domingo, 1 de septiembre de 2013

Manifestación xunitaria pola soberanía y el cambiu social esti 8 setiembre en Xixón.

Esti 8 de setiembre cellebramos el día de la nación asturiana o un día de llucha pa reivindicar qu'Asturies tien que decidir el so futuru, faciendo exerciciu de la so soberanía al traviés de la participación ciudadana dende abaxo, pa lluchar pol necesariu cambéu social, que convierta la Política nun preséu al serviciu del 99% de les persones.

Asturies sufre dende va décades un desaniciu industrial que deriva nel estáu de crisis estructural nel que s’atopa’l nuesu país. Seutores industriales como la siderurxa, la minería, el naval, la pesca, l’agricultura o l’alimentación foron destruyíos, al calor de la denomada “reconversión industrial” empobinada polos poderes económicos capitalistes al traviés de ferramientes como el Reinu d’España o la Xunión Europea, convirtiéndonos en bona midida nuna mera colonia enerxética, quedando en Asturies  la contaminación y degradación del territoriu.

El casu más sangrín ye’l de la minería, tantu pública como privada que, nes caberes trés décades, pasó de tener más de 40 mil trabayadores a los 3.000 que malapenes tien anguaño. Ye tamién destacable la delictiva “xestión” institucional, empresarial y sindical del desaniciu de la minería y la so pretendida reconversión al traviés de los multimillonarios “Fondos Mineros”, que valieron pa la creación d’una rede clientelar de la que se sirvieron de mena especial el PSOE –como principal partíu gobernante n’Asturies y nes comarques mineres- y los sindicatos SOMA-UGT y CC.OO, amás d’empresarios como Victorino Alonso, cuyes práutiques delictives y d’esplotación llaboral son más que conocíes. Ensin escaecer que l'actual gobiernu español del PP, ta acelerando al máximu'l procesu de zarru de la minería, poniendo a Asturies nuna situación insostenible llaboral y economicamente.

Al sometimientu económicu hai qu’amestar la situación d’opresión nacional sufría por Asturies, que ve cómo dende les instituciones de gobiernu se marxina y reprime toa espresión cultural, llingüística, o de cualquier otru calter, que seya d’orixe asturianu. La non oficialidá de la llingua asturiana y la falta de drechos de los sos falantes, o les constantes agresiones al patrimoniu hestóricu, arquitectónicu, arqueolóxicu, etc, son fechos que venimos careciendo con toles formaciones polítiques que caltuvieron el poder n’Asturies, llámese PSOE, Foro, IU, PP, o la reciente complicidá gubernamental d’UPyD. Asina, l'ausencia de toes elles nel procesu xudicial del casu Marea, el mayor casu de corrupción de la política asturiana, ye una bona amuesa d'ello.

Lo que fai más necesariu que nunca establecer nuevos procesos constituyentes frente al fracasu históricu de la mal llamada Transición, y la puesta en cuestión del réximen surdiu del mesmu, al traviés de procesos dende abaxo y empobinaos a llograr la máxima participación nel mesmu, abandonando esi engañu que supón la representación política, el partidismu profesionalizáu, les élites gobernantes coles que non nos idintificamos y munchos menos nos representen, y apostando por formes de democracia directa.

Too esto nun ambiente de vuelta al centralismu más conservador, que fainos desapaecer, entá más, como entidá política autónoma, tarazando les nuestres escases víes d'autogobiernu y anulando l'autonomía de les nueses entidaes locales, y que busca esaniciar directamente figures tradicionales como la parroquia, tan enraigonaes en Asturies. Culpabilizar a l'autotonomía política de la crisis, convirtióse n'otru de los mandamientos que les élites polítiques y económiques españoles quieren facenos creyer.

Poro, la situación ye de crisis a tolos niveles, y nuna doble vertiente gubernamental: los retayos de servicios sociales, les agresiones ecolóxiques, la opresión llingüística y cultural, o la falta d’oportunidaes llaborales en condiciones dignes non sólo son responsabilidá de les instituciones asturianes y los sos actores políticos, sinon en gráu cimeru del gobiernu estatal, como principal impulsor de les sos rellaciones sucursalistes pa con Asturies.

