viernes, 28 de agosto de 2009

Andecha Astur entama la campaña " Esto nun ye plan: 75.000 paraos".


Dende Andecha Astur tan acabantes de da-y anuncia a la so nueva campaña " Esto nun ye plan: 75.000 paraos". Con esta nueva iniciativa Andecha quier denunciar el nuevu Plan E que trata de dinamizar la economía frente la cris y la crisis que sofre'l pais.

Pa la organización independentista esti plan nun ye namai qu'un parche, que bien podía llamase "Plan Zapateru o Plan Tini". Denden Andecha caltienen "que'l Plan E ta valiendo pa que s'enriquezcan los de siempres y nun contribuye un res n'amenorgar el paru, la precariedá y la cris económica permanente na que vivimos".

la organización política señala amás el despilfarru que suponen estes valles que ta poniendo l'executivu español. Sorrayen qu'esti "Plan Español para el Estímulo de la Economía y del Empleo” solo afeutará positivamente n'entidáes bancaries y empreses de la construición.

A.A. amesta tamién que col dineru de toles valles llantáes n'Asturies "podría pagase un sueldu de 1200 euros a más de 100 trabayadorxs durante un añu".

Pa más información sobre esta nueva campaña de la organización política nacionaliega dende A.A. anuncien la direición na rede www.estonunyeplan.com

jueves, 27 de agosto de 2009

La XDLLA califica los diez años de presidencia d’Areces como un retrasu palos derechos llingüisticos


Pala xunta pola defensa de la llingua asturiana la situación xeneral del idioma foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de derechos fundamentales de les persones qu’usen l’asturianu.

Dase’l casu "qu’asistimos, inclusive, a la persecución de l’Alministración a ciudadanos qu’escueyen llibremente la llingua asturiana pa la so vida normal" sorrayen dende la XDLLA.

Pala xunta "la política arecista, nesti tiempu, nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches veces, tomando decisiones, por acción o omisión, perxudiciales pal futuru del idioma. Nun se vio nenguna midida efectiva p’ameyorar la situación del asturianu nel sistema educativu (sigue la precariedá en tolos niveles), nos medios de comunicación (con una presencia marxinal nos medios públicos) y nos diferentes organismos de l’Alministración (qu’escaecen sistemáticamente lo necesario que ye la tresversalidá de les polítiques llingüístiques)".

L’avance producíu cola oficialización de la toponimia de dellos conceyos, exemplu de participación ciudadana y procuru técnicu, vese burlláu de contino pola falta sistemática de cumplimientu poles propies instancies del Principáu y poles entidaes vinculaes directamente a ésti (la Radiotelevisón del Principáu d’Asturies, Caxastur... ente otres).

Por eso, cuando ta acabando la triste y buxa etapa d’inoperacia política del arecismu, la XDLLA vien de pidir a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera sorrayen "qu’habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru".


fonte: Aruelu.

miércoles, 26 de agosto de 2009

Entrevista a Mariu Arbesú, militante d'Andecha Astur.


Falemos con Mariu Arbesú, candidatu d'Andecha Astur nes últimes elleiciones europées sobre la propuesta de campaña de xunidá d'aición que ficiera en campaña.

Pasaron dellos meses dende aquella, foi nel Día d'Andecha nel aniciu de la campaña ellectoral y quiximos saber en que quedara aquella propuesta de SOS Asturies. Más cuando ta ehí yá l'ochu setiembre, Día de la Nación Asturiana.

Na campaña ellectoral prometisti que dempués de les elleiciones, fueren los que fueren los resultaos, dibes plantegar una propuesta de “xunidá d’aición” alredor del llema “SOS Asturies”. Entovía nun hai nada público. ¿Qué pasó dende entós?

Ye cierto que nun hai nada público pero, sin que lo ficieremos público, sí qu’hebio bastante movimientu. Concretamente foi nel actu políticu del Día d’Andecha en Ribeseya onde plantegué por primera vez la idea. Dixe espresamente que si n’Andecha lo teniemos claro intentaríamos facela lo mas abierta posible y llevala a aquellos seutores de la sociedá que tan fartos de les carencies democrátiques y de la crís permanente na que vive Asturies. La propuesta d’aquella taba mui verde: cenciellamente proponía, dientru la nuesa táutica de xunidá d’aición, una campaña baxo’l llema SOS Asturies. Dende entós a esta parte fuimos aldericando sobre’l tema pero nun sólo dientru d’Andecha Astur sinon que quiximos sacar l’alderique a fuera tamién. Presisamente un de los primeros pasos que dí dempués de les elleiciones foi falar d’esto con bastante xente que nun ye d’Andecha pero que venimos moviendonos o coincidiendo muncho casi siempres nos mesmos espacios. Posteriormente de forma yá formal treslladámosla a les organizaciones. Fae ya de esto algo menos d’un mes.

Vamos empincipiar polo primero, ¿Qué ye eso de la xunidá d’aición? ¿En que consiste la propuesta y a quién va dirixida?

Trátase de crear un espaciu de coincidencia pa trabayar a comuña con aquellos qu’asuman esta táutica ensin más condicionante que’l compartir esta necesidá de trabayu xunitariu en defensa de los drechos presonales y colleutivos del Pueblu Asturianu. Una de les primeres coses que tamos plantegando ye qu’esi espaciu sirva pa mantener una comunicación permanente, intercambiu d’información y alderique ente les organizaciones asina como organizar y coordinar aiciones o campañes comunes.

Daquién podría pensar, viendo’l funcionamientu de la política institucional ya institucionalista, que se quier facer dalgún tipu de coalición ellectoral o que respuende a estratexes ellectoralistes. ¿Ye asina?

Non. N’absolutu. Una de les coses que precisamente facilita más el que esta idea puea salir bien ye que nesti intre nun hai unes elleiciones a la vista. Sería radicalmente irreal plantegar nesti momentu una xuntanza elleutoral o daqué asemeyao. Lo que nós plantegamos ye entamar la casa polos cimientos. Xenerar un espaciu que permita dir conociendonos, ver cuales son les coincidencies y cuales les diferencies y a partir de les coses nes que coincidimos crear espacios de llucha y trabayu en comun pero partiendo siempres de la soberanía de les organizaciones y persones que quieran tirar por ello. La idea ye que les organizaciones continuen igualmente cola so actividá y la so dinamica propia y que dende esti espaciu se respete dafechu la so propia percepción de la rialidá y los sos analís políticos.

