El prósimu martes 23 d'avientu nos llocales de la CSI, na casa sindical de Xixón y de magar les 19:00 h. Sofitu va facer la presentación nacional del llibru "Amarraza 102 díes baxo la llei antiterrorista", escritu pol militante independentista Fer G.R.
Amarraza ye un percorríu bien detalláu de cómo ye la vida d'un acusáu de terrorismu nel Estáu Español. El trauma de la detención, l'angustia de los díes de comisaría, el destierru, la resignación del pasu pola Audiencia Nacional y la dureza de los díes de cárcele onde too se complica. Milenta vivencies personales descrites cuando con humor, cuando con dramatismu.
Fer, cunta de primera mano, en cuantes que testigu direutu, lo irracional del sistema carcelariu, y cómo planta-y cara dende'l compromisu políticu y la claridá d'idees. Pero la so narración nun para nuna descripción de fechos y llugares, ta escrita dende la rabia y l'odiu del momentu, lo que-y da un gran valir sentimental que va facer pescanciar muncho meyor tolo vivío por esti militante independentista asturianu.
La presentación tamién tendrá la so parte informativa na que Sofitu dará a conocer toles novedaes del casu y les movilizaciones que ta entamando pa refugar el xuiciu que Fer tendrá na Audiencia Nacional española'l prósimu 12 de xineru.
La primera d'estes movilizaciones sedrá'l mesmu día de la presentación, cuandu a les 18:30 h. hai entamada una concentración na mesma casa sindical.
SOLIDARIDÁ