La mocedá sufré de forma especial esta situación, con un paru n’Asturies namái homologable a nivel européu col griegu, y qu’obliga a miles de mozos y moces a emigrar cada añu fuera d’Asturies pa poder trabayar. Ante ello, namái atopamos la falta d’aición d’un gobiernu asturianu dependiente dafechu del español, qu’al mesmu tiempu ye un simple títere de poderes capitalistes supraestatales como la Xunión Europea, o’l FMI, cola perconocía “Troika”.

Ye por ello que les organizaciones convocantes consideramos necesario articular una rempuesta popular, que dende posiciones asturianes y tresformadores seya quién a dá-y la vuelta a la situación, ufriendo una alternativa al sistema económicu actual, a les cinco fuercies del arcu parllamentariu asturianu –que nun son más qu’un brazu más del aparatu institucional- y a les burocracies del sindicalismu mayoritariu, col so papel d’inmovilismu y desmovilización de la clase obrera.

Esti espaciu d’alderique y aición conxunta ye tamién necesariu pa plantegá-y a la sociedá asturiana la necesidá de superar un sistema económicu caducu a tolos niveles, escontra’l que non sólo hai qu’oponese, sinon tamién hai qu’ufrir una alternativa que mos garantice la xusticia social, y dea igua a la opresión nacional, de clase, de xénero o cualquier otru tipu de dominación.

jueves, 29 de agosto de 2013

Darréu escontra la intervención imperialista en Siria.

Dende la mocedá independentista y revolucionario queremos amosar el nuesu refugu a l’agresión imperialista que ta sufriendo Siria, dientro d’una situación de guerra civil promocionada y financiada dende va dos años poles potencies llideraes polos Estaos Xuníos.

Dende Darréu consideramos que’l casu Siriu ye ún más nel llargu hestorial d’invasiones y espoliu de países na rexón, y cuyes consecuencies son bien visibles nes esperiencies d’Afganistán, Irak, o Libia: caos, cientos de miles de muertes, o’l desaniciu cultural y patrimonial. Amás, en cuantes a drechos democráticos o bientar social, les intervenciones imperialistes suponen un fuerte pasu atrás, que namái tien un beneficiáu: el gran capital de les potencies imperialistes y los sos aliaos.

Nesi sentíu, queda bien claro que l’interés de les potencies capitalistes ye finar con ún de los enclaves antiimperialistes de la zona, nel qu’informes salíos de la propia OTAN amosen un sofitu popular mayoritariu al gobiernu llexítimu del país. Amás, pesie a tolos intentos de xustificar una invasión pol supuestu emplegu gubernamental d’armes químiques, lo cierto ye que, como yá pasó n’intervenciones militares anteriores, les pruebes apurríes a les Naciones Xuníes son nules.

Tamién queremos denunciar, en clave estatal, una nueva amuesa del calter imperialista del estáu español, siempres somorguiáu a los intereses del capitalismu internacional, asina como de la necesidá d’acabar con elli pa la emancipación social y nacional de los pueblos que lu conformen.

Ye tamién destacable’l papel hipócrita del PSOE, que yá amosó públicamente’l so enfotu d’invadir Siria incluso ensin permisu de les Naciones Xuníes. La so aición cómpliz n’otres intervenciones como Afganistán o Libia amosa la hipocresía d’esta formación política cuando’l “Non a la guerra” d’Irak, asina como la so fusión dafechu col PP no que denomen “asuntos d’estáu”, faciendo asina’l xuegu a los poderes económicos estatales escontra la clase obrera .

Poro, dende Darréu afitamos la nuesa posición antiimperialista, contraria a la intervención militar, y señalamos una vez más al estáu español como una de les ferramientes imperialistes que ye imprescindible valtiar pa consiguir la emancipación social y nacional de los pueblos.

info@darreu.org

martes, 27 de agosto de 2013

Darréu refuga la ordenanza "cívica" de Moriyón, l'ataque a la identidá de nueso y el Réxime Policial impuesto en Xixón.


La organización de mocedá soberanista y revolucionario Darréu quier denunciar públicamente l'estáu policial en que Carmen Moriyón convirtió la ciudá de Xixón esti pasáu fin de selmana. L'Ayuntamientu xustifica el Réxime Policial col únicu argumentu de querer cumplir cola llexislación "antibotellón", dientru de la nueva ordenanza cívica, una ordenanza retrógrada, autoritaria y que'l propiu Ayuntamientu viola cuando-y convién, siendo exemplu'l fechu d'entamar la Feria Taurina de Begoña, onde se maltraten y torturen animales.