Vemos que nun ye dalgo zarrao y onde se respeta dafechu l’autonomía y soberanía d’organizaciones y persones. Si hai sectores que nun ven clara la iniciativa agora, ¿van poder amestase más alantre?

Sí, esi ye otru aspectu interesante de la propuesta d’Andecha Astur. Ye abierta y pretende ser un procesu llargu nel tiempu nel que habrá que dir incorporando a más sectores sociales, políticos, sindicales a esta táutica y concretamente a la campaña de SOS ASTURIES. Eso sí, entendiendo que, lloxicamente la propuesta ta dafechamente pesllada a aquelles presones y partíos políticos responsables d’esta situación como FSA-PSOE y IU-LV-BA.

Y.. ¿onde ta’l puntu d’aniciu?, ¿cómo se quier echar a andar esti marcu de xunidá d’aición?

La idea ye entamar con una campaña llarga nel tiempu baxo’l llema SOS Asturies. Ye un lema que podemos compartir toos y que habría que dotalu d’unos contenidos de denuncia. Concretamente nosotros pensamos n’articular la campaña baxo esi lema denunciando dos cuestiones: les carencies democratiques y la falta de drechos políticos que carecemos n’Asturies asina como la crisis permanente a la que nos somete la política económica colonial del estáu español pa col nuesu país. Ye dicir: dos o tres puntos de fondu políticu y un lema o llogotipu qu’identifique la campaña y que sería SOS Asturies. Sería una campaña ambiciosa quiciabes como nunca se vió n’Asturies.

Ta ehí l’ochu setiembre, el Día de la Nación Asturiana ¿pué haber novedaes esti añu?

Sí. Nós tresllademos a les organizaciones una propuesta el 9 d’agostu concretamente que consistía en entamar el 8 de setiembre con la campaña de SOS Asturies cellebrando un Manifestamientu conxuntu con motivu del Díi de la Nación Asturiana, baxo’l mencionáu lema, con baberu compartíu, convocatoria individual (de forma que ca muerganización puea da-y el matiz que camiente más afayaizu, dientru’l lema xeneral) y con comunicáu final conxuntu, en función de los alcuerdos que s’algamen.

Bono, entós paez que dalgo pue salir…

Sí. Esa ye la idea. Tamos viendo que nun toes les que mos prestaría. Agostu son siempres feches difíciles pa sacar alantre proyeutos d’esti tipu y eso ta repercutiendo bastante no despacio que va too. Hai espectatives de qu’esta selmana se concrete alguna cosa de cara al 8 de setiembre con algunes organizaciones. Vemos que dende los seutores más independentistes asumese mui bien la llinia que proponemos y dende les organizaciones mas tradicionales d’izquierda tamién. Ente muerganizaciones como Darréu, CSI o Pcpe además de otros coleutivos sociales y políticos la acoyida foi mui bona dientru, lloxicamente, de les dificultaes esperables. Por embargu, parezme que costará más implicar a los sectores del nacionalismu más moderáu. Por exemplu’l PAS y la UNA dempués de más de 15 dies cola propuesta sobre la mesa entá nun mos contestaron. En tou casu, sabemos que estes coses requieren paciencia y nós siguiremos esforzándonos nesti apueste xunitariu incorporando a esta táutica a más sectores políticos, sindicales, sociales, culturales, ecoloxistes…

Fonte: Infoasturies.

Andecha Astur entamó esti pasáu domingu un actu n'alcordanza del Conseyu Soberanu.



L’actu consistió na instalación d’un monolitu, la intervención de Daniel Cueli y de Rafael Fernandez Tomás, nietu de Belarmino Tomás, la llectura d’un saludu de Joan Tardá, diputáu d’ERC nel parllamentu español y una xinta popular.

Esti domingu 23 d’agostu, Andecha Astur entamó por tercer añu consecutivu l’actu d’alcordanza del Conseyu Soberanu d’Asturies y Lleón coincidiendo col aniversariu de la Declaración de Soberanía de 1937. La prinipal novedá d’esti añu foi el llugar escoyíu pal actu, pasando de la Plaza del Parchís de Xixón, al tamién simbólicu Puertu Tarna. Nel Puertu instalóse un monolitu, qu’años atrás, l’Ayuntamientu de Xixón torgara la so instalación nesti Conceyu, con una placa conmemorativa.

Pasaes les 13:30 hores empincipió l’actu cola intervención de Daniel Cueli voceru d’Andecha Astur. Cueli sorrayó l’exemplu d’una Asturies llibre y socialista. Llibre “porque l’enfotu de gobernase ella mesma foi tan ñidiu que Belarmino Tomás, comu Presidente'l Conseyu Soberanu, comunicó la declaración de soberanía a la Sociedá de Naciones precursora de la ONU y constituyía sólo por Estaos.” y Socialista “porque’l Conseyu Soberanu, col sofitu popular, lluchaba entós pa desaniciar l’aparatu económicu de la burguesía y el sistema de dominación capitalista del Estáu español sobro Asturies, sostituyéndolos por una organización sociopolítica propia, asturiana y socialista”.

Daniel Cueli señaló les dos razones poles que se facía l’actu “pa remembra-y a la izquierda española y a toles sos pigarres que va 72 años los asturianos y asturianes, al traviés del Conseyu Soberanu, decidieren qu’Asturies yera’l so ámbetu propiu de decisión, constituyéndose nuna república asturiana, socialista y soberana” y la d’homenaxear “a esos asturianos y asturianes, espresando’l nuesu compromisu cola so xesta, porque creyemos que’l so determín políticu foi l’acertáu y porque la so memoria sigue siendo anguañu un poderosu llamáu a defender coleutivamente un proyeutu nacional p’Asturies”.
Nel actu participó Rafael Fernández Tomás, nietu de Belarmino Tomás y fíu de Rafael Fernández y Pura Tomás, qu’entamó la so intervención dando les gracies a Andecha Astur polos actos n’alcordanza a Belarmino Tomás que vien faciendo nos últimos años y sorrayó l’allegría que-y diera atopar les plaques d’alcordanza puestes nel Cimenteriu de Pando. Rafael Fernández Tomás defendió la trayeutoria política de so güelu, Presidente del Conseyu Soberanu, y los determinos que foi tomando a lo llargo de la mesma, incluyíu'l de declarar la soberanía d'Asturies, dalgo qu'analizó comu una consecuencia lóxica derivada de les esperiencies vivíes por Belarmino en 1917 y 1934, cuando Asturies quedó sola na llucha revolucionaria.

