del pasáu y mirado al futuru ye necesariu qu’esta resaca eleutoral mos lleve por nuevos caminos estratéxicos y d’actuación.

Partamos de los fechos y de la realidá. El pueblu y la izquierda asturiana nun ye mayoritariamente nacionalista. Poco sumaríen dos sigles si nun esiste una conciencia nacional ente la izquierda y la población. Pero más se podría facer si, adaptándonos a la realidá sociopolítica d’Asturies, sumárase la fuercia d’esi movimientu obreru asturianu combativu y los sos ámbitos d’aición; una izquierda crítica desencantada condenada tamién al “guetu” si nun toma otros caminos estratéxicos.

Siendo reales hai qu’añadir tamién qu’una completa unidá de les diferentes organizaciones que formen la denominada izquierda alternativa asturiana baxo una única sigla ye daqué que nun lo van compartir mayoritariamente nin organizaciones, nin militantes, nin votantes. En mayor o menor medida se tien un apreciu a unes sigles que representen una estratexa y un discursu políticu trabayáu durante años.

Entós, ¿Qué plantegar?

Si bien ye ciertu qu’esisten diferentes proyeutos políticos, tamién ye verdá qu’una serie de persones y sigles vienen compartiendo dende años atrás abondos espacios n’estremaes actividaes polítiques y sociales. Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística….

Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos….

Los citaos son dalgunos exemplos d’una llarga llista de causes qu’axunten. Causes reivindicaes con mayor o menor protagonismu y con unes u otres estratexes, pero a la fin toos ellos puntos ideolóxicos compartidos polos diferentes ámbitos y que xeneren puntos d’alcuentru na so defensa.

Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?

Unes candidatures que garanticen la independencia e identidá propia de los proyeutos particulares de cada una de les sigles que la formen; qu’axunten a partíos políticos, movimientos sociales y xente a nivel individual en base a unos principios asumibles por toos y que nun causen exclusión ente les diferentes sensibilidaes de la izquierda.

En definitiva: unes candidatures d’unidá popular con una estratexa práutica y eficaz que despierte la ilusión y la confianza ente toles persones con ciertes aspiraciones sociales y polítiques en común, que nun signifiquen la desaparición de les ya existentes y estremaes sigles y coles que facer un trabayu responsable y diariu saliendo del “guetu”.

Propuestes constructives

La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.

Crear conciencia, sumar fuercies y xenerar confianza e ilusión na población. Tomar contautu cola xente con propuestes reales en base a los principios ideolóxicos comunes y llegar a unes instituciones que pueden non ser el fin p’algamar les nueses aspiraciones, pero sí un importante mediu por conquistar pa poder trabayar y construir alternatives.

Queden dos años de trabayu pa materializar esta propuesta. De la voluntá de les persones que formen les colectividaes y d’una actuación responsable en comuña depende demostrar que los enfrentamientos ente compañeros tan bien pal patiu del colexu, pero qu’asina políticamente el camín ye más duru, esclusivu y frustrante.

Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.

Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.

--------------------------------------------------------

* Xicu Ariza Fernández (Xixón, 1989)Criáu nel barriu d’El Natahoyo anguañu ta emigráu a Leioa (Bizkaia) onde fae estudios de Periodismu na UPV-EHU.Militante de diferentes organizaciones y movimientos sociales dende temprana mocedá ye tamién coordinador del mediu de comunicación musical FNAST.NET y músicu del grupu Falanoncaduca.