La nueva ofensiva contra'l botellón amás nun dexa fuera a la sidra, prohibiéndose escanciar sidra nes cais de la mayor ciudá'l país. Yá foron decenes de persones les multaes por echar un culín de sidra énte un chigre. Por supuestu, como nun puede ser d'otra manera, la ordenanza y la política españolista de Moriyón atenta contra la identidá asturiana y les nueses costumes.

Esta ofensiva contra lo ociu xuvenil, escaez por completu la educación responsable pa col alcohol y nun fai esceición cola sidra. La única rempuesta qu'ufre la facista Moriyón ye la represión policial y les multes indiscriminaes, amosando asina'l so calter autoritariu y nada dialogante. Hai alternatives que nun vaigan escontra l'ociu xuvenil, los vecinos de les zones de folixa o la identidá asturiana pero Foro en Xixón nun quier saber d'ello. Prefieren ordenar y mandar y ser los únicos qu'inoren ya imcumplen les sos lleis.

¡Pola nuesa identidá! ¡Pol respetu al ociu xuvenil!

¡NON A LA ORDENANZA FACISTA DE MORIYÓN! ¡FORO ANTIASTURIANOS!

info@darreu.org

viernes, 23 de agosto de 2013

Darréu pide dignificar la memoria'l Conseyu Soberanu d'Asturies y Lleón.

El 24 d'agostu de 1937, en plena Guerra Civil, les fuercies antifacistes y
progresistes d'Asturies roblen la declaración de soberanía del Conseyu
d'Asturies y Lleón, pasando tol territoriu a ser soberanu y siendo
encabezáu por Belarmino Tomás, presidente y conseyeru de guerra. El
Conseyu Soberanu tomó midíes de control n'aduanes y fronteres, caltuvo la
emisión de moneda y sellos propios y entamó un sistema xudicial non
dependiente del Gobiernu Español.

La sede del Conseyu Soberanu d'Asturies y Lleón, na conocía como Casa
Blanca de la Plaza'l Parchés de Xixón, tuvo hasta'l final de la guerra
n'Asturies muncho movimientu. Nacionalizáronse los medios de produción al
serviciu la llucha antifacista y desendolcose un procesu revolucionario
hasta que'l Pueblu Asturianu pudo resistir la sangrina guerra coles tropes
facistes y los sos alliaos nazis. El presidente Belarmino Tomás llegó a
pidir l'ingresu del Conseyu Soberanu na Sociedá de Naciones, muérganu
precursor de la ONU.

Güei, 76 años depués, los partíos españoles que participaron nesi procesu
traten de tapecer al Conseyu Soberanu y nun hai nengún reconocimientu
oficial dende'l Principáu pa con esti episodiu hestóricu d'Asturies. Dende
Darréu atalantamos qu'estos partíos quieren tapecer esta hestoria non solo
por qu'atenta contra la so ideoloxía españolista y centraliega. Tamién
desplícase esti escaezu consciente por qu'entienden que les decisiones
económiques tomaes pol Conseyu, como por exemplu facer de toos y toes los
medios de produción, son contraries a la so ideoloxía reformista y
favoratible a los privilexos de clas.

Dende la mocedá soberanista y revolucionario nun podemos faer otra cosa
qu'honrar la memoria'l Conseyu Soberanu y dignificar el valiente pasu que
tomó tol Pueblu Asturianu faciendo d'esti Conseyu Soberanu un proyeutu
común na llucha xunitaria contra'l capitalismu más xabaz, el facismu.
Tenemos de puxar pola nuesa hestoria común y facer alcordanza d'unos
fechos tan importantes, tomando exemplu y caminando xuntos/es haza una
nueva Asturies, como la del Conseyu, que s'empobine haza la so soberanía
nacional y el socialismu.

¡Asturies nun escaez! ¡Puxa'l Conseyu Soberanu! ¡Puxa Asturies llibre y
socialista!

info@darreu.org

miércoles, 14 de agosto de 2013

Darréu pide la dimisión de Carlos Rubiera y Carmen Moriyón.