Rafael, que ñació en México y lleva pocu más de dos años viviendo n'Asturies, criticó fuertemente a los dirixentes actuales del PSOE, tantu pol escaezu al que someten a Belarmino Tomás y a los sos conxéneres, y a los fechos hestóricos que progatonizaren, comu pola situación na que caltienen a l'Asturies d'anguañu. De la mesma manera, dio ánimu a los militantes d'Andecha Astur presentes nel actu pa que siguieren cola so llucha y recomendó-yos pacencia, porque 'les coses acaben llegando, igual que llegaren va 70 años'.

Darréu, y enantes de finar l'actu, lleóse un saludu unviáu por Joan Tardá i Coma, diputáu d'Esquerra Republicana de Catalunya (ERC) nel Congresu español, que taba convidáu al mesmu pero qu'a la fin nun pudo asistir pola coincidencia del actu entamáu por Andecha Astur con otru d'ERC en Tarragona, nel que tenía qu'intervenir.

Tardá tresmitió en nome d’Esquerra “l’apoyu y solidaridá nel día la independencia de la vuesa nación”. Nel saludu unviáu, el diputáu catalán
sorrayó que “Más allá de la estrecha fraternidá ente los nuestros pueblos, la llucha conxunta a favor de la llibertá plena y soberana de los
pueblos ibéricos ye pal republicanismu catalán una condición imprescindible nel oxetivu de francer las cadenes de la Constitución Española monárquica, que nos niega’l derechu a exercer el derechu al autodetermín”. “Ye por ello - fina’l saludu- que vos instamos a perseverar los ideales compartíos de xusticia social y llibertá nacional, llugar d’alcuentru ente tolos homes y muyeres qu’aspiramos a una sociedá superadora de la esplotación”.





Noticia estrayía d'Infoasturies.net


domingo, 23 de agosto de 2009

72 aniversariu del Conseyu Soberanu d'Asturies y LLión, cabera declaración de soberanía asturiana.


El Conseyu Soberanu d'Asturies y Llión, foi'l muérganu alministrativu que socedió al Conseyu Interprovincial d'Asturies y Llión y que taba presidíu pol socialista asturianu Belarmino Tomás que llegó a pidir l'ingresu na Sociedá de Naciones

El 24 d'agostu fírmase'l decretu qu'afita la soberanía de los territorios alministraos pol Conseyu Interprovincial d'Asturies y Llión pasando a ser entoncienes el Conseyu Soberanu d'Asturies y Llión. El 26 d'agostu saldrá espublizáu na prensa [1] dicho decreto. Suel dase la fecha del 25 d'agostu como la qu'entró en vigor la declaración de soberanía del Conseyu.

  • El testu constitucional del conseyu entamaba asina:

"Artículu 1u.– El Conseyu d'Asturies y Llión, dende la fecha y hora d'esti Decretu, constitúise en Conseyu Soberanu de gobiernu de tol territoriu de la so xurisdicción, y a elli queden dafechamente sometíes toles xurisdicciones y organismos civiles y militares que funcionen y funcionaren no socesivo dientro del territoriu referíu.

Artículu 2u.– El propiu Conseyu Soberanu, a la vista los acontecimientos favoratibles que se produzan nel trescursu de la guerra, determinará'l momentu de dexar les sos funciones soberanes que güei asume.

Artículu 3u.– D'esti Decretu daráse cuenta al gobiernu la República pa la so convalidación; ensin perxuiciu de la so absoluta vixencia, impuesta pol imperiu les circunstancies, dende esti mesmu momentu de la so promulgación.

Dáu en Xixón, a venticuatro hores del día venticuatro d'agostu de mil novecientos treinta y siete."

sta declaración nun se fexo ensin polémiques tanto internes (dientro del Conseyu) como esternes (nos gobernantes de la Republica española). La propuesta féxola Belarmino Tomás en xunta estraordinaria y tamién al sofitaben la mayoría de dirixentes del PSOE y por Segundo Blanco y otros responsables de la CNT. El PCE taba a la escontra de la decisión. Los dos representantes de la UGT tuvieron una opinión diferente caún. Los conseyeros d'Izquierda Republicana reprobaron la decisión. Les tensiones llevaron a enfrentamientos ente dalgunos conseyeros que llegaron a los insultos personales. El xefe del exercitu y el comisariu políticu nelli tamién veíen bien el convertise en soberanu.

D'otra miente'l Gobiernu la República censuró l'actitú del Conseyu Soberanu, sobremanera cuando ésti se dirixó a la Sociedá de Naciones. El Ministru de la Gobernación tresmitió a Belarmino Tomás la "so sospresa y el so disgustu". El ministru de Defensa de la República Indalecio Prieto calificó de "disparatada" la decisión y el mesmu Presidente Manuel Azaña criticó la declaración. El gobiernu la Republica llegó a pedir a Belarmino Tomás que se presentare ente elli yendo a la fin los conseyeros Segundo Blanco y Amador Fernández "Amadorín". El conceyu nun fizo que se camudare denguna decisión. Llegó a convocase una xunta del Parllamentu pa tratar la cuestión d'Asturies anque nun llegó a cellebrase polos acontecimientos bélicos.

El Conseyu d'Asturies y Llión dende l'entamu taba conformáu por miembros del PSOE, PCE, Izquierda Republicana, Mocedaes Socialistes Unificaes, Mocedaes llibertaries, FAI, UXT y CNT. Los miebros del Conseyu Soberanu d'Asturies y Lleón son los que vienen darréu:
Cargu Nome Organización
Presidencia y Guerra Belarmino Tomás PSOE
Industria Segundo Blanco CNT
Trabayu Onofre García FAI
Sanidá Ramón G. Posada JJ LL
Facienda Rafael Fernández JSU
Xusticia y Orden Públicu Luis Roca de Albornoz /
Rafael Fernández
JSU
Agricultura Gonzalo López PCE
Marina Mercante Valentín Calleja UGT
Pesca Ramón Álvarez Palomo FAI
Instruición Pública Juan Ambou PCE
Obres Públiques José Maldonado Izq. Rep.
Asistencia Social Maximiliano Llamedo CNT
Comerciu Amador Fernández PSOE
Comunicaciones Avelino Roces UGT
Propaganda Antonio Ortega Izq. Rep.

