Dende Darréu manifiesten lo siguiente:
"A lo llargo del fin de selmana del 6 y 7 de marzu Darréu entamó unes xornaes coincidiendo col día de la muyer trabayadora. El llema escoyíu pola nuesa muerganización de mocedá foi “ Trabayadora güei, trabayadora siempres”.
Los actos entamaron nel salón d’actos de la biblioteca pública de Llangréu el vienres 6 con una charra alderique, con conocios activistes escontra’l machismu, como un ex militante de la desaniciada Xorrecer ente otres presones. Amás Darréu tamién intervino na charra con una vocera que presentó la postura de Darréu n’algamar una sociedá non patriarcal y ensín prexuicios sexistes, nin discriminación que faga más facil algamar la nación que queremos, una Asturies llibre y socialista, poro, llibre d’estos prexuicios y desigualdaes que día a día podemos ver sobre la muyer especialmente. La charra-alderique foi presentada y moderada por un voceru de Darréu . El resultáu de la actividá del vienres foi perbono y la nuesa muerganización revolucionario valora sobretoo la bona asistencia de mocedá a l’actu.
Los actos siguieron el sabadu n’Uviéu dempués del manifestamientu pol asturianu na universidá nel cual tuvimos. Siguío d’esto, a les 19:00 Darréu entamó una proyeición de curtiométraxes sobre les desigualdaes dica la muyer y pa concienciar más sobre esti problema a la muncha xente qu’averose na llibreria paraxuga d’Uvieu, la cual enllenose. La proyeición allargose unos 50 minutos y comentaronse ente los asistentes los curtios. Les xornaes finaron dempúes de la proyeición con una espicha na mesma llibrería con xinta y sidra, onde les moces y mozos aldericaron sobro’l tema.
Dende Darréu tampocu vamos a escaecenos del mural que teniemos programáu pa facer na mañana del sábadu col llema de les xornaes y de temática feminista y revolucionaria. Al paezer al Ayuntamientu de Llangréu, encabezáu pol PSOE y Esther Díaz García, molesto-y que la mocedá tuviera la intención de facer un mural escontra’l patriarcáu y el machismu. Asina, prohibió tal actividá nuna muria pública pa estes xornaes pola muyer lluchadora y trabayadora. A esta persecución tamos yá avezaos en Darréu como yá pasó cola cellebración del DMR del pasáu ochobre y paeznos pergrave que l’Ayuntamientu llangreanu ñegue a la mocedá facer un mural o cualesquier actividá con estes vindicaciones. Dende Darréu asina, valoramos perbien el fin de selmana en conxuntu y caltenemos que siguiremos na llucha pola muyer trabayadora y escontra’l sexismu patriarcal.
Ensín la muyer, Asturies nun sedrá llibre.
Puxa Asturies llibre y socialista."