Dende la organización de mocedá soberanista y socialista Darréu vémonos obligaos a denunciar públicamente un atropellu a la ética y la nuesa cultura lleváu a cabo pol Conceyu de Xixón, col so gobiernu de Foro Asturias. Esti pasáu 13 d'agostu el Conceyu entamó unes xornaes pa neños y neñes, financiaes con perres públiques, col envís d'averar a estos a la tauromaquia y entrenalos nesta práutica foriata y sangrina.

Pocu más qu'una dolcena de neños y neñes tuvieron prauticando toreando, asimilando esta tortura animal como daqué normal y propiu de la so cultura. Asina, el conceyal de cultura de Xixón, Carlos Rubiera, y l'alcaldesa Moriyón, traten d'averar l'afición taurina a los más pequeños, a golpe d'imposición, adoctrinamientu y fondos públicos. Creemos que busquen puxar por una cultura taurina que n'Asturies nun esiste realmente y pa ello van a tratar d'adoctrinar a los nuesos guah.es con clases de toréu. Vergoñosu.

Miles d'euros públicos foron empobinaos pa esta actividá, mentantu recorten nesti importante conceyu en servicios públicos básicos pa que cualesquier persona de Xixón puea vivir una vida digna. Dende Darréu camentamos qu'una vegada más dende Foro en Xixón atropellen la ética, la nuesa cultura y les normes más básiques de la llóxica política y económica. Na situación d'anguaño pretenden aculturizar a los nuesos pequeñes en cuenta d'ayudar a les persones con mayor necesidá de la ciudá y demientres prohiben tomar sidra na cai fomenten a talonariu públicu esta cultura tan remanada pol españolismu ideolóxicu.

Asina, dende Darréu pidimos la dimisión de l'alcaldesa de Xixón Carmen Moriyón y del conceyal de cultura Carlos Rubiera. Tamos fartos y fartes d'aguantar nel nuesu país y los nuesos conceyos a facistes, corruptos, sangrinos taurinos y españolistes ensín nengún tipu d'ética, reparos y decencia.

¡Nin tortura animal, nin imposición cultural!

¡Moriyón y Rubiera dimisión! ¡Facistes y corruptos! 

¡La mocedá pola so cultura y una sociedá que respete los animales!

lunes, 5 de agosto de 2013

La intolerable actitú de despreciu de Duro Felguera con Llangréu.

Nes últimes selmanes y meses, Duro Felguera ta poniendo en práutica una política agresiva que lleva al desmantelamientu de la empresa felguerina del nuesu conceyu, anque paez ser que munchos axentes coleutivos del conceyu y d'Asturies inoren la situación por completu. L'anuncia de Duro Felguera d'abandonar Llangréu d'una forma progresiva yá ye un fechu, destinando plantiya que trabaya nel conceyu a otres poblaciones o despidiendo a trabayadores críticos cola política de la empresa y l'actitú pasiva y collaboracionista de ciertos seutores sindicales, claudicantes énte l'abandonu, más que posible, de la empresa llangreana del nuesu conceyu.


Dende Conceyu Abiertu por Llangréu creemos que debemos manifestanos una vegada más nesti sen y amosar públicamente la nuesa indignación. Creemos que ye intolerable que Duro Felguera quiera abandonar Llangréu depués de tantísimes décades d'esplotar los recursos humanos y naturales del Conceyu de Llangréu. Munches xeneraciones de llangreanos entregaron a esta empresa, que ñació en La Felguera, años de dedicación, los meyores años de la so vida. La clas trabayadora llangreana fizo que güei Duro Felguera seya una multinacional de gran poder económicu, el mugor de los nuesos paisanos foi quien encumbró a la empresa a un llugar cimeru. Agora, DF toma'l determín d'abandonar Lllangréu cuando-y debe tanto a esti conceyu.


Les persones que participamos na iniciativa Conceyu Abiertu por Llangréu pidimos la readmisión del trabayador despedíu nel Taller de Barros de DF darréu. Caltenemos qu'esti despidu respuende a una dinámica de lliquidación de los seutores críticos qu'hai dientru la empresa trabayando. Lo que quieren los xefes de Duro Felguera ye eliminar les voces crítiques y facer más cenciellu'l camín del desmantelamientu de los sos talleres en Llangréu y n'Asturies. Esta política miserable y déspota tien un fiel cómpliz nel Ayuntamientu de Llangréu, que nun diz nada sobre la situación y el desafíu empobináu por DF a la vecindá de Llangréu. Dende Conceyu Abiertu por Llangréu llamamos a los habitantes de Llangréu a planta-y cara a Duro Felguera na so intención de desmantelar la industria en Llangréu y llamamos a toles asociaciones del conceyu a pidir responsabilidá a la empresa col conceyu que la vio ñacer.