Una vez soberanu, el Conseyu asumió plenes responsabilidaes civiles y militares de gobiernu.

El Conseyu Soberanu caltuvo les conseyeríes que veníen furrulando enantes de la soberanía:

  • Guerra
  • Comerciu y Mines
  • Marina
  • Facienda
  • Xusticia
  • Comunicaciones
  • Agricultura
  • Istrucción Pública
  • Industria
  • Sofitu Social
  • Trabayu
  • Pesca
  • Sanidá Civil
  • Obres públiques
  • Propaganda

Pa coles conseyeríes crearanse agora unes Comisiones:

  • Guerra
  • Industries y fortificaciones
  • Abastos, Tresportes y Evacuación
  • Sofitu Social y Sanidá
  • Orde Públicu, Xusticia, Propaganda y Comunicaciones;
  • Economía

Dende la declaración de Soberanía'l Conseyu toma delles midíes nos diferentes campos xurdíos de "constitúise en Conseyu Soberanu de gobiernu de tol territoriu de la so xurisdicción, y a elli queden dafechamente sometíes toles xurisdicciones y organismos civiles y militares". Por exemplu nel tarrén xudicial creáronse Tribunales Permanentes de Guerra les penes nestos tribunales y nel Tribunal Popular yá nun necesitaron de notificación al gobiernu español valiendo pal so cumplimientu la notificación al Conseyu d'Asturies. Nél ámbitu militar el Conseyu Soberanu quitó-y el mandu al xeneral Gámir Urribarri que tenia la xefatura del Exercitu del Norte nomando xefe militar al coronel Adolfo Prada Vaquero. El Conseyu Soberanu tomará tamién midies de control de fronteres y aduanes.

D'otra miente el Conseyu d'Asturies y Lleón yá enantes de la declaración de soberania emitía moneda y sellos. Nesti puntu hai alderique sobre el Conseyu tendría o non capacidá llegal o competencies pa facelo. El casu ye que'l Conseyu Soberanu emitió billetes divisionarios [2] Los billetes son los conocíos popularmente como Belarminos de cursu llegal fasta la ocupación d'Asturies pol exercitu de Franco.

Nos tiempos finales el Conseyu Soberanu d'Asturies y Llión tuvo la so sé na conocía como Casa Blanca, tovía güei na Plaza'l Parchis de Xixón. El conseyu Sobernu disolvióse tres la ocupación total de les fuercies franquistes d'Asturies. Dende'l Conseyu Soberanu teníase la esperanza na llegada l'iviernu un mediu meyor pa la resistencia pola importancia de la orografía asturiana, esi añu la ñeve tardó en cayer. La situación militar tornóse insostenible pal Conseyu que a la fin intentó apautar una rendición con Francisco Franco que namái aceutaba una rendición incondicional. El 20 d'ochobre de 1937 acabó la resistencia. Los miembros del Conseyu tuvieron que fuxir embarcando camín de Francia.






viernes, 21 de agosto de 2009

La cara del gobiernu " Non Nacionalista " n'Euskal Herria.

Detenciones, cierres de chigres y sedes sociales, prohibición de páxines web y portales n'internet, prohibición de propaganda, persecuciones, retirada de semeyes de presos políticos, illegalización y cargues en manifestaciones pacífiques...afayaivos a la Euskal Herria democrática del señor Patxi López, onde "refugamos cualesquier nacionalismu"... menos l'español claro.



Nun hai represión qu'apare a un pueblu armáu d'idegues

EUSKAL HERRIA AURRERA!!!

jueves, 20 de agosto de 2009

Bones noticies pa los antitaurinos.


Pal 2010 Xixón pue dexar de celebrar la feria taurina




Como se vien denunciando per parte d’estremaes asociaciones de diferente calter, la feria taurina qu’anecia n’ufiertar el Conceyu de Xixón, amás de ser una imposición cultural más y una auténtica práutica xabazmente sádica, nun sal rentable pa naide. Les caberes declaraciones del empresariu Carlos Zúñiga amuésenlo claramente, asegura que la feria taurina de Begoña lleñe de da-y beneficios provoca perdides nel so balance económicu y alvierte que pue que l’año que vien nun quiera continuar llevando El Bibio.

Per otru llau, el Conceyal de Festexos, José Manuel Sariego, retrúca-y con abonda claridá: «Nós, como alministración pública, lo que tenemos que facer ye un pliegu de condiciones y tol mundu ye llibre de presentase o de nun facelo. Yo nun voi a entrar a valorar la xestión económica de Carlos Zúñiga, eso ye cosa de so, nosotros llendámonos a cumplir la llei». Y esclaria que tien nidio que na mente del Conceyu nun ta, pel momentu, el camudar eses condiciones p’axudicar la plaza. «Van a ser mui asemeyaes, estudiaránse, veránse y sedrán asoleyaes, yo nun voi a anticipar nenguna condición porque nun ye un tema trescendente, pero na mio opinión va a ser mui paecío a ocasiones anteriores».

Al paecer, según confiesa Zúñiga, el baxo preciu de les entraes y l’alto coste de los toreros que formen el cartelu taurín fain que seya imposible cuadrar les cuentes na feria taurina de Begoña, motivu pol que facía público el so malestar; y a lo que Sariego nun quier saber nada: «Yo nun conozo les cuentes del empresariu nin tengo por qué conoceles, nós ponemos unes condiciones y al que-y interese preséntase y al que non, non».


Estrayíu d'Aruelu.com


"Esti añu el palu foi considerable"

Nuna entrevista n'El Comercio, l'empresariu taurín d'EL Bibio dende va 8 años, Carlos Zuñiga, diz que nun-y sal rentable facer la feria taurina de Xixón. El númberu d'abonaos baxó de 3.305 del añu pasáu a 3.201 d'esti. «Pueo dicir que llevanté a la afición n'Asturies col mi bolsu» diz arguyosu l'empresariu vallisoletanu dueñu Circuitos Taurinos SL.

L'empresariu Carlos Zuñiga revela nuna entrevista n'El Comercio que nun-y sal rentable'l facer feries taurines en Xixón. Zuñiga quéxase de que les entraes son "mui barates" y que "les cuentes nun lleguen a salir nunca". D'otra miente sorraya que nes "corríes denomaes mediátiques hebo muncho meyor rempuesta".

A la entruga de si se ganaron abonaos, l'empresariu taurín retrucó que anque "esperabemos superar" la cifra de 3.305 del añu pasáu a la fin baxo a 3.201. Zuñiga retruca a si ganó munches perres con un "si-y dixera lo que perdí asustaríase", "munchisimes perres" porque "el preciu de la feria ye mui caru y les entraes mui barates. Nun hai feries más barates que les de Xixón y Burgos y asina nos va, aguantando costes enormes" y esclaria l'empresariu "pa nós nun tien denguna rentabilidá".

Zuñiga diz tar pensandose si presentase al concursu y va "facer númberos" y fala "col Ayuntamientu pa buscar la fórmula. Esti añu el palu foi considerable". L'empresariu camienta que l'Ayuntamientu debería camudar los términos del próximu concursu "Yo daré-yos los númberos d'esti añu, con factures, pa que los vean y yá falaremos".

Tres ocho años esplotando la plaza de toros y organizando feries en Xixón onde se mataron cientos de toros, l'empresariu diz haber cumplio oxetivos "artísticos" pero "económicos non" y amuesase arguyosu de llevantar l'afición n'Asturies a golpe de talonariu "col so bolsu".

Ye dificil d'entender lo de la industria española de la tauromaquía, Zuñiga tal paez una "ONG torera" envede una empresa.


Noticia d'Infoasturies.


martes, 18 de agosto de 2009

Andecha Astur va remenbrar la declaración del Conseyu Soberanu en Tarna.




Andecha Astur prepara un actu pa esti domingu 23 d'agostu nel Puertu Tarna pa remenbrar el 73 aniversariu del Conseyu Soberanu d'Asturies y Llión. La formación política asoleya na so web el comunicáu que vien darréu:

"Metanes la Guerra Civil, a la vista de los avances del exércitu facista español haza’l norte peninsular, el Conseyu d’Asturies y Lleón, másima institución de gobiernu del nuesu país mentantu la contienda, decide declarase independiente de la República española na nueche del 24 d’agostu de 1937, pasando a denomase Conseyu Soberanu d’Asturies y Lleón y asumiendo toles competencies polítiques, civiles y militares nel nuesu territoriu.

La dixebra de la República española, la que se ñegó meses enantes a xulgar a los responsables del xenocidiu cometíu pol so propiu exércitu n’Asturies n’ochobre de 1934, enxamás foi reconocía pola mesma; y ye que la declaración de soberanía roblada’l 24 d’agostu suponía la sostitución del Estáu español por un Estáu asturianu, que nos tres meses qu’esistió, fasta que foi invadíu pol exércitu facista español, pidió’l so ingresu na Sociedá de Naciones y punxo en circulación moneda y sellos propios.

Pesi a que nel Conseyu Soberanu tuvieron presencia PSOE y PCE, güei la izquierda española escaeció conscientemente aquellos fechos, nun sólo polo que supusieren pa la lliberación nacional d’Asturies, sinon polo que sinificaren tamién na so lliberación social. Abasta con remembrar que’l primer decretu robláu pol Conseyu Soberanu determinaba la nacionalización de la industria y el so sometimientu al control obreru.

Anguañu, namái la organización política Andecha Astur conmemora tan siñalada fecha na hestoria d’Asturies, el 24 d’agostu, el Día de la Independencia, rindiendo homenax a aquellos asturianos y asturianes que decidieren qu’Asturies yera’l so ámbetu propiu de decisión, porque la so determinación política, l’apuesta por una Asturies Llibre y Socialista, foi l’acertada y porque la so memoria sigui siendo anguañu un poderosu llamáu a defender coleutivamente un proyeutu nacional p’Asturies.

Poro, Andecha Astur entama un actu n’alcordanza del Conseyu Soberanu d’Asturies y Lleón, coincidiendo col 72 aniversariu de la robla de la declaración de soberanía. El mesmu ta programáu pal prósimu domingu, 23 d’agostu, nel Puertu Tarna (Casu), llugar onde, de magar les 13’30 hores, tendrá llugar una intervención política, la colocación d’una placa conmemorativa nun monolitu llantáu al efeutu y una xinta popular."

Aición de Darréu na Feria Muestres escontra la emigración de la mocedá


Darréu aprovechó, esti domingu 16, l'últimu día de la Feria Muestres de Xixón pa denunciar "la crisis permanente na que s'atopa Asturies" y, n'especial, la emigración de la mocedá asturiano con un actu dientro la so campaña permanente "qu'emigre Areces!!!".
L'actu de la organización de mocedá foi na entrada principal del recintu ferial, onde militantes independentistes repartieron cientos de fueyes col comunicáu asoleyáu por Darréu trés les ultimes cifres d'emigración de la mocedá y, tamién, amosaron una pancarta na que podía lleese'l llema "Qu'emigre Areces" .
EL conocíu personaxeTini Toon Areces tamién tuvo presente pa pesllar la 53 edición de la Feria de Muestres en Xixón y nun dexó d'incordiar a los y les manifestantes y de saludar a les munches persones que s'atopaben ellí.

Con esti actu Darréu quier siguir dándo-y continuidá a la campaña Qu'emigre Areces, entamada va tiempu, "pa denunciar la emigración forciada a la que tienen sometío a la mocedá n'Asturies". Darréu píde-y a Areces "que tome medíes riales y efectives pa iguar la llaceriosa situación llaboral que carez Asturies anguañu" y que pida perdón "poles mentires vertíes a la sociedá asturiano, n’especial a la mocedá, tocántenes la emigración".


Estrayíu d'Infoasturies.net

Ésitu na manifestación antitaurina peles cais de Xixón



Yeren les 16:45 hores cuando entamó la manifestación antitaurina convocada pola asociación animalista Anadel de la xixonesa Plaza San Miguel. Más de 400 persones aconceyaron pa glayar en favor de los derechos de los animales y contra les corríes de gües.

Peles cais de Xixón glayáronse conseñes como "Toreros y taurinos, son toos asesinos" o "Asturies llibre del colonialismu español". Na manifestación asistieron persones de toles edaes y viéronse diferentes pancartes de la organización convocante, Anadel, Fai!, Darréu, asociaciones animalistes y representantes d’organizaciones polítiques y sociales.