¡Non al desmantelamientu de Duro Felguera en Llangréu!


¡Despedíu de DF Barros readmisión!

viernes, 26 de julio de 2013

Darréu con Cuba Socialista nesti 26 de xunetu.


La organización de mocedá soberanista y revolucionario Darréu quier tresmitir la so solidaridá pa col Pueblu Cubanu otru 26 de xunetu, día nel que nel añu 1953 un garrapiellu de mozos, encabezaos por Fidel Castro, asalten el Cuartel Moncada contra la Dictadura de Batista.

Dende Darréu queremos unviar un fuerte abrazu internacionalista a Cuba y la so Revolución. Puxamos pola idega de caltener y avanzar nel procesu socialista cubanu y siguir construyendo dignidá, llibertá ya igualdá na islla caribeña. Tamién animamos a tol Pueblu Cubanu a siguir construyendo internacionalismu y solidaridá colos pueblos oprimíos.

Per otru llau, queremos desixir la fin del bloquéu económicu impuestu a Cuba. Un bloquéu criminal impuestu pol imperialismu que tórga-y a Cuba la normalización de les relaciones económiques y polítiques col restu de países y estaos del mundu, tratando asina d'afogar el modelu económicu socialista, dalgo qu'entá nun consiguieron y que día tres día sigue presentando llogros sociales, económicos, científicos o culturales.

Tamién pidimos dende Darréu la lliberación de los cincos patriotes cubanos encarcelaos polos Estáos Xuníos por lluchar contra'l terrorismu imperialista orquestáu poles altes instancies del gobiernu d'EEXX y los sos servicios d'intelixencia. Xabazmente reprimíos y enzarraos estos patriotes lleven yá muncho años na cárcele pol simple fechu de protexer la integridá de los sos compatriotes.

La solidaridá ye la tenrura de los pueblos dixo'l Che Guevara. Dende la mocedá soberanista y revolucionario asturiano creemos qu'asina tien de ser. Na Revolución Cubana atopamos munches asemeyances col camín que tien d'entamar el Pueblu Asturianu: algamar la so soberanía nacional, lliberase nacional y socialmente y entamar la construción del socialismu nel nuesu Estáu propiu pa ser braeramente llibres. Pola soberanía y la llibertá de tolos pueblos oprimíos la mocedá asturiano ta con Cuba Socialista.

¡Puxa la Revolución Cubana! ¡Puxa l'internacionalismu!

Conceyu Abiertu por Xixón refuga'l Festival Aéreu

La organización xixonesa refuga esti actu pol so importante gastu, amás de pola so apoloxía belicista.

"Otru añu más los xixoneses nos atopamos con esi despilfarru llamau “festival aéreu”, una acción propagandística del exércitu español amazcaritada d’espectaculu pa tolos públicos. Nun hai d’escaezer qu’anguañu el principal pesu de les masacres perpetraes polos exércitos occidentales provienen d’estes “atracciones turístiques”.
Aparte del conceutu ideolóxicu, na situación de crisis de los servicios sociales que carez la nuesa ciudá nun nos paez afayadizo caltener festivales que necesiten d’una inversión municipal tan importante, y tan pocos réditos xenera, un solu dia de branu na fastera costera nun fin de selmana…o sea la zona y el momentu más concurríu de Xixón ensín necesidá de denguna clase d’actu belicista.
Pero esti añu ye entá mas feriente, nos carteles colos qu’enllenaron les marquesines podemos ver aviones qu’inequívocamente pertenecen a exércitu golpista de Franco y un bombarderu aleman. Amosando nidiamente que nun tamos ante un espectáculu inocente, sinon una nídia glorificación a dos exércitos que bombardearon cruelmente a la población civil de la nuesa ciudá y el nuesu pais, amás de la de dellos paises europeos.
Por too ello dende Conceyu Abiertu por Xixón refugamos esta clase de exhibiciones militaristes y pa nada inocentes y encamentamos al Ayuntamientu de Xixón que dexe de marafundiar perres n’actos qu’avergoñen l’espiritu y el nome de la nuesa ciudá."
Conceyu Abiertu por Xixón.

jueves, 11 de julio de 2013

Darréu énte la pergrave situación de los astilleros asturianos.