Delantre la Plaza "El Bibio" de titularidá conceyil, anque xestionada pola empresa Circuitos Taurinos SL, cientos d’antitaurinos llegaron a les 18:00 hores y concentráronse a la entrada la mesma, siendo oxetu de provocaciones pola parte de los taurinos, ensin que la policia interviniere dafechu.


Un emocionáu conceyal de Festexos de Xixón José Manuel Sariego (PSOE), natural de Santibañez de la Peña (Palencia) sorrayó que "ye ún de los cartelos meyor armaos de los caberos años" y amosó apreciu a la empresa Circuitos Taurinos SL "l’esfuerciu por que Xixón tenga notoriedá y atraición " nel mundu de la tauromaquia. L’empresariu vallisoletanu Carlos Zuñiga ye ún de los fundadores de la empresa que xestiona la Plaza " El Bibio", que se creó nel añu 1995, xuntu colos sos dos fios, Carlos y Cristina. Esta empresa tamién xestiona diferentes places nel Estáu frances.

La Casa conceyu de Xixón sofita esta iniciativa yá que’l mayestru de ceremonies del actu de presentación de les xornaes taurines foi’l propíu conceyal de Festexos, el socialista José Manuel Sariego.

Los medios de comunicación de mases nun duldaron en criminalizar a los manifestantes amenorgando enforma’l númberu d’asistentes y llegando a pidir inclusive la so detención, amás d’inventar fechos que nunca nun esistieron tapeciendo les provocaciones taurines y l’amagu de carga policial.

Fonte noticia: Aruelu.

Semeyes: Infoasturies.






domingo, 16 de agosto de 2009

Dalgunes frases y cites del compañeru Fidel Castro Ruz.


Unos díis dempués del so cumpleaños asoleyamos una serie de frases que'l compañeru Fidel dexó yá pa la hestoria y que mos puen guiar a tolxs revolucionarixs de mundiu:

" Dalgunos imperialistes s'entruguen por qué aidamos a los angolanos, que qué intereses tenemos nós ellí. Ellos tan avezaos a pensar que cuando un país fai daquéu ye porque ta buscando petróleo, o cobre o diamante, o dalgún recursu ñatural. ¡ Non ! nós nun perseguimos dengún interés material, y ye llóxicu que los imperialistes nun lo entiendan, porque se guíen por criterios esclusivamente chovinistes".

" Nel so 137 aniversariu, con Maceo decimos: Quien intente apoderase de Cuba recoyerá'l polvu de so tierra, añegáu en sangre, si nun perez na contienda".

"¡Cuando un pueblu enérxicu y viril l.lora, la inxusticia tiembla!".

" Les idegues nun necesiten nin de les armes, na midía en que seyan capaces de conquistar a les grandes mases".

" Nin los muertos puen descansar en paz nun país oprimíu".

" Ser internacionalista ye saldar nuesa propia deuda cola humanidá. Quien nun seya capaz de lluchar por otros, nun sedrá nunca suficientemente capaz de lluchar por si mesmu".

" Si se me considera un mitu, ye méritu de los Estáos Xuníos".

" Socialismu o muerte".

" Nun solo sabremos resistir cualesquier agresión sinon que sabremos vencer a cualesquier agresión y nuevamente nun tendríemos otra disyuntiva qu'aquella con que entamamos la llucha revolucionario, la de la llibertá o la muerte, solo qu'agora llibertá quier dicir patria y la disyuntiva nuesa sedría patria o muerte".

" Condergarme, nun importa, la hestoria absolverame".

" Esta humanidá tién ansies de xusticia".

" Si salgo aporto, si aporto entro, si entro trunfo".


" A los pueblos munches vegáes falenlos de democracia los mesmos que tan ñegandosela nel so propiu suelu".

" Argumentos tenemos millones pa defendenos; el capitalismu ye indefendible, l'imperialismu ye indefendible; el socialismu, cualesquier que seyan los erros que puean cometer los homes- y nun habrá denguna obra humana na que los homes nun cometan erros-, ye lo más noble, lo más xusto y lo más dignu que puea llevar a cabu".


" Ye rialmente ablucante qué puxarra de sistema ye'l capitalismu, que nun pue garantizar nin a so propia xente emplegu, nun pue garantizar salú, la educación adecuada; que nun pue impedir que la mocedá se corrompa coles drogues, col xuegu, colos vicios de toles tribes".


" Nun se pue tar en guerra y de folixa"
.

" Nun deseyamos que'l sangre de cubanos y norteamericanos seya derrmada nuna guerra. Nun deseyamos qu'un incalculable númberu de vides, de presones que puen ser collacies, pierdanse nuna contienda. Pero enxamás un pueblu tuvo coses tan sagráes que defender nin convincciones tan fonderes poles cuales lluchar, de tal mena, que prefier desapaecer de la faz de la Tierra enantes d'arrenunciar a la obrea noble y xenerosa pola cual munches xeneraciones de cubanos pagaron el cimeru coste de munches vides de sos meyores fios. Mos acompaña la convicción más fondera de que les idegues puen más que les armes por sofisticáes y poderoses qu'estes seyan. Digamos como'l Che, cuando se despidió de nós: ¡ Hasta la Victoria Siempres!".


" Dientru la revolución too, escontra la revolución nada".

" Nuesu mensaxe aportará a tolos requexos de la Tierra, y nuesa llucha sedrá exemplu. El mundiu, ca vegada más ingobernable, lluchará hasta que l'hexemonismu y l'avasayamientu de los pueblos seyan talmente insostenibles".










viernes, 14 de agosto de 2009

Darréu Xixón peslló la plaza de toros del Bibio.



Un garrapiellu de militantes de Darréu pesllaron simbolicamente ayeri de tarde la plaza de toros de Xixón.

Nel actu, la organización de mocedá indepedentista colocó delles pancartes na Plaza'l Bibio escontra la tauromaquia n'Asturies. Na qu'escolingaron zarrando la puerta principal podía lleese "Plaza pesllá por turtora".


Los mozos y moces de Darréu completaron la aición apegando dalguna pancarta más nes zones cercanes a la plaza. Con esti actu Darréu sigue cola so "Selmana Antitaurina" denunciando "les matances retransmitíes y públiques que se tan desendolcando nel recintu xixonés, y el gastu públicu qu'estes suponen, amás del factor d'imposición cultural que traen a Asturies".