La viabilidá de los pocos astilleros asturianos que queden amenazada nuevamente polos intereses del capital, instrumentalizaos na Xunión Europea.

Vemos como la gran Europa del Capital que mos vendieron yera namái eso, un instrumentu de dominación social y económica qu'inventaron los grandes amos monetarios d'Europa. L'Estáu Español, por supuestu, ye lo mesmu y siempres defenderá los intereses del capital europeu y español, enxamás los porgüeyos de los pueblos y los trabayadores.

Asina, podemos sacar como conclusión que ye'l momentu de que la mocedá asturiano defenda los drechos coleutivos que-y correspuende y defenda'l so futuru. La llucha pola soberanía política y económica d'Asturies ye garante de tresformación social y nacional y de tener una económica y un seutor productivu potente y xustu.

Con soberanía nacional Asturies podría escoyer el so marcu económicu democraticamente y poder tener una economía al serviciu de los intereses del Pueblu Trabayador Asturianu. Javierín Fdez, por supuestu, ta faciendo'l paripé diciendo defender los nuesos astilleros, pues él y el so partíu son responsables direutos del desmantelamientu de la naval asturiana.

¡ASTILLEROS SOLUCIÓN!
¡NIN UE, NIN ESPAÑA! ¡NON MÁS IMPOSICIONES DEL CAPITAL!
¡SOBERANÍA POLÍTICA Y ECONÓMICA P'ASTURIES!

Darréu - Mocedá Independentista Revolucionario.

lunes, 8 de julio de 2013

Conceyu Abiertu por Llangréu denuncia públicamente corrupción en gobiernu y policía llocal.

Ye un secretu a voces, pa tola xente de Llangréu, lo qu'asocede dientru de la Policía Llocal de Llangréu y polo que asocede. Irregularidaes y corrupción que yá fueron denunciaes pol sindicatu USIPA, por exemplu. El gobiernu llocal de Llangréu sigue, güei, calteniemdo los puestos nomaos a deu y sigue pagando sobresueldos illegales. Los servicios xurídicos del Conceyu de Llangréu reconocen dos fechos importantes, la illegalidá del organigrama de la Policía, con nomamientos a deu, ensín seleición nos mandos y la vulneración de la Llei de Presupuestos. Los sobresueldos añales superen los 300.000 euros.

Dende Conceyu Abiertu por Llangréu esiximos qu'estos fechos corruptos acaben d'una vegada y pidimos resposabilidaes polítiques y policiales. Altos cargos de la Policía Llocal y alcaldía tienen de salir a dar desplicaciones públiques y anunciar la so dimisión darréu. Tienen de dimitir por que tan faciendo corrupción de primera y ainda saliendo'l casu a la lluz nun aparen les irregularidaes y siguen col mayor despotismu del mundu, ensín da-y desplicaciones a los vecinos del conceyu.

Pa Conceyu Abiertu por Llangréu esta inñegable corrupción y esti despotismu espeyen perbien el nivel de democracia nulu que vive'l Conceyu de Llangréu. La gravedá d'esti asuntu nun afeuta a los caradures que gobiernen col “ordeno y mando” el nuesu conceyu. Ye una vergoña tener a esta xente nel poder y creemos que la xente de Llangréu tien de rebelase contra esta mafia clientelista, corrupta y déspota.¡Yá ta bien!


¡Democracia pa Llangréu! ¡Valió de corrupción y despotismu!