Yá salió a la cai "Írguite", voceru nacional de Darréu.


Yá se pue mercar la revista en dellos puntos de venta del país. El preciu-collaboración de la mesma ye de namás 1 euru, qu'aida a la continuidá d'esti proyeutu autoxestionáu que fai Darréu.

La revista yá se ta distribuyendo y pue atopáse nuna primer riestra de puntos de venta : Llar d'Andecha de Noreña, na Llibrería Paraxuga d'Uviéu, nel chigre L'Ayalga de Xixón y nel Bar B12 y la Cervecería Sheffield de Llangréu. Prosimamente diremos aumentando puntos de venta n'otres poblaciones del país.

La revista de 21 páxines contién ente otres coses un especial del DMR'08 a tou collor, otru especial del Día de la Muyer Trabayadora'08. Un reportaxe del Ensame República Asturiana, uan entrevista internacional a Azarug y otra a Arma X. Completen la revista una seición d'opinión moza, una de la cabera información y aición de Darréu y otra seición sobre l'ámbitu cultural asturiano.

Darréu tamiién va vender Irguite nos actos nos que participa o convoca y nel puestu informativu y de material.

jueves, 13 de agosto de 2009

Fai! va participar na movilización antitaurina de Xixón


D'esta manera, Fai! quier tar presente na manifestación convocada por ANADEL na villa xixonesa, qu'entamará a les 16.30 hores d'esti sábadu na Plazuela San Miguel. Amás, la organización d'esquierda soberanista asoleya 2.000 pegatines col lema "Esto ye Asturies: Nin tortura animal nin imposición cultural" que demanden la illegalización de les "corríes de toros" al tiempu que la retirada de los "toros d'Osborne" implantaos nel país.

La organización tamién asoleya un manifiestu na so web:
" ¿Fiesta? -> Non, ¡TORTURA! ¿"nacional"? -> Non, ¡ESPAÑOLISTA Y ACULTURIZANTE! Los toreros, col so circu mediáticu endolcáu en traxes tan ridículos como rellumantes, lleguen como tolos años al nuesu país. Demientres, los que sovencionen el circu de la vergoña con perres públiques, los provincianos que nos malgobiernen, llántennos nes nueses cais los sos cartelos de tufu ranciu y sádicu. Por muncho que los torturadores y la so corte de sádicos lo digan, nengún ser vivu naz pa ser maltratáu y martirizáu. Amás, tenemos que tragar y comulgar con qu'esto seya considerao un "arte" y un "bien cultural", en cuenta d'un exemplu cruel del pensamientu egocéntricu humanu. Tampoco podemos escaecer qu'a estos eventos de la crueldá asisten enforma de neños cuando nes lleis estatales ta específicamente prohibío la presencia de menores; daqué, qu'amás, amuesa la violencia d'estos "festexos". Yá enantes de salir a la plaza de tortures, el güe ye maltratáu y drogáu pa provocá-y un estáu d'ansiedá y nervios que-y xeneren una agresividá que torga les sos facultaes físiques y mentales, saliendo al sable desesperáu y malferíu. Nel mesmu "eventu" siguen faciéndose-y mancadures que-y producen un dolor insoportable y al mutilalu y sacalu de la plaza inda sigui vivu n'agonía. Y nun ye esti l'únicu animal que carez la barbarie de los asesinos. Al caballu tamién se lu obliga a "participar" al traviés de golpes y descargues llétriques nos xenitales pa combatir el "mieu" y l'estrés que-y xenera la "fiesta". Ésta, y non otra, ye la realidá d'un "festexu" pol que se lleguen a pagar hasta 500€ per persona, ensin cuntar colos precios astronómicos a los que puen llegar los abonos, cola permisividá institucional y organizativa pa coles "reventes" qu'ellos mesmos remanen. Pero ésti nun ye namás un actu de tortura animal, de sadismu organizáu, NON. Ye una más de les ferramientes al traviés de les cuales se fomenta la imposición cultural españolista a los pueblos del "reinu". Y Asturies, una nación na que'l maltratu animal, y al ganáu vacunu inda más, enxamás fueron permitíes, entendies nin fomentaes, carez la imposición d'unes tradiciones ayenes a esti país. N'Asturies siempre se dió'l llombu a esta triba de "festexos" qu'añu tres d'añu siguen metiéndonos pelos güeyos, como demuestra l'amplísimu dispositivu nos medios públicos asturianos (TPA) y el destín de cientos de miles d'€ públicos pa la "cellebración" d'estes corríes a les qu'acude tola "crème de la crème" de la clas dirixente "asturiana". Poro, dende Fai!, desiximos la inmediata abolición de les corríes de "toros", la tipificación de la tauromaquia como delitu nel códigu penal y la declaración institucional y plena d'Asturies como país llibre de toa mena de tortura animal y, por descontao, llibre en tolos xacíos. Amás, tamién aprovechamos pa espresar la nuesa vergoña énte'l caltenimientu de les 5 siluetes xigantes d'Osborne nel nuesu paisaxe: un "monumentu" a la tortura animal y al españolismu más ranciu protexíu poles lleis del "reinu d'España". ESTO YE ASTURIES: CADA VEGADA SOMOS MÁS NIN TORTURA ANIMAL NIN IMPOSICIÓN CULTURAL TOROS D'OSBORNE ¡FUERA! CORRÍES DE TOROS ¡ABOLICIÓN!"

martes, 11 de agosto de 2009

Darréu escontra la tortura en Xixón.


La organización de mocedá asoleya un comunicáu na so web y llama a manifestase esti sábadu 15 en Xixón na mani qu'entamo ANADEL, que saldrá a les 16:30 dende la Plaza de San Miguel.
El testu qu'escriben dende Darréu ye'l que vien siguíu:


"Ente la cellebración nesta selmana de delles corries de toros na plaza de toros de Xixón, dende la nuesa organización de mocedá queremos espresar lo siguiente:

- Qu’esti eventu nun ye namás qu’una tortura xabaz con fecha, llugar y hora. Un actu programáu nun cartelu onde se fai l’asesinatu d’un ser vivu, de forma sele y sangrina. Caltenemos qu’una corría toros solo-y pue prestar a una presona sádica, una presona que disfruta col sofrimientu d’otru ser vivu. Poro, dende Darréu refugamos dafechu les corries de toros pol so componente asesín. Un actu que ye una humillación, una tortura y una matanza en vivu al animal.