Fonte: www.conceyuabiertu.org

lunes, 1 de julio de 2013

La braera cara NEONAZI de Respuesta Estudiantil

Asina dexaron los mozos de Respuesta Estudiantil la puerte d'un institutu públicu del Conceyu de Llangréu. Esti ye'l grupúsculu de supuestos estudiantes que ñega sistemáticamente la so vinculación col facismu y el neonazismu pero día a día nun apara d'amosar lo contrariu. Empleguen un símbolu hestóricu del facismu europeu, los sos afiliaos pertenecen a grupos neonazis y ultres d'Asturies y son bien conocíos por prevocar agresiones a militantes d'izquierda y otres persones. 
El so españolismu nun dexa tampocu llugar a duldes, españolismu qu'a vegaes inclusu intenten amestar con un "asturianismu folclórizáu" dafechu. Eso si, amuesen día a dia nun tener muncha idega de lo que falen, en toles estayes. 

¡ASTURIES ANTIFACISTA SIEMPRES!

Xornaes antifacistes esti sábadu

XORNAES ANTIFACISTES

SÁBADU 6 DE XUNETU. CASA SINDICAL DE XIXÓN (Cai Sanz. Crespo 3, baxu). ASTURIES.

13:00 Proyeición del documental "Antifa. Cazaores de nazis"

14:00 Xinta popular.

16:00 Presentación protocolo: Qué facer énte una agresión facista ya en casu detención.

17:00 Proyeición del documental "Fighting talk"

17:30 Homenaxe a Clement Meric (Mural graffiti antifacista a cargu d'O'Celt.

19:30 Folixa antifacista a cargu de DJ Ciareslautern ya DJ Kosher.

viernes, 21 de junio de 2013

¡A por too! ¡Contra la represión y pol trabayu! ¡Con ADEPAVAN!


Refuguen la presencia de la lexón nes fiestes de San Pedro

Dende Conceyu Abiertu por Llangréu refuguen dafechu la presencia d'elementos militares nesta fiesta. 
 
Dende Conceyu Abiertu por Llangréu treslladen que "tolos años, coincidiendo coles fiestes felguerines de San Pedro, el día'l santu ésti ye paseáu peles cais de La Felguera, énte los vecinos y vecines de la villa llangreana. Cuando falamos de San Pedro falamos d'unes de les fiestes más populares del Valle'l Nalón, onde munches persones s'averen al nuesu conceyu a esfrutar d'un bon ambiente festivu. Como costume nos caberos años, son lexonarios los que paseen al santu dende la ilesia a dellos puntos de La Felguera".

Camienten dende la plataforma conceyil que "les fiestes han de ser de tolos vecinos de La Felguera y Llangréu y pa ello les mesmes tienen de tener un fondu calter popular. Poro, entendemos que la presencia d'elementos militares, nesti casu, de la Lexón Española, quiciabes sobra na festividá, yá que munches persones nesti conceyu nun s'identifiquen colos valores qu'esta institución representa, y a xulgar pola hestoria d'esti conceyu y d'Asturies nun creemos que seyan poques persones nesti casu".

Pa finar, afiten que "esta institución efeutuó n'otros tiempos na nuestra tierra aiciones represives y xenocides nada honorables nin exemplares, polo qu'entendemos que ye normal que bona parte de la xente de Llangréu nun s'identifique cola presencia de lexonarios nes fiestes de San Pedro. Como alternativa podríen pasear al santu felguerín vecinos de la villa que tean enfotu n'ello.".

Fonte: Infoasturies.net 

lunes, 17 de junio de 2013

Conceyu Abiertu por Llangréu solidarízase con ADEPAVAN no que consideren "un nuevu atropellu a la llibertá d'espresión"

Delegación de Gobiernu refugó una solicitú de l'asamblea de paraos y paraes nel Valle'l Nalón ADEPAVAN pa facer una manifestación el prósimu 29 de xunu con motivu de la festividá de San Pedro.
Al paecer, el conflictu vien por "la ñegativa de Delegación de Gobiernu de conceder permisu pa la cellebración d'esta movilización polos drechos básicos, l'emplegu y un futuru dignu pa los nuesos pueblos bien motivada d'un informe de la conceyalía de seguridá ciudadana del Ayuntamientu de Llangréu, que diz que nun se puede permitir la manifestación por coincidir coles fiestes patronales. Recordar qu'esta manifestación saldría de la Plaza de la Casa Conceyu de Sama y diría hasta La Felguera".
Por esti motivu dende CA por Llangréu denuncien "la constante actitú represiva del gobiernu llocal de Llangréu, qu'algamó nada más y nada menos que prohibir una manifestación polos drechos básicos de les persones convocada por un coleutivu de paraos tan popular como ye ADEPAVAN nel Valle'l Nalón. Ye sorrealista que tando como tan les coses la xente nun pueda protestar cuando pasa necesidá, sofre represión o ve retayaos los sos drechos y llibertaes más básico".
Nesi sen, dende la plataforma conceyil nun dubien en manifestar "el comportamientu l'Ayuntamientu de Llangréu como de FACISMU. Facismu modernu, tratando de tapecer la pergrave situación sociollaboral y predemocrática que vivimos en Llangréu con unes fiestes patronales, lo que tola vida nomose “pan y circu”. Creemos que dende'l gobiernu llocal quieren vender una imaxe idílica del conceyu nestes fiestes y si surden iniciatives de protesta prohibiles direutamente. Ye vergoñosu que la xente ande pasando fame y necesidaes y ellos dedíquense a reprimir sistemáticamente a quien quiera visibilizar los problemes sociales que tenemos en Llangréu. Esti facismu que gobierna en Llangréu tien amás el valor de llamase “socialista” y tamién “obreru”, con unes siegles bien conocíes: PSOE".
Pa finar, dende Conceyu Abiertu por Llangréu afiten que "por pura lóxica, ética y sentir democráticu pidimos a la xente de Llangréu que se solidarice col coleutivu ADEPAVAN. Yá ta bien d'aguantar atropellos a los nuesos drechos y llibertaes en Llangréu, tamos fartos de la represión d'estos corruptos y déspotes qu'especulen col nuesu futuru y les perres de toos, ganaes pol mugor del Pueblu Trabayador de Llangréu".

Fonte: Infoasturies.net

viernes, 14 de junio de 2013

El nuesu finxu cimeru.


Pa poder vivir como somos, en paz, con llibertá y cola xusticia como principiu cimeru del nuesu alborecer.

Conceyu Abiertu por Llangréu reclama al Ayuntamientu un nuevu conveniu coleutivu dignu y xustu

L’actual, qu’afecta a 420 trabayadores, fina’l 7 de xunetu

 Conceyu Abiertu denuncia que'l conveniu colectivu actual lleva prorrogáu dende l'añu 2011 y que'l próximu día 7 de xunetu remata, cola perda de drechos básicos algamaos polos trabayadores. Por ello el trabayadores municipales del Conceyu de Llangréu lleven movilizándose pa presionar al gobiernu local y aprobar un nuevu conveniu colectivu. 

Conceyu Abiertu denuncia que'l gobiernu local incumplió sistemáticamente col calendariu de negociaciones pa solucionar el problema, mientres los sindicatos USO, Sipla y CCOO presentaron en xineru propuestes, y l’Ayuntamientu ignorólos sistemáticamente ensin dar rempuesta nin propuesta. 

Dende Conceyu Abiertu saluden la llucha y les movilizaciones de los trabayadores municipales y piden al gobiernu de María Fernández, alcaldesa de Llangreu, que seya responsable y xusta y llegue a un alcuerdu rápidu nesta materia colos trabayadores, algamando que tengan un conveniu onde se recueyan los sos derechos, ensin arrenunciar a los alcuerdos algamaos en materia de personal, prestación económica y social.

Fonte: Queyeho.com
 

jueves, 6 de junio de 2013

XXV Conciertu pola Oficialidá


Los trabayadores de HP siguen alantre cola fuelga indefinida

Los trabayadores de Hewlett Packard axunten cuatro xornaes de fuelga, con un sofitu masivu de los trabayadores. 
 
Los trabayadores de la empresa informática HP siguen alantre cola so fuelga indefinida, entamada'l pasáu llunes col sofitu de los cuatro sindicatos representativos -CSI, CGT, CCOO, UGT-. La rempuesta de los trabayadores continúa siendo exemplar, con un seguimientu masivu en tolos centros de trabayu de la empresa nel estáu español.

Ún d'esos centros ye l'uvieín, onde, igual que nel restu de centros de trabayu, hebo esti xueves asamblea pa informar a los trabayadores sobre les negociaciones que se tán desendolcando en Madrid, con una serie de vindicaciones clares ya irrenunciables de los trabayadores: non más despidos nin precariedá, menos privilexos pa los direutivos, y un compromisu escontra la deslocalización de les instalaciones de HP.

Fonte: Infoasturies.net