- Que parte’l dineru públicu va destináu a esta matanza al traviés de sovenciones, yá que l’ayuntamientu de Xixón, nesti casu, destina dineru a los setores taurínos n’Asturies que se convierten n’entraes de baldre. Gracies a estes entráes de baldre, los asesinos del traxe de lluces puen ver n’Asturies dalgo de públicu nes plazes del Bibio y Buenavista. Paezmos pergrave que cola fin de siguir xustificando n’Asturies esti actu salvaxe, les alministraciones de Xixón y Uviéu destinen fondos públicos a la tauromaquia. Paezmos grave qu’esti dineru seya de toxs y vaya a esti actu xabaz. Pero más grave sabiendo que’l 80 % de lxs asturianxs nun amuesen interés nengún poles corríes de toros y les refuguen.

- Caltenemos amás qu’esta “folixa” ye una cellebración impuesta n’Asturies, y nun ye otra cosa qu’una estratexa más del estáu español pa imponer el so españolismu oficial y tapecer asina los vezos culturales d’Asturies nesti casu. Sofitámonos, pa xustificar esti argumentu, en qu’enxamás la tauromaquia foi siguía n’Asturies, nin muncho menos foi nunca considerada dalgo llariego, sinon dalgo alloñáu de la identidá cultural asturiana.

Asina, dende Darréu queremos denunciar esti asesinatu sádicu que se produz esta selmana na Plaza’l Bibio de Xixón. Caltenemos que l’Asturies llibre pola que naguamos nun sedría llibre si dalgún ser vivu ye torturáu. Desiximos que nun vaya nin un euru más del dineru públicu pa les corríes de toros, yá qu’amás de dir dica un actu de tortura va destináu a un eventu que nun tien un res d’interes ente lxs ciudadanxs asturianxs. Refugamos tamién el factor aculturizador que n’Asturies tienen estos actos garráos pol españolismu más ranciu, talmente alloñáu de les costumes típiques del pais.Dende la mocedá independentista llamamos a la mocedá de Xixón y Asturies a manifestase el prósimu sábadu 15 d’agostu a les 16:30 hores escontra la tortura. Esti manifestamientu, entamáu por ANADEL saldrá de la Plaza de San Miguel de Xixón, toxs debemos tar ellí pa puxar polos drechos de tolos seres vivos.

¡NIN ARTE, NIN CULTURA! ¡NON MÁS SOVENCIONES PÚBLIQUES A LA TORTURA! ¡ XIXÓN ANTITAURÍN ! ¡ ASTURIES ANTITAURINA!"

sábado, 8 de agosto de 2009

L'autodetermín: ¿ Drechu civil o utopía ?


El drechu de llibre determín de los pueblos o drechu d'autodetermín ye'l drechu d'un pueblu a dicidir les sos formes propies de gobiernu, persiguir el so desendolque económicu, social ya cultural y encadarmáse llibremente, ensin inxerencies esternes y d'alcuerdu col entamu d'igualdá. El llibre determín ye un entamu cimeru de Derechu internacional públicu y un drechu inalienable de los pueblos, que xenera ubligaciones erga omnes[1] pa los Estaos. El Comité de Drechos Humanos punxo de manifiestu'l so cálter fundamental, al siñalar que ye un prerrequisitu afayadizu pa la plena efeutividá de los drechos humanos individuales.

El llibre determín ta recoyíu en dellos de los cartafueyos internacionales más importantes, como la Carta de les Naciones Xuníes o los Pautos Internacionales de Drechos Humanos. Tamién una bayura resoluciones de l'Asamblea Xeneral de Naciones Xuníes faen referencia a esti entamu y desendólquenlu; como, por exemplu, les resoluciones 1514 (XV), 1541 (XV) ó 2625 (XXV).

El conceutu de llibre determín ta estrechamente venceyáu al de pueblos, un términu polémicu y que mos ufre un únicu sinificáu. De magar 1960, la definición de los pueblos coloniales como suxetos del llibre determín supunxo un alitu esencial pa la descolonización y collaboró nuna auténtica universalización de la sociedá internacional. La conceición occidental considera tamién pueblu al conxuntu d'habitantes de un Estáu unitariamente consideráu, mentanto que delles minoríes nacionales o pueblos indíxenes dientro d'Estaos autodefinieronse como pueblos. Les sos vindicaciones amuesen un exemplu de la tensión ente'l drechu de llibre determín de los pueblos y la integridá territorial de los estaos.

¡AUTODETERMÍN P'ASTURIES! [* + ]

¡AUTODETERMÍN PA LOS PUEBLOS OPRIMÍOS! [ * ]

miércoles, 5 de agosto de 2009

Darréu va tar presente en Ribeseya na Fiesta les Piragües


Van poner el puestu de material ya informativu nes cais de Ribeseya. Nueves camisetes y el tercer númberu de la revista Irguite, les grandes novedaes.

Darréu va instalar nes cais de Ribeseya esti sábadu el puestu de material y información. Les moces y mozos que quieran pasar perellí podrán mercar camisetes, banderes d'Asturies, revistes, chapes y demás material independentista.

estrayíu de www.darreu.org

Fai tuvo nel Derrame Rock


Fai! tuvo nel Derrame Rock por segundu añu.
La organización d'esquierda soberanista volvió a acudir al festival de música en Pravia pa llevar alantre un puestín informativu y de material pel que pasaron cientos de persones a lo llargo de tol fin de selmana de los díes 9 y 10 de xunetu.

Fai! volvió a tar presente asina, nun espaciu privilexiáu, nuna cita qu'axuntó a munchos mozos y moces asturianos y asturianes y de países vecinos que punxeron interés en conocer campañes llingüístiques, soberanistes y les lluches que se tan desendolcando n'Asturies.

Fai! asoleyó un modelu nuevu de camiseta pa mozu y moza que pronto tará nel puestín de material y unes pegatines nueves coles qu'afondar nel espardimientu de la organización. Asina mesmo, Fai! punxo una hucha de resistencia pal movimientu okupa d'Asturies que vien medrando y consolidándose tres de la primer esperiencia de la ReFLEXón en Xixón.